| Library / Tipiṭaka / ਤਿਪਿਟਕ • Tipiṭaka / ਮਜ੍ਝਿਮਨਿਕਾਯ (ਅਟ੍ਠਕਥਾ) • Majjhimanikāya (aṭṭhakathā) |
੮. ਸਮਣਮੁਣ੍ਡਿਕਸੁਤ੍ਤવਣ੍ਣਨਾ
8. Samaṇamuṇḍikasuttavaṇṇanā
੨੬੦. ਏવਂ ਮੇ ਸੁਤਨ੍ਤਿ ਸਮਣਮੁਣ੍ਡਿਕਸੁਤ੍ਤਂ। ਤਤ੍ਥ ਉਗ੍ਗਾਹਮਾਨੋਤਿ ਤਸ੍ਸ ਪਰਿਬ੍ਬਾਜਕਸ੍ਸ ਨਾਮਂ। ਸੁਮਨੋਤਿ ਪਕਤਿਨਾਮਂ। ਕਿਞ੍ਚਿ ਕਿਞ੍ਚਿ ਪਨ ਉਗ੍ਗਹਿਤੁਂ ਉਗ੍ਗਾਹੇਤੁਂ ਸਮਤ੍ਥਤਾਯ ਉਗ੍ਗਾਹਮਾਨੋਤਿ ਨਂ ਸਞ੍ਜਾਨਨ੍ਤਿ। ਸਮਯਂ ਪવਦਨ੍ਤਿ ਏਤ੍ਥਾਤਿ ਸਮਯਪ੍ਪવਾਦਕਂ। ਤਸ੍ਮਿਂ ਕਿਰ ਠਾਨੇ ਚਙ੍ਕੀਤਾਰੁਕ੍ਖਪੋਕ੍ਖਰਸਾਤਿਪ੍ਪਭੁਤਯੋ ਬ੍ਰਾਹ੍ਮਣਾ ਨਿਗਣ੍ਠਾਚੇਲਕਪਰਿਬ੍ਬਾਜਕਾਦਯੋ ਚ ਪਬ੍ਬਜਿਤਾ ਸਨ੍ਨਿਪਤਿਤ੍વਾ ਅਤ੍ਤਨੋ ਅਤ੍ਤਨੋ ਸਮਯਂ ਪવਦਨ੍ਤਿ ਕਥੇਨ੍ਤਿ ਦੀਪੇਨ੍ਤਿ, ਤਸ੍ਮਾ ਸੋ ਆਰਾਮੋ ਸਮਯਪ੍ਪવਾਦਕੋਤਿ વੁਚ੍ਚਤਿ। ਸ੍વੇવ ਤਿਨ੍ਦੁਕਾਚੀਰਸਙ੍ਖਾਤਾਯ ਤਿਮ੍ਬਰੂਸਕਰੁਕ੍ਖਪਨ੍ਤਿਯਾ ਪਰਿਕ੍ਖਿਤ੍ਤਤ੍ਤਾ ਤਿਨ੍ਦੁਕਾਚੀਰਂ। ਯਸ੍ਮਾ ਪਨੇਤ੍ਥ ਪਠਮਂ ਏਕਾ ਸਾਲਾ ਅਹੋਸਿ, ਪਚ੍ਛਾ ਮਹਾਪੁਞ੍ਞਂ ਪੋਟ੍ਠਪਾਦਪਰਿਬ੍ਬਾਜਕਂ ਨਿਸ੍ਸਾਯ ਬਹੂ ਸਾਲਾ ਕਤਾ, ਤਸ੍ਮਾ ਤਮੇવ ਏਕਂ ਸਾਲਂ ਉਪਾਦਾਯ ਲਦ੍ਧਨਾਮવਸੇਨ ਏਕਸਾਲਕੋਤਿ વੁਚ੍ਚਤਿ। ਮਲ੍ਲਿਕਾਯ ਪਨ ਪਸੇਨਦਿਰਞ੍ਞੋ ਦੇવਿਯਾ ਉਯ੍ਯਾਨਭੂਤੋ ਸੋ ਪੁਪ੍ਫਫਲਸਞ੍ਛਨ੍ਨੋ ਆਰਾਮੋਤਿ ਕਤ੍વਾ ਮਲ੍ਲਿਕਾਯ ਆਰਾਮੋਤਿ ਸਙ੍ਖਂ ਗਤੋ। ਤਸ੍ਮਿਂ ਸਮਯਪ੍ਪવਾਦਕੇ ਤਿਨ੍ਦੁਕਾਚੀਰੇ ਏਕਸਾਲਕੇ ਮਲ੍ਲਿਕਾਯ ਆਰਾਮੇ। ਪਟਿવਸਤੀਤਿ વਾਸਫਾਸੁਤਾਯ વਸਤਿ। ਦਿવਾ ਦਿવਸ੍ਸਾਤਿ ਦਿવਸਸ੍ਸ ਦਿવਾ ਨਾਮ ਮਜ੍ਝਨ੍ਹਾਤਿਕ੍ਕਮੋ, ਤਸ੍ਮਿਂ ਦਿવਸਸ੍ਸਪਿ ਦਿવਾਭੂਤੇ ਅਤਿਕ੍ਕਨ੍ਤਮਤ੍ਤੇ ਮਜ੍ਝਨ੍ਹਿਕੇ ਨਿਕ੍ਖਮੀਤਿ ਅਤ੍ਥੋ। ਪਟਿਸਲ੍ਲੀਨੋਤਿ ਤਤੋ ਤਤੋ ਰੂਪਾਦਿਗੋਚਰਤੋ ਚਿਤ੍ਤਂ ਪਟਿਸਂਹਰਿਤ੍વਾ ਲੀਨੋ, ਝਾਨਰਤਿਸੇવਨવਸੇਨ ਏਕੀਭਾવਂ ਗਤੋ। ਮਨੋਭਾવਨੀਯਾਨਨ੍ਤਿ ਮਨવਡ੍ਢਨਕਾਨਂ, ਯੇ ਆવਜ੍ਜਤੋ ਮਨਸਿਕਰੋਤੋ ਚਿਤ੍ਤਂ વਿਨੀવਰਣਂ ਹੋਤਿ ਉਨ੍ਨਮਤਿ વਡ੍ਢਤਿ। ਯਾવਤਾਤਿ ਯਤ੍ਤਕਾ। ਅਯਂ ਤੇਸਂ ਅਞ੍ਞਤਰੋਤਿ ਅਯਂ ਤੇਸਂ ਅਬ੍ਭਨ੍ਤਰੋ ਏਕੋ ਸਾવਕੋ। ਅਪ੍ਪੇવ ਨਾਮਾਤਿ ਤਸ੍ਸ ਉਪਸਙ੍ਕਮਨਂ ਪਤ੍ਥਯਮਾਨੋ ਆਹ। ਪਤ੍ਥਨਾਕਾਰਣਂ ਪਨ ਸਨ੍ਦਕਸੁਤ੍ਤੇ વੁਤ੍ਤਮੇવ।
