| Library / Tipiṭaka / তিপিটক • Tipiṭaka / খুদ্দসিক্খা-মূলসিক্খা • Khuddasikkhā-mūlasikkhā |
২৬. সমানাসনিকনিদ্দেসৰণ্ণনা
26. Samānāsanikaniddesavaṇṇanā
১৯৫. তিণ্ণং ৰস্সানং অন্তরং তিৰস্সন্তরং। ‘‘অনুজানামি, ভিক্খৰে, তিৰস্সন্তরেন সহ নিসীদিতু’’ন্তি (চূল়ৰ॰ ৩২০) হি ৰুত্তং। যো দ্ৰীহি ৰস্সেহি (চূল়ৰ॰ অট্ঠ॰ ৩২০) ৰুড্ঢো ৰা নৰো ৰা, সো তিৰস্সন্তরো নাম।
195. Tiṇṇaṃ vassānaṃ antaraṃ tivassantaraṃ. ‘‘Anujānāmi, bhikkhave, tivassantarena saha nisīditu’’nti (cūḷava. 320) hi vuttaṃ. Yo dvīhi vassehi (cūḷava. aṭṭha. 320) vuḍḍho vā navo vā, so tivassantaro nāma.
১৯৬. মুনীতি বুদ্ধমুনি। সব্বেহেৰাতি অনুপসম্পন্নেহিপি।
196.Munīti buddhamuni. Sabbehevāti anupasampannehipi.
১৯৭. অন্তন্তি পচ্ছিমং। ‘‘অনুজানামি, ভিক্খৰে, যং তিণ্ণং পহোতি, এত্তকং পচ্ছিমং দীঘাসন’’ন্তি (চূল়ৰ॰ ৩২০) ৰুত্তত্তা যং তিণ্ণং পহোতি, এতং সংহারিমং ৰা হোতু অসংহারিমং ৰা, তথারূপেসু ফলকখণ্ডেসুপি নিসীদিতুং ৰট্টতি। দ্ৰিন্নন্তি দ্ৰিন্নং সমানাসনিকানং। ‘‘অনুজানামি, ভিক্খৰে, দুৰগ্গস্স মঞ্চং দুৰগ্গস্স পীঠ’’ন্তি (চুল়ৰ॰ ৩২০) ৰুত্তত্তা দ্ৰে সমানাসনিকা সহ নিসীদিতুং লভন্তি। অঞ্ঞেহি অসমানাসনিকেহি, অনুপসম্পন্নাদীহি ৰা দ্ৰে হুত্ৰাপি নিসীদিতুং ন লভন্তি। সমানাসনিকৰিনিচ্ছযো।
197.Antanti pacchimaṃ. ‘‘Anujānāmi, bhikkhave, yaṃ tiṇṇaṃ pahoti, ettakaṃ pacchimaṃ dīghāsana’’nti (cūḷava. 320) vuttattā yaṃ tiṇṇaṃ pahoti, etaṃ saṃhārimaṃ vā hotu asaṃhārimaṃ vā, tathārūpesu phalakakhaṇḍesupi nisīdituṃ vaṭṭati. Dvinnanti dvinnaṃ samānāsanikānaṃ. ‘‘Anujānāmi, bhikkhave, duvaggassa mañcaṃ duvaggassa pīṭha’’nti (cuḷava. 320) vuttattā dve samānāsanikā saha nisīdituṃ labhanti. Aññehi asamānāsanikehi, anupasampannādīhi vā dve hutvāpi nisīdituṃ na labhanti. Samānāsanikavinicchayo.
সমানাসনিকনিদ্দেসৰণ্ণনা নিট্ঠিতা।
Samānāsanikaniddesavaṇṇanā niṭṭhitā.
