| Library / Tipiṭaka / ತಿಪಿಟಕ • Tipiṭaka / ಕಥಾವತ್ಥುಪಾಳಿ • Kathāvatthupāḷi |
೮. ಅಟ್ಠಮವಗ್ಗೋ
8. Aṭṭhamavaggo
(೭೯) ೭. ರೂಪಧಾತುಯಾಆಯತನಕಥಾ
(79) 7. Rūpadhātuyāāyatanakathā
೫೧೯. ಅತ್ಥಿ ಸಳಾಯತನಿಕೋ ಅತ್ತಭಾವೋ ರೂಪಧಾತುಯಾತಿ? ಆಮನ್ತಾ। ಅತ್ಥಿ ತತ್ಥ ಘಾನಾಯತನನ್ತಿ? ಆಮನ್ತಾ। ಅತ್ಥಿ ತತ್ಥ ಗನ್ಧಾಯತನನ್ತಿ? ನ ಹೇವಂ ವತ್ತಬ್ಬೇ…ಪೇ॰… ಅತ್ಥಿ ತತ್ಥ ಜಿವ್ಹಾಯತನನ್ತಿ? ಆಮನ್ತಾ । ಅತ್ಥಿ ತತ್ಥ ರಸಾಯತನನ್ತಿ? ನ ಹೇವಂ ವತ್ತಬ್ಬೇ…ಪೇ॰… ಅತ್ಥಿ ತತ್ಥ ಕಾಯಾಯತನನ್ತಿ? ಆಮನ್ತಾ। ಅತ್ಥಿ ತತ್ಥ ಫೋಟ್ಠಬ್ಬಾಯತನನ್ತಿ? ನ ಹೇವಂ ವತ್ತಬ್ಬೇ…ಪೇ॰…।
519. Atthi saḷāyataniko attabhāvo rūpadhātuyāti? Āmantā. Atthi tattha ghānāyatananti? Āmantā. Atthi tattha gandhāyatananti? Na hevaṃ vattabbe…pe… atthi tattha jivhāyatananti? Āmantā . Atthi tattha rasāyatananti? Na hevaṃ vattabbe…pe… atthi tattha kāyāyatananti? Āmantā. Atthi tattha phoṭṭhabbāyatananti? Na hevaṃ vattabbe…pe….
ನತ್ಥಿ ತತ್ಥ ಗನ್ಧಾಯತನನ್ತಿ? ಆಮನ್ತಾ। ನತ್ಥಿ ತತ್ಥ ಘಾನಾಯತನನ್ತಿ? ನ ಹೇವಂ ವತ್ತಬ್ಬೇ…ಪೇ॰… ನತ್ಥಿ ತತ್ಥ ರಸಾಯತನನ್ತಿ? ಆಮನ್ತಾ। ನತ್ಥಿ ತತ್ಥ ಜಿವ್ಹಾಯತನನ್ತಿ? ನ ಹೇವಂ ವತ್ತಬ್ಬೇ…ಪೇ॰… ನತ್ಥಿ ತತ್ಥ ಫೋಟ್ಠಬ್ಬಾಯತನನ್ತಿ? ಆಮನ್ತಾ । ನತ್ಥಿ ತತ್ಥ ಕಾಯಾಯತನನ್ತಿ? ನ ಹೇವಂ ವತ್ತಬ್ಬೇ…ಪೇ॰…।
Natthi tattha gandhāyatananti? Āmantā. Natthi tattha ghānāyatananti? Na hevaṃ vattabbe…pe… natthi tattha rasāyatananti? Āmantā. Natthi tattha jivhāyatananti? Na hevaṃ vattabbe…pe… natthi tattha phoṭṭhabbāyatananti? Āmantā . Natthi tattha kāyāyatananti? Na hevaṃ vattabbe…pe….
