| Library / Tipiṭaka / តិបិដក • Tipiṭaka / អបទានបាឡិ • Apadānapāḷi |
៣៨. ពោធិវន្ទនវគ្គោ
38. Bodhivandanavaggo
១. ពោធិវន្ទកត្ថេរអបទានំ
1. Bodhivandakattheraapadānaṃ
១.
1.
‘‘បាដលិំ ហរិតំ ទិស្វា, បាទបំ ធរណីរុហំ;
‘‘Pāṭaliṃ haritaṃ disvā, pādapaṃ dharaṇīruhaṃ;
ឯកំសំ អញ្ជលិំ កត្វា, អវន្ទិំ បាដលិំ អហំ។
Ekaṃsaṃ añjaliṃ katvā, avandiṃ pāṭaliṃ ahaṃ.
២.
2.
‘‘អញ្ជលិំ បគ្គហេត្វាន, គរុំ កត្វាន មានសំ;
‘‘Añjaliṃ paggahetvāna, garuṃ katvāna mānasaṃ;
អន្តោសុទ្ធំ ពហិសុទ្ធំ, សុវិមុត្តមនាសវំ។
Antosuddhaṃ bahisuddhaṃ, suvimuttamanāsavaṃ.
៣.
3.
‘‘វិបស្សិំ លោកមហិតំ, ករុណាញាណសាគរំ;
‘‘Vipassiṃ lokamahitaṃ, karuṇāñāṇasāgaraṃ;
សម្មុខា វិយ សម្ពុទ្ធំ, អវន្ទិំ បាដលិំ អហំ។
Sammukhā viya sambuddhaṃ, avandiṃ pāṭaliṃ ahaṃ.
៤.
4.
‘‘ឯកនវុតិតោ កប្បេ, យំ ពោធិមភិវន្ទហំ;
‘‘Ekanavutito kappe, yaṃ bodhimabhivandahaṃ;
ទុគ្គតិំ នាភិជានាមិ, វន្ទនាយ ឥទំ ផលំ។
Duggatiṃ nābhijānāmi, vandanāya idaṃ phalaṃ.
៥.
5.
‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;
‘‘Paṭisambhidā catasso, vimokkhāpi ca aṭṭhime;
ឆឡភិញ្ញា សច្ឆិកតា, កតំ ពុទ្ធស្ស សាសនំ’’។
Chaḷabhiññā sacchikatā, kataṃ buddhassa sāsanaṃ’’.
ឥត្ថំ សុទំ អាយស្មា ពោធិវន្ទកោ ថេរោ ឥមា គាថាយោ អភាសិត្ថាតិ។
Itthaṃ sudaṃ āyasmā bodhivandako thero imā gāthāyo abhāsitthāti.
ពោធិវន្ទកត្ថេរស្សាបទានំ បឋមំ។
Bodhivandakattherassāpadānaṃ paṭhamaṃ.