260.Evaṃme sutanti samaṇamuṇḍikasuttaṃ. Tattha uggāhamānoti tassa paribbājakassa nāmaṃ. Sumanoti pakatināmaṃ. Kiñci kiñci pana uggahituṃ uggāhetuṃ samatthatāya uggāhamānoti naṃ sañjānanti. Samayaṃ pavadanti etthāti samayappavādakaṃ. Tasmiṃ kira ṭhāne caṅkītārukkhapokkharasātippabhutayo brāhmaṇā nigaṇṭhācelakaparibbājakādayo ca pabbajitā sannipatitvā attano attano samayaṃ pavadanti kathenti dīpenti, tasmā so ārāmo samayappavādakoti vuccati. Sveva tindukācīrasaṅkhātāya timbarūsakarukkhapantiyā parikkhittattā tindukācīraṃ. Yasmā panettha paṭhamaṃ ekā sālā ahosi, pacchā mahāpuññaṃ poṭṭhapādaparibbājakaṃ nissāya bahū sālā katā, tasmā tameva ekaṃ sālaṃ upādāya laddhanāmavasena ekasālakoti vuccati. Mallikāya pana pasenadirañño deviyā uyyānabhūto so pupphaphalasañchanno ārāmoti katvā mallikāya ārāmoti saṅkhaṃ gato. Tasmiṃ samayappavādake tindukācīre ekasālake mallikāya ārāme. Paṭivasatīti vāsaphāsutāya vasati. Divā divassāti divasassa divā nāma majjhanhātikkamo, tasmiṃ divasassapi divābhūte atikkantamatte majjhanhike nikkhamīti attho. Paṭisallīnoti tato tato rūpādigocarato cittaṃ paṭisaṃharitvā līno, jhānaratisevanavasena ekībhāvaṃ gato. Manobhāvanīyānanti manavaḍḍhanakānaṃ, ye āvajjato manasikaroto cittaṃ vinīvaraṇaṃ hoti unnamati vaḍḍhati. Yāvatāti yattakā. Ayaṃ tesaṃ aññataroti ayaṃ tesaṃ abbhantaro eko sāvako. Appeva nāmāti tassa upasaṅkamanaṃ patthayamāno āha. Patthanākāraṇaṃ pana sandakasutte vuttameva.