೫೨೦. ಅತ್ಥಿ ತತ್ಥ ಚಕ್ಖಾಯತನಂ, ಅತ್ಥಿ ರೂಪಾಯತನನ್ತಿ? ಆಮನ್ತಾ। ಅತ್ಥಿ ತತ್ಥ ಘಾನಾಯತನಂ, ಅತ್ಥಿ ಗನ್ಧಾಯತನನ್ತಿ? ನ ಹೇವಂ ವತ್ತಬ್ಬೇ…ಪೇ॰… ಅತ್ಥಿ ತತ್ಥ ಚಕ್ಖಾಯತನಂ, ಅತ್ಥಿ ರೂಪಾಯತನನ್ತಿ? ಆಮನ್ತಾ। ಅತ್ಥಿ ತತ್ಥ ಜಿವ್ಹಾಯತನಂ, ಅತ್ಥಿ ರಸಾಯತನಂ…ಪೇ॰… ಅತ್ಥಿ ತತ್ಥ ಕಾಯಾಯತನಂ, ಅತ್ಥಿ ಫೋಟ್ಠಬ್ಬಾಯತನನ್ತಿ? ನ ಹೇವಂ ವತ್ತಬ್ಬೇ…ಪೇ॰… ಅತ್ಥಿ ತತ್ಥ ಸೋತಾಯತನಂ, ಅತ್ಥಿ ಸದ್ದಾಯತನಂ…ಪೇ॰… ಅತ್ಥಿ ತತ್ಥ ಮನಾಯತನಂ, ಅತ್ಥಿ ಧಮ್ಮಾಯತನನ್ತಿ? ಆಮನ್ತಾ। ಅತ್ಥಿ ತತ್ಥ ಘಾನಾಯತನಂ, ಅತ್ಥಿ ಗನ್ಧಾಯತನನ್ತಿ? ನ ಹೇವಂ ವತ್ತಬ್ಬೇ…ಪೇ॰… ಅತ್ಥಿ ತತ್ಥ ಮನಾಯತನಂ, ಅತ್ಥಿ ಧಮ್ಮಾಯತನನ್ತಿ? ಆಮನ್ತಾ। ಅತ್ಥಿ ತತ್ಥ ಜಿವ್ಹಾಯತನಂ, ಅತ್ಥಿ ರಸಾಯತನನ್ತಿ…ಪೇ॰… ಅತ್ಥಿ ತತ್ಥ ಕಾಯಾಯತನಂ, ಅತ್ಥಿ ಫೋಟ್ಠಬ್ಬಾಯತನನ್ತಿ? ನ ಹೇವಂ ವತ್ತಬ್ಬೇ…ಪೇ॰…।
520. Atthi tattha cakkhāyatanaṃ, atthi rūpāyatananti? Āmantā. Atthi tattha ghānāyatanaṃ, atthi gandhāyatananti? Na hevaṃ vattabbe…pe… atthi tattha cakkhāyatanaṃ, atthi rūpāyatananti? Āmantā. Atthi tattha jivhāyatanaṃ, atthi rasāyatanaṃ…pe… atthi tattha kāyāyatanaṃ, atthi phoṭṭhabbāyatananti? Na hevaṃ vattabbe…pe… atthi tattha sotāyatanaṃ, atthi saddāyatanaṃ…pe… atthi tattha manāyatanaṃ, atthi dhammāyatananti? Āmantā. Atthi tattha ghānāyatanaṃ, atthi gandhāyatananti? Na hevaṃ vattabbe…pe… atthi tattha manāyatanaṃ, atthi dhammāyatananti? Āmantā. Atthi tattha jivhāyatanaṃ, atthi rasāyatananti…pe… atthi tattha kāyāyatanaṃ, atthi phoṭṭhabbāyatananti? Na hevaṃ vattabbe…pe….
