| Library / Tipiṭaka / তিপিটক • Tipiṭaka / সুত্তনিপাত-অট্ঠকথা • Suttanipāta-aṭṭhakathā |
৮. সল্লসুত্তৰণ্ণনা
8. Sallasuttavaṇṇanā
৫৮০. অনিমিত্তন্তি সল্লসুত্তং। কা উপ্পত্তি? ভগৰতো কির উপট্ঠাকো একো উপাসকো, তস্স পুত্তো কালমকাসি। সো পুত্তসোকাভিভূতো সত্তাহং নিরাহারো অহোসি। তং অনুকম্পন্তো ভগৰা তস্স ঘরং গন্ত্ৰা সোকৰিনোদনত্থং ইমং সুত্তমভাসি।
580.Animittanti sallasuttaṃ. Kā uppatti? Bhagavato kira upaṭṭhāko eko upāsako, tassa putto kālamakāsi. So puttasokābhibhūto sattāhaṃ nirāhāro ahosi. Taṃ anukampanto bhagavā tassa gharaṃ gantvā sokavinodanatthaṃ imaṃ suttamabhāsi.
তত্থ অনিমত্তন্তি কিরিযাকারনিমিত্তৰিরহিতং। যথা হি ‘‘যদাহং অক্খিং ৰা নিখণিস্সামি, ভমুকং ৰা উক্খিপিস্সামি, তেন নিমিত্তেন তং ভণ্ডং অৰহরা’’তিআদীসু কিরিযাকারনিমিত্তমত্থি, ন এৰং জীৰিতে। ন হি সক্কা লদ্ধুং ‘‘যাৰাহং ইদং ৰা ইদং ৰা করোমি, তাৰ ত্ৰং জীৰ, মা মীযা’’তি। অনঞ্ঞাতন্তি অতো এৰ ন সক্কা একংসেন অঞ্ঞাতুং ‘‘এত্তকং ৰা এত্তকং ৰা কালং ইমিনা জীৰিতব্ব’’ন্তি গতিযা আযুপরিযন্তৰসেন ৰা। যথা হি চাতুমহারাজিকাদীনং পরিমিতং আযু, ন তথা মচ্চানং, এৰম্পি একংসেন অনঞ্ঞাতং।
Tattha animattanti kiriyākāranimittavirahitaṃ. Yathā hi ‘‘yadāhaṃ akkhiṃ vā nikhaṇissāmi, bhamukaṃ vā ukkhipissāmi, tena nimittena taṃ bhaṇḍaṃ avaharā’’tiādīsu kiriyākāranimittamatthi, na evaṃ jīvite. Na hi sakkā laddhuṃ ‘‘yāvāhaṃ idaṃ vā idaṃ vā karomi, tāva tvaṃ jīva, mā mīyā’’ti. Anaññātanti ato eva na sakkā ekaṃsena aññātuṃ ‘‘ettakaṃ vā ettakaṃ vā kālaṃ iminā jīvitabba’’nti gatiyā āyupariyantavasena vā. Yathā hi cātumahārājikādīnaṃ parimitaṃ āyu, na tathā maccānaṃ, evampi ekaṃsena anaññātaṃ.
