| Library / Tipiṭaka / ತಿಪಿಟಕ • Tipiṭaka / ವಿನಯವಿನಿಚ್ಛಯ-ಟೀಕಾ • Vinayavinicchaya-ṭīkā |
ಸಾಧಾರಣಾಸಾಧಾರಣಕಥಾವಣ್ಣನಾ
Sādhāraṇāsādhāraṇakathāvaṇṇanā
೭೭೯-೮೦. ಸಬ್ಬಸಿಕ್ಖಾಪದಾನನ್ತಿ ಉಭತೋವಿಭಙ್ಗಾಗತಾನಂ ಸಬ್ಬಸಿಕ್ಖಾಪದಾನಂ। ಭಿಕ್ಖೂಹಿ ಭಿಕ್ಖುನೀಹೀತಿ ಉಭಯತ್ಥ ಸಹತ್ಥೇ ಕರಣವಚನಂ। ಭಿಕ್ಖೂಹಿ ಭಿಕ್ಖುನೀನಞ್ಚ, ಭಿಕ್ಖುನೀಹಿ ಭಿಕ್ಖೂನಞ್ಚಾತಿ ಉಭಯತ್ಥ ಅಸಾಧಾರಣಪಞ್ಞತ್ತಞ್ಚ, ತಥಾ ಭಿಕ್ಖೂಹಿ ಭಿಕ್ಖುನೀನಞ್ಚ, ಭಿಕ್ಖುನೀಹಿ ಭಿಕ್ಖೂನಞ್ಚಾತಿ ಉಭಯತ್ಥ ಸಾಧಾರಣಸಿಕ್ಖಾಪದಞ್ಚ ಅಹಂ ವಕ್ಖಾಮೀತಿ ಯೋಜನಾ। ಸಮಾಹಿತಾತಿ ಏಕಗ್ಗಚಿತ್ತಾ। ತಂ ಮಯಾ ವುಚ್ಚಮಾನಂ ನಿದಾನಾದಿನಯಂ। ಸುಣಾಥಾತಿ ಸೋತುಜನಂ ಸಕ್ಕಚ್ಚಸವನೇ ನಿಯೋಜೇತಿ।
779-80.Sabbasikkhāpadānanti ubhatovibhaṅgāgatānaṃ sabbasikkhāpadānaṃ. Bhikkhūhi bhikkhunīhīti ubhayattha sahatthe karaṇavacanaṃ. Bhikkhūhi bhikkhunīnañca, bhikkhunīhi bhikkhūnañcāti ubhayattha asādhāraṇapaññattañca, tathā bhikkhūhi bhikkhunīnañca, bhikkhunīhi bhikkhūnañcāti ubhayattha sādhāraṇasikkhāpadañca ahaṃ vakkhāmīti yojanā. Samāhitāti ekaggacittā. Taṃ mayā vuccamānaṃ nidānādinayaṃ. Suṇāthāti sotujanaṃ sakkaccasavane niyojeti.
೭೮೧. ‘‘ನಿದಾನ’’ನ್ತಿಆದಿಗಾಥಾ ವುತ್ತತ್ಥಾವ।
781.‘‘Nidāna’’ntiādigāthā vuttatthāva.
೭೮೨-೩. ‘‘ಕತಿ ವೇಸಾಲಿಯಾ’’ತಿಆದಿ ಪುಚ್ಛಾಗಾಥಾ ಉತ್ತಾನತ್ಥಾಯೇವ।
782-3.‘‘Kati vesāliyā’’tiādi pucchāgāthā uttānatthāyeva.
೭೮೬. ‘‘ದಸ ವೇಸಾಲಿಯಾ’’ತಿಆದಿವಿಸ್ಸಜ್ಜನಗಾಥಾನಂ ‘‘ಮೇಥುನ’’ನ್ತಿಆದಯೋ ನಿದ್ದೇಸವಸೇನ ವುತ್ತಾ। ವಿಗ್ಗಹೋತಿ ಮನುಸ್ಸವಿಗ್ಗಹಂ ಪಾರಾಜಿಕಂ। ಚತುತ್ಥನ್ತಿಮವತ್ಥುಕನ್ತಿ ಉತ್ತರಿಮನುಸ್ಸಧಮ್ಮಪಾರಾಜಿಕಂ। ಅತಿರೇಕಚೀವರನ್ತಿ ಪಠಮಕಥಿನಂ। ಸುದ್ಧಕಾಳಕೇಳಕಲೋಮಕನ್ತಿ ಏಳಕಲೋಮವಗ್ಗೇ ದುತಿಯಂ।
786. ‘‘Dasa vesāliyā’’tiādivissajjanagāthānaṃ ‘‘methuna’’ntiādayo niddesavasena vuttā. Viggahoti manussaviggahaṃ pārājikaṃ. Catutthantimavatthukanti uttarimanussadhammapārājikaṃ. Atirekacīvaranti paṭhamakathinaṃ. Suddhakāḷakeḷakalomakanti eḷakalomavagge dutiyaṃ.
೭೮೭. ಭೂತನ್ತಿ ಪಠಮೇ ಮುಸಾವಾದವಗ್ಗೇ ಅಟ್ಠಮಂ। ಪರಮ್ಪರಞ್ಚೇವಾತಿ ಪರಮ್ಪರಭೋಜನಸಿಕ್ಖಾಪದಂ। ಮುಖದ್ವಾರನ್ತಿ ಚತುತ್ಥೇ ಭೋಜನವಗ್ಗೇ ದಸಮಂ। ಭಿಕ್ಖುನೀಸು ಚ ಅಕ್ಕೋಸೋತಿ ಭಿಕ್ಖುನಿಪಾತಿಮೋಕ್ಖೇ ಛಟ್ಠೇ ಆರಾಮವಗ್ಗೇ ದುತಿಯಂ।
787.Bhūtanti paṭhame musāvādavagge aṭṭhamaṃ. Paramparañcevāti paramparabhojanasikkhāpadaṃ. Mukhadvāranti catutthe bhojanavagge dasamaṃ. Bhikkhunīsu ca akkosoti bhikkhunipātimokkhe chaṭṭhe ārāmavagge dutiyaṃ.
೭೮೮. ದ್ವೇ ಅನುದ್ಧಂಸನಾನೀತಿ ಅಟ್ಠಮನವಮಸಙ್ಘಾದಿಸೇಸಾ। ಚೀವರಸ್ಸ ಪಟಿಗ್ಗಹೋತಿ ಚೀವರವಗ್ಗೇ ಪಞ್ಚಮಂ।
788.Dveanuddhaṃsanānīti aṭṭhamanavamasaṅghādisesā. Cīvarassa paṭiggahoti cīvaravagge pañcamaṃ.
