| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၈. သကလိကသုတ္တဝဏ္ဏနာ
8. Sakalikasuttavaṇṇanā
၃၈. အဋ္ဌမေ မဒ္ဒကုစ္ဆိသ္မိန္တိ ဧဝံနာမကေ ဥယ္ယာနေ။ တဉ္ဟိ အဇာတသတ္တုမ္ဟိ ကုစ္ဆိဂတေ တသ္သ မာတရာ – ‘‘အယံ မယ္ဟံ ကုစ္ဆိဂတော ဂဗ္ဘော ရညော သတ္တု ဘဝိသ္သတိ။ ကိံ မေ ဣမိနာ’’တိ? ဂဗ္ဘပာတနတ္ထံ ကုစ္ဆိ မဒ္ဒာပိတာ။ တသ္မာ ‘‘မဒ္ဒကုစ္ဆီ’’တိ သင္ခံ ဂတံ။ မိဂာနံ ပန အဘယဝာသတ္ထာယ ဒိန္နတ္တာ မိဂဒာယောတိ ဝုစ္စတိ။
38. Aṭṭhame maddakucchisminti evaṃnāmake uyyāne. Tañhi ajātasattumhi kucchigate tassa mātarā – ‘‘ayaṃ mayhaṃ kucchigato gabbho rañño sattu bhavissati. Kiṃ me iminā’’ti? Gabbhapātanatthaṃ kucchi maddāpitā. Tasmā ‘‘maddakucchī’’ti saṅkhaṃ gataṃ. Migānaṃ pana abhayavāsatthāya dinnattā migadāyoti vuccati.
တေန ခော ပန သမယေနာတိ ဧတ္ထ အယံ အနုပုဗ္ဗိကထာ – ဒေဝဒတ္တော ဟိ အဇာတသတ္တုံ နိသ္သာယ ဓနုဂ္ဂဟေ စ ဓနပာလကဉ္စ ပယောဇေတ္ဝာပိ တထာဂတသ္သ ဇီဝိတန္တရာယံ ကာတုံ အသက္ကောန္တော ‘‘သဟတ္ထေနေဝ မာရေသ္သာမီ’’တိ ဂိဇ္ဈကူဋပဗ္ဗတံ အဘိရုဟိတ္ဝာ မဟန္တံ ကူဋာဂာရပ္ပမာဏံ သိလံ ဥက္ခိပိတ္ဝာ, ‘‘သမဏော ဂောတမော စုဏ္ဏဝိစုဏ္ဏော ဟောတူ’’တိ ပဝိဇ္ဈိ။ မဟာထာမဝာ ကိရေသ ပဉ္စန္နံ ဟတ္ထီနံ ဗလံ ဓာရေတိ။ အဋ္ဌာနံ ခော ပနေတံ, ယံ ဗုဒ္ဓာနံ ပရူပက္ကမေန ဇီဝိတန္တရာယော ဘဝေယ္ယာတိ တံ တထာဂတသ္သ သရီရာဘိမုခံ အာဂစ္ဆန္တံ အာကာသေ အညာ သိလာ ဥဋ္ဌဟိတ္ဝာ သမ္ပဋိစ္ဆိ။ ဒ္ဝိန္နံ သိလာနံ သမ္ပဟာရေန မဟန္တော ပာသာဏသ္သ သကလိကာ ဥဋ္ဌဟိတ္ဝာ ဘဂဝတော ပိဋ္ဌိပာဒပရိယန္တံ အဘိဟနိ, ပာဒော မဟာဖရသုနာ ပဟတော ဝိယ သမုဂ္ဂတလောဟိတေန လာခာရသမက္ခိတော ဝိယ အဟောသိ။ ဘဂဝာ ဥဒ္ဓံ ဥလ္လောကေတ္ဝာ ဒေဝဒတ္တံ ဧတဒဝောစ – ‘‘ဗဟု တယာ မောဃပုရိသ, အပုညံ ပသုတံ, ယော တ္ဝံ ပဒုဋ္ဌစိတ္တော ဝဓကစိတ္တော တထာဂတသ္သ လောဟိတံ ဥပ္ပာဒေသီ’’တိ။ တတော ပဋ္ဌာယ ဘဂဝတော အဖာသု ဇာတံ။ ဘိက္ခူ စိန္တယိံသု – ‘‘အယံ ဝိဟာရော ဥဇ္ဇင္ဂလော ဝိသမော, ဗဟူနံ ခတ္တိယာဒီနဉ္စေဝ ပဗ္ဗဇိတာနဉ္စ အနောကာသော’’တိ။ တေ တထာဂတံ မဉ္စသိဝိကာယ အာဒာယ မဒ္ဒကုစ္ဆိံ နယိံသု။ တေန ဝုတ္တံ – ‘‘တေန ခော ပန သမယေန ဘဂဝတော ပာဒော သကလိကာယ ခတော ဟောတီ’’တိ။
