| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
6. பிண்ட³பாதமஹப்ப²லபஞ்ஹோ
6. Piṇḍapātamahapphalapañho
6. ‘‘ப⁴ந்தே நாக³ஸேன, பா⁴ஸிதம்பேதங் த⁴ம்மஸங்கீ³திகாரகேஹி தே²ரேஹி –
6. ‘‘Bhante nāgasena, bhāsitampetaṃ dhammasaṅgītikārakehi therehi –
‘‘‘சுந்த³ஸ்ஸ ப⁴த்தங் பு⁴ஞ்ஜித்வா, கம்மாரஸ்ஸாதி மே ஸுதங்;
‘‘‘Cundassa bhattaṃ bhuñjitvā, kammārassāti me sutaṃ;
ஆபா³த⁴ங் ஸம்பு²ஸீ தீ⁴ரோ, பபா³ள்ஹங் மாரணந்திக’ந்தி 1.
Ābādhaṃ samphusī dhīro, pabāḷhaṃ māraṇantika’nti 2.
‘‘புன ச ப⁴க³வதா ப⁴ணிதங் ‘த்³வேமே, ஆனந்த³, பிண்ட³பாதா ஸமஸமப²லா ஸமவிபாகா அதிவிய அஞ்ஞேஹி பிண்ட³பாதேஹி மஹப்ப²லதரா ச மஹானிஸங்ஸதரா ச. கதமே த்³வே? யஞ்ச பிண்ட³பாதங் பரிபு⁴ஞ்ஜித்வா ததா²க³தோ அனுத்தரங் ஸம்மாஸம்போ³தி⁴ங் அபி⁴ஸம்பு³ஜ்ஜி², யஞ்ச பிண்ட³பாதங் பரிபு⁴ஞ்ஜித்வா ததா²க³தோ அனுபாதி³ஸேஸாய நிப்³பா³னதா⁴துயா பரினிப்³பா³யதி. இமே த்³வே பிண்ட³பாதா ஸமஸமப²லா ஸமவிபாகா, அதிவிய அஞ்ஞேஹி பிண்ட³பாதேஹி மஹப்ப²லதரா ச மஹானிஸங்ஸதரா சா’தி. யதி³, ப⁴ந்தே நாக³ஸேன, ப⁴க³வதோ சுந்த³ஸ்ஸ ப⁴த்தங் பு⁴த்தாவிஸ்ஸ 3 க²ரோ ஆபா³தோ⁴ உப்பன்னோ, பபா³ள்ஹா ச வேத³னா பவத்தா மாரணந்திகா, தேன ஹி ‘த்³வேமே, ஆனந்த³, பிண்ட³பாதா ஸமஸமப²லா ஸமவிபாகா அதிவிய அஞ்ஞேஹி பிண்ட³பாதேஹி மஹப்ப²லதரா ச மஹானிஸங்ஸதரா சா’தி யங் வசனங், தங் மிச்சா². யதி³ த்³வேமே பிண்ட³பாதா ஸமஸமப²லா ஸமவிபாகா அதிவிய அஞ்ஞேஹி பிண்ட³பாதேஹி மஹப்ப²லதரா ச மஹானிஸங்ஸதரா ச, தேன ஹி ப⁴க³வதோ சுந்த³ஸ்ஸ ப⁴த்தங் பு⁴த்தாவிஸ்ஸ 4 க²ரோ ஆபா³தோ⁴ உப்பன்னோ, பபா³ள்ஹா ச வேத³னா பவத்தா மாரணந்திகாதி தம்பி வசனங் மிச்சா². கிங்னு கோ², ப⁴ந்தே நாக³ஸேன, ஸோ பிண்ட³பாதோ விஸக³ததாய மஹப்ப²லோ, ரோகு³ப்பாத³கதாய மஹப்ப²லோ , ஆயுவினாஸகதாய மஹப்ப²லோ, ப⁴க³வதோ ஜீவிதஹரணதாய மஹப்ப²லோ? தத்த² மே காரணங் ப்³ரூஹி பரவாதா³னங் நிக்³க³ஹாய, எத்தா²யங் ஜனோ ஸம்மூள்ஹோ லோப⁴வஸேன அதிப³ஹுங் கா²யிதேன லோஹிதபக்க²ந்தி³கா உப்பன்னாதி. அயம்பி உப⁴தோ கோடிகோ பஞ்ஹோ தவானுப்பத்தோ, ஸோ தயா நிப்³பா³ஹிதப்³போ³’’தி.