কসিরন্তি অনেকপচ্চযপটিবদ্ধৰুত্তিভাৰতো কিচ্ছং ন সুখযাপনীযং। তথা হি তং অস্সাসপটিবদ্ধঞ্চ, পস্সাসপটিবদ্ধঞ্চ, মহাভূতপটিবদ্ধঞ্চ, কবল়ীকারাহারপটিবদ্ধঞ্চ, উস্মাপটিবদ্ধঞ্চ, ৰিঞ্ঞাণপটিবদ্ধঞ্চ। অনস্সসন্তোপি হি ন জীৰতি অপস্সসন্তোপি। চতূসু চ ধাতূসু কট্ঠমুখাদিআসীৰিসদট্ঠো ৰিয কাযো পথৰীধাতুপ্পকোপেন তাৰ থদ্ধো হোতি কলিঙ্গরসদিসো। যথাহ –
Kasiranti anekapaccayapaṭibaddhavuttibhāvato kicchaṃ na sukhayāpanīyaṃ. Tathā hi taṃ assāsapaṭibaddhañca, passāsapaṭibaddhañca, mahābhūtapaṭibaddhañca, kabaḷīkārāhārapaṭibaddhañca, usmāpaṭibaddhañca, viññāṇapaṭibaddhañca. Anassasantopi hi na jīvati apassasantopi. Catūsu ca dhātūsu kaṭṭhamukhādiāsīvisadaṭṭho viya kāyo pathavīdhātuppakopena tāva thaddho hoti kaliṅgarasadiso. Yathāha –
‘‘পত্থদ্ধো ভৰতী কাযো, দট্ঠো কট্ঠমুখেন ৰা।
‘‘Patthaddho bhavatī kāyo, daṭṭho kaṭṭhamukhena vā;
পথৰীধাতুপ্পকোপেন, হোতি কট্ঠমুখেৰ সো’’তি॥ (ধ॰ স॰ অট্ঠ॰ ৫৮৪)।
Pathavīdhātuppakopena, hoti kaṭṭhamukheva so’’ti. (dha. sa. aṭṭha. 584);
আপোধাতুপ্পকোপেন পূতিভাৰং আপজ্জিত্ৰা পগ্ঘরিতপুব্বমংসলোহিতো অট্ঠিচম্মাৰসেসো হোতি। যথাহ –
Āpodhātuppakopena pūtibhāvaṃ āpajjitvā paggharitapubbamaṃsalohito aṭṭhicammāvaseso hoti. Yathāha –
‘‘পূতিকো ভৰতী কাযো, দট্ঠো পূতিমুখেন ৰা।
‘‘Pūtiko bhavatī kāyo, daṭṭho pūtimukhena vā;
আপোধাতুপ্পকোপেন, হোতি পূতিমুখেৰ সো’’তি॥ (ধ॰ স॰ অট্ঠ॰ ৫৮৪)।
Āpodhātuppakopena, hoti pūtimukheva so’’ti. (dha. sa. aṭṭha. 584);
তেজোধাতুপ্পকোপেন অঙ্গারকাসুযং পক্খিত্তো ৰিয সমন্তা পরিডয্হতি। যথাহ –
Tejodhātuppakopena aṅgārakāsuyaṃ pakkhitto viya samantā pariḍayhati. Yathāha –
‘‘সন্তত্তো ভৰতী কাযো, দট্ঠো অগ্গিমুখেন ৰা।
‘‘Santatto bhavatī kāyo, daṭṭho aggimukhena vā;
তেজোধাতুপ্পকোপেন, হোতি অগ্গিমুখেৰ সো’’তি॥ (ধ॰ স॰ অট্ঠ॰ ৫৮৪)।
Tejodhātuppakopena, hoti aggimukheva so’’ti. (dha. sa. aṭṭha. 584);
ৰাযোধাতুপ্পকোপেন সঞ্ছিজ্জমানসন্ধিবন্ধনো পাসাণেহি কোট্টেত্ৰা সঞ্চুণ্ণিযমানট্ঠিকো ৰিয চ হোতি। যথাহ –
Vāyodhātuppakopena sañchijjamānasandhibandhano pāsāṇehi koṭṭetvā sañcuṇṇiyamānaṭṭhiko viya ca hoti. Yathāha –
‘‘সঞ্ছিন্নো ভৰতী কাযো, দট্ঠো সত্থমুখেন ৰা।
‘‘Sañchinno bhavatī kāyo, daṭṭho satthamukhena vā;
ৰাযোধাতুপ্পকোপেন, হোতি সত্থমুখেৰ সো’’তি॥ (ধ॰ স॰ অট্ঠ॰ ৫৮৪)।
Vāyodhātuppakopena, hoti satthamukheva so’’ti. (dha. sa. aṭṭha. 584);
ধাতুপ্পকোপব্যাপন্নকাযোপি চ ন জীৰতি। যদা পন তা ধাতুযো অঞ্ঞমঞ্ঞং পতিট্ঠানাদিকিচ্চং সাধেন্তাপি সমং ৰহন্তি, তদা জীৰিতং পৰত্ততি। এৰং মহাভূতপটিবদ্ধঞ্চ জীৰিতং। দুব্ভিক্খাদীসু পন আহারুপচ্ছেদেন সত্তানং জীৰিতক্খযো পাকটো এৰ। এৰং কবল়ীকারাহারপটিবদ্ধঞ্চ জীৰিতং। তথা অসিতপীতাদিপরিপাকে কম্মজতেজে খীণে সত্তা জীৰিতক্খযং পাপুণন্তাপি পাকটা এৰ। এৰং উস্মাপটিবদ্ধঞ্চ জীৰিতং। ৰিঞ্ঞাণে পন নিরুদ্ধে নিরুদ্ধতো পভুতি সত্তানং ন হোতি জীৰিতন্তি এৰম্পি লোকে পাকটমেৰ। এৰং ৰিঞ্ঞাণপটিবদ্ধঞ্চ জীৰিতং। এৰং অনেকপচ্চযপটিবদ্ধৰুত্তিভাৰতো কসিরং ৰেদিতব্বং।
