| Library / Tipiṭaka / តិបិដក • Tipiṭaka / នេត្តិប្បករណបាឡិ • Nettippakaraṇapāḷi |
១៦. សមារោបនហារសម្បាតោ
16. Samāropanahārasampāto
៧៨. តត្ថ កតមោ សមារោបនោ ហារសម្បាតោ?
78. Tattha katamo samāropano hārasampāto?
‘‘តស្មា រក្ខិតចិត្តស្ស, សម្មាសង្កប្បគោចរោ;
‘‘Tasmā rakkhitacittassa, sammāsaṅkappagocaro;
សម្មាទិដ្ឋិបុរេក្ខារោ, ញត្វាន ឧទយព្ពយំ;
Sammādiṭṭhipurekkhāro, ñatvāna udayabbayaṃ;
ថិនមិទ្ធាភិភូ ភិក្ខុ, សព្ពា ទុគ្គតិយោ ជហេ’’តិ។
Thinamiddhābhibhū bhikkhu, sabbā duggatiyo jahe’’ti.
តស្មា រក្ខិតចិត្តស្សាតិ តិណ្ណំ សុចរិតានំ បទដ្ឋានំ, ចិត្តេ រក្ខិតេ តំ រក្ខិតំ ភវតិ កាយកម្មំ វចីកម្មំ មនោកម្មំ។ សម្មាទិដ្ឋិបុរេក្ខារោតិ សម្មាទិដ្ឋិយា ភាវិតាយ ភាវិតោ ភវតិ អរិយោ អដ្ឋង្គិកោ មគ្គោ។ កេន ការណេន? សម្មាទិដ្ឋិតោ ហិ សម្មាសង្កប្បោ បភវតិ, សម្មាសង្កប្បតោ សម្មាវាចា បភវតិ, សម្មាវាចាតោ សម្មាកម្មន្តោ បភវតិ, សម្មាកម្មន្តតោ សម្មាអាជីវោ បភវតិ, សម្មាអាជីវតោ សម្មាវាយាមោ បភវតិ, សម្មាវាយាមតោ សម្មាសតិ បភវតិ, សម្មាសតិតោ សម្មាសមាធិ បភវតិ, សម្មាសមាធិតោ សម្មាវិមុត្តិ បភវតិ, សម្មាវិមុត្តិតោ សម្មាវិមុត្តិញាណទស្សនំ បភវតិ។ អយំ អនុបាទិសេសោ បុគ្គលោ អនុបាទិសេសា ច និព្ពានធាតុ។
Tasmā rakkhitacittassāti tiṇṇaṃ sucaritānaṃ padaṭṭhānaṃ, citte rakkhite taṃ rakkhitaṃ bhavati kāyakammaṃ vacīkammaṃ manokammaṃ. Sammādiṭṭhipurekkhāroti sammādiṭṭhiyā bhāvitāya bhāvito bhavati ariyo aṭṭhaṅgiko maggo. Kena kāraṇena? Sammādiṭṭhito hi sammāsaṅkappo pabhavati, sammāsaṅkappato sammāvācā pabhavati, sammāvācāto sammākammanto pabhavati, sammākammantato sammāājīvo pabhavati, sammāājīvato sammāvāyāmo pabhavati, sammāvāyāmato sammāsati pabhavati, sammāsatito sammāsamādhi pabhavati, sammāsamādhito sammāvimutti pabhavati, sammāvimuttito sammāvimuttiñāṇadassanaṃ pabhavati. Ayaṃ anupādiseso puggalo anupādisesā ca nibbānadhātu.
និយុត្តោ សមារោបនោ ហារសម្បាតោ។
Niyutto samāropano hārasampāto.
តេនាហ អាយស្មា មហាកច្ចាយនោ –
Tenāha āyasmā mahākaccāyano –
‘‘សោឡស ហារា បឋមំ, ទិសលោចនតោ ទិសា វិលោកេត្វា;
‘‘Soḷasa hārā paṭhamaṃ, disalocanato disā viloketvā;
សង្ខិបិយ អង្កុសេន ហិ, នយេហិ តីហិ និទ្ទិសេ សុត្ត’’ន្តិ។
Saṅkhipiya aṅkusena hi, nayehi tīhi niddise sutta’’nti.
និយុត្តោ ហារសម្បាតោ។
Niyutto hārasampāto.
Related texts:
ដីកា • Tīkā / សុត្តបិដក (ដីកា) • Suttapiṭaka (ṭīkā) / ខុទ្ទកនិកាយ (ដីកា) • Khuddakanikāya (ṭīkā) / នេត្តិវិភាវិនី • Nettivibhāvinī / ១៦. សមារោបនហារសម្បាតវិភាវនា • 16. Samāropanahārasampātavibhāvanā