೭೮೯. ರೂಪಿಯನ್ತಿ ಏಳಕಲೋಮವಗ್ಗೇ ಅಟ್ಠಮಂ। ಸುತ್ತವಿಞ್ಞತ್ತೀತಿ ಪತ್ತವಗ್ಗೇ ಛಟ್ಠಂ। ಉಜ್ಝಾಪನನ್ತಿ ದುತಿಯೇ ಭೂತಗಾಮವಗ್ಗೇ ತತಿಯಂ। ಪರಿಪಾಚಿತಪಿಣ್ಡೋತಿ ತತಿಯೇ ಓವಾದವಗ್ಗೇ ನವಮಂ। ತಥೇವ ಗಣಭೋಜನನ್ತಿ ಚತುತ್ಥೇ ಭೋಜನವಗ್ಗೇ ದುತಿಯಂ।
789.Rūpiyanti eḷakalomavagge aṭṭhamaṃ. Suttaviññattīti pattavagge chaṭṭhaṃ. Ujjhāpananti dutiye bhūtagāmavagge tatiyaṃ. Paripācitapiṇḍoti tatiye ovādavagge navamaṃ. Tatheva gaṇabhojananti catutthe bhojanavagge dutiyaṃ.
೭೯೦. ವಿಕಾಲೇ ಭೋಜನಞ್ಚೇವಾತಿ ತತ್ಥೇವ ಸತ್ತಮಂ। ಚಾರಿತ್ತನ್ತಿ ಅಚೇಲಕವಗ್ಗೇ ಪಞ್ಚಮೇ ಛಟ್ಠಂ। ನ್ಹಾನನ್ತಿ ಸುರಾಪಾನವಗ್ಗೇ ಛಟ್ಠೇ ಸತ್ತಮಂ। ಊನವೀಸತಿವಸ್ಸನ್ತಿ ಸತ್ತಮೇ ಸಪ್ಪಾಣಕವಗ್ಗೇ ಪಞ್ಚಮಂ। ದತ್ವಾ ಸಙ್ಘೇನ ಚೀವರನ್ತಿ ಅಟ್ಠಮೇ ಸಹಧಮ್ಮಿಕವಗ್ಗೇ ನವಮಂ।
790.Vikāle bhojanañcevāti tattheva sattamaṃ. Cārittanti acelakavagge pañcame chaṭṭhaṃ. Nhānanti surāpānavagge chaṭṭhe sattamaṃ. Ūnavīsativassanti sattame sappāṇakavagge pañcamaṃ. Datvā saṅghena cīvaranti aṭṭhame sahadhammikavagge navamaṃ.
೭೯೧. ವೋಸಾಸನ್ತೀತಿ ದುತಿಯಂ ಭಿಕ್ಖುಪಾಟಿದೇಸನೀಯಂ। ನಚ್ಚಂ ವಾ ಗೀತಂ ವಾತಿ ಪಠಮೇ ಲಸುಣವಗ್ಗೇ ದಸಮಂ। ಚಾರಿಕದ್ವಯನ್ತಿ ಚತುತ್ಥೇ ತುವಟ್ಟವಗ್ಗೇ ಸತ್ತಮಟ್ಠಮಾನಿ। ಛನ್ದದಾನೇನಾತಿ ಅಟ್ಠಮೇ ಕುಮಾರಿಭೂತವಗ್ಗೇ ಏಕಾದಸಮಂ। ‘‘ಛನ್ದದಾನೇತೀ’’ತಿ ವಾ ಪಾಠೋ। ‘‘ಛನ್ದದಾನಂ ಇತಿ ಇಮೇ’’ತಿ ಪದಚ್ಛೇದೋ।
791.Vosāsantīti dutiyaṃ bhikkhupāṭidesanīyaṃ. Naccaṃ vā gītaṃ vāti paṭhame lasuṇavagge dasamaṃ. Cārikadvayanti catutthe tuvaṭṭavagge sattamaṭṭhamāni. Chandadānenāti aṭṭhame kumāribhūtavagge ekādasamaṃ. ‘‘Chandadānetī’’ti vā pāṭho. ‘‘Chandadānaṃ iti ime’’ti padacchedo.
೭೯೨. ಕುಟೀತಿ ಛಟ್ಠೋ ಸಙ್ಘಾದಿಸೇಸೋ। ಕೋಸಿಯನ್ತಿ ನಿಸ್ಸಗ್ಗಿಯೇಸು ದುತಿಯೇ ಏಳಕಲೋಮವಗ್ಗೇ ಪಠಮಂ। ಸೇಯ್ಯನ್ತಿ ಮುಸಾವಾದವಗ್ಗೇ ಪಞ್ಚಮಂ। ಪಥವೀತಿ ಮುಸಾವಾದವಗ್ಗೇ ದಸಮಂ। ಭೂತಗಾಮಕನ್ತಿ ಭೂತಗಾಮವಗ್ಗೇ ದುತಿಯೇ ಪಠಮಂ। ಸಪ್ಪಾಣಕಞ್ಚ ಸಿಞ್ಚನ್ತೀತಿ ಭೂತಗಾಮವಗ್ಗೇ ದಸಮಂ।
792.Kuṭīti chaṭṭho saṅghādiseso. Kosiyanti nissaggiyesu dutiye eḷakalomavagge paṭhamaṃ. Seyyanti musāvādavagge pañcamaṃ. Pathavīti musāvādavagge dasamaṃ. Bhūtagāmakanti bhūtagāmavagge dutiye paṭhamaṃ. Sappāṇakañca siñcantīti bhūtagāmavagge dasamaṃ.
೮೦೦. ಛಊನಾನಿ ತೀಣೇವ ಸತಾನೀತಿ ಛಹಿ ಊನಾನಿ ತೀಣೇವ ಸತಾನಿ, ಚತುನವುತಾಧಿಕಾನಿ ದ್ವಿಸತಾನೀತಿ ಅತ್ಥೋ। ಸಮಚೇತಸಾತಿ –
800.Chaūnāni tīṇeva satānīti chahi ūnāni tīṇeva satāni, catunavutādhikāni dvisatānīti attho. Samacetasāti –
‘‘ವಧಕೇ ದೇವದತ್ತಮ್ಹಿ, ಚೋರೇ ಅಙ್ಗುಲಿಮಾಲಕೇ।
‘‘Vadhake devadattamhi, core aṅgulimālake;
ಧನಪಾಲೇ ರಾಹುಲೇ ಚ, ಸಬ್ಬತ್ಥ ಸಮಮಾನಸೋ’’ತಿ॥ (ಮಿ॰ ಪ॰ ೬.೬.೫; ಧ॰ ಪ॰ ಅಟ್ಠ॰ ೧.೧೬ ದೇವದತ್ತವತ್ಥು; ಇತಿವು॰ ಅಟ್ಠ॰ ೧೦೦) –
Dhanapāle rāhule ca, sabbattha samamānaso’’ti. (mi. pa. 6.6.5; dha. pa. aṭṭha. 1.16 devadattavatthu; itivu. aṭṭha. 100) –
ವಚನತೋ ಸಬ್ಬೇಸು ಹಿತಾಹಿತೇಸು, ಲಾಭಾಲಾಭಾದೀಸು ಚ ಅಟ್ಠಸು ಲೋಕಧಮ್ಮೇಸು ನಿಬ್ಬಿಕಾರತಾಯ ಚ ಸಮಾನಚಿತ್ತೇನ ತಥಾಗತೇನ।
Vacanato sabbesu hitāhitesu, lābhālābhādīsu ca aṭṭhasu lokadhammesu nibbikāratāya ca samānacittena tathāgatena.