੨੬੧. ਏਤਦવੋਚਾਤਿ ਦਨ੍ਦਪਞ੍ਞੋ ਅਯਂ ਗਹਪਤਿ, ਧਮ੍ਮਕਥਾਯ ਨਂ ਸਙ੍ਗਣ੍ਹਿਤ੍વਾ ਅਤ੍ਤਨੋ ਸਾવਕਂ ਕਰਿਸ੍ਸਾਮੀਤਿ ਮਞ੍ਞਮਾਨੋ ਏਤਂ ‘‘ਚਤੂਹਿ ਖੋ’’ਤਿਆਦਿવਚਨਂ ਅવੋਚ। ਤਤ੍ਥ ਪਞ੍ਞ੍ਪੇਮੀਤਿ ਦਸ੍ਸੇਮਿ ਠਪੇਮਿ। ਸਮ੍ਪਨ੍ਨਕੁਸਲਨ੍ਤਿ ਪਰਿਪੁਣ੍ਣਕੁਸਲਂ। ਪਰਮਕੁਸਲਨ੍ਤਿ ਉਤ੍ਤਮਕੁਸਲਂ। ਅਯੋਜ੍ਝਨ੍ਤਿ વਾਦਯੁਦ੍ਧੇਨ ਯੁਜ੍ਝਿਤ੍વਾ ਚਾਲੇਤੁਂ ਅਸਕ੍ਕੁਣੇਯ੍ਯਂ ਅਚਲਂ ਨਿਕ੍ਕਮ੍ਪਂ ਥਿਰਂ। ਨ ਕਰੋਤੀਤਿ ਅਕਰਣਮਤ੍ਤਮੇવ વਦਤਿ, ਏਤ੍ਥ ਪਨ ਸਂવਰਪ੍ਪਹਾਨਂ વਾ ਪਟਿਸੇવਨਪ੍ਪਹਾਨਂ વਾ ਨ વਦਤਿ। ਸੇਸਪਦੇਸੁਪਿ ਏਸੇવ ਨਯੋ।
261.Etadavocāti dandapañño ayaṃ gahapati, dhammakathāya naṃ saṅgaṇhitvā attano sāvakaṃ karissāmīti maññamāno etaṃ ‘‘catūhi kho’’tiādivacanaṃ avoca. Tattha paññpemīti dassemi ṭhapemi. Sampannakusalanti paripuṇṇakusalaṃ. Paramakusalanti uttamakusalaṃ. Ayojjhanti vādayuddhena yujjhitvā cāletuṃ asakkuṇeyyaṃ acalaṃ nikkampaṃ thiraṃ. Na karotīti akaraṇamattameva vadati, ettha pana saṃvarappahānaṃ vā paṭisevanappahānaṃ vā na vadati. Sesapadesupi eseva nayo.
ਨੇવ ਅਭਿਨਨ੍ਦੀਤਿ ਤਿਤ੍ਥਿਯਾ ਨਾਮ ਜਾਨਿਤ੍વਾਪਿ ਅਜਾਨਿਤ੍વਾਪਿ ਯਂ વਾ ਤਂ વਾ વਦਨ੍ਤੀਤਿ ਮਞ੍ਞਮਾਨੋ ਨਾਭਿਨਨ੍ਦਿ। ਨ ਪਟਿਕ੍ਕੋਸੀਤਿ ਸਾਸਨਸ੍ਸ ਅਨੁਲੋਮਂ વਿਯ ਪਸਨ੍ਨਾਕਾਰਂ વਿਯ વਦਤੀਤਿ ਮਞ੍ਞਮਾਨੋ ਨ ਪਟਿਸੇਧੇਤਿ।
Neva abhinandīti titthiyā nāma jānitvāpi ajānitvāpi yaṃ vā taṃ vā vadantīti maññamāno nābhinandi. Na paṭikkosīti sāsanassa anulomaṃ viya pasannākāraṃ viya vadatīti maññamāno na paṭisedheti.
