| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
२. चक्खुसुत्तं
2. Cakkhusuttaṃ
६१. वुत्तञ्हेतं भगवता, वुत्तमरहताति मे सुतं –
61. Vuttañhetaṃ bhagavatā, vuttamarahatāti me sutaṃ –
‘‘तीणिमानि, भिक्खवे, चक्खूनि। कतमानि तीणि? मंसचक्खु, दिब्बचक्खु, पञ्ञाचक्खु – इमानि खो, भिक्खवे, तीणि चक्खूनी’’ति। एतमत्थं भगवा अवोच। तत्थेतं इति वुच्चति –
‘‘Tīṇimāni, bhikkhave, cakkhūni. Katamāni tīṇi? Maṃsacakkhu, dibbacakkhu, paññācakkhu – imāni kho, bhikkhave, tīṇi cakkhūnī’’ti. Etamatthaṃ bhagavā avoca. Tatthetaṃ iti vuccati –
‘‘मंसचक्खु दिब्बचक्खु, पञ्ञाचक्खु अनुत्तरं।
‘‘Maṃsacakkhu dibbacakkhu, paññācakkhu anuttaraṃ;
एतानि तीणि चक्खूनि, अक्खासि पुरिसुत्तमो॥
Etāni tīṇi cakkhūni, akkhāsi purisuttamo.
‘‘मंसचक्खुस्स उप्पादो, मग्गो दिब्बस्स चक्खुनो।
‘‘Maṃsacakkhussa uppādo, maggo dibbassa cakkhuno;
यतो ञाणं उदपादि, पञ्ञाचक्खु अनुत्तरं।
Yato ñāṇaṃ udapādi, paññācakkhu anuttaraṃ;
यस्स चक्खुस्स पटिलाभा, सब्बदुक्खा पमुच्चती’’ति॥
Yassa cakkhussa paṭilābhā, sabbadukkhā pamuccatī’’ti.
अयम्पि अत्थो वुत्तो भगवता, इति मे सुतन्ति। दुतियं।
Ayampi attho vutto bhagavatā, iti me sutanti. Dutiyaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / २. चक्खुसुत्तवण्णना • 2. Cakkhusuttavaṇṇanā