ವುತ್ತಾವಸೇಸಾತಿ ವೇಸಾಲಿಯಾದೀಸು ಛಸು ನಗರೇಸು ವುತ್ತೇಹಿ ಅವಸಿಟ್ಠಾನಿ। ಇಮೇ ಸಬ್ಬೇ ಇಮಾನಿ ಸಬ್ಬಾನಿ ಸಿಕ್ಖಾಪದಾನಿ ಸಾವತ್ಥಿಯಂ ಕತಾನಿ ಭವನ್ತಿ, ಪಞ್ಞತ್ತಾನಿ ಹೋನ್ತೀತಿ ಅತ್ಥೋ।
Vuttāvasesāti vesāliyādīsu chasu nagaresu vuttehi avasiṭṭhāni. Ime sabbe imāni sabbāni sikkhāpadāni sāvatthiyaṃ katāni bhavanti, paññattāni hontīti attho.
೮೦೧. ಪಾರಾಜಿಕಾನಿ ಚತ್ತಾರೀತಿ ವೇಸಾಲಿಯಂ ವುತ್ತಂ ಮೇಥುನಮನುಸ್ಸವಿಗ್ಗಹಉತ್ತರಿಮನುಸ್ಸಧಮ್ಮಂ, ರಾಜಗಹೇ ಅದಿನ್ನಾದಾನನ್ತಿ ಚತ್ತಾರಿ। ಸತ್ತ ಸಙ್ಘಾದಿಸೇಸಕಾತಿ ರಾಜಗಹೇ ವುತ್ತಾ ದ್ವೇ ಅನುದ್ಧಂಸನಾ, ದ್ವೇ ಚ ಭೇದಾ, ಆಳವಿಯಂ ಕುಟಿಕಾರೋ, ಕೋಸಮ್ಬಿಯಂ ಮಹಲ್ಲಕವಿಹಾರೋ, ದೋವಚಸ್ಸನ್ತಿ ಸತ್ತ। ನಿಸ್ಸಗ್ಗಿಯಾನಿ ಅಟ್ಠೇವಾತಿ ವೇಸಾಲಿಯಂ ಅತಿರೇಕಚೀವರಂ, ಕಾಳಕಏಳಕಲೋಮಂ, ರಾಜಗಹೇ ಚೀವರಪಟಿಗ್ಗಹಣಂ, ರೂಪಿಯಪಟಿಗ್ಗಹಣಂ, ಸುತ್ತವಿಞ್ಞತ್ತಿ, ಆಳವಿಯಂ ಕೋಸಿಯಮಿಸ್ಸಕಂ, ಕಪಿಲವತ್ಥುಮ್ಹಿ ಏಳಕಲೋಮಧೋವನಂ, ಊನಪಞ್ಚಬನ್ಧನನ್ತಿ ಅಟ್ಠ।
801.Pārājikāni cattārīti vesāliyaṃ vuttaṃ methunamanussaviggahauttarimanussadhammaṃ, rājagahe adinnādānanti cattāri. Satta saṅghādisesakāti rājagahe vuttā dve anuddhaṃsanā, dve ca bhedā, āḷaviyaṃ kuṭikāro, kosambiyaṃ mahallakavihāro, dovacassanti satta. Nissaggiyāni aṭṭhevāti vesāliyaṃ atirekacīvaraṃ, kāḷakaeḷakalomaṃ, rājagahe cīvarapaṭiggahaṇaṃ, rūpiyapaṭiggahaṇaṃ, suttaviññatti, āḷaviyaṃ kosiyamissakaṃ, kapilavatthumhi eḷakalomadhovanaṃ, ūnapañcabandhananti aṭṭha.
ದ್ವತ್ತಿಂಸೇವ ಚ ಖುದ್ದಕಾತಿ ವೇಸಾಲಿಯಂ ಭೂತಾರೋಚನಂ, ಪರಮ್ಪರಭೋಜನಂ, ಅಪ್ಪಟಿಗ್ಗಹಣಂ, ಅಚೇಲಕಂ, ‘‘ಯಾ ಪನ ಭಿಕ್ಖುನೀ ಭಿಕ್ಖುಂ ಅಕ್ಕೋಸೇಯ್ಯಾ’’ತಿ ಪಞ್ಚ, ರಾಜಗಹೇ ಉಜ್ಝಾಪನಕಂ, ಭಿಕ್ಖುನಿಪರಿಪಾಚಿತಪಿಣ್ಡೋ, ಗಣಭೋಜನಂ, ವಿಕಾಲಭೋಜನಂ, ‘‘ಯೋ ಪನ ಭಿಕ್ಖು ನಿಮನ್ತಿತೋ’’ತಿಆದಿ ಚ, ‘‘ಓರೇನಡ್ಢಮಾಸಂ ನಹಾಯೇಯ್ಯಾ’’ತಿ, ಊನವೀಸತಿವಸ್ಸಂ, ‘‘ಸಮಗ್ಗೇನ ಸಙ್ಘೇನ ಚೀವರಂ ದತ್ವಾ’’ತಿ ಭಿಕ್ಖೂನಂ ಅಟ್ಠ, ಭಿಕ್ಖುನೀನಂ ಪನ ‘‘ನಚ್ಚಂ ವಾ ಗೀತಂ ವಾ’’ತಿಆದಿ ಚ, ‘‘ಯಾ ಪನ ಭಿಕ್ಖುನೀ ಅನ್ತೋವಸ್ಸ’’ನ್ತಿಆದಿ ಚ, ‘‘ಯಾ ಪನ ಭಿಕ್ಖುನೀ ವಸ್ಸಂವುತ್ಥಾ’’ತಿಆದಿ ಚಾತಿ ದ್ವಯಂ, ‘‘ಯಾ ಪನ ಭಿಕ್ಖುನೀ ಪಾರಿವಾಸಿಕಛನ್ದದಾನೇನಾ’’ತಿಆದಿ ಚಾತಿ ಚತ್ತಾರಿ, ಆಳವಿಯಂ ಅನುಪಸಮ್ಪನ್ನೇನ ಉತ್ತರಿ ದಿರತ್ತತಿರತ್ತಂ, ‘‘ಪಥವಿಂ ಖಣೇಯ್ಯ ವಾ’’ತಿಆದಿ, ಭೂತಗಾಮಪಾತಬ್ಯತಾಯ, ‘‘ಜಾನಂ ಸಪ್ಪಾಣಕಂ ಉದಕ’’ನ್ತಿ ಚತ್ತಾರಿ, ಕೋಸಮ್ಬಿಯಂ ಅಞ್ಞವಾದಕೇ ವಿಹೇಸಕೇ, ಯಾವದ್ವಾರಕೋಸಾ ಅಗ್ಗಳಟ್ಠಪನಾಯ, ಸುರಾಮೇರಯಪಾನೇ, ಅನಾದರಿಯೇ, ‘‘ಯೋ ಪನ ಭಿಕ್ಖು ಭಿಕ್ಖೂಹಿ ಸಹಧಮ್ಮಿಕ’’ನ್ತಿಆದಿ ಚಾತಿ ಪಞ್ಚ, ಕಪಿಲವತ್ಥುಮ್ಹಿ ‘‘ಭಿಕ್ಖುನುಪಸ್ಸಯಂ ಗನ್ತ್ವಾ’’ತಿಆದಿ, ‘‘ಅಗಿಲಾನೇನ ಭಿಕ್ಖುನಾ ಚಾತುಮಾಸ’’ನ್ತಿಆದಿ, ‘‘ಅಟ್ಠಿಮಯಂ ವಾ ದನ್ತಮಯಂ ವಾ’’ತಿಆದಿ ತೀಣಿ ಭಿಕ್ಖೂನಂ, ಭಿಕ್ಖುನೀನಂ ಪನ ‘‘ಉದಕಸುದ್ಧಿಕಂ ಪನಾ’’ತಿಆದಿ, ‘‘ಓವಾದಾಯ ವಾ’’ತಿಆದೀತಿ ದ್ವೇ, ಭಗ್ಗೇಸು ‘‘ಅಗಿಲಾನೋ ವಿಸಿಬ್ಬನಾಪೇಕ್ಖೋ’’ತಿಆದಿ ಏಕನ್ತಿ ಏತಾನಿ ಬಾತ್ತಿಂಸೇವ ಪಾಚಿತ್ತಿಯಾನಿ।