੨੬੨. ਯਥਾ ਉਗ੍ਗਾਹਮਾਨਸ੍ਸਾਤਿ ਯਥਾ ਤਸ੍ਸ વਚਨਂ, ਏવਂ ਸਨ੍ਤੇ ਉਤ੍ਤਾਨਸੇਯ੍ਯਕੋ ਕੁਮਾਰੋ ਅਯੋਜ੍ਝਸਮਣੋ ਥਿਰਸਮਣੋ ਭવਿਸ੍ਸਤਿ, ਮਯਂ ਪਨ ਏવਂ ਨ વਦਾਮਾਤਿ ਦੀਪੇਤਿ। ਕਾਯੋਤਿਪਿ ਨ ਹੋਤੀਤਿ ਸਕਕਾਯੋ ਪਰਕਾਯੋਤਿਪਿ વਿਸੇਸਞਾਣਂ ਨ ਹੋਤਿ। ਅਞ੍ਞਤ੍ਰ ਫਨ੍ਦਿਤਮਤ੍ਤਾਤਿ ਪਚ੍ਚਤ੍ਥਰਣੇ વਲਿਸਮ੍ਫਸ੍ਸੇਨ વਾ ਮਙ੍ਗੁਲਦਟ੍ਠੇਨ વਾ ਕਾਯਫਨ੍ਦਨਮਤ੍ਤਂ ਨਾਮ ਹੋਤਿ। ਤਂ ਠਪੇਤ੍વਾ ਅਞ੍ਞਂ ਕਾਯੇਨ ਕਰਣਕਮ੍ਮਂ ਨਾਮ ਨਤ੍ਥਿ। ਤਮ੍ਪਿ ਚ ਕਿਲੇਸਸਹਗਤਚਿਤ੍ਤੇਨੇવ ਹੋਤਿ। વਾਚਾਤਿਪਿ ਨ ਹੋਤੀਤਿ ਮਿਚ੍ਛਾવਾਚਾ ਸਮ੍ਮਾવਾਚਾਤਿਪਿ ਨਾਨਤ੍ਤਂ ਨ ਹੋਤਿ। ਰੋਦਿਤਮਤ੍ਤਾਤਿ ਜਿਘਚ੍ਛਾਪਿਪਾਸਾਪਰੇਤਸ੍ਸ ਪਨ ਰੋਦਿਤਮਤ੍ਤਂ ਹੋਤਿ। ਤਮ੍ਪਿ ਕਿਲੇਸਸਹਗਤਚਿਤ੍ਤੇਨੇવ। ਸਙ੍ਕਪ੍ਪੋਤਿ ਮਿਚ੍ਛਾਸਙ੍ਕਪ੍ਪੋ ਸਮ੍ਮਾਸਙ੍ਕਪ੍ਪੋਤਿਪਿ ਨਾਨਤ੍ਤਂ ਨ ਹੋਤਿ। વਿਕੂਜਿਤਮਤ੍ਤਾਤਿ વਿਕੂਜਿਤਮਤ੍ਤਂ ਰੋਦਨਹਸਿਤਮਤ੍ਤਂ ਹੋਤਿ। ਦਹਰਕੁਮਾਰਕਾਨਞ੍ਹਿ ਚਿਤ੍ਤਂ ਅਤੀਤਾਰਮ੍ਮਣਂ ਪવਤ੍ਤਤਿ, ਨਿਰਯਤੋ ਆਗਤਾ ਨਿਰਯਦੁਕ੍ਖਂ ਸਰਿਤ੍વਾ ਰੋਦਨ੍ਤਿ, ਦੇવਲੋਕਤੋ ਆਗਤਾ ਹਸਨ੍ਤਿ, ਤਮ੍ਪਿ ਕਿਲੇਸਸਹਗਤਚਿਤ੍ਤੇਨੇવ ਹੋਤਿ। ਆਜੀવੋਤਿ ਮਿਚ੍ਛਾਜੀવੋ ਸਮ੍ਮਾਜੀવੋਤਿਪਿ ਨਾਨਤ੍ਤਂ ਨ ਹੋਤਿ। ਅਞ੍ਞਤ੍ਰ ਮਾਤੁਥਞ੍ਞਾਤਿ ਥਞ੍ਞਚੋਰਦਾਰਕਾ ਨਾਮ ਹੋਨ੍ਤਿ, ਮਾਤਰਿ ਖੀਰਂ ਪਾਯਨ੍ਤਿਯਾ ਅਪਿવਿਤ੍વਾ ਅਞ੍ਞવਿਹਿਤਕਾਲੇ ਪਿਟ੍ਠਿਪਸ੍ਸੇਨ ਆਗਨ੍ਤ੍વਾ ਥਞ੍ਞਂ ਪਿવਨ੍ਤਿ। ਏਤ੍ਤਕਂ ਮੁਞ੍ਚਿਤ੍વਾ ਅਞ੍ਞੋ ਮਿਚ੍ਛਾਜੀવੋ ਨਤ੍ਥਿ। ਅਯਮ੍ਪਿ ਕਿਲੇਸਸਹਗਤਚਿਤ੍ਤੇਨੇવ ਹੋਤੀਤਿ ਦਸ੍ਸੇਤਿ।
262.Yathā uggāhamānassāti yathā tassa vacanaṃ, evaṃ sante uttānaseyyako kumāro ayojjhasamaṇo thirasamaṇo bhavissati, mayaṃ pana evaṃ na vadāmāti dīpeti. Kāyotipi na hotīti sakakāyo parakāyotipi visesañāṇaṃ na hoti. Aññatraphanditamattāti paccattharaṇe valisamphassena vā maṅguladaṭṭhena vā kāyaphandanamattaṃ nāma hoti. Taṃ ṭhapetvā aññaṃ kāyena karaṇakammaṃ nāma natthi. Tampi ca