| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၅. သမနုပသ္သနာသုတ္တဝဏ္ဏနာ
5. Samanupassanāsuttavaṇṇanā
၄၇. ပဉ္စမေ ပဉ္စုပာဒာနက္ခန္ဓေ သမနုပသ္သန္တိ ဧတေသံ ဝာ အညတရန္တိ ပရိပုဏ္ဏဂာဟဝသေန ပဉ္စက္ခန္ဓေ သမနုပသ္သန္တိ, အပရိပုဏ္ဏဂာဟဝသေန ဧတေသံ အညတရံ။ ဣတိ အယဉ္စေဝ သမနုပသ္သနာတိ ဣတိ အယဉ္စ ဒိဋ္ဌိသမနုပသ္သနာ။ အသ္မီတိ စသ္သ အဝိဂတံ ဟောတီတိ ယသ္သ အယံ သမနုပသ္သနာ အတ္ထိ, တသ္မိံ အသ္မီတိ တဏ္ဟာမာနဒိဋ္ဌိသင္ခာတံ ပပဉ္စတ္တယံ အဝိဂတမေဝ ဟောတိ။ ပဉ္စန္နံ ဣန္ဒ္ရိယာနံ အဝက္ကန္တိ ဟောတီတိ တသ္မိံ ကိလေသဇာတေ သတိ ကမ္မကိလေသပစ္စယာနံ ပဉ္စန္နံ ဣန္ဒ္ရိယာနံ နိဗ္ဗတ္တိ ဟောတိ။
47. Pañcame pañcupādānakkhandhe samanupassanti etesaṃ vā aññataranti paripuṇṇagāhavasena pañcakkhandhe samanupassanti, aparipuṇṇagāhavasena etesaṃ aññataraṃ. Iti ayañceva samanupassanāti iti ayañca diṭṭhisamanupassanā. Asmīti cassa avigataṃ hotīti yassa ayaṃ samanupassanā atthi, tasmiṃ asmīti taṇhāmānadiṭṭhisaṅkhātaṃ papañcattayaṃ avigatameva hoti. Pañcannaṃindriyānaṃ avakkanti hotīti tasmiṃ kilesajāte sati kammakilesapaccayānaṃ pañcannaṃ indriyānaṃ nibbatti hoti.
အတ္ထိ, ဘိက္ခဝေ, မနောတိ ဣဒံ ကမ္မမနံ သန္ဓာယ ဝုတ္တံ။ ဓမ္မာတိ အာရမ္မဏံ။ အဝိဇ္ဇာဓာတူတိ ဇဝနက္ခဏေ အဝိဇ္ဇာ။ အဝိဇ္ဇာသမ္ဖသ္သဇေနာတိ အဝိဇ္ဇာသမ္ပယုတ္တဖသ္သတော ဇာတေန။ အပိစ မနောတိ ဘဝင္ဂက္ခဏေ ဝိပာကမနောဓာတု, အာဝဇ္ဇနက္ခဏေ ကိရိယမနောဓာတု။ ဓမ္မာဒယော ဝုတ္တပ္ပကာရာဝ။ အသ္မီတိပိသ္သ ဟောတီတိ တဏ္ဟာမာနဒိဋ္ဌိဝသေန အသ္မီတိ ဧဝမ္ပိသ္သ ဟောတိ။ ဣတော ပရေသု အယမဟမသ္မီတိ ရူပာဒီသု ကိဉ္စိဒေဝ ဓမ္မံ ဂဟေတ္ဝာ ‘‘အယံ အဟမသ္မီ’’တိ အတ္တဒိဋ္ဌိဝသေန ဝုတ္တံ။ ဘဝိသ္သန္တိ သသ္သတဒိဋ္ဌိဝသေန။ န ဘဝိသ္သန္တိ ဥစ္ဆေဒဒိဋ္ဌိဝသေန။ ရူပီ ဘဝိသ္သန္တိအာဒီနိ သဗ္ဗာနိ သသ္သတမေဝ ဘဇန္တိ။ အထေတ္ထာတိ အထ တေနေဝာကာရေန ဌိတေသု ဧတေသု ဣန္ဒ္ရိယေသု။ အဝိဇ္ဇာ ပဟီယတီတိ စတူသု သစ္စေသု အညာဏဘူတာ အဝိဇ္ဇာ ပဟီယတိ။ ဝိဇ္ဇာ ဥပ္ပဇ္ဇတီတိ အရဟတ္တမဂ္ဂဝိဇ္ဇာ ဥပ္ပဇ္ဇတိ။ ဧဝမေတ္ထ အသ္မီတိ တဏ္ဟာမာနဒိဋ္ဌိယော။ ကမ္မသ္သ ပဉ္စန္နဉ္စ ဣန္ဒ္ရိယာနံ အန္တရေ ဧကော သန္ဓိ, ဝိပာကမနံ ပဉ္စိန္ဒ္ရိယပက္ခိကံ ကတ္ဝာ ပဉ္စန္နဉ္စ ဣန္ဒ္ရိယာနံ ကမ္မသ္သ စ အန္တရေ ဧကော သန္ဓီတိ။ ဣတိ တယော ပပဉ္စာ အတီတော အဒ္ဓာ, ဣန္ဒ္ရိယာဒီနိ ပစ္စုပ္ပန္နော အဒ္ဓာ, တတ္ထ ကမ္မမနံ အာဒိံ ကတ္ဝာ အနာဂတသ္သ ပစ္စယော ဒသ္သိတောတိ။ ပဉ္စမံ။
Atthi, bhikkhave, manoti idaṃ kammamanaṃ sandhāya vuttaṃ. Dhammāti ārammaṇaṃ. Avijjādhātūti javanakkhaṇe avijjā. Avijjāsamphassajenāti avijjāsampayuttaphassato jātena. Apica manoti bhavaṅgakkhaṇe vipākamanodhātu, āvajjanakkhaṇe kiriyamanodhātu. Dhammādayo vuttappakārāva. Asmītipissa hotīti taṇhāmānadiṭṭhivasena asmīti evampissa hoti. Ito paresu ayamahamasmīti rūpādīsu kiñcideva dhammaṃ gahetvā ‘‘ayaṃ ahamasmī’’ti attadiṭṭhivasena vuttaṃ. Bhavissanti sassatadiṭṭhivasena. Na bhavissanti ucchedadiṭṭhivasena. Rūpī bhavissantiādīni sabbāni sassatameva bhajanti. Athetthāti atha tenevākārena ṭhitesu etesu indriyesu. Avijjā pahīyatīti catūsu saccesu aññāṇabhūtā avijjā pahīyati. Vijjā uppajjatīti arahattamaggavijjā uppajjati. Evamettha asmīti taṇhāmānadiṭṭhiyo. Kammassa pañcannañca indriyānaṃ antare eko sandhi, vipākamanaṃ pañcindriyapakkhikaṃ katvā pañcannañca indriyānaṃ kammassa ca antare eko sandhīti. Iti tayo papañcā atīto addhā, indriyādīni paccuppanno addhā, tattha kammamanaṃ ādiṃ katvā anāgatassa paccayo dassitoti. Pañcamaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၅. သမနုပသ္သနာသုတ္တံ • 5. Samanupassanāsuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၅. သမနုပသ္သနာသုတ္တဝဏ္ဏနာ • 5. Samanupassanāsuttavaṇṇanā