Tena kho pana samayenāti ettha ayaṃ anupubbikathā – devadatto hi ajātasattuṃ nissāya dhanuggahe ca dhanapālakañca payojetvāpi tathāgatassa jīvitantarāyaṃ kātuṃ asakkonto ‘‘sahattheneva māressāmī’’ti gijjhakūṭapabbataṃ abhiruhitvā mahantaṃ kūṭāgārappamāṇaṃ silaṃ ukkhipitvā, ‘‘samaṇo gotamo cuṇṇavicuṇṇo hotū’’ti pavijjhi. Mahāthāmavā kiresa pañcannaṃ hatthīnaṃ balaṃ dhāreti. Aṭṭhānaṃ kho panetaṃ, yaṃ buddhānaṃ parūpakkamena jīvitantarāyo bhaveyyāti taṃ tathāgatassa sarīrābhimukhaṃ āgacchantaṃ ākāse aññā silā uṭṭhahitvā sampaṭicchi. Dvinnaṃ silānaṃ sampahārena mahanto pāsāṇassa sakalikā uṭṭhahitvā bhagavato piṭṭhipādapariyantaṃ abhihani, pādo mahāpharasunā pahato viya samuggatalohitena lākhārasamakkhito viya ahosi. Bhagavā uddhaṃ ulloketvā devadattaṃ etadavoca – ‘‘bahu tayā moghapurisa, apuññaṃ pasutaṃ, yo tvaṃ paduṭṭhacitto vadhakacitto tathāgatassa lohitaṃ uppādesī’’ti. Tato paṭṭhāya bhagavato aphāsu jātaṃ. Bhikkhū cintayiṃsu – ‘‘ayaṃ vihāro ujjaṅgalo visamo, bahūnaṃ khattiyādīnañceva pabbajitānañca anokāso’’ti. Te tathāgataṃ mañcasivikāya ādāya maddakucchiṃ nayiṃsu. Tena vuttaṃ – ‘‘tena kho pana samayena bhagavato pādo sakalikāya khato hotī’’ti.
ဘုသာတိ ဗလဝတိယော။ သုဒန္တိ နိပာတမတ္တံ။ ဒုက္ခန္တိ သုခပဋိက္ခေပော။ တိဗ္ဗာတိ ဗဟလာ။ ခရာတိ ဖရုသာ။ ကဋုကာတိ တိခိဏာ။ အသာတာတိ အမဓုရာ။ န တာသု မနော အပ္ပေတိ, န တာ မနံ အပ္ပာယန္တိ ဝဍ္ဎေန္တီတိ အမနာပာ။ သတော သမ္ပဇာနောတိ ဝေဒနာဓိဝာသနသတိသမ္ပဇညေန သမန္နာဂတော ဟုတ္ဝာ။ အဝိဟညမာနောတိ အပီဠိယမာနော, သမ္ပရိဝတ္တသာယိတာယ ဝေဒနာနံ ဝသံ အဂစ္ဆန္တော။
Bhusāti balavatiyo. Sudanti nipātamattaṃ. Dukkhanti sukhapaṭikkhepo. Tibbāti bahalā. Kharāti pharusā. Kaṭukāti tikhiṇā. Asātāti amadhurā. Na tāsu mano appeti, na tā manaṃ appāyanti vaḍḍhentīti amanāpā. Sato sampajānoti vedanādhivāsanasatisampajaññena samannāgato hutvā. Avihaññamānoti apīḷiyamāno, samparivattasāyitāya vedanānaṃ vasaṃ agacchanto.
