| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
৪. সালকল্যাণিকঙ্গপঞ্হো
4. Sālakalyāṇikaṅgapañho
৪. ‘‘ভন্তে নাগসেন, ‘সালকল্যাণিকায একং অঙ্গং গহেতব্ব’ন্তি যং ৰদেসি, কতমং তং একং অঙ্গং গহেতব্ব’’ন্তি? ‘‘যথা, মহারাজ, সালকল্যাণিকা নাম অন্তোপথৰিযং যেৰ অভিৰড্ঢতি হত্থসতম্পি ভিয্যোপি, এৰমেৰ খো, মহারাজ, যোগিনা যোগাৰচরেন চত্তারি সামঞ্ঞফলানি চতস্সো পটিসম্ভিদা ছল়ভিঞ্ঞাযো কেৰলঞ্চ সমণধম্মং সুঞ্ঞাগারে যেৰ পরিপূরযিতব্বং। ইদং, মহারাজ, সালকল্যাণিকায একং অঙ্গং গহেতব্বং। ভাসিতম্পেতং, মহারাজ, থেরেন রাহুলেন –
4. ‘‘Bhante nāgasena, ‘sālakalyāṇikāya ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, sālakalyāṇikā nāma antopathaviyaṃ yeva abhivaḍḍhati hatthasatampi bhiyyopi, evameva kho, mahārāja, yoginā yogāvacarena cattāri sāmaññaphalāni catasso paṭisambhidā chaḷabhiññāyo kevalañca samaṇadhammaṃ suññāgāre yeva paripūrayitabbaṃ. Idaṃ, mahārāja, sālakalyāṇikāya ekaṃ aṅgaṃ gahetabbaṃ. Bhāsitampetaṃ, mahārāja, therena rāhulena –
‘‘‘সালকল্যাণিকা নাম, পাদপো ধরণীরুহো।
‘‘‘Sālakalyāṇikā nāma, pādapo dharaṇīruho;
অন্তোপথৰিযং যেৰ, সতহত্থোপি ৰড্ঢতি॥
Antopathaviyaṃ yeva, satahatthopi vaḍḍhati.
‘‘‘যথা কালম্হি সম্পত্তে, পরিপাকেন সো দুমো।
‘‘‘Yathā kālamhi sampatte, paripākena so dumo;
উগ্গঞ্ছিত্ৰান একাহং, সতহত্থোপি ৰড্ঢতি॥
Uggañchitvāna ekāhaṃ, satahatthopi vaḍḍhati.
‘‘‘এৰমেৰাহং মহাৰীর, সালকল্যাণিকা ৰিয।
‘‘‘Evamevāhaṃ mahāvīra, sālakalyāṇikā viya;
অব্ভন্তরে সুঞ্ঞাগারে, ধম্মতো অভিৰড্ঢযি’’’ন্তি॥
Abbhantare suññāgāre, dhammato abhivaḍḍhayi’’’nti.
সালকল্যাণিকঙ্গপঞ্হো চতুত্থো।
Sālakalyāṇikaṅgapañho catuttho.