ಅತ್ಥಿ ತತ್ಥ ಘಾನಾಯತನಂ, ನತ್ಥಿ ಗನ್ಧಾಯತನನ್ತಿ? ಆಮನ್ತಾ । ಅತ್ಥಿ ತತ್ಥ ಚಕ್ಖಾಯತನಂ, ನತ್ಥಿ ರೂಪಾಯತನನ್ತಿ? ನ ಹೇವಂ ವತ್ತಬ್ಬೇ…ಪೇ॰… ಅತ್ಥಿ ತತ್ಥ ಘಾನಾಯತನಂ, ನತ್ಥಿ ಗನ್ಧಾಯತನನ್ತಿ? ಆಮನ್ತಾ। ಅತ್ಥಿ ತತ್ಥ ಸೋತಾಯತನಂ, ನತ್ಥಿ ಸದ್ದಾಯತನಂ…ಪೇ॰… ಅತ್ಥಿ ತತ್ಥ ಮನಾಯತನಂ, ನತ್ಥಿ ಧಮ್ಮಾಯತನನ್ತಿ? ನ ಹೇವಂ ವತ್ತಬ್ಬೇ…ಪೇ॰… ಅತ್ಥಿ ತತ್ಥ ಜಿವ್ಹಾಯತನಂ, ನತ್ಥಿ ರಸಾಯತನಂ…ಪೇ॰… ಅತ್ಥಿ ತತ್ಥ ಕಾಯಾಯತನಂ, ನತ್ಥಿ ಫೋಟ್ಠಬ್ಬಾಯತನನ್ತಿ? ಆಮನ್ತಾ। ಅತ್ಥಿ ತತ್ಥ ಚಕ್ಖಾಯತನಂ, ನತ್ಥಿ ರೂಪಾಯತನನ್ತಿ? ನ ಹೇವಂ ವತ್ತಬ್ಬೇ…ಪೇ॰… ಅತ್ಥಿ ತತ್ಥ ಕಾಯಾಯತನಂ, ನತ್ಥಿ ಫೋಟ್ಠಬ್ಬಾಯತನನ್ತಿ? ಆಮನ್ತಾ। ಅತ್ಥಿ ತತ್ಥ ಸೋತಾಯತನಂ, ನತ್ಥಿ ಸದ್ದಾಯತನಂ …ಪೇ॰… ಅತ್ಥಿ ತತ್ಥ ಮನಾಯತನಂ, ನತ್ಥಿ ಧಮ್ಮಾಯತನನ್ತಿ? ನ ಹೇವಂ ವತ್ತಬ್ಬೇ…ಪೇ॰…।
Atthi tattha ghānāyatanaṃ, natthi gandhāyatananti? Āmantā . Atthi tattha cakkhāyatanaṃ, natthi rūpāyatananti? Na hevaṃ vattabbe…pe… atthi tattha ghānāyatanaṃ, natthi gandhāyatananti? Āmantā. Atthi tattha sotāyatanaṃ, natthi saddāyatanaṃ…pe… atthi tattha manāyatanaṃ, natthi dhammāyatananti? Na hevaṃ vattabbe…pe… atthi tattha jivhāyatanaṃ, natthi rasāyatanaṃ…pe… atthi tattha kāyāyatanaṃ, natthi phoṭṭhabbāyatananti? Āmantā. Atthi tattha cakkhāyatanaṃ, natthi rūpāyatananti? Na hevaṃ vattabbe…pe… atthi tattha kāyāyatanaṃ, natthi phoṭṭhabbāyatananti? Āmantā. Atthi tattha sotāyatanaṃ, natthi saddāyatanaṃ …pe… atthi tattha manāyatanaṃ, natthi dhammāyatananti? Na hevaṃ vattabbe…pe….
