| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၃. တတိယဝဂ္ဂော
3. Tatiyavaggo
၁. သမ္ဗဟုလသုတ္တဝဏ္ဏနာ
1. Sambahulasuttavaṇṇanā
၁၅၇. ဇဋာစုမ္ဗဋကေနာတိ သီသေ ပဋိမုက္ကေန ဇဋာကလာပေန။ အပရိဂ္ဂဟဗ္ရာဟ္မဏပဗ္ဗဇိတာ ဟိ ဇဋာယ ဥဉ္ဆာစရိယံ စရန္တိ။ ဥဒုမ္ဗရဒဏ္ဍဉ္ဟိ အတ္တဂုတ္တတ္ထာယ ဂဟိတံ တေသံ အပ္ပိစ္ဆဘာဝပ္ပကာသနံ။ တေနာဟ ‘‘အပ္ပိစ္ဆဘာဝပ္ပကာသနတ္ထ’’န္တိ။ သီသံ ဩကမ္ပေတ္ဝာတိ ဧတ္ထ အတိဝိယ သီသသ္သ ဩကမ္ပိတဘာဝံ ဒသ္သေတုံ ‘‘ဟနုကေန ဥရံ ပဟရန္တော အဓောနတံ ကတ္ဝာ’’တိ ဝုတ္တံ။ ဇိဝ္ဟံ နီဟရိတ္ဝာတိ လမ္ဗနစာလနဝသေန မုခတော နိက္ခာမေတ္ဝာ။ တေနာဟ ‘‘ဥဒ္ဓ’’န္တိအာဒိ။ တိသာခန္တိ တိဘင္ဂဘကုဋိ ဝိယ နလာဋေ ဇာတတ္တာ နလာဋိကံ။ တေနာဟ ‘‘နလာဋေ ဥဋ္ဌိတံ ဝလိတ္တယ’’န္တိ, တိဘင္ဂဝလိကံ နလာဋေ ကတ္ဝာတိ အတ္ထော။ အတ္တနောဝ တေလေတိ အတ္တနောဝ ပာပကမ္မနိဗ္ဗတ္တကေ တေလေ, ပစိတဗ္ဗဋ္ဌာနဂေဟေတိ အဓိပ္ပာယော။
157.Jaṭācumbaṭakenāti sīse paṭimukkena jaṭākalāpena. Apariggahabrāhmaṇapabbajitā hi jaṭāya uñchācariyaṃ caranti. Udumbaradaṇḍañhi attaguttatthāya gahitaṃ tesaṃ appicchabhāvappakāsanaṃ. Tenāha ‘‘appicchabhāvappakāsanattha’’nti. Sīsaṃ okampetvāti ettha ativiya sīsassa okampitabhāvaṃ dassetuṃ ‘‘hanukena uraṃ paharanto adhonataṃ katvā’’ti vuttaṃ. Jivhaṃ nīharitvāti lambanacālanavasena mukhato nikkhāmetvā. Tenāha ‘‘uddha’’ntiādi. Tisākhanti tibhaṅgabhakuṭi viya nalāṭe jātattā nalāṭikaṃ. Tenāha ‘‘nalāṭe uṭṭhitaṃ valittaya’’nti, tibhaṅgavalikaṃ nalāṭe katvāti attho. Attanova teleti attanova pāpakammanibbattake tele, pacitabbaṭṭhānageheti adhippāyo.
သမ္ဗဟုလသုတ္တဝဏ္ဏနာ နိဋ္ဌိတာ။
Sambahulasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁. သမ္ဗဟုလသုတ္တံ • 1. Sambahulasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁. သမ္ဗဟုလသုတ္တဝဏ္ဏနာ • 1. Sambahulasuttavaṇṇanā