Dvattiṃseva ca khuddakāti vesāliyaṃ bhūtārocanaṃ, paramparabhojanaṃ, appaṭiggahaṇaṃ, acelakaṃ, ‘‘yā pana bhikkhunī bhikkhuṃ akkoseyyā’’ti pañca, rājagahe ujjhāpanakaṃ, bhikkhuniparipācitapiṇḍo, gaṇabhojanaṃ, vikālabhojanaṃ, ‘‘yo pana bhikkhu nimantito’’tiādi ca, ‘‘orenaḍḍhamāsaṃ nahāyeyyā’’ti, ūnavīsativassaṃ, ‘‘samaggena saṅghena cīvaraṃ datvā’’ti bhikkhūnaṃ aṭṭha, bhikkhunīnaṃ pana ‘‘naccaṃ vā gītaṃ vā’’tiādi ca, ‘‘yā pana bhikkhunī antovassa’’ntiādi ca, ‘‘yā pana bhikkhunī vassaṃvutthā’’tiādi cāti dvayaṃ, ‘‘yā pana bhikkhunī pārivāsikachandadānenā’’tiādi cāti cattāri, āḷaviyaṃ anupasampannena uttari dirattatirattaṃ, ‘‘pathaviṃ khaṇeyya vā’’tiādi, bhūtagāmapātabyatāya, ‘‘jānaṃ sappāṇakaṃ udaka’’nti cattāri, kosambiyaṃ aññavādake vihesake, yāvadvārakosā aggaḷaṭṭhapanāya, surāmerayapāne, anādariye, ‘‘yo pana bhikkhu bhikkhūhi sahadhammika’’ntiādi cāti pañca, kapilavatthumhi ‘‘bhikkhunupassayaṃ gantvā’’tiādi, ‘‘agilānena bhikkhunā cātumāsa’’ntiādi, ‘‘aṭṭhimayaṃ vā dantamayaṃ vā’’tiādi tīṇi bhikkhūnaṃ, bhikkhunīnaṃ pana ‘‘udakasuddhikaṃ panā’’tiādi, ‘‘ovādāya vā’’tiādīti dve, bhaggesu ‘‘agilāno visibbanāpekkho’’tiādi ekanti etāni bāttiṃseva pācittiyāni.
೮೦೨. ದ್ವೇ ಗಾರಯ್ಹಾತಿ ‘‘ಭಿಕ್ಖು ಪನೇವ ಕುಲೇಸೂ’’ತಿಆದಿ, ‘‘ಯಾನಿ ಖೋ ಪನ ತಾನಿ ಆರಞ್ಞಕಾನೀ’’ತಿಆದಿ ಚಾತಿ ದ್ವೇ ಪಾಟಿದೇಸನೀಯಾ। ತಯೋ ಸೇಖಾತಿ ಕೋಸಮ್ಬಿಯಂ ನ ಸುರುಸುರುಕಾರಕಂ, ಭಗ್ಗೇಸು ನ ಸಾಮಿಸೇನ ಹತ್ಥೇನ ಪಾನೀಯಥಾಲಕಂ, ನ ಸಸಿತ್ಥಕಂ ಪತ್ತಧೋವನನ್ತಿ ತೀಣಿ ಸೇಖಿಯಾನಿ। ಛಪ್ಪಞ್ಞಾಸೇವ ಸಿಕ್ಖಾಪದಾನಿ ಪಿಣ್ಡಿತಾನಿ ವೇಸಾಲಿಯಾದೀಸು ಛಸು ನಗರೇಸು ಪಞ್ಞತ್ತಾನಿ ಭವನ್ತೀತಿ ಯೋಜನಾ।
802.Dvegārayhāti ‘‘bhikkhu paneva kulesū’’tiādi, ‘‘yāni kho pana tāni āraññakānī’’tiādi cāti dve pāṭidesanīyā. Tayo sekhāti kosambiyaṃ na surusurukārakaṃ, bhaggesu na sāmisena hatthena pānīyathālakaṃ, na sasitthakaṃ pattadhovananti tīṇi sekhiyāni. Chappaññāseva sikkhāpadāni piṇḍitāni vesāliyādīsu chasu nagaresu paññattāni bhavantīti yojanā.
