| Library / Tipiṭaka / ತಿಪಿಟಕ • Tipiṭaka / ಇತಿವುತ್ತಕ-ಅಟ್ಠಕಥಾ • Itivuttaka-aṭṭhakathā |
೪. ಸಮಣಬ್ರಾಹ್ಮಣಸುತ್ತವಣ್ಣನಾ
4. Samaṇabrāhmaṇasuttavaṇṇanā
೧೦೩. ಚತುತ್ಥೇ ಯೇ ಹಿ ಕೇಚೀತಿ ಯೇ ಕೇಚಿ। ಇದಂ ದುಕ್ಖನ್ತಿ ಯಥಾಭೂತಂ ನಪ್ಪಜಾನನ್ತೀತಿ ‘‘ಇದಂ ದುಕ್ಖಂ, ಏತ್ತಕಂ ದುಕ್ಖಂ, ನ ಇತೋ ಭಿಯ್ಯೋ’’ತಿ ಅವಿಪರೀತಂ ಸಭಾವಸರಸಲಕ್ಖಣತೋ ವಿಪಸ್ಸನಾಪಞ್ಞಾಸಹಿತಾಯ ಮಗ್ಗಪಞ್ಞಾಯ ದುಕ್ಖಸಚ್ಚಂ ನ ಜಾನನ್ತಿ ನ ಪಟಿವಿಜ್ಝನ್ತಿ। ಸೇಸೇಸುಪಿ ಏಸೇವ ನಯೋ। ನ ಮೇ ತೇ, ಭಿಕ್ಖವೇತಿಆದೀಸು ಅಯಂ ಸಙ್ಖೇಪತ್ಥೋ – ಭಿಕ್ಖವೇ, ಚತುಸಚ್ಚಕಮ್ಮಟ್ಠಾನಂ ಅನನುಯುತ್ತಾ ಪಬ್ಬಜ್ಜಾಮತ್ತಸಮಣಾ ಚೇವ ಜಾತಿಮತ್ತಬ್ರಾಹ್ಮಣಾ ಚ ನ ಮಯಾ ತೇ ಸಮಿತಪಾಪಸಮಣೇಸು ಸಮಣೋತಿ, ಬಾಹಿತಪಾಪಬ್ರಾಹ್ಮಣೇಸು ಬ್ರಾಹ್ಮಣೋತಿ ಚ ಸಮ್ಮತಾ ಅನುಞ್ಞಾತಾ। ಕಸ್ಮಾ? ಸಮಣಕರಣಾನಂ ಬ್ರಾಹ್ಮಣಕರಣಾನಞ್ಚ ಧಮ್ಮಾನಂ ಅಭಾವತೋತಿ। ತೇನೇವಾಹ ‘‘ನ ಚ ಪನ ತೇ ಆಯಸ್ಮನ್ತೋ’’ತಿಆದಿ। ತತ್ಥ ಸಾಮಞ್ಞತ್ಥನ್ತಿ ಸಾಮಞ್ಞಸಙ್ಖಾತಂ ಅತ್ಥಂ, ಚತ್ತಾರಿ ಸಾಮಞ್ಞಫಲಾನೀತಿ ಅತ್ಥೋ। ಬ್ರಹ್ಮಞ್ಞತ್ಥನ್ತಿ ತಸ್ಸೇವ ವೇವಚನಂ। ಅಪರೇ ಪನ ‘‘ಸಾಮಞ್ಞತ್ಥನ್ತಿ ಚತ್ತಾರೋ ಅರಿಯಮಗ್ಗಾ, ಬ್ರಹ್ಮಞ್ಞತ್ಥನ್ತಿ ಚತ್ತಾರಿ ಅರಿಯಫಲಾನೀ’’ತಿ ವದನ್ತಿ। ಸೇಸಂ ವುತ್ತನಯಮೇವ। ಸುಕ್ಕಪಕ್ಖೋ ವುತ್ತವಿಪರಿಯಾಯೇನ ವೇದಿತಬ್ಬೋ। ಗಾಥಾಸು ಅಪುಬ್ಬಂ ನತ್ಥಿ।
103. Catutthe ye hi kecīti ye keci. Idaṃ dukkhanti yathābhūtaṃ nappajānantīti ‘‘idaṃ dukkhaṃ, ettakaṃ dukkhaṃ, na ito bhiyyo’’ti aviparītaṃ sabhāvasarasalakkhaṇato vipassanāpaññāsahitāya maggapaññāya dukkhasaccaṃ na jānanti na paṭivijjhanti. Sesesupi eseva nayo. Na me te, bhikkhavetiādīsu ayaṃ saṅkhepattho – bhikkhave, catusaccakammaṭṭhānaṃ ananuyuttā pabbajjāmattasamaṇā ceva jātimattabrāhmaṇā ca na mayā te samitapāpasamaṇesu samaṇoti, bāhitapāpabrāhmaṇesu brāhmaṇoti ca sammatā anuññātā. Kasmā? Samaṇakaraṇānaṃ brāhmaṇakaraṇānañca dhammānaṃ abhāvatoti. Tenevāha ‘‘na ca pana te āyasmanto’’tiādi. Tattha sāmaññatthanti sāmaññasaṅkhātaṃ atthaṃ, cattāri sāmaññaphalānīti attho. Brahmaññatthanti tasseva vevacanaṃ. Apare pana ‘‘sāmaññatthanti cattāro ariyamaggā, brahmaññatthanti cattāri ariyaphalānī’’ti vadanti. Sesaṃ vuttanayameva. Sukkapakkho vuttavipariyāyena veditabbo. Gāthāsu apubbaṃ natthi.
ಚತುತ್ಥಸುತ್ತವಣ್ಣನಾ ನಿಟ್ಠಿತಾ।
Catutthasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಇತಿವುತ್ತಕಪಾಳಿ • Itivuttakapāḷi / ೪. ಸಮಣಬ್ರಾಹ್ಮಣಸುತ್ತಂ • 4. Samaṇabrāhmaṇasuttaṃ
