| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
៩. បុន្នាគបុប្ផិយត្ថេរអបទានវណ្ណនា
9. Punnāgapupphiyattheraapadānavaṇṇanā
កាននំ វនមោគយ្ហាតិអាទិកំ អាយស្មតោ បុន្នាគបុប្ផិយត្ថេរស្ស អបទានំ។ អយម្បិ បុរិមជិនវរេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ ផុស្សស្ស ភគវតោ កាលេ នេសាទកុលេ និព្ពត្តោ មហាវនំ បវិដ្ឋោ តត្ថ សុបុប្ផិតបុន្នាគបុប្ផំ ទិស្វា ហេតុសម្បន្នត្តា ពុទ្ធារម្មណបីតិវសេន ភគវន្តំ សរិត្វា តំ បុប្ផំ សហ កណ្ណិកាហិ ឱចិនិត្វា វាលុកាហិ ចេតិយំ កត្វា បូជេសិ។
Kānanaṃvanamogayhātiādikaṃ āyasmato punnāgapupphiyattherassa apadānaṃ. Ayampi purimajinavaresu katādhikāro tattha tattha bhave vivaṭṭūpanissayāni puññāni upacinanto phussassa bhagavato kāle nesādakule nibbatto mahāvanaṃ paviṭṭho tattha supupphitapunnāgapupphaṃ disvā hetusampannattā buddhārammaṇapītivasena bhagavantaṃ saritvā taṃ pupphaṃ saha kaṇṇikāhi ocinitvā vālukāhi cetiyaṃ katvā pūjesi.
៤៦. សោ តេន បុញ្ញេន ទ្វេនវុតិកប្បេ និរន្តរំ ទេវមនុស្សសម្បត្តិយោយេវ អនុភវិត្វា ឥមស្មិំ ពុទ្ធុប្បាទេ សាវត្ថិយំ វិភវសម្បន្នេ កុលេ និព្ពត្តោ វុទ្ធិមន្វាយ បុព្ពវាសនាពលេន សាសនេ បសន្នោ បព្ពជិត្វា វាយមន្តោ នចិរស្សេវ អរហា ហុត្វា បុព្ពេ កតកុសលំ សរិត្វា សោមនស្សជាតោ បុព្ពចរិតាបទានំ បកាសេន្តោ កាននំ វនមោគយ្ហាតិអាទិមាហ។ តំ សព្ពំ ហេដ្ឋា វុត្តត្តា ឧត្តានត្ថមេវាតិ។
46. So tena puññena dvenavutikappe nirantaraṃ devamanussasampattiyoyeva anubhavitvā imasmiṃ buddhuppāde sāvatthiyaṃ vibhavasampanne kule nibbatto vuddhimanvāya pubbavāsanābalena sāsane pasanno pabbajitvā vāyamanto nacirasseva arahā hutvā pubbe katakusalaṃ saritvā somanassajāto pubbacaritāpadānaṃ pakāsento kānanaṃ vanamogayhātiādimāha. Taṃ sabbaṃ heṭṭhā vuttattā uttānatthamevāti.
បុន្នាគបុប្ផិយត្ថេរអបទានវណ្ណនា សមត្តា។
Punnāgapupphiyattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ៩. បុន្នាគបុប្ផិយត្ថេរអបទានំ • 9. Punnāgapupphiyattheraapadānaṃ