သီဟသေယ္ယန္တိ ဧတ္ထ ကာမဘောဂိသေယ္ယာ, ပေတသေယ္ယာ, သီဟသေယ္ယာ, တထာဂတသေယ္ယာတိ စတသ္သော သေယ္ယာ။ တတ္ထ ‘‘ယေဘုယ္ယေန, ဘိက္ခဝေ, ကာမဘောဂီ သတ္တာ ဝာမေန ပသ္သေန သေန္တီ’’တိ အယံ ကာမဘောဂိသေယ္ယာ။ တေသု ဟိ ယေဘုယ္ယေန ဒက္ခိဏပသ္သေန သယာနော နာမ နတ္ထိ။ ‘‘ယေဘုယ္ယေန, ဘိက္ခဝေ, ပေတာ ဥတ္တာနာ သေန္တီ’’တိ အယံ ပေတသေယ္ယာ။ အပ္ပမံသလောဟိတတ္တာ ဟိ အဋ္ဌိသင္ဃာဋဇဋိတာ ဧကေန ပသ္သေန သယိတုံ န သက္ကောန္တိ, ဥတ္တာနာဝ သေန္တိ။ ‘‘ယေဘုယ္ယေန, ဘိက္ခဝေ, သီဟော မိဂရာဇာ နင္ဂုဋ္ဌံ အန္တရသတ္ထိမ္ဟိ အနုပက္ခိပိတ္ဝာ ဒက္ခိဏေန ပသ္သေန သေတီ’’တိ အယံ သီဟသေယ္ယာ။ တေဇုသ္သဒတ္တာ ဟိ သီဟော မိဂရာဇာ ဒ္ဝေ ပုရိမပာဒေ ဧကသ္မိံ, ‘ပစ္ဆိမပာဒေ ဧကသ္မိံ ဌာနေ ဌပေတ္ဝာ နင္ဂုဋ္ဌံ အန္တရသတ္ထိမ္ဟိ ပက္ခိပိတ္ဝာ ပုရိမပာဒပစ္ဆိမပာဒနင္ဂုဋ္ဌာနံ ဌိတောကာသံ သလ္လက္ခေတ္ဝာ ဒ္ဝိန္နံ ပုရိမပာဒာနံ မတ္ထကေ သီသံ ဌပေတ္ဝာ သယတိ, ဒိဝသမ္ပိ သယိတ္ဝာ ပဗုဇ္ဈမာနော န ဥတ္ရသန္တော ပဗုဇ္ဈတိ, သီသံ ပန ဥက္ခိပိတ္ဝာ ပုရိမပာဒာဒီနံ ဌိတောကာသံ သလ္လက္ခေတိ’။ သစေ ကိဉ္စိ ဌာနံ ဝိဇဟိတ္ဝာ ဌိတံ ဟောတိ, ‘‘နယိဒံ တုယ္ဟံ ဇာတိယာ, န သူရဘာဝသ္သ အနုရူပ’’န္တိ အနတ္တမနော ဟုတ္ဝာ တတ္ထေဝ သယတိ, န ဂောစရာယ ပက္ကမတိ။ အဝိဇဟိတ္ဝာ ဌိတေ ပန ‘‘တုယ္ဟံ ဇာတိယာ စ သူရဘာဝသ္သ စ အနုရူပမိဒ’’န္တိ ဟဋ္ဌတုဋ္ဌော ဥဋ္ဌာယ သီဟဝိဇမ္ဘိတံ ဝိဇမ္ဘိတ္ဝာ ကေသရဘာရံ ဝိဓုနိတ္ဝာ တိက္ခတ္တုံ သီဟနာဒံ နဒိတ္ဝာ ဂောစရာယ ပက္ကမတိ။ စတုတ္ထဇ္ဈာနသေယ္ယာ ပန ‘‘တထာဂတသေယ္ယာ’’တိ ဝုစ္စတိ။ တာသု ဣဓ သီဟသေယ္ယာ အာဂတာ။ အယဉ္ဟိ တေဇုသ္သဒဣရိယာပထတ္တာ ဥတ္တမသေယ္ယာ နာမ။
