| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
२. दुतियवग्गो
2. Dutiyavaggo
१. पुञ्ञकिरियवत्थुसुत्तं
1. Puññakiriyavatthusuttaṃ
६०. वुत्तञ्हेतं भगवता, वुत्तमरहताति मे सुतं –
60. Vuttañhetaṃ bhagavatā, vuttamarahatāti me sutaṃ –
‘‘तीणिमानि, भिक्खवे, पुञ्ञकिरियवत्थूनि। कतमानि तीणि? दानमयं पुञ्ञकिरियवत्थु, सीलमयं पुञ्ञकिरियवत्थु, भावनामयं पुञ्ञकिरियवत्थु – इमानि खो, भिक्खवे, तीणि पुञ्ञकिरियवत्थूनी’’ति। एतमत्थं भगवा अवोच। तत्थेतं इति वुच्चति –
‘‘Tīṇimāni, bhikkhave, puññakiriyavatthūni. Katamāni tīṇi? Dānamayaṃ puññakiriyavatthu, sīlamayaṃ puññakiriyavatthu, bhāvanāmayaṃ puññakiriyavatthu – imāni kho, bhikkhave, tīṇi puññakiriyavatthūnī’’ti. Etamatthaṃ bhagavā avoca. Tatthetaṃ iti vuccati –
‘‘पुञ्ञमेव सो सिक्खेय्य, आयतग्गं सुखुद्रयं।
‘‘Puññameva so sikkheyya, āyataggaṃ sukhudrayaṃ;
दानञ्च समचरियञ्च, मेत्तचित्तञ्च भावये॥
Dānañca samacariyañca, mettacittañca bhāvaye.
‘‘एते धम्मे भावयित्वा, तयो सुखसमुद्दये।
‘‘Ete dhamme bhāvayitvā, tayo sukhasamuddaye;
अब्यापज्झं सुखं लोकं, पण्डितो उपपज्जती’’ति॥
Abyāpajjhaṃ sukhaṃ lokaṃ, paṇḍito upapajjatī’’ti.
अयम्पि अत्थो वुत्तो भगवता, इति मे सुतन्ति। पठमं।
Ayampi attho vutto bhagavatā, iti me sutanti. Paṭhamaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / १. पुञ्ञकिरियवत्थुसुत्तवण्णना • 1. Puññakiriyavatthusuttavaṇṇanā
