| Library / Tipiṭaka / തിപിടക • Tipiṭaka / കങ്ഖാവിതരണീ-അഭിനവ-ടീകാ • Kaṅkhāvitaraṇī-abhinava-ṭīkā |
൯. രൂപിയസംവോഹാരസിക്ഖാപദവണ്ണനാ
9. Rūpiyasaṃvohārasikkhāpadavaṇṇanā
കതാദിവസേനാതി കതഅകതകതാകതവസേന. സുവണ്ണാദിചതുബ്ബിധമ്പി നിസ്സഗ്ഗിയവത്ഥു ഇധ രൂപിയഗ്ഗഹണേന ഗഹിതന്തി ആഹ ‘‘ജാതരൂപരജതപരിവത്തന’’ന്തി. ഇദഞ്ച ഉക്കട്ഠപരിച്ഛേദേന വുത്തന്തി ദട്ഠബ്ബം. തേനാഹ ‘‘പുരിമസിക്ഖാപദേന ഹീ’’തിആദി. പരിവത്തനന്തി സാദിതരൂപിയസ്സ പരിവത്തനം. പുരിമനയാനുസാരേനാതി ‘‘അഹം, ഭന്തേ, നാനപ്പകാരകം രൂപിയസംവോഹാരം സമാപജ്ജിം, ഇദം മേ നിസ്സഗ്ഗിയ’’ന്തിആദിനാ (പാരാ॰ ൫൮൯).
Katādivasenāti kataakatakatākatavasena. Suvaṇṇādicatubbidhampi nissaggiyavatthu idha rūpiyaggahaṇena gahitanti āha ‘‘jātarūparajataparivattana’’nti. Idañca ukkaṭṭhaparicchedena vuttanti daṭṭhabbaṃ. Tenāha ‘‘purimasikkhāpadena hī’’tiādi. Parivattananti sāditarūpiyassa parivattanaṃ. Purimanayānusārenāti ‘‘ahaṃ, bhante, nānappakārakaṃ rūpiyasaṃvohāraṃ samāpajjiṃ, idaṃ me nissaggiya’’ntiādinā (pārā. 589).
രൂപിയസംവോഹാരവത്ഥുസ്മിന്തി പടിഗ്ഗഹണസ്സേവ പടിക്ഖിത്തത്താ പടിഗ്ഗഹിതപരിവത്തനേ ദോസം അദിസ്വാ രൂപിയപരിവത്തനേ. തസ്സ വാതി പരിവത്തിതസ്സ വാ. ധനസ്സ വാതി അത്തനോ മൂലധനസ്സ വാ . അത്തനോ വാ ഹി അരൂപിയേന പരസ്സ രൂപിയം ചേതാപേയ്യ, അത്തനോ വാ രൂപിയേന പരസ്സ അരൂപിയം, ഉഭയഥാപി രൂപിയസംവോഹാരോ കതോവ ഹോതീതി.
Rūpiyasaṃvohāravatthusminti paṭiggahaṇasseva paṭikkhittattā paṭiggahitaparivattane dosaṃ adisvā rūpiyaparivattane. Tassa vāti parivattitassa vā. Dhanassa vāti attano mūladhanassa vā . Attano vā hi arūpiyena parassa rūpiyaṃ cetāpeyya, attano vā rūpiyena parassa arūpiyaṃ, ubhayathāpi rūpiyasaṃvohāro katova hotīti.
രൂപിയസംവോഹാരസിക്ഖാപദവണ്ണനാ നിട്ഠിതാ.
Rūpiyasaṃvohārasikkhāpadavaṇṇanā niṭṭhitā.