೫೨೧. ಅತ್ಥಿ ತತ್ಥ ಚಕ್ಖಾಯತನಂ ಅತ್ಥಿ ರೂಪಾಯತನಂ, ತೇನ ಚಕ್ಖುನಾ ತಂ ರೂಪಂ ಪಸ್ಸತೀತಿ? ಆಮನ್ತಾ। ಅತ್ಥಿ ತತ್ಥ ಘಾನಾಯತನಂ ಅತ್ಥಿ ಗನ್ಧಾಯತನಂ, ತೇನ ಘಾನೇನ ತಂ ಗನ್ಧಂ ಘಾಯತೀತಿ? ನ ಹೇವಂ ವತ್ತಬ್ಬೇ…ಪೇ॰… ಅತ್ಥಿ ತತ್ಥ ಚಕ್ಖಾಯತನಂ ಅತ್ಥಿ ರೂಪಾಯತನಂ, ತೇನ ಚಕ್ಖುನಾ ತಂ ರೂಪಂ ಪಸ್ಸತೀತಿ? ಆಮನ್ತಾ। ಅತ್ಥಿ ತತ್ಥ ಜಿವ್ಹಾಯತನಂ ಅತ್ಥಿ ರಸಾಯತನಂ, ತಾಯ ಜಿವ್ಹಾಯ ತಂ ರಸಂ ಸಾಯತಿ…ಪೇ॰… ಅತ್ಥಿ ತತ್ಥ ಕಾಯಾಯತನಂ ಅತ್ಥಿ ಫೋಟ್ಠಬ್ಬಾಯತನಂ, ತೇನ ಕಾಯೇನ ತಂ ಫೋಟ್ಠಬ್ಬಂ ಫುಸತೀತಿ? ನ ಹೇವಂ ವತ್ತಬ್ಬೇ…ಪೇ॰…।
521. Atthi tattha cakkhāyatanaṃ atthi rūpāyatanaṃ, tena cakkhunā taṃ rūpaṃ passatīti? Āmantā. Atthi tattha ghānāyatanaṃ atthi gandhāyatanaṃ, tena ghānena taṃ gandhaṃ ghāyatīti? Na hevaṃ vattabbe…pe… atthi tattha cakkhāyatanaṃ atthi rūpāyatanaṃ, tena cakkhunā taṃ rūpaṃ passatīti? Āmantā. Atthi tattha jivhāyatanaṃ atthi rasāyatanaṃ, tāya jivhāya taṃ rasaṃ sāyati…pe… atthi tattha kāyāyatanaṃ atthi phoṭṭhabbāyatanaṃ, tena kāyena taṃ phoṭṭhabbaṃ phusatīti? Na hevaṃ vattabbe…pe….
ಅತ್ಥಿ ತತ್ಥ ಸೋತಾಯತನಂ ಅತ್ಥಿ ಸದ್ದಾಯತನಂ…ಪೇ॰… ಅತ್ಥಿ ತತ್ಥ ಮನಾಯತನಂ ಅತ್ಥಿ ಧಮ್ಮಾಯತನಂ, ತೇನ ಮನೇನ ತಂ ಧಮ್ಮಂ ವಿಜಾನಾತೀತಿ? ಆಮನ್ತಾ। ಅತ್ಥಿ ತತ್ಥ ಘಾನಾಯತನಂ ಅತ್ಥಿ ಗನ್ಧಾಯತನಂ, ತೇನ ಘಾನೇನ ತಂ ಗನ್ಧಂ ಘಾಯತೀತಿ? ನ ಹೇವಂ ವತ್ತಬ್ಬೇ…ಪೇ॰… ಅತ್ಥಿ ತತ್ಥ ಮನಾಯತನಂ ಅತ್ಥಿ ಧಮ್ಮಾಯತನಂ, ತೇನ ಮನೇನ ತಂ ಧಮ್ಮಂ ವಿಜಾನಾತೀತಿ? ಆಮನ್ತಾ। ಅತ್ಥಿ ತತ್ಥ ಜಿವ್ಹಾಯತನಂ ಅತ್ಥಿ ರಸಾಯತನಂ…ಪೇ॰… ಅತ್ಥಿ ತತ್ಥ ಕಾಯಾಯತನಂ ಅತ್ಥಿ ಫೋಟ್ಠಬ್ಬಾಯತನಂ, ತೇನ ಕಾಯೇನ ತಂ ಫೋಟ್ಠಬ್ಬಂ ಫುಸತೀತಿ? ನ ಹೇವಂ ವತ್ತಬ್ಬೇ…ಪೇ॰…।
Atthi tattha sotāyatanaṃ atthi saddāyatanaṃ…pe… atthi tattha manāyatanaṃ atthi dhammāyatanaṃ, tena manena taṃ dhammaṃ vijānātīti? Āmantā. Atthi tattha ghānāyatanaṃ atthi gandhāyatanaṃ, tena ghānena taṃ gandhaṃ ghāyatīti? Na hevaṃ vattabbe…pe… atthi tattha manāyatanaṃ atthi dhammāyatanaṃ, tena manena taṃ dhammaṃ vijānātīti? Āmantā. Atthi tattha jivhāyatanaṃ atthi rasāyatanaṃ…pe… atthi tattha kāyāyatanaṃ atthi phoṭṭhabbāyatanaṃ, tena kāyena taṃ phoṭṭhabbaṃ phusatīti? Na hevaṃ vattabbe…pe….