Dhātuppakopabyāpannakāyopi ca na jīvati. Yadā pana tā dhātuyo aññamaññaṃ patiṭṭhānādikiccaṃ sādhentāpi samaṃ vahanti, tadā jīvitaṃ pavattati. Evaṃ mahābhūtapaṭibaddhañca jīvitaṃ. Dubbhikkhādīsu pana āhārupacchedena sattānaṃ jīvitakkhayo pākaṭo eva. Evaṃ kabaḷīkārāhārapaṭibaddhañca jīvitaṃ. Tathā asitapītādiparipāke kammajateje khīṇe sattā jīvitakkhayaṃ pāpuṇantāpi pākaṭā eva. Evaṃ usmāpaṭibaddhañca jīvitaṃ. Viññāṇe pana niruddhe niruddhato pabhuti sattānaṃ na hoti jīvitanti evampi loke pākaṭameva. Evaṃ viññāṇapaṭibaddhañca jīvitaṃ. Evaṃ anekapaccayapaṭibaddhavuttibhāvato kasiraṃ veditabbaṃ.
পরিত্তঞ্চাতি অপ্পকং, দেৰানং জীৰিতং উপনিধায তিণগ্গে উস্সাৰবিন্দুসদিসং, চিত্তক্খণতো উদ্ধং অভাৰেন ৰা পরিত্তং। অতিদীঘাযুকোপি হি সত্তো অতীতেন চিত্তেন জীৰিত্থ ন জীৰতি ন জীৰিস্সতি, অনাগতেন জীৰিস্সতি ন জীৰতি ন জীৰিত্থ, পচ্চুপ্পন্নেন জীৰতি ন জীৰিত্থ ন জীৰিস্সতি। ৰুত্তঞ্চেতং –
Parittañcāti appakaṃ, devānaṃ jīvitaṃ upanidhāya tiṇagge ussāvabindusadisaṃ, cittakkhaṇato uddhaṃ abhāvena vā parittaṃ. Atidīghāyukopi hi satto atītena cittena jīvittha na jīvati na jīvissati, anāgatena jīvissati na jīvati na jīvittha, paccuppannena jīvati na jīvittha na jīvissati. Vuttañcetaṃ –
‘‘জীৰিতং অত্তভাৰো চ, সুখদুক্খা চ কেৰলা।
‘‘Jīvitaṃ attabhāvo ca, sukhadukkhā ca kevalā;
একচিত্তসমাযুত্তা, লহুসো ৰত্ততে খণো॥
Ekacittasamāyuttā, lahuso vattate khaṇo.
‘‘চুল্লাসীতিসহস্সানি , কপ্পা তিট্ঠন্তি যে মরূ।
‘‘Cullāsītisahassāni , kappā tiṭṭhanti ye marū;
নত্ৰেৰ তেপি জীৰন্তি, দ্ৰীহি চিত্তেহি সংযুতা’’তি॥ (মহানি॰ ১০)।
Natveva tepi jīvanti, dvīhi cittehi saṃyutā’’ti. (mahāni. 10);
তঞ্চ দুক্খেন সংযুতন্তি তঞ্চ জীৰিতং এৰং অনিমিত্তমনঞ্ঞাতং কসিরং পরিত্তঞ্চ সমানম্পি সীতুণ্হডংসমকসাদিসম্ফস্সখুপ্পিপাসাসঙ্খারদুক্খৰিপরিণামদুক্খদুক্খদুক্খেহি সংযুতং। কিং ৰুত্তং হোতি? যস্মা ঈদিসং মচ্চানং জীৰিতং, তস্মা ত্ৰং যাৰ তং পরিক্খযং ন গচ্ছতি, তাৰ ধম্মচরিযমেৰ ব্রূহয, মা পুত্তমনুসোচাতি।
Tañca dukkhena saṃyutanti tañca jīvitaṃ evaṃ animittamanaññātaṃ kasiraṃ parittañca samānampi sītuṇhaḍaṃsamakasādisamphassakhuppipāsāsaṅkhāradukkhavipariṇāmadukkhadukkhadukkhehi saṃyutaṃ. Kiṃ vuttaṃ hoti? Yasmā īdisaṃ maccānaṃ jīvitaṃ, tasmā tvaṃ yāva taṃ parikkhayaṃ na gacchati, tāva dhammacariyameva brūhaya, mā puttamanusocāti.