೮೦೩. ಸತ್ತಸು ನಗರೇಸು ಪಞ್ಞತ್ತಾನಿ ಏತಾನಿ ಸಬ್ಬಾನೇವ ಸಿಕ್ಖಾಪದಾನಿ ಪನ ಅಡ್ಢುಡ್ಢಾನಿ ಸತಾನೇವ ಭವನ್ತಿ। ಸಾವತ್ಥಿಯಂ ಪಞ್ಞತ್ತೇಹಿ ಚತುನವುತಾಧಿಕದ್ವಿಸತಸಿಕ್ಖಾಪದೇಹಿ ಸದ್ಧಿಂ ಛಸು ನಗರೇಸು ಪಞ್ಞತ್ತಾನಿ ಛಪಞ್ಞಾಸ ಸಿಕ್ಖಾಪದಾನಿ ಪಞ್ಞಾಸಾಧಿಕಾನಿ ತೀಣಿ ಸತಾನಿ ಭವನ್ತೀತಿ ಅತ್ಥೋ। ಅಡ್ಢೇನ ಚತುತ್ಥಂ ಯೇಸಂ ತಾನಿ ಅಡ್ಢುಡ್ಢಾನಿ।
803. Sattasu nagaresu paññattāni etāni sabbāneva sikkhāpadāni pana aḍḍhuḍḍhāni satāneva bhavanti. Sāvatthiyaṃ paññattehi catunavutādhikadvisatasikkhāpadehi saddhiṃ chasu nagaresu paññattāni chapaññāsa sikkhāpadāni paññāsādhikāni tīṇi satāni bhavantīti attho. Aḍḍhena catutthaṃ yesaṃ tāni aḍḍhuḍḍhāni.
೮೦೪-೧೦. ಏವಂ ನಿದಾನವಸೇನ ನಗರಂ ದಸ್ಸೇತ್ವಾ ಇದಾನಿ ನಿದಾನಮಞ್ಞಮಸೇಸೇತ್ವಾ ಉಭತೋವಿಭಙ್ಗಾಗತಾನಂ ಸಬ್ಬೇಸಂ ಸಿಕ್ಖಾಪದಾನಂ ಕೇವಲಂ ಪಿಣ್ಡವಸೇನ ಗಣನಂ ದಸ್ಸೇತುಮಾಹ ‘‘ಸಿಕ್ಖಾಪದಾನಿ ಭಿಕ್ಖೂನ’’ನ್ತಿಆದಿ।
804-10. Evaṃ nidānavasena nagaraṃ dassetvā idāni nidānamaññamasesetvā ubhatovibhaṅgāgatānaṃ sabbesaṃ sikkhāpadānaṃ kevalaṃ piṇḍavasena gaṇanaṃ dassetumāha ‘‘sikkhāpadāni bhikkhūna’’ntiādi.
೮೧೧. ಏವಂ ಸಬ್ಬಸಿಕ್ಖಾಪದಾನಂ ನಿದಾನಞ್ಚ ಗಣನಞ್ಚ ದಸ್ಸೇತ್ವಾ ಇದಾನಿ ಅಸಾಧಾರಣಾನಿ ದಸ್ಸೇತುಮಾಹ ‘‘ಛಚತ್ತಾಲೀಸಾ’’ತಿಆದಿ। ಭಿಕ್ಖೂನಂ ಭಿಕ್ಖುನೀಹಿ ಅಸಾಧಾರಣಭಾವಂ ಮಹೇಸಿನಾ ಗಮಿತಾನಿ ಸಿಕ್ಖಾಪದಾನಿ ಛಚತ್ತಾಲೀಸೇವ ಹೋನ್ತೀತಿ ಯೋಜನಾ। ಇಮಿನಾ ಉದ್ದೇಸಮಾಹ।
811. Evaṃ sabbasikkhāpadānaṃ nidānañca gaṇanañca dassetvā idāni asādhāraṇāni dassetumāha ‘‘chacattālīsā’’tiādi. Bhikkhūnaṃ bhikkhunīhi asādhāraṇabhāvaṃ mahesinā gamitāni sikkhāpadāni chacattālīseva hontīti yojanā. Iminā uddesamāha.
೮೧೪. ‘‘ಛ ಚ ಸಙ್ಘಾದಿಸೇಸಾ’’ತಿಆದೀಹಿ ದ್ವೀಹಿ ಗಾಥಾಹಿ ನಿದ್ದೇಸಂ ದಸ್ಸೇತ್ವಾ ‘‘ವಿಸ್ಸಟ್ಠೀ’’ತಿಆದಿನಾ ಪಟಿನಿದ್ದೇಸಮಾಹ।
814. ‘‘Cha ca saṅghādisesā’’tiādīhi dvīhi gāthāhi niddesaṃ dassetvā ‘‘vissaṭṭhī’’tiādinā paṭiniddesamāha.
೮೧೫. ‘‘ನಿಸ್ಸಗ್ಗಿಯೇ ಆದಿವಗ್ಗಸ್ಮಿ’’ನ್ತಿ ಪದಚ್ಛೇದೋ। ಧೋವನನ್ತಿ ಅಞ್ಞಾತಿಕಾಯ ಭಿಕ್ಖುನಿಯಾ ಚೀವರಧೋವನಂ। ಪಟಿಗ್ಗಹೋತಿ ತಸ್ಸಾಯೇವ ಹತ್ಥತೋ ಚೀವರಪಟಿಗ್ಗಹಣಂ।
815. ‘‘Nissaggiye ādivaggasmi’’nti padacchedo. Dhovananti aññātikāya bhikkhuniyā cīvaradhovanaṃ. Paṭiggahoti tassāyeva hatthato cīvarapaṭiggahaṇaṃ.
೮೧೬. ಆರಞ್ಞನ್ತಿ ಏಕೂನತಿಂಸತಿಮಂ ಸಿಕ್ಖಾಪದಂ।
816.Āraññanti ekūnatiṃsatimaṃ sikkhāpadaṃ.
೮೧೭. ಭಿಕ್ಖೂನಂ, ಭಿಕ್ಖುನೀನಞ್ಚ ವುತ್ತಾನಿ ಸಬ್ಬಾನಿ ಪಾಚಿತ್ತಿಯಾನಿ ಗಣನಾವಸಾ ಅಟ್ಠಾಸೀತಿಸತಂ ಭವನ್ತೀತಿ ಯೋಜನಾ। ಅಟ್ಠಾಸೀತಿಸತನ್ತಿ ಭಿಕ್ಖುನಿಪಾತಿಮೋಕ್ಖಾಗತಂ ಛಸಟ್ಠಿಸತಪಾಚಿತ್ತಿಯಂ ವಕ್ಖಮಾನೇಹಿ ಭಿಕ್ಖುನಿಯತೇಹಿ ಬಾವೀಸತಿಪಾಚಿತ್ತಿಯೇಹಿ ಸದ್ಧಿಂ ಅಟ್ಠಾಸೀತಿಸತಂ ಹೋತಿ। ತತೋತಿ ಅಟ್ಠಾಸೀತಾಧಿಕಸತಪಾಚಿತ್ತಿಯತೋ ನಿದ್ಧಾರಿತಾನಿ ಏತಾನಿ ದ್ವಾವೀಸತಿ ಖುದ್ದಕಾನಿ ಭಿಕ್ಖೂನಂ ಪಾತಿಮೋಕ್ಖಕೇ ಭವನ್ತೀತಿ ಯೋಜನಾ।
817. Bhikkhūnaṃ, bhikkhunīnañca vuttāni sabbāni pācittiyāni gaṇanāvasā aṭṭhāsītisataṃ bhavantīti yojanā. Aṭṭhāsītisatanti bhikkhunipātimokkhāgataṃ chasaṭṭhisatapācittiyaṃ vakkhamānehi bhikkhuniyatehi bāvīsatipācittiyehi saddhiṃ aṭṭhāsītisataṃ hoti. Tatoti aṭṭhāsītādhikasatapācittiyato niddhāritāni etāni dvāvīsati khuddakāni bhikkhūnaṃ pātimokkhake bhavantīti yojanā.
