| Library / Tipiṭaka / तिपिटक • Tipiṭaka / सुत्तनिपातपाळि • Suttanipātapāḷi |
१६. पिङ्गियमाणवपुच्छा
16. Piṅgiyamāṇavapucchā
११२६.
1126.
‘‘जिण्णोहमस्मि अबलो वीतवण्णो, (इच्चायस्मा पिङ्गियो)
‘‘Jiṇṇohamasmi abalo vītavaṇṇo, (iccāyasmā piṅgiyo)
नेत्ता न सुद्धा सवनं न फासु।
Nettā na suddhā savanaṃ na phāsu;
माहं नस्सं मोमुहो अन्तराव
Māhaṃ nassaṃ momuho antarāva
आचिक्ख धम्मं यमहं विजञ्ञं।
Ācikkha dhammaṃ yamahaṃ vijaññaṃ;
जातिजराय इध विप्पहानं’’॥
Jātijarāya idha vippahānaṃ’’.
११२७.
1127.
‘‘दिस्वान रूपेसु विहञ्ञमाने, (पिङ्गियाति भगवा)
‘‘Disvāna rūpesu vihaññamāne, (piṅgiyāti bhagavā)
रुप्पन्ति रूपेसु जना पमत्ता।
Ruppanti rūpesu janā pamattā;
तस्मा तुवं पिङ्गिय अप्पमत्तो,
Tasmā tuvaṃ piṅgiya appamatto,
जहस्सु रूपं अपुनब्भवाय’’॥
Jahassu rūpaṃ apunabbhavāya’’.
११२८.
1128.
‘‘दिसा चतस्सो विदिसा चतस्सो, उद्धं अधो दस दिसा इमायो।
‘‘Disā catasso vidisā catasso, uddhaṃ adho dasa disā imāyo;
आचिक्ख धम्मं यमहं विजञ्ञं, जातिजराय इध विप्पहानं’’॥
Ācikkha dhammaṃ yamahaṃ vijaññaṃ, jātijarāya idha vippahānaṃ’’.
११२९.
1129.
‘‘तण्हाधिपन्ने मनुजे पेक्खमानो, (पिङ्गियाति भगवा)
‘‘Taṇhādhipanne manuje pekkhamāno, (piṅgiyāti bhagavā)
सन्तापजाते जरसा परेते।
Santāpajāte jarasā parete;
तस्मा तुवं पिङ्गिय अप्पमत्तो, जहस्सु तण्हं अपुनब्भवाया’’ति॥
Tasmā tuvaṃ piṅgiya appamatto, jahassu taṇhaṃ apunabbhavāyā’’ti.
पिङ्गियमाणवपुच्छा सोळसमा निट्ठिता।
Piṅgiyamāṇavapucchā soḷasamā niṭṭhitā.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / सुत्तनिपात-अट्ठकथा • Suttanipāta-aṭṭhakathā / १६. पिङ्गियसुत्तवण्णना • 16. Piṅgiyasuttavaṇṇanā
