| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၉. ပဌမပဇ္ဇုန္နဓီတုသုတ္တဝဏ္ဏနာ
9. Paṭhamapajjunnadhītusuttavaṇṇanā
၃၉. နဝမေ ပဇ္ဇုန္နသ္သ ဓီတာတိ ပဇ္ဇုန္နသ္သ နာမ ဝသ္သဝလာဟကဒေဝရညော စာတုမဟာရာဇိကသ္သ ဓီတာ။ အဘိဝန္ဒေတိ ဘဂဝာ တုမ္ဟာကံ ပာဒေ ဝန္ဒာမိ။ စက္ခုမတာတိ ပဉ္စဟိ စက္ခူဟိ စက္ခုမန္တေန တထာဂတေန။ ဓမ္မော အနုဗုဒ္ဓောတိ, ‘‘ဣဒံ မယာ ပုဗ္ဗေ ပရေသံ သန္တိကေ ကေဝလံ သုတံယေဝ အာသီ’’တိ ဝဒတိ။ သာဟံ ဒာနီတိ, သာ အဟံ ဣဒာနိ။ သက္ခိ ဇာနာမီတိ, ပဋိဝေဓဝသေန ပစ္စက္ခမေဝ ဇာနာမိ။ ဝိဂရဟန္တာတိ, ‘‘ဟီနက္ခရပဒဗ္ယဉ္ဇနော’’တိ ဝာ ‘‘အနိယ္ယာနိကော’’တိ ဝာ ဧဝံ ဂရဟန္တာ။ ရောရုဝန္တိ, ဒ္ဝေ ရောရုဝာ – ဓူမရောရုဝော စ ဇာလရောရုဝော စ။ တတ္ထ ဓူမရောရုဝော ဝိသုံ ဟောတိ, ဇာလရောရုဝောတိ ပန အဝီစိမဟာနိရယသ္သေဝေတံ နာမံ။ တတ္ထ ဟိ သတ္တာ အဂ္ဂိမ္ဟိ ဇလန္တေ ဇလန္တေ ပုနပ္ပုနံ ရဝံ ရဝန္တိ, တသ္မာ သော ‘‘ရောရုဝော’’တိ ဝုစ္စတိ။ ဃောရန္တိ ဒာရုဏံ။ ခန္တိယာ ဥပသမေန ဥပေတာတိ ရုစ္စိတ္ဝာ ခမာပေတ္ဝာ ဂဟဏခန္တိယာ စ ရာဂာဒိဥပသမေန စ ဥပေတာတိ။ နဝမံ။
39. Navame pajjunnassa dhītāti pajjunnassa nāma vassavalāhakadevarañño cātumahārājikassa dhītā. Abhivandeti bhagavā tumhākaṃ pāde vandāmi. Cakkhumatāti pañcahi cakkhūhi cakkhumantena tathāgatena. Dhammo anubuddhoti, ‘‘idaṃ mayā pubbe paresaṃ santike kevalaṃ sutaṃyeva āsī’’ti vadati. Sāhaṃ dānīti, sā ahaṃ idāni. Sakkhi jānāmīti, paṭivedhavasena paccakkhameva jānāmi. Vigarahantāti, ‘‘hīnakkharapadabyañjano’’ti vā ‘‘aniyyāniko’’ti vā evaṃ garahantā. Roruvanti, dve roruvā – dhūmaroruvo ca jālaroruvo ca. Tattha dhūmaroruvo visuṃ hoti, jālaroruvoti pana avīcimahānirayassevetaṃ nāmaṃ. Tattha hi sattā aggimhi jalante jalante punappunaṃ ravaṃ ravanti, tasmā so ‘‘roruvo’’ti vuccati. Ghoranti dāruṇaṃ. Khantiyā upasamena upetāti ruccitvā khamāpetvā gahaṇakhantiyā ca rāgādiupasamena ca upetāti. Navamaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၉. ပဌမပဇ္ဇုန္နဓီတုသုတ္တံ • 9. Paṭhamapajjunnadhītusuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၉. ပဌမပဇ္ဇုန္နဓီတုသုတ္တဝဏ္ဏနာ • 9. Paṭhamapajjunnadhītusuttavaṇṇanā