৫৮১. অথাপি মঞ্ঞেয্যাসি ‘‘সব্বূপকরণেহি পুত্তং অনুরক্খন্তস্সাপি মে সো মতো, তেন সোচামী’’তি, এৰম্পি মা সোচি। ন হি সো উপক্কমো অত্থি, যেন জাতা ন মিয্যরে, ন হি সক্কা কেনচি উপক্কমেন জাতা সত্তা মা মরন্তূতি রক্খিতুন্তি ৰুত্তং হোতি। ততো যস্মা সো ‘‘জরং পত্ৰা নাম, ভন্তে, মরণং অনুরূপং, অতিদহরো মে পুত্তো মতো’’তি চিন্তেসি, তস্মা আহ ‘‘জরম্পি পত্ৰা মরণং, এৰংধম্মা হি পাণিনো’’তি, জরং পত্ৰাপি অপ্পত্ৰাপি মরণং, নত্থি এত্থ নিযমোতি ৰুত্তং হোতি।
581. Athāpi maññeyyāsi ‘‘sabbūpakaraṇehi puttaṃ anurakkhantassāpi me so mato, tena socāmī’’ti, evampi mā soci. Na hi so upakkamo atthi, yena jātā na miyyare, na hi sakkā kenaci upakkamena jātā sattā mā marantūti rakkhitunti vuttaṃ hoti. Tato yasmā so ‘‘jaraṃ patvā nāma, bhante, maraṇaṃ anurūpaṃ, atidaharo me putto mato’’ti cintesi, tasmā āha ‘‘jarampi patvā maraṇaṃ, evaṃdhammā hi pāṇino’’ti, jaraṃ patvāpi appatvāpi maraṇaṃ, natthi ettha niyamoti vuttaṃ hoti.
৫৮২. ইদানি তমত্থং নিদস্সনেন সাধেন্তো ‘‘ফলানমিৰ পক্কান’’ন্তিআদিমাহ। তস্সত্থো – যথা ফলানং পক্কানং যস্মা সূরিযুগ্গমনতো পভুতি সূরিযাতপেন সন্তপ্পমানে রুক্খে পথৰিরসো চ আপোরসো চ পত্ততো সাখং সাখতো খন্ধং খন্ধতো মূলন্তি এৰং অনুক্কমেন মূলতো পথৰিমেৰ পৰিসতি, ওগমনতো পভুতি পন পথৰিতো মূলং মূলতো খন্ধন্তি এৰং অনুক্কমেন সাখাপত্তপল্লৰাদীনি পুন আরোহতি, এৰং আরোহন্তো চ পরিপাকগতে ফলে ৰণ্টমূলং ন পৰিসতি। অথ সূরিযাতপেন তপ্পমানে ৰণ্টমূলে পরিল়াহো উপ্পজ্জতি। তেন তানি ফলানি পাতো পাতো নিচ্চকালং পতন্তি, নেসং পাতো পতনতো ভযং হোতি, পতনা ভযং হোতীতি অত্থো। এৰং জাতানং মচ্চানং নিচ্চং মরণতো ভযং । পক্কফলসদিসা হি সত্তাতি।
582. Idāni tamatthaṃ nidassanena sādhento ‘‘phalānamiva pakkāna’’ntiādimāha. Tassattho – yathā phalānaṃ pakkānaṃ yasmā sūriyuggamanato pabhuti sūriyātapena santappamāne rukkhe pathaviraso ca āporaso ca pattato sākhaṃ sākhato khandhaṃ khandhato mūlanti evaṃ anukkamena mūlato pathavimeva pavisati, ogamanato pabhuti pana pathavito mūlaṃ mūlato khandhanti evaṃ anukkamena sākhāpattapallavādīni puna ārohati, evaṃ ārohanto ca paripākagate phale vaṇṭamūlaṃ na pavisati. Atha sūriyātapena tappamāne vaṇṭamūle pariḷāho uppajjati. Tena tāni phalāni pāto pāto niccakālaṃ patanti, nesaṃ pāto patanato bhayaṃ hoti, patanā bhayaṃ hotīti attho. Evaṃ jātānaṃ maccānaṃ niccaṃ maraṇato bhayaṃ . Pakkaphalasadisā hi sattāti.