೮೧೮. ಭಿಕ್ಖುನಿವಗ್ಗೋತಿ ಭಿಕ್ಖುನೀನಂ ಓವಾದವಗ್ಗೋ। ಪರಮ್ಪರಭೋಜನೇ ಪಞ್ಞತ್ತಂ ಸಿಕ್ಖಾಪದಂ ಪರಮ್ಪರಭೋಜನಂ, ಪರಮ್ಪರಭೋಜನೇನ ಸಹ ವತ್ತತೀತಿ ಸಪರಮ್ಪರಭೋಜನೋ।
818.Bhikkhunivaggoti bhikkhunīnaṃ ovādavaggo. Paramparabhojane paññattaṃ sikkhāpadaṃ paramparabhojanaṃ, paramparabhojanena saha vattatīti saparamparabhojano.
೮೨೨. ‘‘ಏಕತೋ ಪನ ಪಞ್ಞತ್ತಾ’’ತಿಆದಿ ನಿಗಮನಂ। ಭಿಕ್ಖುನೀಹಿ ಅಸಾಧಾರಣತಂ ಗತಾ ಏಕತೋವ ಪಞ್ಞತ್ತಾ ಇಮೇ ಇಮಾನಿ ಸಿಕ್ಖಾಪದಾನಿ ಪಿಣ್ಡಿತಾನಿ ಛಚತ್ತಾಲೀಸ ಹೋನ್ತೀತಿ ಯೋಜನಾ।
822.‘‘Ekato pana paññattā’’tiādi nigamanaṃ. Bhikkhunīhi asādhāraṇataṃ gatā ekatova paññattā ime imāni sikkhāpadāni piṇḍitāni chacattālīsa hontīti yojanā.
೮೨೩. ಮಹೇಸಿನಾ ಭಿಕ್ಖೂಹಿ ಅಸಾಧಾರಣಭಾವಂ ಗಮಿತಾನಿ ಭಿಕ್ಖುನೀನಂ ಸಿಕ್ಖಾಪದಾನಿ ಪರಿಪಿಣ್ಡಿತಾನಿ ಸತಂ, ತಿಂಸ ಚ ಭವನ್ತೀತಿ ಯೋಜನಾ।
823. Mahesinā bhikkhūhi asādhāraṇabhāvaṃ gamitāni bhikkhunīnaṃ sikkhāpadāni paripiṇḍitāni sataṃ, tiṃsa ca bhavantīti yojanā.
೮೨೪. ಏವಂ ಉದ್ದಿಟ್ಠಾನಂ ನಿದ್ದೇಸಮಾಹ ‘‘ಪಾರಾಜಿಕಾನೀ’’ತಿಆದಿನಾ। ಪಾರಾಜಿಕಾನಿ ಚತ್ತಾರೀತಿ ಉಬ್ಭಜಾಣುಮಣ್ಡಲಿಕವಜ್ಜಪಟಿಚ್ಛಾದಿಕಉಕ್ಖಿತ್ತಾನುವತ್ತಿಕಅಟ್ಠವತ್ಥುಕಸಙ್ಖಾತಾನಿ ಚತ್ತಾರಿ ಪಾರಾಜಿಕಾನಿ।
824. Evaṃ uddiṭṭhānaṃ niddesamāha ‘‘pārājikānī’’tiādinā. Pārājikāni cattārīti ubbhajāṇumaṇḍalikavajjapaṭicchādikaukkhittānuvattikaaṭṭhavatthukasaṅkhātāni cattāri pārājikāni.
೮೨೬. ದ್ವೀಹಿ ಗಾಥಾಹಿ ನಿದ್ದಿಟ್ಠಾನಂ ಪಟಿನಿದ್ದೇಸೋ ‘‘ಭಿಕ್ಖುನೀನಂ ತು ಸಙ್ಘಾದಿಸೇಸೇಹೀ’’ತಿಆದಿ। ಚತುನ್ನಂ ಪಾರಾಜಿಕಾನಂ ಉದ್ದೇಸವಸೇನೇವ ಪಾಕಟತ್ತಾ ಪಟಿನಿದ್ದೇಸೇ ಅಗ್ಗಹಣಂ। ಆದಿತೋ ಛಾತಿ ಉಸ್ಸಯವಾದಿಕಾದಯೋ ಛ ಸಙ್ಘಾದಿಸೇಸಾ। ‘‘ಆದಿತೋ’’ತಿ ಇದಂ ‘‘ಯಾವತತಿಯಕಾ’’ತಿ ಇಮಿನಾಪಿ ಯೋಜೇತಬ್ಬಂ, ಅಟ್ಠಸು ಯಾವತತಿಯಕೇಸು ಪುರಿಮಾನಿ ಚತ್ತಾರಿ ಸಿಕ್ಖಾಪದಾನೀತಿ ವುತ್ತಂ ಹೋತಿ।
826. Dvīhi gāthāhi niddiṭṭhānaṃ paṭiniddeso ‘‘bhikkhunīnaṃ tu saṅghādisesehī’’tiādi. Catunnaṃ pārājikānaṃ uddesavaseneva pākaṭattā paṭiniddese aggahaṇaṃ. Ādito chāti ussayavādikādayo cha saṅghādisesā. ‘‘Ādito’’ti idaṃ ‘‘yāvatatiyakā’’ti imināpi yojetabbaṃ, aṭṭhasu yāvatatiyakesu purimāni cattāri sikkhāpadānīti vuttaṃ hoti.
೮೨೭. ಸತ್ತಞ್ಞದತ್ಥಿಕಾದೀನೀತಿ ಆದಿ-ಸದ್ದೇನ ಅಞ್ಞದತ್ಥಿಕಸಿಕ್ಖಾಪದತೋ ಪಚ್ಛಿಮಾನಿ ಚತ್ತಾರಿ, ಪುರಿಮಾನಿ ‘‘ಅಞ್ಞಂ ವಿಞ್ಞಾಪೇಯ್ಯ, ಅಞ್ಞಂ ಚೇತಾಪೇಯ್ಯಾ’’ತಿ ದ್ವೇ ಚ ಗಹಿತಾನಿ। ಪತ್ತೋ ಚೇವಾತಿ ಪಠಮಂ ಪತ್ತಸನ್ನಿಚಯಸಿಕ್ಖಾಪದಮಾಹ। ದುತಿಯವಗ್ಗೇ ಪುರಿಮಸಿಕ್ಖಾಪದದ್ವಯಂ ‘‘ಗರುಂ ಲಹು’’ನ್ತಿ ಇಮಿನಾ ಗಹಿತಂ।
827.Sattaññadatthikādīnīti ādi-saddena aññadatthikasikkhāpadato pacchimāni cattāri, purimāni ‘‘aññaṃ viññāpeyya, aññaṃ cetāpeyyā’’ti dve ca gahitāni. Patto cevāti paṭhamaṃ pattasannicayasikkhāpadamāha. Dutiyavagge purimasikkhāpadadvayaṃ ‘‘garuṃ lahu’’nti iminā gahitaṃ.
