| Library / Tipiṭaka / តិបិដក • Tipiṭaka / មិលិន្ទបញ្ហបាឡិ • Milindapañhapāḷi |
៩. សក្កង្គបញ្ហោ
9. Sakkaṅgapañho
៩. ‘‘ភន្តេ នាគសេន, ‘សក្កស្ស តីណិ អង្គានិ គហេតព្ពានី’តិ យំ វទេសិ, កតមានិ តានិ តីណិ អង្គានិ គហេតព្ពានី’’តិ? ‘‘យថា, មហារាជ, សក្កោ ឯកន្តសុខសមប្បិតោ, ឯវមេវ ខោ, មហារាជ, យោគិនា យោគាវចរេន ឯកន្តបវិវេកសុខាភិរតេន ភវិតព្ពំ។ ឥទំ, មហារាជ, សក្កស្ស បឋមំ អង្គំ គហេតព្ពំ។
9. ‘‘Bhante nāgasena, ‘sakkassa tīṇi aṅgāni gahetabbānī’ti yaṃ vadesi, katamāni tāni tīṇi aṅgāni gahetabbānī’’ti? ‘‘Yathā, mahārāja, sakko ekantasukhasamappito, evameva kho, mahārāja, yoginā yogāvacarena ekantapavivekasukhābhiratena bhavitabbaṃ. Idaṃ, mahārāja, sakkassa paṭhamaṃ aṅgaṃ gahetabbaṃ.
‘‘បុន ចបរំ, មហារាជ, សក្កោ ទេវេ ទិស្វា បគ្គណ្ហាតិ, ហាសមភិជនេតិ, ឯវមេវ ខោ, មហារាជ, យោគិនា យោគាវចរេន កុសលេសុ ធម្មេសុ អលីនមតន្ទិតំ សន្តំ មានសំ បគ្គហេតព្ពំ, ហាសមភិជនេតព្ពំ, ឧដ្ឋហិតព្ពំ ឃដិតព្ពំ វាយមិតព្ពំ ។ ឥទំ, មហារាជ, សក្កស្ស ទុតិយំ អង្គំ គហេតព្ពំ។
‘‘Puna caparaṃ, mahārāja, sakko deve disvā paggaṇhāti, hāsamabhijaneti, evameva kho, mahārāja, yoginā yogāvacarena kusalesu dhammesu alīnamatanditaṃ santaṃ mānasaṃ paggahetabbaṃ, hāsamabhijanetabbaṃ, uṭṭhahitabbaṃ ghaṭitabbaṃ vāyamitabbaṃ . Idaṃ, mahārāja, sakkassa dutiyaṃ aṅgaṃ gahetabbaṃ.
‘‘បុន ចបរំ, មហារាជ, សក្កស្ស អនភិរតិ នុប្បជ្ជតិ, ឯវមេវ ខោ, មហារាជ, យោគិនា យោគាវចរេន សុញ្ញាគារេ អនភិរតិ ន ឧប្បាទេតព្ពា។ ឥទំ, មហារាជ, សក្កស្ស តតិយំ អង្គំ គហេតព្ពំ។ ភាសិតម្បេតំ, មហារាជ, ថេរេន សុភូតិនា –
‘‘Puna caparaṃ, mahārāja, sakkassa anabhirati nuppajjati, evameva kho, mahārāja, yoginā yogāvacarena suññāgāre anabhirati na uppādetabbā. Idaṃ, mahārāja, sakkassa tatiyaṃ aṅgaṃ gahetabbaṃ. Bhāsitampetaṃ, mahārāja, therena subhūtinā –
‘‘‘សាសនេ តេ មហាវីរ, យតោ បព្ពជិតោ អហំ;
‘‘‘Sāsane te mahāvīra, yato pabbajito ahaṃ;
នាភិជានាមិ ឧប្បន្នំ, មានសំ កាមសំហិត’’’ន្តិ។
Nābhijānāmi uppannaṃ, mānasaṃ kāmasaṃhita’’’nti.
សក្កង្គបញ្ហោ នវមោ។
Sakkaṅgapañho navamo.