kilesasahagatacitteneva hoti. Vācātipi na hotīti micchāvācā sammāvācātipi nānattaṃ na hoti. Roditamattāti jighacchāpipāsāparetassa pana roditamattaṃ hoti. Tampi kilesasahagatacitteneva. Saṅkappoti micchāsaṅkappo sammāsaṅkappotipi nānattaṃ na hoti. Vikūjitamattāti vikūjitamattaṃ rodanahasitamattaṃ hoti. Daharakumārakānañhi cittaṃ atītārammaṇaṃ pavattati, nirayato āgatā nirayadukkhaṃ saritvā rodanti, devalokato āgatā hasanti, tampi kilesasahagatacitteneva hoti. Ājīvoti micchājīvo sammājīvotipi nānattaṃ na hoti. Aññatra mātuthaññāti thaññacoradārakā nāma honti, mātari khīraṃ pāyantiyā apivitvā aññavihitakāle piṭṭhipassena āgantvā thaññaṃ pivanti. Ettakaṃ muñcitvā añño micchājīvo natthi. Ayampi kilesasahagatacitteneva hotīti dasseti.
੨੬੩. ਏવਂ ਪਰਿਬ੍ਬਾਜਕવਾਦਂ ਪਟਿਕ੍ਖਿਪਿਤ੍વਾ ਇਦਾਨਿ ਸਯਂ ਸੇਕ੍ਖਭੂਮਿਯਂ ਮਾਤਿਕਂ ਠਪੇਨ੍ਤੋ ਚਤੂਹਿ ਖੋ ਅਹਨ੍ਤਿਆਦਿਮਾਹ। ਤਤ੍ਥ ਸਮਧਿਗਯ੍ਹ ਤਿਟ੍ਠਤੀਤਿ વਿਸੇਸੇਤ੍વਾ ਤਿਟ੍ਠਤਿ। ਨ ਕਾਯੇਨ ਪਾਪ ਕਮ੍ਮਨ੍ਤਿਆਦੀਸੁ ਨ ਕੇવਲਂ ਅਕਰਣਮਤ੍ਤਮੇવ, ਭਗવਾ ਪਨ ਏਤ੍ਥ ਸਂવਰਪ੍ਪਹਾਨਪਟਿਸਙ੍ਖਾ ਪਞ੍ਞਪੇਤਿ। ਤਂ ਸਨ੍ਧਾਯੇવਮਾਹ। ਨ ਚੇવ ਸਮ੍ਪਨ੍ਨਕੁਸਲਨ੍ਤਿਆਦਿ ਪਨ ਖੀਣਾਸવਂ ਸਨ੍ਧਾਯ વੁਤ੍ਤਂ।
263. Evaṃ paribbājakavādaṃ paṭikkhipitvā idāni sayaṃ sekkhabhūmiyaṃ mātikaṃ ṭhapento catūhi kho ahantiādimāha. Tattha samadhigayha tiṭṭhatīti visesetvā tiṭṭhati. Nakāyena pāpa kammantiādīsu na kevalaṃ akaraṇamattameva, bhagavā pana ettha saṃvarappahānapaṭisaṅkhā paññapeti. Taṃ sandhāyevamāha. Na ceva sampannakusalantiādi pana khīṇāsavaṃ sandhāya vuttaṃ.