‘‘Puna ca bhagavatā bhaṇitaṃ ‘dveme, ānanda, piṇḍapātā samasamaphalā samavipākā ativiya aññehi piṇḍapātehi mahapphalatarā ca mahānisaṃsatarā ca. Katame dve? Yañca piṇḍapātaṃ paribhuñjitvā tathāgato anuttaraṃ sammāsambodhiṃ abhisambujjhi, yañca piṇḍapātaṃ paribhuñjitvā tathāgato anupādisesāya nibbānadhātuyā parinibbāyati. Ime dve piṇḍapātā samasamaphalā samavipākā, ativiya aññehi piṇḍapātehi mahapphalatarā ca mahānisaṃsatarā cā’ti. Yadi, bhante nāgasena, bhagavato cundassa bhattaṃ bhuttāvissa 5 kharo ābādho uppanno, pabāḷhā ca vedanā pavattā māraṇantikā, tena hi ‘dveme, ānanda, piṇḍapātā samasamaphalā samavipākā ativiya aññehi piṇḍapātehi mahapphalatarā ca mahānisaṃsatarā cā’ti yaṃ vacanaṃ, taṃ micchā. Yadi dveme piṇḍapātā samasamaphalā samavipākā ativiya aññehi piṇḍapātehi mahapphalatarā ca mahānisaṃsatarā ca, tena hi bhagavato cundassa bhattaṃ bhuttāvissa 6 kharo ābādho uppanno, pabāḷhā ca vedanā pavattā māraṇantikāti tampi vacanaṃ micchā. Kiṃnu kho, bhante nāgasena, so piṇḍapāto visagatatāya mahapphalo, roguppādakatāya mahapphalo , āyuvināsakatāya mahapphalo, bhagavato jīvitaharaṇatāya mahapphalo? Tattha me kāraṇaṃ brūhi paravādānaṃ niggahāya, etthāyaṃ jano sammūḷho lobhavasena atibahuṃ khāyitena lohitapakkhandikā uppannāti. Ayampi ubhato koṭiko pañho tavānuppatto, so tayā nibbāhitabbo’’ti.
‘‘பா⁴ஸிதம்பேதங், மஹாராஜ, த⁴ம்மஸங்கீ³திகாரகேஹி தே²ரேஹி –
‘‘Bhāsitampetaṃ, mahārāja, dhammasaṅgītikārakehi therehi –
‘‘‘சுந்த³ஸ்ஸ ப⁴த்தங் பு⁴ஞ்ஜித்வா, கம்மாரஸ்ஸாதி மே ஸுதங்;
‘‘‘Cundassa bhattaṃ bhuñjitvā, kammārassāti me sutaṃ;
ஆபா³த⁴ங் ஸம்பு²ஸீ தீ⁴ரோ, பபா³ள்ஹங் மாரணந்திக’ந்தி.
Ābādhaṃ samphusī dhīro, pabāḷhaṃ māraṇantika’nti.
