| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၅. သမနုပသ္သနာသုတ္တဝဏ္ဏနာ
5. Samanupassanāsuttavaṇṇanā
၄၇. ပရိပုဏ္ဏဂာဟဝသေနာတိ ပဉ္စက္ခန္ဓေ အသေသေတ္ဝာ ဧကဇ္ဈံ ‘‘အတ္တာ’’တိ ဂဟဏဝသေန။ ဧတေသံ ပဉ္စန္နံ ဥပာဒာနက္ခန္ဓာနံ အညတရံ ‘‘အတ္တာ’’တိ သမနုပသ္သန္တိ။ ဣတီတိ ဧဝံ။ ယသ္သ ပုဂ္ဂလသ္သ အယံ အတ္တဒိဋ္ဌိသင္ခာတာ သမနုပသ္သနာ အတ္ထိ ပဋိပက္ခေန အဝိဟတတ္တာ သံဝိဇ္ဇတိ။ ပဉ္စန္နံ ဣန္ဒ္ရိယာနန္တိ စက္ခာဒီနံ ဣန္ဒ္ရိယာနံ။
47.Paripuṇṇagāhavasenāti pañcakkhandhe asesetvā ekajjhaṃ ‘‘attā’’ti gahaṇavasena. Etesaṃ pañcannaṃ upādānakkhandhānaṃ aññataraṃ ‘‘attā’’ti samanupassanti. Itīti evaṃ. Yassa puggalassa ayaṃ attadiṭṭhisaṅkhātā samanupassanā atthi paṭipakkhena avihatattā saṃvijjati. Pañcannaṃ indriyānanti cakkhādīnaṃ indriyānaṃ.
အာရမ္မဏန္တိ ကမ္မဝိညာဏသ္သ အာရမ္မဏံ။ မာနဝသေန စ ဒိဋ္ဌိဝသေန စ ‘‘အသ္မီ’’တိ ဂာဟေ သိဇ္ဈန္တေ တံသဟဂတာ တဏ္ဟာပိ တဂ္ဂဟိတာဝ ဟောတီတိ ဝုတ္တံ ‘‘တဏ္ဟာမာနဒိဋ္ဌိဝသေန အသ္မီတိ ဧဝမ္ပိသ္သ ဟောတီ’’တိ။ ဂဟေတ္ဝာတိ အဟံကာရဝတ္ထုဝသေန ဂဟေတ္ဝာ။ အယံ အဟမသ္မီတိ အယံ စက္ခာဒိကော, သုခာဒိကော ဝာ အဟမသ္မိ။ ‘‘ရူပီ အတ္တာ အရောဂော ပရံ မရဏာ’’တိ ဧဝမာဒိဂဟဏဝသေန ပဝတ္တနတော ဝုတ္တံ ‘‘ရူပီ ဘဝိသ္သန္တိအာဒီနိ သဗ္ဗာနိ သသ္သတမေဝ ဘဇန္တီ’’တိ။ ဝိပသ္သနာဘိနိဝေသတော ပုဗ္ဗေ ယထေဝာကာရာနိ ပဉ္စိန္ဒ္ရိယာနိ, အထ ဝိပသ္သနာဘိနိဝေသတော ပရံ တေနေဝာကာရေန ဌိတေသု စက္ခာဒီသု ဣန္ဒ္ရိယေသု အဝိဇ္ဇာ ပဟီယတိ ဝိပသ္သနံ ဝဍ္ဎဧတ္ဝာ မဂ္ဂသ္သ ဥပ္ပာဒနေန, အထ မဂ္ဂပရမ္ပရာယ အရဟတ္တမဂ္ဂဝိဇ္ဇာ ဥပ္ပဇ္ဇတိ။ တဏ္ဟာမာနဒိဋ္ဌိယော ကမ္မသမ္ဘာရဘာဝတော။ ကမ္မသ္သ။ပေ.။ ဧကော သန္ဓီတိ ဟေတုဖလသန္ဓိ။ ပုန ဧကော သန္ဓီတိ ဖလဟေတုသန္ဓိမာဟ။ တယော ပပဉ္စာ အတီတော အဒ္ဓာ အတီတဘဝအဒ္ဓာနံ တေသံ အဓိပ္ပေတတ္တာ။ အနာဂတသ္သ ပစ္စယော ဒသ္သိတော အသ္သုတဝတော ပုထုဇ္ဇနသ္သ ဝသေန။ သုတဝတော ပန အရိယသာဝကသ္သ ဝသေန ဝဋ္ဋသ္သ ဝူပသမော ဒသ္သိတောတိ။
Ārammaṇanti kammaviññāṇassa ārammaṇaṃ. Mānavasena ca diṭṭhivasena ca ‘‘asmī’’ti gāhe sijjhante taṃsahagatā taṇhāpi taggahitāva hotīti vuttaṃ ‘‘taṇhāmānadiṭṭhivasena asmīti evampissa hotī’’ti. Gahetvāti ahaṃkāravatthuvasena gahetvā. Ayaṃ ahamasmīti ayaṃ cakkhādiko, sukhādiko vā ahamasmi. ‘‘Rūpī attā arogo paraṃ maraṇā’’ti evamādigahaṇavasena pavattanato vuttaṃ ‘‘rūpī bhavissantiādīni sabbāni sassatameva bhajantī’’ti. Vipassanābhinivesato pubbe yathevākārāni pañcindriyāni, atha vipassanābhinivesato paraṃ tenevākārena ṭhitesu cakkhādīsu indriyesu avijjā pahīyati vipassanaṃ vaḍḍhaetvā maggassa uppādanena, atha maggaparamparāya arahattamaggavijjā uppajjati. Taṇhāmānadiṭṭhiyo kammasambhārabhāvato. Kammassa…pe… eko sandhīti hetuphalasandhi. Puna eko sandhīti phalahetusandhimāha. Tayo papañcā atīto addhā atītabhavaaddhānaṃ tesaṃ adhippetattā. Anāgatassa paccayo dassito assutavato puthujjanassa vasena. Sutavato pana ariyasāvakassa vasena vaṭṭassa vūpasamo dassitoti.
သမနုပသ္သနာသုတ္တဝဏ္ဏနာ နိဋ္ဌိတာ။
Samanupassanāsuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၅. သမနုပသ္သနာသုတ္တံ • 5. Samanupassanāsuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၅. သမနုပသ္သနာသုတ္တဝဏ္ဏနာ • 5. Samanupassanāsuttavaṇṇanā