৫৮৩-৬. কিঞ্চ ভিয্যো ‘‘যথাপি কুম্ভকারস্স…পে॰… জীৰিত’’ন্তি। তস্মা ‘‘দহরা চ…পে॰… পরাযণা’’তি এৰং গণ্হ, এৰঞ্চ গহেত্ৰা ‘‘তেসং মচ্চু…পে॰… ঞাতী ৰা পন ঞাতকে’’তি এৰম্পি গণ্হ। যস্মা চ ন পিতা তাযতে পুত্তং, ঞাতী ৰা পন ঞাতকে, তস্মা পেক্খতংযেৰ…পে॰… নীযতি।
583-6. Kiñca bhiyyo ‘‘yathāpi kumbhakārassa…pe… jīvita’’nti. Tasmā ‘‘daharā ca…pe… parāyaṇā’’ti evaṃ gaṇha, evañca gahetvā ‘‘tesaṃ maccu…pe… ñātī vā pana ñātake’’ti evampi gaṇha. Yasmā ca na pitā tāyate puttaṃ, ñātī vā pana ñātake, tasmā pekkhataṃyeva…pe… nīyati.
তত্থ অযং যোজনা – পস্সমানানংযেৰ ঞাতীনং ‘‘অম্ম, তাতা’’তিআদিনা নযেন পুথু অনেকপ্পকারকং লালপতংযেৰ মচ্চানং একমেকো মচ্চো যথা গো ৰজ্ঝো এৰং নীযতি, এৰং পস্স, উপাসক, যাৰ অতাণো লোকোতি।
Tattha ayaṃ yojanā – passamānānaṃyeva ñātīnaṃ ‘‘amma, tātā’’tiādinā nayena puthu anekappakārakaṃ lālapataṃyeva maccānaṃ ekameko macco yathā go vajjho evaṃ nīyati, evaṃ passa, upāsaka, yāva atāṇo lokoti.
৫৮৭. তত্থ যে বুদ্ধপচ্চেকবুদ্ধাদযো ধিতিসম্পন্না, তে ‘‘এৰমব্ভাহতো লোকো মচ্চুনা চ জরায চ, সো ন সক্কা কেনচি পরিত্তাণং কাতু’’ন্তি যস্মা জানন্তি, তস্মা ধীরা ন সোচন্তি ৰিদিত্ৰা লোকপরিযাযং। ইমং লোকসভাৰং ঞত্ৰা ন সোচন্তীতি ৰুত্তং হোতি।
587. Tattha ye buddhapaccekabuddhādayo dhitisampannā, te ‘‘evamabbhāhato loko maccunā ca jarāya ca, so na sakkā kenaci parittāṇaṃ kātu’’nti yasmā jānanti, tasmā dhīrā na socanti viditvā lokapariyāyaṃ. Imaṃ lokasabhāvaṃ ñatvā na socantīti vuttaṃ hoti.
৫৮৮. ত্ৰং পন যস্স মগ্গং…পে॰… পরিদেৰসি। কিং ৰুত্তং হোতি? যস্স মাতুকুচ্ছিং আগতস্স আগতমগ্গং ৰা ইতো চৰিত্ৰা অঞ্ঞত্থ গতস্স গতমগ্গং ৰা ন জানাসি, তস্স ইমে উভো অন্তে অসম্পস্সং নিরত্থং পরিদেৰসি। ধীরা পন তে পস্সন্তা ৰিদিত্ৰা লোকপরিযাযং ন সোচন্তীতি।
588. Tvaṃ pana yassa maggaṃ…pe… paridevasi. Kiṃ vuttaṃ hoti? Yassa mātukucchiṃ āgatassa āgatamaggaṃ vā ito cavitvā aññattha gatassa gatamaggaṃ vā na jānāsi, tassa ime ubho ante asampassaṃ niratthaṃ paridevasi. Dhīrā pana te passantā viditvā lokapariyāyaṃ na socantīti.