ਇਦਾਨਿ ਅਸੇਕ੍ਖਭੂਮਿਯਂ ਮਾਤਿਕਂ ਠਪੇਨ੍ਤੋ ਦਸਹਿ ਖੋ ਅਹਨ੍ਤਿਆਦਿਮਾਹ। ਤਤ੍ਥ ਤੀਣਿ ਪਦਾਨਿ ਨਿਸ੍ਸਾਯ ਦ੍વੇ ਪਠਮਚਤੁਕ੍ਕਾ ਠਪਿਤਾ, ਏਕਂ ਪਦਂ ਨਿਸ੍ਸਾਯ ਦ੍વੇ ਪਚ੍ਛਿਮਚਤੁਕ੍ਕਾ। ਅਯਂ ਸੇਕ੍ਖਭੂਮਿਯਂ ਮਾਤਿਕਾ।
Idāni asekkhabhūmiyaṃ mātikaṃ ṭhapento dasahi kho ahantiādimāha. Tattha tīṇi padāni nissāya dve paṭhamacatukkā ṭhapitā, ekaṃ padaṃ nissāya dve pacchimacatukkā. Ayaṃ sekkhabhūmiyaṃ mātikā.
੨੬੪. ਇਦਾਨਿ ਤਂ વਿਭਜਨ੍ਤੋ ਕਤਮੇ ਚ ਥਪਤਿ ਅਕੁਸਲਸੀਲਾਤਿਆਦਿਮਾਹ। ਤਤ੍ਥ ਸਰਾਗਨ੍ਤਿ ਅਟ੍ਠવਿਧਂ ਲੋਭਸਹਗਤਚਿਤ੍ਤਂ। ਸਦੋਸਨ੍ਤਿ ਪਟਿਘਸਮ੍ਪਯੁਤ੍ਤਚਿਤ੍ਤਦ੍વਯਂ। ਸਮੋਹਨ੍ਤਿ વਿਚਿਕਿਚ੍ਛੁਦ੍ਧਚ੍ਚਸਹਗਤਚਿਤ੍ਤਦ੍વਯਮ੍ਪਿ વਟ੍ਟਤਿ, ਸਬ੍ਬਾਕੁਸਲਚਿਤ੍ਤਾਨਿਪਿ। ਮੋਹੋ ਸਬ੍ਬਾਕੁਸਲੇ ਉਪ੍ਪਜ੍ਜਤੀਤਿ ਹਿ વੁਤ੍ਤਂ। ਇਤੋਸਮੁਟ੍ਠਾਨਾਤਿ ਇਤੋ ਸਰਾਗਾਦਿਚਿਤ੍ਤਤੋ ਸਮੁਟ੍ਠਾਨਂ ਉਪ੍ਪਤ੍ਤਿ ਏਤੇਸਨ੍ਤਿ ਇਤੋਸਮੁਟ੍ਠਾਨਾ।
264. Idāni taṃ vibhajanto katame ca thapati akusalasīlātiādimāha. Tattha sarāganti aṭṭhavidhaṃ lobhasahagatacittaṃ. Sadosanti paṭighasampayuttacittadvayaṃ. Samohanti vicikicchuddhaccasahagatacittadvayampi vaṭṭati, sabbākusalacittānipi. Moho sabbākusale uppajjatīti hi vuttaṃ. Itosamuṭṭhānāti ito sarāgādicittato samuṭṭhānaṃ uppatti etesanti itosamuṭṭhānā.
ਕੁਹਿਨ੍ਤਿ ਕਤਰਂ ਠਾਨਂ ਪਾਪੁਣਿਤ੍વਾ ਅਪਰਿਸੇਸਾ ਨਿਰੁਜ੍ਝਨ੍ਤਿ। ਏਤ੍ਥੇਤੇਤਿ ਸੋਤਾਪਤ੍ਤਿਫਲੇ ਭੁਮ੍ਮਂ। ਪਾਤਿਮੋਕ੍ਖਸਂવਰਸੀਲਞ੍ਹਿ ਸੋਤਾਪਤ੍ਤਿਫਲੇ ਪਰਿਪੁਣ੍ਣਂ ਹੋਤਿ, ਤਂ ਠਾਨਂ ਪਤ੍વਾ ਅਕੁਸਲਸੀਲਂ ਅਸੇਸਂ ਨਿਰੁਜ੍ਝਤਿ। ਅਕੁਸਲਸੀਲਨ੍ਤਿ ਚ ਦੁਸ੍ਸੀਲਸ੍ਸੇਤਂ ਅਧਿવਚਨਨ੍ਤਿ વੇਦਿਤਬ੍ਬਂ।
Kuhinti kataraṃ ṭhānaṃ pāpuṇitvā aparisesā nirujjhanti. Ettheteti sotāpattiphale bhummaṃ. Pātimokkhasaṃvarasīlañhi sotāpattiphale paripuṇṇaṃ hoti, taṃ ṭhānaṃ patvā akusalasīlaṃ asesaṃ nirujjhati. Akusalasīlanti ca dussīlassetaṃ adhivacananti veditabbaṃ.
