| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
४. अद्धासुत्तं
4. Addhāsuttaṃ
६३. वुत्तञ्हेतं भगवता, वुत्तमरहताति मे सुतं –
63. Vuttañhetaṃ bhagavatā, vuttamarahatāti me sutaṃ –
‘‘तयोमे, भिक्खवे, अद्धा। कतमे तयो? अतीतो अद्धा, अनागतो अद्धा, पच्चुप्पन्नो अद्धा – इमे खो, भिक्खवे, तयो अद्धा’’ति। एतमत्थं भगवा अवोच। तत्थेतं इति वुच्चति –
‘‘Tayome, bhikkhave, addhā. Katame tayo? Atīto addhā, anāgato addhā, paccuppanno addhā – ime kho, bhikkhave, tayo addhā’’ti. Etamatthaṃ bhagavā avoca. Tatthetaṃ iti vuccati –
‘‘अक्खेय्यसञ्ञिनो सत्ता, अक्खेय्यस्मिं पतिट्ठिता।
‘‘Akkheyyasaññino sattā, akkheyyasmiṃ patiṭṭhitā;
अक्खेय्यं अपरिञ्ञाय, योगमायन्ति मच्चुनो॥
Akkheyyaṃ apariññāya, yogamāyanti maccuno.
‘‘अक्खेय्यञ्च परिञ्ञाय, अक्खातारं न मञ्ञति।
‘‘Akkheyyañca pariññāya, akkhātāraṃ na maññati;
फुट्ठो विमोक्खो मनसा, सन्तिपदमनुत्तरं॥
Phuṭṭho vimokkho manasā, santipadamanuttaraṃ.
सङ्खायसेवी धम्मट्ठो, सङ्ख्यं नोपेति वेदगू’’ति॥
Saṅkhāyasevī dhammaṭṭho, saṅkhyaṃ nopeti vedagū’’ti.
अयम्पि अत्थो वुत्तो भगवता, इति मे सुतन्ति। चतुत्थं।
Ayampi attho vutto bhagavatā, iti me sutanti. Catutthaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / ४. अद्धासुत्तवण्णना • 4. Addhāsuttavaṇṇanā