৫৮৯. ইদানি ‘‘নিরত্থং পরিদেৰসী’’তি এত্থ ৰুত্তপরিদেৰনায নিরত্থকভাৰং সাধেন্তো ‘‘পরিদেৰযমানো চে’’তিআদিমাহ। তত্থ উদব্বহেতি উব্বহেয্য ধারেয্য, অত্তনি সঞ্জনেয্যাতি অত্থো। সম্মূল়্হো হিংসমত্তানন্তি সম্মূল়্হো হুত্ৰা অত্তানং বাধেন্তো। কযিরা চে নং ৰিচক্খণোতি যদি তাদিসো কঞ্চি অত্থং উদব্বহে, ৰিচক্খণোপি নং পরিদেৰং করেয্য।
589. Idāni ‘‘niratthaṃ paridevasī’’ti ettha vuttaparidevanāya niratthakabhāvaṃ sādhento ‘‘paridevayamāno ce’’tiādimāha. Tattha udabbaheti ubbaheyya dhāreyya, attani sañjaneyyāti attho. Sammūḷho hiṃsamattānanti sammūḷho hutvā attānaṃ bādhento. Kayirā ce naṃ vicakkhaṇoti yadi tādiso kañci atthaṃ udabbahe, vicakkhaṇopi naṃ paridevaṃ kareyya.
৫৯০. ন হি রুণ্ণেনাতি এত্থাযং যোজনা – ন পন কোচি রুণ্ণেন ৰা সোকেন ৰা চেতসো সন্তিং পপ্পোতি, অপিচ খো পন রোদতো সোচতো চ ভিয্যো অস্স উপ্পজ্জতে দুক্খং, সরীরঞ্চ দুব্বণ্ণিযাদীহি উপহঞ্ঞতীতি।
590.Na hi ruṇṇenāti etthāyaṃ yojanā – na pana koci ruṇṇena vā sokena vā cetaso santiṃ pappoti, apica kho pana rodato socato ca bhiyyo assa uppajjate dukkhaṃ, sarīrañca dubbaṇṇiyādīhi upahaññatīti.
৫৯১. ন তেন পেতাতি তেন পরিদেৰনেন কালকতা ন পালেন্তি ন যাপেন্তি, ন তং তেসং উপকারায হোতি। তস্মা নিরত্থা পরিদেৰনাতি।
591.Na tena petāti tena paridevanena kālakatā na pālenti na yāpenti, na taṃ tesaṃ upakārāya hoti. Tasmā niratthā paridevanāti.
৫৯২. ন কেৰলঞ্চ নিরত্থা, অনত্থম্পি আৰহতি। কস্মা? যস্মা সোকমপ্পজহং …পে॰… ৰসমন্ৰগূ। তত্থ অনুত্থুনন্তোতি অনুসোচন্তো। ৰসমন্ৰগূতি ৰসং গতো।
592. Na kevalañca niratthā, anatthampi āvahati. Kasmā? Yasmā sokamappajahaṃ…pe… vasamanvagū. Tattha anutthunantoti anusocanto. Vasamanvagūti vasaṃ gato.
৫৯৩. এৰম্পি নিরত্থকত্তং অনত্থাৰহত্তঞ্চ সোকস্স দস্সেত্ৰা ইদানি সোকৰিনযত্থং ওৰদন্তো ‘‘অঞ্ঞেপি পস্সা’’তিআদিমাহ। তত্থ গমিনেতি গমিকে, পরলোকগমনসজ্জে ঠিতেতি ৰুত্তং হোতি। ফন্দন্তেৰিধ পাণিনোতি মরণভযেন ফন্দমানেযেৰ ইধ সত্তে।
593. Evampi niratthakattaṃ anatthāvahattañca sokassa dassetvā idāni sokavinayatthaṃ ovadanto ‘‘aññepi passā’’tiādimāha. Tattha gamineti gamike, paralokagamanasajje ṭhiteti vuttaṃ hoti. Phandantevidha pāṇinoti maraṇabhayena phandamāneyeva idha satte.
৫৯৪. যেন যেনাতি যেনাকারেন মঞ্ঞন্তি ‘‘দীঘাযুকো ভৰিস্সতি, অরোগো ভৰিস্সতী’’তি। ততো তং অঞ্ঞথাযেৰ হোতি, সো এৰং মঞ্ঞিতো মরতিপি, রোগীপি হোতি। এতাদিসো অযং ৰিনাভাৰো মঞ্ঞিতপ্পচ্চনীকেন হোতি, পস্স, উপাসক, লোকসভাৰন্তি এৰমেত্থ অধিপ্পাযযোজনা ৰেদিতব্বা।
594.Yena yenāti yenākārena maññanti ‘‘dīghāyuko bhavissati, arogo bhavissatī’’ti. Tato taṃ aññathāyeva hoti, so evaṃ maññito maratipi, rogīpi hoti. Etādiso ayaṃ vinābhāvo maññitappaccanīkena hoti, passa, upāsaka, lokasabhāvanti evamettha adhippāyayojanā veditabbā.
