| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
៧. សកចិន្តនិយវគ្គោ
7. Sakacintaniyavaggo
១. សកចិន្តនិយត្ថេរអបទានវណ្ណនា
1. Sakacintaniyattheraapadānavaṇṇanā
បវនំ កាននំ ទិស្វាតិអាទិកំ អាយស្មតោ សកចិន្តនិយត្ថេរស្ស អបទានំ។ អយម្បិ បុរិមពុទ្ធេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ វិបស្សិស្ស ភគវតោ កាលេ ឯកស្មិំ កុលគេហេ និព្ពត្តោ វុទ្ធិមន្វាយ តស្ស ភគវតោ អាយុបរិយោសានេ ឧប្បន្នោ ធរមានំ ភគវន្តំ អបាបុណិត្វា បរិនិព្ពុតកាលេ ឥសិបព្ពជ្ជំ បព្ពជិត្វា ហិមវន្តេ វសន្តោ វិវេកំ រមណីយំ ឯកំ វនំ បត្វា តត្ថេវេកាយ កន្ទរាយ បុលិនចេតិយំ កត្វា ភគវតិ សញ្ញំ កត្វា សធាតុកសញ្ញញ្ច កត្វា វនបុប្ផេហិ បូជេត្វា នមស្សមានោ បរិចរិ។ សោ តេន បុញ្ញកម្មេន ទេវមនុស្សេសុ សំសរន្តោ ទ្វីសុ អគ្គំ អគ្គសម្បត្តិំ អគ្គញ្ច ចក្កវត្តិសម្បត្តិំ អនុភវិត្វា ឥមស្មិំ ពុទ្ធុប្បាទេ ឯកស្មិំ កុលគេហេ និព្ពត្តោ វិភវសម្បន្នោ សទ្ធាសម្បន្នោ សត្ថរិ បសីទិត្វា បព្ពជិត្វា អរហា ឆឡភិញ្ញោ អហោសិ។
Pavanaṃkānanaṃ disvātiādikaṃ āyasmato sakacintaniyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle ekasmiṃ kulagehe nibbatto vuddhimanvāya tassa bhagavato āyupariyosāne uppanno dharamānaṃ bhagavantaṃ apāpuṇitvā parinibbutakāle isipabbajjaṃ pabbajitvā himavante vasanto vivekaṃ ramaṇīyaṃ ekaṃ vanaṃ patvā tatthevekāya kandarāya pulinacetiyaṃ katvā bhagavati saññaṃ katvā sadhātukasaññañca katvā vanapupphehi pūjetvā namassamāno paricari. So tena puññakammena devamanussesu saṃsaranto dvīsu aggaṃ aggasampattiṃ aggañca cakkavattisampattiṃ anubhavitvā imasmiṃ buddhuppāde ekasmiṃ kulagehe nibbatto vibhavasampanno saddhāsampanno satthari pasīditvā pabbajitvā arahā chaḷabhiñño ahosi.
១. សោ អត្តនោ បុព្ពកម្មំ សរិត្វា សោមនស្សជាតោ បុព្ពចរិតាបទានំ បកាសេន្តោ បវនំ កាននំ ទិស្វាតិអាទិមាហ។ តត្ថ បវនន្តិ បការេន វនំ បត្ថដំ វិត្ថិណ្ណំ គហនភូតន្តិ បវនំ។ កាននំ អវកុច្ឆិតំ អាននំ អវហនំ សតតំ សីហព្យគ្ឃយក្ខរក្ខសមទ្ទហត្ថិអស្សសុបណ្ណឧរគេហិ វិហង្គគណសទ្ទកុក្កុដកោកិលេហិ វា ពហលន្តិ កាននំ, តំ កាននសង្ខាតំ បវនំ មនុស្សសទ្ទវិរហិតត្តា អប្បសទ្ទំ និស្សទ្ទន្តិ អត្ថោ។ អនាវិលន្តិ ន អាវិលំ ឧបទ្ទវរហិតន្តិ អត្ថោ។ ឥសីនំ អនុចិណ្ណន្តិ ពុទ្ធបច្ចេកពុទ្ធអរហន្តខីណាសវសង្ខាតានំ ឥសីនំ អនុចិណ្ណំ និសេវិតន្តិ អត្ថោ។ អាហុតីនំ បដិគ្គហន្តិ អាហុនំ វុច្ចតិ បូជាសក្ការំ បដិគ្គហំ គេហសទិសន្តិ អត្ថោ។
1. So attano pubbakammaṃ saritvā somanassajāto pubbacaritāpadānaṃ pakāsento pavanaṃ kānanaṃ disvātiādimāha. Tattha pavananti pakārena vanaṃ patthaṭaṃ vitthiṇṇaṃ gahanabhūtanti pavanaṃ. Kānanaṃ avakucchitaṃ ānanaṃ avahanaṃ satataṃ sīhabyagghayakkharakkhasamaddahatthiassasupaṇṇauragehi vihaṅgagaṇasaddakukkuṭakokilehi vā bahalanti kānanaṃ, taṃ kānanasaṅkhātaṃ pavanaṃ manussasaddavirahitattā appasaddaṃ nissaddanti attho. Anāvilanti na āvilaṃ upaddavarahitanti attho. Isīnaṃ anuciṇṇanti buddhapaccekabuddhaarahantakhīṇāsavasaṅkhātānaṃ isīnaṃ anuciṇṇaṃ nisevitanti attho. Āhutīnaṃpaṭiggahanti āhunaṃ vuccati pūjāsakkāraṃ paṭiggahaṃ gehasadisanti attho.
២. ថូបំ កត្វាន វេឡុនាតិ វេឡុបេសិកាហិ ចេតិយំ កត្វាតិ អត្ថោ។ នានាបុប្ផំ សមោកិរិន្តិ ចម្បកាទីហិ អនេកេហិ បុប្ផេហិ សមោកិរិំ បូជេសិន្តិ អត្ថោ។ សម្មុខា វិយ សម្ពុទ្ធន្តិ សជីវមានស្ស សម្ពុទ្ធស្ស សម្មុខា ឥវ និម្មិតំ ឧប្បាទិតំ ចេតិយំ អហំ អភិ វិសេសេន វន្ទិំ បណាមមកាសិន្តិ អត្ថោ។ សេសំ សុវិញ្ញេយ្យមេវាតិ។
2.Thūpaṃ katvāna veḷunāti veḷupesikāhi cetiyaṃ katvāti attho. Nānāpupphaṃ samokirinti campakādīhi anekehi pupphehi samokiriṃ pūjesinti attho. Sammukhā viya sambuddhanti sajīvamānassa sambuddhassa sammukhā iva nimmitaṃ uppāditaṃ cetiyaṃ ahaṃ abhi visesena vandiṃ paṇāmamakāsinti attho. Sesaṃ suviññeyyamevāti.
សកចិន្តនិយត្ថេរអបទានវណ្ណនា សមត្តា។
Sakacintaniyattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ១. សកចិន្តនិយត្ថេរអបទានំ • 1. Sakacintaniyattheraapadānaṃ
