| Library / Tipiṭaka / திபிடக • Tipiṭaka / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā |
2. ஸச்சகதா²
2. Saccakathā
ஸச்சகதா²வண்ணனா
Saccakathāvaṇṇanā
8. இதா³னி யுக³னத்³த⁴கு³ணஸ்ஸ அரியமக்³க³ஸ்ஸ வஸேன ஸச்சட்ட²ங் ஸச்சபடிவேத⁴விஸேஸங் ஸச்சலக்க²ணாதி³விதா⁴னஞ்ச த³ஸ்ஸெந்தேன கதி²தாய ஸுத்தந்தபுப்³ப³ங்க³மாய ஸச்சகதா²ய அபுப்³ப³த்தா²னுவண்ணனா. தத்த² ஸுத்தந்தே தாவ ததா²னீதி யதா²ஸபா⁴வவஸேன தச்சா²னி. யதா²ஸபா⁴வபூ⁴தானேவ ஹி த⁴ம்மஜாதானி ஸச்சட்டே²ன ஸச்சானி. ஸச்சட்டோ² பட²மஞாணனித்³தே³ஸவண்ணனாயங் வுத்தோ. அவிததா²னீதி வுத்தஸபா⁴வே விபரியாயவிரஹிதானி. ந ஹி ஸச்சானி அஸச்சானி நாம ஹொந்தி. அனஞ்ஞதா²னீதி அஞ்ஞஸபா⁴வவிரஹிதானி. ந ஹி அஸச்சானி ஸச்சானி நாம ஹொந்தி. இத³ங் து³க்க²ந்தி, பி⁴க்க²வே, தத²மேதந்தி பி⁴க்க²வே, இத³ங் து³க்க²ந்தி யங் வுச்சதி, ஏதங் யதா²ஸபா⁴வத்தா தத²ங். து³க்க²மேவ ஹி து³க்க²ங். வுத்தஸபா⁴வே விபரியாயாபா⁴வதோ அவிதத²ங். ந ஹி து³க்க²ங் அது³க்க²ங் நாம ஹோதி. அஞ்ஞஸபா⁴வவிரஹிதத்தா அனஞ்ஞத²ங். ந ஹி து³க்க²ங் ஸமுத³யாதி³ஸபா⁴வங் ஹோதி. ஸமுத³யாதீ³ஸுபி ஏஸேவ நயோ.
8. Idāni yuganaddhaguṇassa ariyamaggassa vasena saccaṭṭhaṃ saccapaṭivedhavisesaṃ saccalakkhaṇādividhānañca dassentena kathitāya suttantapubbaṅgamāya saccakathāya apubbatthānuvaṇṇanā. Tattha suttante tāva tathānīti yathāsabhāvavasena tacchāni. Yathāsabhāvabhūtāneva hi dhammajātāni saccaṭṭhena saccāni. Saccaṭṭho paṭhamañāṇaniddesavaṇṇanāyaṃ vutto. Avitathānīti vuttasabhāve vipariyāyavirahitāni. Na hi saccāni asaccāni nāma honti. Anaññathānīti aññasabhāvavirahitāni. Na hi asaccāni saccāni nāma honti. Idaṃ dukkhanti, bhikkhave, tathametanti bhikkhave, idaṃ dukkhanti yaṃ vuccati, etaṃ yathāsabhāvattā tathaṃ. Dukkhameva hi dukkhaṃ. Vuttasabhāve vipariyāyābhāvato avitathaṃ. Na hi dukkhaṃ adukkhaṃ nāma hoti. Aññasabhāvavirahitattā anaññathaṃ. Na hi dukkhaṃ samudayādisabhāvaṃ hoti. Samudayādīsupi eseva nayo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / படிஸம்பி⁴தா³மக்³க³பாளி • Paṭisambhidāmaggapāḷi / 2. ஸச்சகதா² • 2. Saccakathā