Sīhaseyyanti ettha kāmabhogiseyyā, petaseyyā, sīhaseyyā, tathāgataseyyāti catasso seyyā. Tattha ‘‘yebhuyyena, bhikkhave, kāmabhogī sattā vāmena passena sentī’’ti ayaṃ kāmabhogiseyyā. Tesu hi yebhuyyena dakkhiṇapassena sayāno nāma natthi. ‘‘Yebhuyyena, bhikkhave, petā uttānā sentī’’ti ayaṃ petaseyyā. Appamaṃsalohitattā hi aṭṭhisaṅghāṭajaṭitā ekena passena sayituṃ na sakkonti, uttānāva senti. ‘‘Yebhuyyena, bhikkhave, sīho migarājā naṅguṭṭhaṃ antarasatthimhi anupakkhipitvā dakkhiṇena passena setī’’ti ayaṃ sīhaseyyā. Tejussadattā hi sīho migarājā dve purimapāde ekasmiṃ, ‘pacchimapāde ekasmiṃ ṭhāne ṭhapetvā naṅguṭṭhaṃ antarasatthimhi pakkhipitvā purimapādapacchimapādanaṅguṭṭhānaṃ ṭhitokāsaṃ sallakkhetvā dvinnaṃ purimapādānaṃ matthake sīsaṃ ṭhapetvā sayati, divasampi sayitvā pabujjhamāno na utrasanto pabujjhati, sīsaṃ pana ukkhipitvā purimapādādīnaṃ ṭhitokāsaṃ sallakkheti’. Sace kiñci ṭhānaṃ vijahitvā ṭhitaṃ hoti, ‘‘nayidaṃ tuyhaṃ jātiyā, na sūrabhāvassa anurūpa’’nti anattamano hutvā tattheva sayati, na gocarāya pakkamati. Avijahitvā ṭhite pana ‘‘tuyhaṃ jātiyā ca sūrabhāvassa ca anurūpamida’’nti haṭṭhatuṭṭho uṭṭhāya sīhavijambhitaṃ vijambhitvā kesarabhāraṃ vidhunitvā tikkhattuṃ sīhanādaṃ naditvā gocarāya pakkamati. Catutthajjhānaseyyā pana ‘‘tathāgataseyyā’’ti vuccati. Tāsu idha sīhaseyyā āgatā. Ayañhi tejussadairiyāpathattā uttamaseyyā nāma.