‘‘ப⁴க³வதா ச ப⁴ணிதங் ‘த்³வேமே, ஆனந்த³, பிண்ட³பாதா ஸமஸமப²லா ஸமவிபாகா அதிவிய அஞ்ஞேஹி பிண்ட³பாதேஹி மஹப்ப²லதரா ச மஹானிஸங்ஸதரா ச. கதமே த்³வே? யஞ்ச பிண்ட³பாதங் பரிபு⁴ஞ்ஜித்வா ததா²க³தோ அனுத்தரங் ஸம்மாஸம்போ³தி⁴ங் அபி⁴ஸம்பு³ஜ்ஜி², யஞ்ச பிண்ட³பாதங் பரிபு⁴ஞ்ஜித்வா ததா²க³தோ அனுபாதி³ஸேஸாய நிப்³பா³னதா⁴துயா பரினிப்³பா³யதி 7, இமே த்³வே பிண்ட³பாதா ஸமஸமப²லா ஸமவிபாகா, அதிவிய அஞ்ஞேஹி பிண்ட³பாதேஹி மஹப்ப²லதரா ச மஹானிஸங்ஸதரா சா’தி.
‘‘Bhagavatā ca bhaṇitaṃ ‘dveme, ānanda, piṇḍapātā samasamaphalā samavipākā ativiya aññehi piṇḍapātehi mahapphalatarā ca mahānisaṃsatarā ca. Katame dve? Yañca piṇḍapātaṃ paribhuñjitvā tathāgato anuttaraṃ sammāsambodhiṃ abhisambujjhi, yañca piṇḍapātaṃ paribhuñjitvā tathāgato anupādisesāya nibbānadhātuyā parinibbāyati 8, ime dve piṇḍapātā samasamaphalā samavipākā, ativiya aññehi piṇḍapātehi mahapphalatarā ca mahānisaṃsatarā cā’ti.
‘‘ஸோ பன பிண்ட³பாதோ ப³ஹுகு³ணோ அனேகானிஸங்ஸோ. தே³வதா, மஹாராஜ, ஹட்டா² பஸன்னமானஸா ‘அயங் ப⁴க³வதோ பச்சி²மோ பிண்ட³பாதோ’தி தி³ப்³ப³ங் ஓஜங் ஸூகரமத்³த³வே ஆகிரிங்ஸு. தஞ்ச பன ஸம்மாபாகங் லஹுபாகங் 9 மனுஞ்ஞங் ப³ஹுரஸங் ஜட்ட²ரக்³கி³தேஜஸ்ஸ ஹிதங். ந, மஹாராஜ, ததோனிதா³னங் ப⁴க³வதோ கோசி அனுப்பன்னோ ரோகோ³ உப்பன்னோ, அபி ச, மஹாராஜ, ப⁴க³வதோ பகதிது³ப்³ப³லே ஸரீரே கீ²ணே ஆயுஸங்கா²ரே உப்பன்னோ ரோகோ³ பி⁴ய்யோ அபி⁴வட்³டி⁴.
‘‘So pana piṇḍapāto bahuguṇo anekānisaṃso. Devatā, mahārāja, haṭṭhā pasannamānasā ‘ayaṃ bhagavato pacchimo piṇḍapāto’ti dibbaṃ ojaṃ sūkaramaddave ākiriṃsu. Tañca pana sammāpākaṃ lahupākaṃ 10 manuññaṃ bahurasaṃ jaṭṭharaggitejassa hitaṃ. Na, mahārāja, tatonidānaṃ bhagavato koci anuppanno rogo uppanno, api ca, mahārāja, bhagavato pakatidubbale sarīre khīṇe āyusaṅkhāre uppanno rogo bhiyyo abhivaḍḍhi.
‘‘யதா², மஹாராஜ, பகதியா ஜலமானோ அக்³கி³ அஞ்ஞஸ்மிங் உபாதா³னே தி³ன்னே பி⁴ய்யோ பஜ்ஜலதி, ஏவமேவ கோ², மஹாராஜ, ப⁴க³வதோ பகதிது³ப்³ப³லே ஸரீரே கீ²ணே ஆயுஸங்கா²ரே உப்பன்னோ ரோகோ³ பி⁴ய்யோ அபி⁴வட்³டி⁴.
