| Library / Tipiṭaka / តិបិដក • Tipiṭaka / អបទានបាឡិ • Apadānapāḷi |
៨. រដ្ឋបាលត្ថេរអបទានំ
8. Raṭṭhapālattheraapadānaṃ
៩៧.
97.
‘‘បទុមុត្តរស្ស ភគវតោ, លោកជេដ្ឋស្ស តាទិនោ;
‘‘Padumuttarassa bhagavato, lokajeṭṭhassa tādino;
វរនាគោ មយា ទិន្នោ, ឦសាទន្តោ ឧរូឡ្ហវា។
Varanāgo mayā dinno, īsādanto urūḷhavā.
៩៨.
98.
‘‘សេតច្ឆត្តោ បសោភិតោ, សកប្បនោ សហត្ថិបោ;
‘‘Setacchatto pasobhito, sakappano sahatthipo;
អគ្ឃាបេត្វាន តំ សព្ពំ, សង្ឃារាមំ អការយិំ។
Agghāpetvāna taṃ sabbaṃ, saṅghārāmaṃ akārayiṃ.
៩៩.
99.
‘‘ចតុបញ្ញាសសហស្សានិ, បាសាទេ ការយិំ អហំ;
‘‘Catupaññāsasahassāni, pāsāde kārayiṃ ahaṃ;
១០០.
100.
‘‘អនុមោទិ មហាវីរោ, សយម្ភូ អគ្គបុគ្គលោ;
‘‘Anumodi mahāvīro, sayambhū aggapuggalo;
សព្ពេ ជនេ ហាសយន្តោ, ទេសេសិ អមតំ បទំ។
Sabbe jane hāsayanto, desesi amataṃ padaṃ.
១០១.
101.
‘‘តំ មេ ពុទ្ធោ វិយាកាសិ, ជលជុត្តរនាមកោ;
‘‘Taṃ me buddho viyākāsi, jalajuttaranāmako;
ភិក្ខុសង្ឃេ និសីទិត្វា, ឥមា គាថា អភាសថ។
Bhikkhusaṅghe nisīditvā, imā gāthā abhāsatha.
១០២.
102.
‘‘‘ចតុបញ្ញាសសហស្សានិ, បាសាទេ ការយី អយំ;
‘‘‘Catupaññāsasahassāni, pāsāde kārayī ayaṃ;
កថយិស្សាមិ វិបាកំ, សុណោថ មម ភាសតោ។
Kathayissāmi vipākaṃ, suṇotha mama bhāsato.
១០៣.
103.
‘‘‘អដ្ឋារសសហស្សានិ, កូដាគារា ភវិស្សរេ;
‘‘‘Aṭṭhārasasahassāni, kūṭāgārā bhavissare;
ព្យម្ហុត្តមម្ហិ និព្ពត្តា, សព្ពសោណ្ណមយា ច តេ។
Byamhuttamamhi nibbattā, sabbasoṇṇamayā ca te.
១០៤.
104.
‘‘‘បញ្ញាសក្ខត្តុំ ទេវិន្ទោ, ទេវរជ្ជំ ករិស្សតិ;
‘‘‘Paññāsakkhattuṃ devindo, devarajjaṃ karissati;
អដ្ឋបញ្ញាសក្ខត្តុញ្ច, ចក្កវត្តី ភវិស្សតិ។
Aṭṭhapaññāsakkhattuñca, cakkavattī bhavissati.
១០៥.
105.
‘‘‘កប្បសតសហស្សម្ហិ, ឱក្កាកកុលសម្ភវោ;
‘‘‘Kappasatasahassamhi, okkākakulasambhavo;
គោតមោ នាម គោត្តេន, សត្ថា លោកេ ភវិស្សតិ។
Gotamo nāma gottena, satthā loke bhavissati.
១០៦.
106.
‘‘‘ទេវលោកា ចវិត្វាន, សុក្កមូលេន ចោទិតោ;
‘‘‘Devalokā cavitvāna, sukkamūlena codito;
អឌ្ឍេ កុលេ មហាភោគេ, និព្ពត្តិស្សតិ តាវទេ។
Aḍḍhe kule mahābhoge, nibbattissati tāvade.
១០៧.
107.
‘‘‘សោ បច្ឆា បព្ពជិត្វាន, សុក្កមូលេន ចោទិតោ;
‘‘‘So pacchā pabbajitvāna, sukkamūlena codito;
រដ្ឋបាលោតិ នាមេន, ហេស្សតិ សត្ថុ សាវកោ។
Raṭṭhapāloti nāmena, hessati satthu sāvako.
១០៨.
108.
‘‘‘បធានបហិតត្តោ សោ, ឧបសន្តោ និរូបធិ;
‘‘‘Padhānapahitatto so, upasanto nirūpadhi;
សព្ពាសវេ បរិញ្ញាយ, និព្ពាយិស្សតិនាសវោ’។
Sabbāsave pariññāya, nibbāyissatināsavo’.
១០៩.
109.
‘‘ឧដ្ឋាយ អភិនិក្ខម្ម, ជហិតា ភោគសម្បទា;
‘‘Uṭṭhāya abhinikkhamma, jahitā bhogasampadā;
ខេឡបិណ្ឌេវ ភោគម្ហិ, បេមំ មយ្ហំ ន វិជ្ជតិ។
Kheḷapiṇḍeva bhogamhi, pemaṃ mayhaṃ na vijjati.
១១០.
110.
‘‘វីរិយំ មេ ធុរធោរយ្ហំ, យោគក្ខេមាធិវាហនំ;
‘‘Vīriyaṃ me dhuradhorayhaṃ, yogakkhemādhivāhanaṃ;
ធារេមិ អន្តិមំ ទេហំ, សម្មាសម្ពុទ្ធសាសនេ។
Dhāremi antimaṃ dehaṃ, sammāsambuddhasāsane.
១១១.
111.
‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;
‘‘Paṭisambhidā catasso, vimokkhāpi ca aṭṭhime;
ឆឡភិញ្ញា សច្ឆិកតា, កតំ ពុទ្ធស្ស សាសនំ’’។
Chaḷabhiññā sacchikatā, kataṃ buddhassa sāsanaṃ’’.
ឥត្ថំ សុទំ អាយស្មា រដ្ឋបាលោ ថេរោ ឥមា គាថាយោ អភាសិត្ថាតិ។
Itthaṃ sudaṃ āyasmā raṭṭhapālo thero imā gāthāyo abhāsitthāti.
រដ្ឋបាលត្ថេរស្សាបទានំ អដ្ឋមំ។
Raṭṭhapālattherassāpadānaṃ aṭṭhamaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / អបទាន-អដ្ឋកថា • Apadāna-aṭṭhakathā / ៨. រដ្ឋបាលត្ថេរអបទានវណ្ណនា • 8. Raṭṭhapālattheraapadānavaṇṇanā