ಅತ್ಥಿ ತತ್ಥ ಘಾನಾಯತನಂ ಅತ್ಥಿ ಗನ್ಧಾಯತನಂ, ನ ಚ ತೇನ ಘಾನೇನ ತಂ ಗನ್ಧಂ ಘಾಯತೀತಿ? ಆಮನ್ತಾ। ಅತ್ಥಿ ತತ್ಥ ಚಕ್ಖಾಯತನಂ ಅತ್ಥಿ ರೂಪಾಯತನಂ, ನ ಚ ತೇನ ಚಕ್ಖುನಾ ತಂ ರೂಪಂ ಪಸ್ಸತೀತಿ? ನ ಹೇವಂ ವತ್ತಬ್ಬೇ…ಪೇ॰… ಅತ್ಥಿ ತತ್ಥ ಘಾನಾಯತನಂ ಅತ್ಥಿ ಗನ್ಧಾಯತನಂ, ನ ಚ ತೇನ ಘಾನೇನ ತಂ ಗನ್ಧಂ ಘಾಯತೀತಿ? ಆಮನ್ತಾ। ಅತ್ಥಿ ತತ್ಥ ಸೋತಾಯತನಂ ಅತ್ಥಿ ಸದ್ದಾಯತನಂ…ಪೇ॰… ಅತ್ಥಿ ತತ್ಥ ಮನಾಯತನಂ ಅತ್ಥಿ ಧಮ್ಮಾಯತನಂ, ನ ಚ ತೇನ ಮನೇನ ತಂ ಧಮ್ಮಂ ವಿಜಾನಾತೀತಿ? ನ ಹೇವಂ ವತ್ತಬ್ಬೇ…ಪೇ॰…।
Atthi tattha ghānāyatanaṃ atthi gandhāyatanaṃ, na ca tena ghānena taṃ gandhaṃ ghāyatīti? Āmantā. Atthi tattha cakkhāyatanaṃ atthi rūpāyatanaṃ, na ca tena cakkhunā taṃ rūpaṃ passatīti? Na hevaṃ vattabbe…pe… atthi tattha ghānāyatanaṃ atthi gandhāyatanaṃ, na ca tena ghānena taṃ gandhaṃ ghāyatīti? Āmantā. Atthi tattha sotāyatanaṃ atthi saddāyatanaṃ…pe… atthi tattha manāyatanaṃ atthi dhammāyatanaṃ, na ca tena manena taṃ dhammaṃ vijānātīti? Na hevaṃ vattabbe…pe….