৫৯৬. অরহতো সুত্ৰাতি ইমং এৰরূপং অরহতো ধম্মদেসনং সুত্ৰা। নেসো লব্ভা মযা ইতীতি সো পেতো ‘‘ইদানি মযা পুন জীৰতূ’’তি ন লব্ভা ইতি পরিজানন্তো, ৰিনেয্য পরিদেৰিতন্তি ৰুত্তং হোতি।
596.Arahato sutvāti imaṃ evarūpaṃ arahato dhammadesanaṃ sutvā. Neso labbhā mayā itīti so peto ‘‘idāni mayā puna jīvatū’’ti na labbhā iti parijānanto, vineyya paridevitanti vuttaṃ hoti.
৫৯৭. কিঞ্চ ভিয্যো – ‘‘যথা সরণমাদিত্তং…পে॰… ধংসযে’’তি। তত্থ ধীরো ধিতিসম্পদায, সপঞ্ঞো সাভাৰিকপঞ্ঞায, পণ্ডিতো বাহুসচ্চপঞ্ঞায, কুসলো চিন্তকজাতিকতায ৰেদিতব্বো। চিন্তামযসুতমযভাৰনামযপঞ্ঞাহি ৰা যোজেতব্বং।
597. Kiñca bhiyyo – ‘‘yathā saraṇamādittaṃ…pe… dhaṃsaye’’ti. Tattha dhīro dhitisampadāya, sapañño sābhāvikapaññāya, paṇḍito bāhusaccapaññāya, kusalo cintakajātikatāya veditabbo. Cintāmayasutamayabhāvanāmayapaññāhi vā yojetabbaṃ.
৫৯৮-৯. ন কেৰলঞ্চ সোকমেৰ, পরিদেৰং…পে॰… সল্লমত্তনো। তত্থ পজপ্পন্তি তণ্হং। দোমনস্সন্তি চেতসিকদুক্খং। অব্বহেতি উদ্ধরে। সল্লন্তি এতমেৰ তিপ্পকারং দুন্নীহরণট্ঠেন অন্তোৰিজ্ঝনট্ঠেন চ সল্লং। পুব্বে ৰুত্তং সত্তৰিধং রাগাদিসল্লং ৰা। এতস্মিঞ্হি অব্বূল়্হে সল্লে অব্বূল়্হসল্লো…পে॰… নিব্বুতোতি অরহত্তনিকূটেন দেসনং নিট্ঠাপেসি। তত্থ অসিতোতি তণ্হাদিট্ঠীহি অনিস্সিতো। পপ্পুয্যাতি পাপুণিত্ৰা। সেসং ইধ ইতো পুব্বে ৰুত্তত্তা উত্তানত্থমেৰ, তস্মা ন ৰণ্ণিতং।
598-9. Na kevalañca sokameva, paridevaṃ…pe… sallamattano. Tattha pajappanti taṇhaṃ. Domanassanti cetasikadukkhaṃ. Abbaheti uddhare. Sallanti etameva tippakāraṃ dunnīharaṇaṭṭhena antovijjhanaṭṭhena ca sallaṃ. Pubbe vuttaṃ sattavidhaṃ rāgādisallaṃ vā. Etasmiñhi abbūḷhe salle abbūḷhasallo…pe… nibbutoti arahattanikūṭena desanaṃ niṭṭhāpesi. Tattha asitoti taṇhādiṭṭhīhi anissito. Pappuyyāti pāpuṇitvā. Sesaṃ idha ito pubbe vuttattā uttānatthameva, tasmā na vaṇṇitaṃ.
পরমত্থজোতিকায খুদ্দক-অট্ঠকথায
Paramatthajotikāya khuddaka-aṭṭhakathāya
সুত্তনিপাত-অট্ঠকথায সল্লসুত্তৰণ্ণনা নিট্ঠিতা।
Suttanipāta-aṭṭhakathāya sallasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / সুত্তনিপাতপাল়ি • Suttanipātapāḷi / ৮. সল্লসুত্তং • 8. Sallasuttaṃ