ပာဒေ ပာဒန္တိ ဒက္ခိဏပာဒေ ဝာမပာဒံ။ အစ္စာဓာယာတိ အတိအာဓာယ, ဤသကံ အတိက္ကမ္မ ဌပေတ္ဝာ ။ ဂောပ္ဖကေန ဟိ ဂောပ္ဖကေ ဇာဏုနာ ဝာ ဇာဏုမ္ဟိ သင္ဃဋ္ဋိယမာနေ အဘိဏ္ဟံ ဝေဒနာ ဥပ္ပဇ္ဇတိ, စိတ္တံ ဧကဂ္ဂံ န ဟောတိ, သေယ္ယာ အဖာသုကာ ဟောတိ။ ယထာ န သင္ဃဋ္ဋေတိ, ဧဝံ အတိက္ကမ္မ ဌပိတေ ဝေဒနာ နုပ္ပဇ္ဇတိ, စိတ္တံ ဧကဂ္ဂံ ဟောတိ, သေယ္ယာ ဖာသု ဟောတိ။ တသ္မာ ဧဝံ နိပဇ္ဇိ။ သတော သမ္ပဇာနောတိ သယနပရိဂ္ဂာဟကသတိသမ္ပဇညေန သမန္နာဂတော။ ‘‘ဥဋ္ဌာနသည’’န္တိ ပနေတ္ထ န ဝုတ္တံ, ဂိလာနသေယ္ယာ ဟေသာ တထာဂတသ္သ။
Pāde pādanti dakkhiṇapāde vāmapādaṃ. Accādhāyāti atiādhāya, īsakaṃ atikkamma ṭhapetvā . Gopphakena hi gopphake jāṇunā vā jāṇumhi saṅghaṭṭiyamāne abhiṇhaṃ vedanā uppajjati, cittaṃ ekaggaṃ na hoti, seyyā aphāsukā hoti. Yathā na saṅghaṭṭeti, evaṃ atikkamma ṭhapite vedanā nuppajjati, cittaṃ ekaggaṃ hoti, seyyā phāsu hoti. Tasmā evaṃ nipajji. Sato sampajānoti sayanapariggāhakasatisampajaññena samannāgato. ‘‘Uṭṭhānasañña’’nti panettha na vuttaṃ, gilānaseyyā hesā tathāgatassa.
သတ္တသတာတိ ဣမသ္မိံ သုတ္တေ သဗ္ဗာပိ တာ ဒေဝတာ ဂိလာနသေယ္ယဋ္ဌာနံ အာဂတာ။ ဥဒာနံ ဥဒာနေသီတိ ဂိလာနသေယ္ယံ အာဂတာနံ ဒောမနသ္သေန ဘဝိတဗ္ဗံ သိယာ။ ဣမာသံ ပန တထာဂတသ္သ ဝေဒနာဓိဝာသနံ ဒိသ္ဝာ, ‘‘အဟော ဗုဒ္ဓာနံ မဟာနုဘာဝတာ! ဧဝရူပာသု နာမ ဝေဒနာသု ဝတ္တမာနာသု ဝိကာရမတ္တမ္ပိ နတ္ထိ, သိရီသယနေ အလင္ကရိတ္ဝာ ဌပိတသုဝဏ္ဏရူပကံ ဝိယ အနိဉ္ဇမာနေန ကာယေန နိပန္နော, ဣဒာနိသ္သ အဓိကတရံ မုခဝဏ္ဏော ဝိရောစတိ, အာဘာသမ္ပန္နော ပုဏ္ဏစန္ဒော ဝိယ သမ္ပတိ ဝိကသိတံ ဝိယ စ အရဝိန္ဒံ အသ္သ မုခံ သောဘတိ, ကာယေပိ ဝဏ္ဏာယတနံ ဣဒာနိ သုသမ္မဋ္ဌကဉ္စနံ ဝိယ ဝိပ္ပသီဒတီ’’တိ ဥဒာနံ ဥဒပာဒိ။
Sattasatāti imasmiṃ sutte sabbāpi tā devatā gilānaseyyaṭṭhānaṃ āgatā. Udānaṃ udānesīti gilānaseyyaṃ āgatānaṃ domanassena bhavitabbaṃ siyā. Imāsaṃ pana tathāgatassa vedanādhivāsanaṃ disvā, ‘‘aho buddhānaṃ mahānubhāvatā! Evarūpāsu nāma vedanāsu vattamānāsu vikāramattampi natthi, sirīsayane alaṅkaritvā ṭhapitasuvaṇṇarūpakaṃ viya aniñjamānena kāyena nipanno, idānissa adhikataraṃ mukhavaṇṇo virocati, ābhāsampanno puṇṇacando viya sampati vikasitaṃ viya ca aravindaṃ assa mukhaṃ sobhati, kāyepi vaṇṇāyatanaṃ idāni susammaṭṭhakañcanaṃ viya vippasīdatī’’ti udānaṃ udapādi.