ಅತ್ಥಿ ತತ್ಥ ಜಿವ್ಹಾಯತನಂ ಅತ್ಥಿ ರಸಾಯತನಂ…ಪೇ॰… ಅತ್ಥಿ ತತ್ಥ ಕಾಯಾಯತನಂ ಅತ್ಥಿ ಫೋಟ್ಠಬ್ಬಾಯತನಂ, ನ ಚ ತೇನ ಕಾಯೇನ ತಂ ಫೋಟ್ಠಬ್ಬಂ ಫುಸತೀತಿ? ಆಮನ್ತಾ। ಅತ್ಥಿ ತತ್ಥ ಸೋತಾಯತನಂ ಅತ್ಥಿ ಸದ್ದಾಯತನಂ…ಪೇ॰… ಅತ್ಥಿ ತತ್ಥ ಮನಾಯತನಂ ಅತ್ಥಿ ಧಮ್ಮಾಯತನಂ, ನ ಚ ತೇನ ಮನೇನ ತಂ ಧಮ್ಮಂ ವಿಜಾನಾತೀತಿ? ನ ಹೇವಂ ವತ್ತಬ್ಬೇ…ಪೇ॰…।
Atthi tattha jivhāyatanaṃ atthi rasāyatanaṃ…pe… atthi tattha kāyāyatanaṃ atthi phoṭṭhabbāyatanaṃ, na ca tena kāyena taṃ phoṭṭhabbaṃ phusatīti? Āmantā. Atthi tattha sotāyatanaṃ atthi saddāyatanaṃ…pe… atthi tattha manāyatanaṃ atthi dhammāyatanaṃ, na ca tena manena taṃ dhammaṃ vijānātīti? Na hevaṃ vattabbe…pe….
೫೨೨. ಅತ್ಥಿ ತತ್ಥ ಘಾನಾಯತನಂ ಅತ್ಥಿ ಗನ್ಧಾಯತನಂ, ತೇನ ಘಾನೇನ ತಂ ಗನ್ಧಂ ಘಾಯತೀತಿ? ಆಮನ್ತಾ। ಅತ್ಥಿ ತತ್ಥ ಮೂಲಗನ್ಧೋ ಸಾರಗನ್ಧೋ ತಚಗನ್ಧೋ ಪತ್ತಗನ್ಧೋ ಪುಪ್ಫಗನ್ಧೋ ಫಲಗನ್ಧೋ ಆಮಗನ್ಧೋ ವಿಸ್ಸಗನ್ಧೋ ಸುಗನ್ಧೋ ದುಗ್ಗನ್ಧೋತಿ? ನ ಹೇವಂ ವತ್ತಬ್ಬೇ…ಪೇ॰…।
522. Atthi tattha ghānāyatanaṃ atthi gandhāyatanaṃ, tena ghānena taṃ gandhaṃ ghāyatīti? Āmantā. Atthi tattha mūlagandho sāragandho tacagandho pattagandho pupphagandho phalagandho āmagandho vissagandho sugandho duggandhoti? Na hevaṃ vattabbe…pe….
ಅತ್ಥಿ ತತ್ಥ ಜಿವ್ಹಾಯತನಂ ಅತ್ಥಿ ರಸಾಯತನಂ, ತಾಯ ಜಿವ್ಹಾಯ ತಂ ರಸಂ ಸಾಯತೀತಿ? ಆಮನ್ತಾ। ಅತ್ಥಿ ತತ್ಥ ಮೂಲರಸೋ ಖನ್ಧರಸೋ ತಚರಸೋ ಪತ್ತರಸೋ ಪುಪ್ಫರಸೋ ಫಲರಸೋ ಅಮ್ಬಿಲಂ ಮಧುರಂ ತಿತ್ತಕಂ ಕಟುಕಂ ಲೋಣಿಯಂ ಖಾರಿಯಂ ಲಮ್ಬಿಲಂ ಕಸಾವೋ ಸಾದು ಅಸಾದೂತಿ? ನ ಹೇವಂ ವತ್ತಬ್ಬೇ…ಪೇ॰…।
Atthi tattha jivhāyatanaṃ atthi rasāyatanaṃ, tāya jivhāya taṃ rasaṃ sāyatīti? Āmantā. Atthi tattha mūlaraso khandharaso tacaraso pattaraso puppharaso phalaraso ambilaṃ madhuraṃ tittakaṃ kaṭukaṃ loṇiyaṃ khāriyaṃ lambilaṃ kasāvo sādu asādūti? Na hevaṃ vattabbe…pe….