ਅਕੁਸਲਾਨਂ ਸੀਲਾਨਂ ਨਿਰੋਧਾਯ ਪਟਿਪਨ੍ਨੋਤਿ ਏਤ੍ਥ ਯਾવ ਸੋਤਾਪਤ੍ਤਿਮਗ੍ਗਾ ਨਿਰੋਧਾਯ ਪਟਿਪਨ੍ਨੋ ਨਾਮ ਹੋਤਿ, ਫਲਪਤ੍ਤੇ ਪਨ ਤੇ ਨਿਰੋਧਿਤਾ ਨਾਮ ਹੋਨ੍ਤਿ।
Akusalānaṃ sīlānaṃ nirodhāya paṭipannoti ettha yāva sotāpattimaggā nirodhāya paṭipanno nāma hoti, phalapatte pana te nirodhitā nāma honti.
੨੬੫. વੀਤਰਾਗਨ੍ਤਿਆਦੀਹਿ ਅਟ੍ਠવਿਧਂ ਕਾਮਾવਚਰਕੁਸਲਚਿਤ੍ਤਮੇવ વੁਤ੍ਤਂ। ਏਤੇਨ ਹਿ ਕੁਸਲਸੀਲਂ ਸਮੁਟ੍ਠਾਤਿ।
265.Vītarāgantiādīhi aṭṭhavidhaṃ kāmāvacarakusalacittameva vuttaṃ. Etena hi kusalasīlaṃ samuṭṭhāti.
ਸੀਲવਾ ਹੋਤੀਤਿ ਸੀਲਸਮ੍ਪਨ੍ਨੋ ਹੋਤਿ ਗੁਣਸਮ੍ਪਨ੍ਨੋ ਚ। ਨੋ ਚ ਸੀਲਮਯੋਤਿ ਅਲਮੇਤ੍ਤਾવਤਾ, ਨਤ੍ਥਿ ਇਤੋ ਕਿਞ੍ਚਿ ਉਤ੍ਤਰਿ ਕਰਣੀਯਨ੍ਤਿ ਏવਂ ਸੀਲਮਯੋ ਨ ਹੋਤਿ। ਯਤ੍ਥਸ੍ਸ ਤੇਤਿ ਅਰਹਤ੍ਤਫਲੇ ਭੁਮ੍ਮਂ। ਅਰਹਤ੍ਤਫਲਞ੍ਹਿ ਪਤ੍વਾ ਅਕੁਸਲਸੀਲਂ ਅਸੇਸਂ ਨਿਰੁਜ੍ਝਤਿ।
Sīlavā hotīti sīlasampanno hoti guṇasampanno ca. No ca sīlamayoti alamettāvatā, natthi ito kiñci uttari karaṇīyanti evaṃ sīlamayo na hoti. Yatthassa teti arahattaphale bhummaṃ. Arahattaphalañhi patvā akusalasīlaṃ asesaṃ nirujjhati.
ਨਿਰੋਧਾਯ ਪਟਿਪਨ੍ਨੋਤਿ ਏਤ੍ਥ ਯਾવ ਅਰਹਤ੍ਤਮਗ੍ਗਾ ਨਿਰੋਧਾਯ ਪਟਿਪਨ੍ਨੋ ਨਾਮ ਹੋਤਿ, ਫਲਪਤ੍ਤੇ ਪਨ ਤੇ ਨਿਰੋਧਿਤਾ ਨਾਮ ਹੋਨ੍ਤਿ।
Nirodhāya paṭipannoti ettha yāva arahattamaggā nirodhāya paṭipanno nāma hoti, phalapatte pana te nirodhitā nāma honti.
੨੬੬. ਕਾਮਸਞ੍ਞਾਦੀਸੁ ਕਾਮਸਞ੍ਞਾ ਅਟ੍ਠਲੋਭਸਹਗਤਚਿਤ੍ਤਸਹਜਾਤਾ, ਇਤਰਾ ਦ੍વੇ ਦੋਮਨਸ੍ਸਸਹਗਤਚਿਤ੍ਤਦ੍વਯੇਨ ਸਹਜਾਤਾ।
266.Kāmasaññādīsu kāmasaññā aṭṭhalobhasahagatacittasahajātā, itarā dve domanassasahagatacittadvayena sahajātā.
