| Library / Tipiṭaka / តិបិដក • Tipiṭaka / អបទានបាឡិ • Apadānapāḷi |
១០. សឡលបុប្ផិយត្ថេរអបទានំ
10. Saḷalapupphiyattheraapadānaṃ
៣៥.
35.
‘‘ចន្ទភាគានទីតីរេ , អហោសិំ កិន្នរោ តទា;
‘‘Candabhāgānadītīre , ahosiṃ kinnaro tadā;
តត្ថទ្ទសំ ទេវទេវំ, ចង្កមន្តំ នរាសភំ។
Tatthaddasaṃ devadevaṃ, caṅkamantaṃ narāsabhaṃ.
៣៦.
36.
‘‘ឱចិនិត្វាន សឡលំ, បុប្ផំ ពុទ្ធស្សទាសហំ;
‘‘Ocinitvāna saḷalaṃ, pupphaṃ buddhassadāsahaṃ;
ឧបសិង្ឃិ មហាវីរោ, សឡលំ ទេវគន្ធិកំ។
Upasiṅghi mahāvīro, saḷalaṃ devagandhikaṃ.
៣៧.
37.
‘‘បដិគ្គហេត្វា សម្ពុទ្ធោ, វិបស្សី លោកនាយកោ;
‘‘Paṭiggahetvā sambuddho, vipassī lokanāyako;
ឧបសិង្ឃិ មហាវីរោ, បេក្ខមានស្ស មេ សតោ។
Upasiṅghi mahāvīro, pekkhamānassa me sato.
៣៨.
38.
‘‘បសន្នចិត្តោ សុមនោ, វន្ទិត្វា ទ្វិបទុត្តមំ;
‘‘Pasannacitto sumano, vanditvā dvipaduttamaṃ;
អញ្ជលិំ បគ្គហេត្វាន, បុន បព្ពតមារុហិំ។
Añjaliṃ paggahetvāna, puna pabbatamāruhiṃ.
៣៩.
39.
‘‘ឯកនវុតិតោ កប្បេ, យំ បុប្ផមភិបូជយិំ;
‘‘Ekanavutito kappe, yaṃ pupphamabhipūjayiṃ;
ទុគ្គតិំ នាភិជានាមិ, ពុទ្ធបូជាយិទំ ផលំ។
Duggatiṃ nābhijānāmi, buddhapūjāyidaṃ phalaṃ.
៤០.
40.
‘‘បដិសម្ភិទា ចតស្សោ…បេ.… កតំ ពុទ្ធស្ស សាសនំ’’។
‘‘Paṭisambhidā catasso…pe… kataṃ buddhassa sāsanaṃ’’.
ឥត្ថំ សុទំ អាយស្មា សឡលបុប្ផិយោ ថេរោ ឥមា គាថាយោ អភាសិត្ថាតិ។
Itthaṃ sudaṃ āyasmā saḷalapupphiyo thero imā gāthāyo abhāsitthāti.
សឡលបុប្ផិយត្ថេរស្សាបទានំ ទសមំ។
Saḷalapupphiyattherassāpadānaṃ dasamaṃ.
មន្ទារវបុប្ផិយវគ្គោ សត្តតិំសតិមោ។
Mandāravapupphiyavaggo sattatiṃsatimo.
តស្សុទ្ទានំ –
Tassuddānaṃ –
មន្ទារវញ្ច កក្ការុ, ភិសកេសរបុប្ផិយោ;
Mandāravañca kakkāru, bhisakesarapupphiyo;
អង្កោលកោ កទម្ពី ច, ឧទ្ទាលី ឯកចម្បកោ;
Aṅkolako kadambī ca, uddālī ekacampako;
តិមិរំ សឡលញ្ចេវ, គាថា តាលីសមេវ ច។
Timiraṃ saḷalañceva, gāthā tālīsameva ca.