‘‘Yathā, mahārāja, pakatiyā jalamāno aggi aññasmiṃ upādāne dinne bhiyyo pajjalati, evameva kho, mahārāja, bhagavato pakatidubbale sarīre khīṇe āyusaṅkhāre uppanno rogo bhiyyo abhivaḍḍhi.
‘‘யதா² வா பன, மஹாராஜ, ஸோதோ பகதியா ஸந்த³மானோ அபி⁴வுட்டே² மஹாமேகே⁴ பி⁴ய்யோ மஹோகோ⁴ உத³கவாஹகோ ஹோதி, ஏவமேவ கோ², மஹாராஜ, ப⁴க³வதோ பகதிது³ப்³ப³லே ஸரீரே கீ²ணே ஆயுஸங்கா²ரே உப்பன்னோ ரோகோ³ பி⁴ய்யோ அபி⁴வட்³டி⁴.
‘‘Yathā vā pana, mahārāja, soto pakatiyā sandamāno abhivuṭṭhe mahāmeghe bhiyyo mahogho udakavāhako hoti, evameva kho, mahārāja, bhagavato pakatidubbale sarīre khīṇe āyusaṅkhāre uppanno rogo bhiyyo abhivaḍḍhi.
‘‘யதா² வா பன, மஹாராஜ, பகதியா அபி⁴ஸன்னதா⁴து குச்சி² அஞ்ஞஸ்மிங் அஜ்ஜோ²ஹரிதே பி⁴ய்யோ ஆயமெய்ய 11, ஏவமேவ கோ², மஹாராஜ, ப⁴க³வதோ பகதிது³ப்³ப³லே ஸரீரே கீ²ணே ஆயுஸங்கா²ரே உப்பன்னோ ரோகோ³ பி⁴ய்யோ அபி⁴வட்³டி⁴, நத்தி², மஹாராஜ, தஸ்மிங் பிண்ட³பாதே தோ³ஸோ, ந ச தஸ்ஸ ஸக்கா தோ³ஸங் ஆரோபேது’’ந்தி.
‘‘Yathā vā pana, mahārāja, pakatiyā abhisannadhātu kucchi aññasmiṃ ajjhoharite bhiyyo āyameyya 12, evameva kho, mahārāja, bhagavato pakatidubbale sarīre khīṇe āyusaṅkhāre uppanno rogo bhiyyo abhivaḍḍhi, natthi, mahārāja, tasmiṃ piṇḍapāte doso, na ca tassa sakkā dosaṃ āropetu’’nti.
‘‘ப⁴ந்தே நாக³ஸேன, கேன காரணேன தே த்³வே பிண்ட³பாதா ஸமஸமப²லா ஸமவிபாகா அதிவிய அஞ்ஞேஹி பிண்ட³பாதேஹி மஹப்ப²லதரா ச மஹானிஸங்ஸதரா சா’’தி? ‘‘த⁴ம்மானுமஜ்ஜனஸமாபத்திவஸேன, மஹாராஜ, தே த்³வே பிண்ட³பாதா ஸமஸமப²லா ஸமவிபாகா அதிவிய அஞ்ஞேஹி பிண்ட³பாதேஹி மஹப்ப²லதரா ச மஹானிஸங்ஸதரா சா’’தி.
‘‘Bhante nāgasena, kena kāraṇena te dve piṇḍapātā samasamaphalā samavipākā ativiya aññehi piṇḍapātehi mahapphalatarā ca mahānisaṃsatarā cā’’ti? ‘‘Dhammānumajjanasamāpattivasena, mahārāja, te dve piṇḍapātā samasamaphalā samavipākā ativiya aññehi piṇḍapātehi mahapphalatarā ca mahānisaṃsatarā cā’’ti.