೮೨೮. ಇಧ ಭಿಕ್ಖುನಿಪಾತಿಮೋಕ್ಖೇ ಏತಾನಿ ಪನ ದ್ವಾದಸೇವ ನಿಸ್ಸಗ್ಗಿಯಾನಿ ಸತ್ಥಾರಾ ಭಿಕ್ಖುನೀನಂ ವಸೇನ ಏಕತೋ ಪಞ್ಞತ್ತಾನೀತಿ ಯೋಜನಾ।
828.Idha bhikkhunipātimokkhe etāni pana dvādaseva nissaggiyāni satthārā bhikkhunīnaṃ vasena ekato paññattānīti yojanā.
೮೨೯-೩೦. ‘‘ಸಬ್ಬೇವ ಗಣನಾವಸಾ’’ತಿಆದಿ ನಿಗಮನಂ। ಭಿಕ್ಖೂಹಿ ಅಸಾಧಾರಣತಂ ಗತಾ ಭಿಕ್ಖುನೀನಂ ಏಕತೋ ಪಞ್ಞತ್ತಾ ಸತಂ, ತಿಂಸ ಭವನ್ತೀತಿ ಯೋಜನಾ।
829-30.‘‘Sabbeva gaṇanāvasā’’tiādi nigamanaṃ. Bhikkhūhi asādhāraṇataṃ gatā bhikkhunīnaṃ ekato paññattā sataṃ, tiṃsa bhavantīti yojanā.
೮೩೧-೩. ‘‘ಅಸಾಧಾರಣಾ ಉಭಿನ್ನ’’ನ್ತಿ ಪದಚ್ಛೇದೋ। ಉಭಿನ್ನಂ ಅಸಾಧಾರಣಸಿಕ್ಖಾಪದಾನಿ ಸತಞ್ಚ ಸತ್ತತಿ ಚ ಛ ಚ ಭವನ್ತಿ। ಏವಮುದ್ದಿಟ್ಠಾನಂ ನಿದ್ದೇಸೋ ‘‘ಪಾರಾಜಿಕಾನಿ ಚತ್ತಾರೀ’’ತಿಆದಿ। ಭಿಕ್ಖೂಹಿ ಅಸಾಧಾರಣಾನಿ ಭಿಕ್ಖುನೀನಂ ಚತ್ತಾರಿ ಪಾರಾಜಿಕಾನಿ। ದಸಚ್ಛ ಚಾತಿ ಭಿಕ್ಖೂಹಿ ಅಸಾಧಾರಣಾನಿ ಭಿಕ್ಖುನೀನಂ ಸಙ್ಘಾದಿಸೇಸಾ ದಸ, ಭಿಕ್ಖುನೀಹಿ ಅಸಾಧಾರಣಾನಿ ಭಿಕ್ಖೂನಂ ವಿಸ್ಸಟ್ಠಿಆದಿಕಾ ಸಙ್ಘಾದಿಸೇಸಾ ಛ ಚಾತಿ ಸಙ್ಘಾದಿಸೇಸಾ ಸೋಳಸ।
831-3. ‘‘Asādhāraṇā ubhinna’’nti padacchedo. Ubhinnaṃ asādhāraṇasikkhāpadāni satañca sattati ca cha ca bhavanti. Evamuddiṭṭhānaṃ niddeso ‘‘pārājikāni cattārī’’tiādi. Bhikkhūhi asādhāraṇāni bhikkhunīnaṃ cattāri pārājikāni. Dasacchacāti bhikkhūhi asādhāraṇāni bhikkhunīnaṃ saṅghādisesā dasa, bhikkhunīhi asādhāraṇāni bhikkhūnaṃ vissaṭṭhiādikā saṅghādisesā cha cāti saṅghādisesā soḷasa.
ಅನಿಯತಾ ದುವೇ ಚೇವಾತಿ ಭಿಕ್ಖುನೀಹಿ ಅಸಾಧಾರಣಾನಿ ಭಿಕ್ಖೂನಂ ಅನಿಯತಾ ದ್ವೇ ಚ। ನಿಸ್ಸಗ್ಗಾ ಚತುವೀಸತೀತಿ ಭಿಕ್ಖುನೀಹಿ ಅಸಾಧಾರಣಾನಿ ಭಿಕ್ಖೂನಂ ದ್ವಾದಸ, ಭಿಕ್ಖೂಹಿ ಅಸಾಧಾರಣಾನಿ ಭಿಕ್ಖುನೀನಂ ದ್ವಾದಸಾತಿ ಏವಂ ನಿಸ್ಸಗ್ಗಿಯಾ ಚತುವೀಸತಿ ಚ। ಸತಂ ಅಟ್ಠಾರಸ ಖುದ್ದಕಾತಿ ಭಿಕ್ಖುನೀಹಿ ಅಸಾಧಾರಣಾನಿ ಭಿಕ್ಖೂನಂ ಬಾವೀಸತಿ, ಭಿಕ್ಖೂಹಿ ಅಸಾಧಾರಣಾನಿ ಭಿಕ್ಖುನೀನಂ ಛನ್ನವುತೀತಿ ಅಟ್ಠಾರಸಾಧಿಕಸತಂ ಖುದ್ದಕಾನಿ ಚ। ಏತ್ಥಾತಿ ಇಮಸ್ಮಿಂ ಅಸಾಧಾರಣಸಙ್ಗಹೇ।
Aniyatā duve cevāti bhikkhunīhi asādhāraṇāni bhikkhūnaṃ aniyatā dve ca. Nissaggā catuvīsatīti bhikkhunīhi asādhāraṇāni bhikkhūnaṃ dvādasa, bhikkhūhi asādhāraṇāni bhikkhunīnaṃ dvādasāti evaṃ nissaggiyā catuvīsati ca. Sataṃ aṭṭhārasa khuddakāti bhikkhunīhi asādhāraṇāni bhikkhūnaṃ bāvīsati, bhikkhūhi asādhāraṇāni bhikkhunīnaṃ channavutīti aṭṭhārasādhikasataṃ khuddakāni ca. Etthāti imasmiṃ asādhāraṇasaṅgahe.