ਪਠਮਂ ਝਾਨਨ੍ਤਿ ਅਨਾਗਾਮਿਫਲਪਠਮਜ੍ਝਾਨਂ। ਏਤ੍ਥੇਤੇਤਿ ਅਨਾਗਾਮਿਫਲੇ ਭੁਮ੍ਮਂ। ਅਨਾਗਾਮਿਫਲਞ੍ਹਿ ਪਤ੍વਾ ਅਕੁਸਲਸਙ੍ਕਪ੍ਪਾ ਅਪਰਿਸੇਸਾ ਨਿਰੁਜ੍ਝਨ੍ਤਿ।
Paṭhamaṃjhānanti anāgāmiphalapaṭhamajjhānaṃ. Ettheteti anāgāmiphale bhummaṃ. Anāgāmiphalañhi patvā akusalasaṅkappā aparisesā nirujjhanti.
ਨਿਰੋਧਾਯ ਪਟਿਪਨ੍ਨੋਤਿ ਏਤ੍ਥ ਯਾવ ਅਨਾਗਾਮਿਮਗ੍ਗਾ ਨਿਰੋਧਾਯ ਪਟਿਪਨ੍ਨੋ ਨਾਮ ਹੋਤਿ, ਫਲਪਤ੍ਤੇ ਪਨ ਤੇ ਨਿਰੋਧਿਤਾ ਨਾਮ ਹੋਨ੍ਤਿ। ਨੇਕ੍ਖਮ੍ਮਸਞ੍ਞਾਦਯੋ ਹਿ ਤਿਸ੍ਸੋਪਿ ਅਟ੍ਠਕਾਮਾવਚਰਕੁਸਲਸਹਜਾਤਸਞ੍ਞਾવ।
Nirodhāya paṭipannoti ettha yāva anāgāmimaggā nirodhāya paṭipanno nāma hoti, phalapatte pana te nirodhitā nāma honti. Nekkhammasaññādayo hi tissopi aṭṭhakāmāvacarakusalasahajātasaññāva.
੨੬੭. ਏਤ੍ਥੇਤੇਤਿ ਅਰਹਤ੍ਤਫਲੇ ਭੁਮ੍ਮਂ। ਦੁਤਿਯਜ੍ਝਾਨਿਕਂ ਅਰਹਤ੍ਤਫਲਞ੍ਹਿ ਪਾਪੁਣਿਤ੍વਾ ਕੁਸਲਸਙ੍ਕਪ੍ਪਾ ਅਪਰਿਸੇਸਾ ਨਿਰੁਜ੍ਝਨ੍ਤਿ। ਨਿਰੋਧਾਯ ਪਟਿਪਨ੍ਨੋਤਿ ਏਤ੍ਥ ਯਾવ ਅਰਹਤ੍ਤਮਗ੍ਗਾ ਨਿਰੋਧਾਯ ਪਟਿਪਨ੍ਨੋ ਨਾਮ ਹੋਤਿ, ਫਲਪਤ੍ਤੇ ਪਨ ਤੇ ਨਿਰੋਧਿਤਾ ਨਾਮ ਹੋਨ੍ਤਿ। ਸੇਸਂ ਸਬ੍ਬਤ੍ਥ ਉਤ੍ਤਾਨਮੇવਾਤਿ।
267.Ettheteti arahattaphale bhummaṃ. Dutiyajjhānikaṃ arahattaphalañhi pāpuṇitvā kusalasaṅkappā aparisesā nirujjhanti. Nirodhāya paṭipannoti ettha yāva arahattamaggā nirodhāya paṭipanno nāma hoti, phalapatte pana te nirodhitā nāma honti. Sesaṃ sabbattha uttānamevāti.
ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ
Papañcasūdaniyā majjhimanikāyaṭṭhakathāya
ਸਮਣਮੁਣ੍ਡਿਕਸੁਤ੍ਤવਣ੍ਣਨਾ ਨਿਟ੍ਠਿਤਾ।
Samaṇamuṇḍikasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਮਜ੍ਝਿਮਨਿਕਾਯ • Majjhimanikāya / ੮. ਸਮਣਮੁਣ੍ਡਿਕਸੁਤ੍ਤਂ • 8. Samaṇamuṇḍikasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਮਜ੍ਝਿਮਨਿਕਾਯ (ਟੀਕਾ) • Majjhimanikāya (ṭīkā) / ੮. ਸਮਣਮੁਣ੍ਡਿਕਾਪੁਤ੍ਤਸੁਤ੍ਤવਣ੍ਣਨਾ • 8. Samaṇamuṇḍikāputtasuttavaṇṇanā