နာဂော ဝတ ဘောတိ, ဧတ္ထ ဘောတိ ဓမ္မာလပနံ။ ဗလဝန္တဋ္ဌေန နာဂော။ နာဂဝတာတိ နာဂဘာဝေန။ သီဟော ဝတာတိအာဒီသု အသန္တာသနဋ္ဌေန သီဟော။ ဗ္ယတ္တပရိစယဋ္ဌေန ကာရဏာကာရဏဇာနနေန ဝာ အာဇာနီယော။ အပ္ပဋိသမဋ္ဌေန နိသဘော။ ဂဝသတဇေဋ္ဌကော ဟိ ဥသဘော, ဂဝသဟသ္သဇေဋ္ဌကော ဝသဘော, ဂဝသတသဟသ္သဇေဋ္ဌကော နိသဘောတိ ဝုစ္စတိ။ ဘဂဝာ ပန အပ္ပဋိသမဋ္ဌေန အာသဘံ ဌာနံ ပဋိဇာနာတိ။ တေနေဝတ္ထေန ဣဓ ‘‘နိသဘော’’တိ ဝုတ္တော။ ဓုရဝာဟဋ္ဌေန ဓောရယ္ဟော။ နိဗ္ဗိသေဝနဋ္ဌေန ဒန္တော။
Nāgovata bhoti, ettha bhoti dhammālapanaṃ. Balavantaṭṭhena nāgo. Nāgavatāti nāgabhāvena. Sīho vatātiādīsu asantāsanaṭṭhena sīho. Byattaparicayaṭṭhena kāraṇākāraṇajānanena vā ājānīyo. Appaṭisamaṭṭhena nisabho. Gavasatajeṭṭhako hi usabho, gavasahassajeṭṭhako vasabho, gavasatasahassajeṭṭhako nisabhoti vuccati. Bhagavā pana appaṭisamaṭṭhena āsabhaṃ ṭhānaṃ paṭijānāti. Tenevatthena idha ‘‘nisabho’’ti vutto. Dhuravāhaṭṭhena dhorayho. Nibbisevanaṭṭhena danto.
ပသ္သာတိ အနိယမိတာဏတ္တိ။ သမာဓိန္တိ အရဟတ္တဖလသမာဓိံ။ သုဝိမုတ္တန္တိ ဖလဝိမုတ္တိယာ သုဝိမုတ္တံ။ ရာဂာနုဂတံ ပန စိတ္တံ အဘိနတံ နာမ ဟောတိ, ဒောသာနုဂတံ အပနတံ။ တဒုဘယပဋိက္ခေပေန န စာဘိနတံ န စာပနတန္တိ အာဟ။ န စ သသင္ခာရနိဂ္ဂယ္ဟဝာရိတဂတန္တိ န သသင္ခာရေန သပ္ပယောဂေန ကိလေသေ နိဂ္ဂဟေတ္ဝာ ဝာရိတဝတံ, ကိလေသာနံ ပန ဆိန္နတ္တာ ဝတံ ဖလသမာဓိနာ သမာဟိတန္တိ အတ္ထော။ အတိက္ကမိတဗ္ဗန္တိ ဝိဟေဌေတဗ္ဗံ ဃဋ္ဋေတဗ္ဗံ။ အဒသ္သနာတိ အညာဏာ။ အညာဏီ ဟိ အန္ဓဗာလောဝ ဧဝရူပေ သတ္ထရိ အပရဇ္ဈေယ္ယာတိ ဒေဝဒတ္တံ ဃဋ္ဋယမာနာ ဝဒန္တိ။
Passāti aniyamitāṇatti. Samādhinti arahattaphalasamādhiṃ. Suvimuttanti phalavimuttiyā suvimuttaṃ. Rāgānugataṃ pana cittaṃ abhinataṃ nāma hoti, dosānugataṃ apanataṃ. Tadubhayapaṭikkhepena na cābhinataṃ na cāpanatanti āha. Na ca sasaṅkhāraniggayhavāritagatanti na sasaṅkhārena sappayogena kilese niggahetvā vāritavataṃ, kilesānaṃ pana chinnattā vataṃ phalasamādhinā samāhitanti attho. Atikkamitabbanti viheṭhetabbaṃ ghaṭṭetabbaṃ. Adassanāti aññāṇā. Aññāṇī hi andhabālova evarūpe satthari aparajjheyyāti devadattaṃ ghaṭṭayamānā vadanti.
