| Library / Tipiṭaka / তিপিটক • Tipiṭaka / খুদ্দসিক্খা-মূলসিক্খা • Khuddasikkhā-mūlasikkhā |
২৬. সমানাসনিকনিদ্দেসৰণ্ণনা
26. Samānāsanikaniddesavaṇṇanā
১৯৫. তিৰস্সন্তরমেকমাসনং ভিক্খূনং অনুঞ্ঞাতন্তি সম্বন্ধো। তত্থ একস্মিং আসনে মঞ্চাদিকে দ্ৰিন্নং আসনং নিসীদনং একমাসনং। ম-কারো সন্ধিজো। কীদিসন্তি আহ ‘‘তিৰস্সন্তর’’ন্তি। তিণ্ণং ৰস্সানমন্তরমেতস্সাতি তিৰস্সন্তরো, দ্ৰীহি ৰস্সেহি মহন্ততরো ৰা দহরতরো ৰা ভিক্খু, সো অস্স অত্থীতি তিৰস্সন্তরং, তিৰস্সন্তরৰন্তন্তি অত্থো। যো পন একেন ৰস্সেন মহন্ততরো ৰা দহরতরো ৰা একৰস্সোযেৰ ৰা, তব্বন্ততায ৰত্তব্বমেৰ নত্থি। অথ ৰা তিৰস্সন্তরন্তি করণত্থে উপযোগৰচনং, তিৰস্সন্তরেন সদ্ধিন্তি অত্থো। তমেৰ সমত্থেতি ‘‘সত্তৰস্সে’’চ্চাদিনা।
195. Tivassantaramekamāsanaṃ bhikkhūnaṃ anuññātanti sambandho. Tattha ekasmiṃ āsane mañcādike dvinnaṃ āsanaṃ nisīdanaṃ ekamāsanaṃ. Ma-kāro sandhijo. Kīdisanti āha ‘‘tivassantara’’nti. Tiṇṇaṃ vassānamantarametassāti tivassantaro, dvīhi vassehi mahantataro vā daharataro vā bhikkhu, so assa atthīti tivassantaraṃ, tivassantaravantanti attho. Yo pana ekena vassena mahantataro vā daharataro vā ekavassoyeva vā, tabbantatāya vattabbameva natthi. Atha vā tivassantaranti karaṇatthe upayogavacanaṃ, tivassantarena saddhinti attho. Tameva samattheti ‘‘sattavasse’’ccādinā.
১৯৬. মুনি অনুঞ্ঞাসীতি সম্বন্ধো। সব্বেহেৰাতি সমানাসনিকঅসমানাসনিকেহি সব্বেহেৰ সদ্ধিং।
196. Muni anuññāsīti sambandho. Sabbehevāti samānāsanikaasamānāsanikehi sabbeheva saddhiṃ.
১৯৭. দীঘাসনং দস্সেতি ‘‘অন্ত’’ন্তিআদিনা। যং তিণ্ণং নিসীদিতুং পহোতি, তং অন্তং দীঘাসনন্তি সম্বন্ধো। অন্তন্তি পচ্ছিমং। অদীঘাসনে পন সমানাসনিকা নিসীদিতুং লব্ভন্তীতি দস্সেন্তো ‘‘মঞ্চকে’’তিআদিমাহ। সব্বত্থ অযথাকরণতো দুক্কটন্তি।
197. Dīghāsanaṃ dasseti ‘‘anta’’ntiādinā. Yaṃ tiṇṇaṃ nisīdituṃ pahoti, taṃ antaṃ dīghāsananti sambandho. Antanti pacchimaṃ. Adīghāsane pana samānāsanikā nisīdituṃ labbhantīti dassento ‘‘mañcake’’tiādimāha. Sabbattha ayathākaraṇato dukkaṭanti.
সমানাসনিকনিদ্দেসৰণ্ণনা নিট্ঠিতা।
Samānāsanikaniddesavaṇṇanā niṭṭhitā.