ಅತ್ಥಿ ತತ್ಥ ಕಾಯಾಯತನಂ ಅತ್ಥಿ ಫೋಟ್ಠಬ್ಬಾಯತನಂ, ತೇನ ಕಾಯೇನ ತಂ ಫೋಟ್ಠಬ್ಬಂ ಫುಸತೀತಿ? ಆಮನ್ತಾ। ಅತ್ಥಿ ತತ್ಥ ಕಕ್ಖಳಂ ಮುದುಕಂ ಸಣ್ಹಂ ಫರುಸಂ ಸುಖಸಮ್ಫಸ್ಸಂ ದುಕ್ಖಸಮ್ಫಸ್ಸಂ ಗರುಕಂ ಲಹುಕನ್ತಿ? ನ ಹೇವಂ ವತ್ತಬ್ಬೇ…ಪೇ॰…।
Atthi tattha kāyāyatanaṃ atthi phoṭṭhabbāyatanaṃ, tena kāyena taṃ phoṭṭhabbaṃ phusatīti? Āmantā. Atthi tattha kakkhaḷaṃ mudukaṃ saṇhaṃ pharusaṃ sukhasamphassaṃ dukkhasamphassaṃ garukaṃ lahukanti? Na hevaṃ vattabbe…pe….
೫೨೩. ನ ವತ್ತಬ್ಬಂ – ‘‘ಸಳಾಯತನಿಕೋ ಅತ್ತಭಾವೋ ರೂಪಧಾತುಯಾ’’ತಿ? ಆಮನ್ತಾ। ನನು ಅತ್ಥಿ ತತ್ಥ ಘಾನನಿಮಿತ್ತಂ ಜಿವ್ಹಾನಿಮಿತ್ತಂ ಕಾಯನಿಮಿತ್ತನ್ತಿ? ಆಮನ್ತಾ। ಹಞ್ಚಿ ಅತ್ಥಿ ತತ್ಥ ಘಾನನಿಮಿತ್ತಂ ಜಿವ್ಹಾನಿಮಿತ್ತಂ ಕಾಯನಿಮಿತ್ತಂ, ತೇನ ವತ ರೇ ವತ್ತಬ್ಬೇ – ‘‘ಸಳಾಯತನಿಕೋ ಅತ್ತಭಾವೋ ರೂಪಧಾತುಯಾ’’ತಿ।
523. Na vattabbaṃ – ‘‘saḷāyataniko attabhāvo rūpadhātuyā’’ti? Āmantā. Nanu atthi tattha ghānanimittaṃ jivhānimittaṃ kāyanimittanti? Āmantā. Hañci atthi tattha ghānanimittaṃ jivhānimittaṃ kāyanimittaṃ, tena vata re vattabbe – ‘‘saḷāyataniko attabhāvo rūpadhātuyā’’ti.
ರೂಪಧಾತುಯಾ ಆಯತನಕಥಾ ನಿಟ್ಠಿತಾ।
Rūpadhātuyā āyatanakathā niṭṭhitā.
Related texts:
ಅಟ್ಠಕಥಾ • Aṭṭhakathā / ಅಭಿಧಮ್ಮಪಿಟಕ (ಅಟ್ಠಕಥಾ) • Abhidhammapiṭaka (aṭṭhakathā) / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā / ೭. ರೂಪಧಾತುಯಾ ಆಯತನಕಥಾವಣ್ಣನಾ • 7. Rūpadhātuyā āyatanakathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā / ೭. ರೂಪಧಾತುಯಾಆಯತನಕಥಾವಣ್ಣನಾ • 7. Rūpadhātuyāāyatanakathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಅನುಟೀಕಾ • Pañcapakaraṇa-anuṭīkā / ೭. ರೂಪಧಾತುಯಾಆಯತನಕಥಾವಣ್ಣನಾ • 7. Rūpadhātuyāāyatanakathāvaṇṇanā