ပဉ္စဝေဒာတိ ဣတိဟာသပဉ္စမာနံ ဝေဒာနံ ဓာရကာ။ သတံ သမန္တိ ဝသ္သသတံ။ တပသ္သီတိ တပနိသ္သိတကာ ဟုတ္ဝာ။ စရန္တိ စရန္တာ။ န သမ္မာဝိမုတ္တန္တိ သစေပိ ဧဝရူပာ ဗ္ရာဟ္မဏာ ဝသ္သသတံ စရန္တိ, စိတ္တဉ္စ နေသံ သမ္မာ ဝိမုတ္တံ န ဟောတိ။ ဟီနတ္တရူပာ န ပာရံ ဂမာ တေတိ ဟီနတ္တသဘာဝာ တေ နိဗ္ဗာနင္ဂမာ န ဟောန္တိ။ ‘‘ဟီနတ္ထရူပာ’’တိပိ ပာဌော, ဟီနတ္ထဇာတိကာ ပရိဟီနတ္ထာတိ အတ္ထော။ တဏ္ဟာဓိပန္နာတိ တဏ္ဟာယ အဇ္ဈောတ္ထဋာ။ ဝတသီလဗဒ္ဓာတိ အဇဝတကုက္ကုရဝတာဒီဟိ စ ဝတေဟိ တာဒိသေဟေဝ စ သီလေဟိ ဗဒ္ဓာ။ လူခံ တပန္တိ ပဉ္စာတပတာပနံ ကဏ္ဋကသေယ္ယာဒိကံ တပံ။ ဣဒာနိ သာ ဒေဝတာ သာသနသ္သ နိယ္ယာနိကဘာဝံ ကထေန္တီ န မာနကာမသ္သာတိအာဒိမာဟ။ တံ ဝုတ္တတ္ထမေဝာတိ။ အဋ္ဌမံ။
Pañcavedāti itihāsapañcamānaṃ vedānaṃ dhārakā. Sataṃ samanti vassasataṃ. Tapassīti tapanissitakā hutvā. Caranti carantā. Na sammāvimuttanti sacepi evarūpā brāhmaṇā vassasataṃ caranti, cittañca nesaṃ sammā vimuttaṃ na hoti. Hīnattarūpā na pāraṃ gamā teti hīnattasabhāvā te nibbānaṅgamā na honti. ‘‘Hīnattharūpā’’tipi pāṭho, hīnatthajātikā parihīnatthāti attho. Taṇhādhipannāti taṇhāya ajjhotthaṭā. Vatasīlabaddhāti ajavatakukkuravatādīhi ca vatehi tādiseheva ca sīlehi baddhā. Lūkhaṃ tapanti pañcātapatāpanaṃ kaṇṭakaseyyādikaṃ tapaṃ. Idāni sā devatā sāsanassa niyyānikabhāvaṃ kathentī na mānakāmassātiādimāha. Taṃ vuttatthamevāti. Aṭṭhamaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၈. သကလိကသုတ္တံ • 8. Sakalikasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၈. သကလိကသုတ္တဝဏ္ဏနာ • 8. Sakalikasuttavaṇṇanā