ದ್ವಾದಸೇವ ಚ ಗಾರಯ್ಹಾತಿ ಭಿಕ್ಖುನೀಹಿ ಅಸಾಧಾರಣಾನಿ ಭಿಕ್ಖೂನಂ ಚತ್ತಾರಿ, ಭಿಕ್ಖೂಹಿ ಅಸಾಧಾರಣಾನಿ ಭಿಕ್ಖುನೀನಂ ಅಟ್ಠಾತಿ ಏತೇ ಪಾಟಿದೇಸನೀಯಾ ಚಾತಿ ಇಮೇ ಛಸತ್ತತಿಅಧಿಕಾನಿ ಸತಸಿಕ್ಖಾಪದಾನಿ ಉಭಿನ್ನಮ್ಪಿ ಅಸಾಧಾರಣಾನೀತಿ ಯೋಜನಾ।
Dvādaseva ca gārayhāti bhikkhunīhi asādhāraṇāni bhikkhūnaṃ cattāri, bhikkhūhi asādhāraṇāni bhikkhunīnaṃ aṭṭhāti ete pāṭidesanīyā cāti ime chasattatiadhikāni satasikkhāpadāni ubhinnampi asādhāraṇānīti yojanā.
೮೩೪. ಉಭಿನ್ನಮ್ಪಿ ಸಾಧಾರಣಾನಿ ಸತ್ಥುನಾ ಪಞ್ಞತ್ತಾನಿ ಸಿಕ್ಖಾಪದಾನಿ ಸತಞ್ಚ ಸತ್ತತಿ ಚ ಚತ್ತಾರಿ ಚ ಭವನ್ತೀತಿ ಪಕಾಸಿತಾತಿ ಯೋಜನಾ।
834. Ubhinnampi sādhāraṇāni satthunā paññattāni sikkhāpadāni satañca sattati ca cattāri ca bhavantīti pakāsitāti yojanā.
೮೩೫-೬. ಪಾರಾಜಿಕಾನಿ ಚತ್ತಾರೀತಿ ಮೇಥುನಅದಿನ್ನಾದಾನಮನುಸ್ಸವಿಗ್ಗಹಉತ್ತರಿಮನುಸ್ಸಧಮ್ಮಪಾರಾಜಿಕಾನಿ ಚತ್ತಾರಿ ಚ। ಸತ್ತ ಸಙ್ಘಾದಿಸೇಸಕಾತಿ ಸಞ್ಚರಿತ್ತಅಮೂಲಕಅಞ್ಞಭಾಗಿಯಾ, ಚತ್ತಾರೋ ಯಾವತತಿಯಕಾ ಚಾತಿ ಸಙ್ಘಾದಿಸೇಸಾ ಸತ್ತ ಚ। ಅಟ್ಠಾರಸ ಚ ನಿಸ್ಸಗ್ಗಾತಿ ನಿಸ್ಸಗ್ಗಿಯೇಸು ಪಠಮೇ ಚೀವರವಗ್ಗೇ ಧೋವನಪಟಿಗ್ಗಹಣಸಿಕ್ಖಾಪದದ್ವಯವಜ್ಜಿತಾನಿ ಅಟ್ಠ, ಏಳಕಲೋಮವಗ್ಗೇ ಅಟ್ಠಮನವಮದಸಮಾನೀತಿ ತಯೋ, ಪತ್ತವಗ್ಗೇ ಪಠಮಪತ್ತವಸ್ಸಿಕಸಾಟಿಕಆರಞ್ಞಕಸಿಕ್ಖಾಪದತ್ತಯಸ್ಸ ವಜ್ಜಿತಾನಿ ಸತ್ತ ಚಾತಿ ಇಮಾನಿ ಅಟ್ಠಾರಸ ನಿಸ್ಸಗ್ಗಿಯಸಿಕ್ಖಾಪದಾನಿ ಚ। ಸಮಸತ್ತತಿ ಖುದ್ದಕಾತಿ –
835-6.Pārājikāni cattārīti methunaadinnādānamanussaviggahauttarimanussadhammapārājikāni cattāri ca. Satta saṅghādisesakāti sañcarittaamūlakaaññabhāgiyā, cattāro yāvatatiyakā cāti saṅghādisesā satta ca. Aṭṭhārasa ca nissaggāti nissaggiyesu paṭhame cīvaravagge dhovanapaṭiggahaṇasikkhāpadadvayavajjitāni aṭṭha, eḷakalomavagge aṭṭhamanavamadasamānīti tayo, pattavagge paṭhamapattavassikasāṭikaāraññakasikkhāpadattayassa vajjitāni satta cāti imāni aṭṭhārasa nissaggiyasikkhāpadāni ca. Samasattati khuddakāti –
‘‘ಸಬ್ಬೋ ಭಿಕ್ಖುನಿವಗ್ಗೋಪಿ…ಪೇ॰… ದ್ವಾವೀಸತಿ ಭವನ್ತಿ ಹೀ’’ತಿ॥ (ಉ॰ ವಿ॰ ೮೧೮-೮೨೧) –
‘‘Sabbo bhikkhunivaggopi…pe… dvāvīsati bhavanti hī’’ti. (u. vi. 818-821) –
ವುತ್ತಾ ಭಿಕ್ಖೂನಂ ಭಿಕ್ಖುನೀಹಿ ಅಸಾಧಾರಣಾತಿ ಇಮೇಹಿ ಬಾವೀಸತಿಪಾಚಿತ್ತಿಯೇಹಿ ವಜ್ಜಿತಾನಿ ಅವಸೇಸಾನಿ ಸತ್ತತಿ ಪಾಚಿತ್ತಿಯಾನಿ ಚ ಉಭಯಸಾಧಾರಣವಸೇನ ಪಞ್ಞತ್ತಾನಿ। ಪಞ್ಚಸತ್ತತಿ ಸೇಖಿಯಾಪಿ ಚಾತಿ ಉಭಿನ್ನಂ ಭಿಕ್ಖುಭಿಕ್ಖುನೀನಂ ಸಮಸಿಕ್ಖತಾ ಸಾಧಾರಣಸಿಕ್ಖಾಪದಾನಿ ಸಬ್ಬಸೋ ಸತಂ, ಸತ್ತತಿ, ಚತ್ತಾರಿ ಚ ಹೋನ್ತೀತಿ ಯೋಜನಾ।
Vuttā bhikkhūnaṃ bhikkhunīhi asādhāraṇāti imehi bāvīsatipācittiyehi vajjitāni avasesāni sattati pācittiyāni ca ubhayasādhāraṇavasena paññattāni. Pañcasattati sekhiyāpi cāti ubhinnaṃ bhikkhubhikkhunīnaṃ samasikkhatā sādhāraṇasikkhāpadāni sabbaso sataṃ, sattati, cattāri ca hontīti yojanā.
ಇತಿ ಉತ್ತರೇ ಲೀನತ್ಥಪಕಾಸನಿಯಾ
Iti uttare līnatthapakāsaniyā
ಸಾಧಾರಣಾಸಾಧಾರಣಕಥಾವಣ್ಣನಾ ನಿಟ್ಠಿತಾ।
Sādhāraṇāsādhāraṇakathāvaṇṇanā niṭṭhitā.