‘‘ப⁴ந்தே நாக³ஸேன, கதமேஸங் த⁴ம்மானங் அனுமஜ்ஜனஸமாபத்திவஸேன தே த்³வே பிண்ட³பாதா ஸமஸமப²லா ஸமவிபாகா அதிவிய அஞ்ஞேஹி பிண்ட³பாதேஹி மஹப்ப²லதரா ச மஹானிஸங்ஸதரா சா’’தி? ‘‘நவன்னங், மஹாராஜ, அனுபுப்³ப³விஹாரஸமாபத்தீனங் அனுலோமப்படிலோமஸமாபஜ்ஜனவஸேன தே த்³வே பிண்ட³பாதா ஸமஸமப²லா ஸமவிபாகா அதிவிய அஞ்ஞேஹி பிண்ட³பாதேஹி மஹப்ப²லதரா ச மஹானிஸங்ஸதரா சா’’தி.
‘‘Bhante nāgasena, katamesaṃ dhammānaṃ anumajjanasamāpattivasena te dve piṇḍapātā samasamaphalā samavipākā ativiya aññehi piṇḍapātehi mahapphalatarā ca mahānisaṃsatarā cā’’ti? ‘‘Navannaṃ, mahārāja, anupubbavihārasamāpattīnaṃ anulomappaṭilomasamāpajjanavasena te dve piṇḍapātā samasamaphalā samavipākā ativiya aññehi piṇḍapātehi mahapphalatarā ca mahānisaṃsatarā cā’’ti.
‘‘ப⁴ந்தே நாக³ஸேன, த்³வீஸு யேவ தி³வஸேஸு அதி⁴மத்தங் ததா²க³தோ நவானுபுப்³ப³விஹாரஸமாபத்தியோ அனுலோமப்படிலோமங் ஸமாபஜ்ஜீ’’தி? ‘‘ஆம, மஹாராஜா’’தி. ‘‘அச்ச²ரியங், ப⁴ந்தே நாக³ஸேன, அப்³பு⁴தங் ப⁴ந்தே நாக³ஸேன. யங் இமஸ்மிங் பு³த்³த⁴க்கெ²த்தே அஸதி³ஸங் பரமதா³னங், தம்பி இமேஹி த்³வீஹி பிண்ட³பாதேஹி அக³ணிதங். அச்ச²ரியங், ப⁴ந்தே நாக³ஸேன, அப்³பு⁴தங், ப⁴ந்தே நாக³ஸேன. யாவ மஹந்தா நவானுபுப்³ப³விஹாரஸமாபத்தியோ, யத்ர ஹி நாம நவானுபுப்³ப³விஹாரஸமாபத்திவஸேன தா³னங் மஹப்ப²லதரங் ஹோதி மஹானிஸங்ஸதரஞ்ச. ஸாது⁴, ப⁴ந்தே நாக³ஸேன, ஏவமேதங் ததா² ஸம்படிச்சா²மீ’’தி.
‘‘Bhante nāgasena, dvīsu yeva divasesu adhimattaṃ tathāgato navānupubbavihārasamāpattiyo anulomappaṭilomaṃ samāpajjī’’ti? ‘‘Āma, mahārājā’’ti. ‘‘Acchariyaṃ, bhante nāgasena, abbhutaṃ bhante nāgasena. Yaṃ imasmiṃ buddhakkhette asadisaṃ paramadānaṃ, tampi imehi dvīhi piṇḍapātehi agaṇitaṃ. Acchariyaṃ, bhante nāgasena, abbhutaṃ, bhante nāgasena. Yāva mahantā navānupubbavihārasamāpattiyo, yatra hi nāma navānupubbavihārasamāpattivasena dānaṃ mahapphalataraṃ hoti mahānisaṃsatarañca. Sādhu, bhante nāgasena, evametaṃ tathā sampaṭicchāmī’’ti.
பிண்ட³பாதமஹப்ப²லபஞ்ஹோ ச²ட்டோ².
Piṇḍapātamahapphalapañho chaṭṭho.
Footnotes:
