| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) |
༥. སཱམཉྙཝགྒོ
5. Sāmaññavaggo
༡. སམྦཱདྷསུཏྟཝཎྞནཱ
1. Sambādhasuttavaṇṇanā
༤༢. པཉྩམསྶ པཋམེ ཨུདཱཡཱིཏི ཀཱལུ༹དཱཡིཏྠེརོ། ཨཝིདྭཱཏི ཨཉྙཱསི། བྷཱུརིམེདྷསོཏི མཧཱཔཉྙོ། ཡོ ཛྷཱནམབུཛ྄ཛྷཱིཏི ཡོ ཛྷཱནཾ ཨབུཛ྄ཛྷི། པཊིལཱིནནིསབྷོཏི ཨེཀཱིབྷཱཝཝསེན པཊིལཱིནོ ཙེཝ ཨུཏྟམཊྛེན ཙ ནིསབྷོ། མུནཱིཏི བུདྡྷམུནི། པརིཡཱཡེནཱཏི ཨེཀེན ཀཱརཎེན། ཀཱམསམྦཱདྷསྶ ཧི ཨབྷཱཝམཏྟེནེཝ པཋམཛ྄ཛྷཱནཾ ཨོཀཱསཱདྷིགམོ ནཱམ, ན སབྦཐཱ སབྦཾ། ཏཏྲཱཔཏྠི སམྦཱདྷོཏི ཏསྨིམྤི པཋམཛ྄ཛྷཱནེ སམྦཱདྷོ པཊིཔཱིལ༹ནཾ ཨཏྠིཡེཝ། ཏཏྲཱཔིཏྠཱིཏིཔི པཱཋོ། ཀིཉྩ ཏཏྠ སམྦཱདྷོཏི ཏསྨིཾ པན ཛྷཱནེ ཀིཾ སམྦཱདྷོ ནཱམ། ཨཡམེཏྠ སམྦཱདྷོཏི ཨཡཾ ཝིཏཀྐཝིཙཱརཱནཾ ཨནིརུདྡྷབྷཱཝོ སམྦཱདྷོ སཾཔཱིལཱ༹ ནཱམ། ཨིམིནཱ ཨུཔཱཡེན སབྦཝཱརེསུ ཨཏྠོ ཝེདིཏབྦོ། ནིཔྤརིཡཱཡེནཱཏི ན ཨེཀེན ཀཱརཎེན, ཨཐ ཁོ ཨཱསཝཀྑཡོ ནཱམ སབྦསམྦཱདྷཱནཾ པཧཱིནཏྟཱ སབྦེན སབྦཾ ཨོཀཱསཱདྷིགམོ ནཱམཱཏི།
42. Pañcamassa paṭhame udāyīti kāḷudāyitthero. Avidvāti aññāsi. Bhūrimedhasoti mahāpañño. Yo jhānamabujjhīti yo jhānaṃ abujjhi. Paṭilīnanisabhoti ekībhāvavasena paṭilīno ceva uttamaṭṭhena ca nisabho. Munīti buddhamuni. Pariyāyenāti ekena kāraṇena. Kāmasambādhassa hi abhāvamatteneva paṭhamajjhānaṃ okāsādhigamo nāma, na sabbathā sabbaṃ. Tatrāpatthi sambādhoti tasmimpi paṭhamajjhāne sambādho paṭipīḷanaṃ atthiyeva. Tatrāpitthītipi pāṭho. Kiñca tattha sambādhoti tasmiṃ pana jhāne kiṃ sambādho nāma. Ayamettha sambādhoti ayaṃ vitakkavicārānaṃ aniruddhabhāvo sambādho saṃpīḷā nāma. Iminā upāyena sabbavāresu attho veditabbo. Nippariyāyenāti na ekena kāraṇena, atha kho āsavakkhayo nāma sabbasambādhānaṃ pahīnattā sabbena sabbaṃ okāsādhigamo nāmāti.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༡. སམྦཱདྷསུཏྟཾ • 1. Sambādhasuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡-༡༠. སམྦཱདྷསུཏྟཱདིཝཎྞནཱ • 1-10. Sambādhasuttādivaṇṇanā
