| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
३. इन्द्रियसुत्तं
3. Indriyasuttaṃ
६२. वुत्तञ्हेतं भगवता, वुत्तमरहताति मे सुतं –
62. Vuttañhetaṃ bhagavatā, vuttamarahatāti me sutaṃ –
‘‘तीणिमानि, भिक्खवे, इन्द्रियानि। कतमानि तीणि? अनञ्ञातञ्ञस्सामीतिन्द्रियं, अञ्ञिन्द्रियं, अञ्ञाताविन्द्रियं – इमानि खो, भिक्खवे, तीणि इन्द्रियानी’’ति। एतमत्थं भगवा अवोच। तत्थेतं इति वुच्चति –
‘‘Tīṇimāni, bhikkhave, indriyāni. Katamāni tīṇi? Anaññātaññassāmītindriyaṃ, aññindriyaṃ, aññātāvindriyaṃ – imāni kho, bhikkhave, tīṇi indriyānī’’ti. Etamatthaṃ bhagavā avoca. Tatthetaṃ iti vuccati –
‘‘सेखस्स सिक्खमानस्स, उजुमग्गानुसारिनो।
‘‘Sekhassa sikkhamānassa, ujumaggānusārino;
खयस्मिं पठमं ञाणं, ततो अञ्ञा अनन्तरा॥
Khayasmiṃ paṭhamaṃ ñāṇaṃ, tato aññā anantarā.
‘‘ततो अञ्ञा विमुत्तस्स, ञाणं वे होति तादिनो।
‘‘Tato aññā vimuttassa, ñāṇaṃ ve hoti tādino;
अकुप्पा मे विमुत्तीति, भवसंयोजनक्खया॥
Akuppā me vimuttīti, bhavasaṃyojanakkhayā.
धारेति अन्तिमं देहं, जेत्वा मारं सवाहिनि’’न्ति॥
Dhāreti antimaṃ dehaṃ, jetvā māraṃ savāhini’’nti.
अयम्पि अत्थो वुत्तो भगवता, इति मे सुतन्ति। ततियं।
Ayampi attho vutto bhagavatā, iti me sutanti. Tatiyaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / ३. इन्द्रियसुत्तवण्णना • 3. Indriyasuttavaṇṇanā
