| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
7. பு³த்³த⁴பூஜனபஞ்ஹோ
7. Buddhapūjanapañho
7. ‘‘ப⁴ந்தே நாக³ஸேன, பா⁴ஸிதம்பேதங் ததா²க³தேன ‘அப்³யாவடா தும்ஹே, ஆனந்த³, ஹோத² ததா²க³தஸ்ஸ ஸரீரபூஜாயா’தி. புன ச ப⁴ணிதங் –
7. ‘‘Bhante nāgasena, bhāsitampetaṃ tathāgatena ‘abyāvaṭā tumhe, ānanda, hotha tathāgatassa sarīrapūjāyā’ti. Puna ca bhaṇitaṃ –
‘‘‘பூஜேத² நங் பூஜனியஸ்ஸ தா⁴துங்;
‘‘‘Pūjetha naṃ pūjaniyassa dhātuṃ;
ஏவங் கரா ஸக்³க³மிதோ க³மிஸ்ஸதா²’தி.
Evaṃ karā saggamito gamissathā’ti.
‘‘யதி³, ப⁴ந்தே நாக³ஸேன, ததா²க³தேன ப⁴ணிதங் ‘அப்³யாவடா தும்ஹே, ஆனந்த³, ஹோத² ததா²க³தஸ்ஸ ஸரீரபூஜாயா’தி, தேன ஹி ‘பூஜேத² நங் பூஜனியஸ்ஸ தா⁴துங், ஏவங் கரா ஸக்³க³மிதோ க³மிஸ்ஸதா²’தி யங் வசனங், தங் மிச்சா². யதி³ ததா²க³தேன ப⁴ணிதங் ‘பூஜேத² நங் பூஜனியஸ்ஸ தா⁴துங், ஏவங் கரா ஸக்³க³மிதோ க³மிஸ்ஸதா²’தி, தேன ஹி ‘அப்³யாவடா தும்ஹே ஆனந்த³, ஹோத² ததா²க³தஸ்ஸ ஸரீரபூஜாயா’தி தம்பி வசனங் மிச்சா². அயம்பி உப⁴தோ கோடிகோ பஞ்ஹோ தவானுப்பத்தோ, ஸோ தயா நிப்³பா³ஹிதப்³போ³’’தி.
‘‘Yadi, bhante nāgasena, tathāgatena bhaṇitaṃ ‘abyāvaṭā tumhe, ānanda, hotha tathāgatassa sarīrapūjāyā’ti, tena hi ‘pūjetha naṃ pūjaniyassa dhātuṃ, evaṃ karā saggamito gamissathā’ti yaṃ vacanaṃ, taṃ micchā. Yadi tathāgatena bhaṇitaṃ ‘pūjetha naṃ pūjaniyassa dhātuṃ, evaṃ karā saggamito gamissathā’ti, tena hi ‘abyāvaṭā tumhe ānanda, hotha tathāgatassa sarīrapūjāyā’ti tampi vacanaṃ micchā. Ayampi ubhato koṭiko pañho tavānuppatto, so tayā nibbāhitabbo’’ti.
‘‘பா⁴ஸிதம்பேதங், மஹாராஜ, ப⁴க³வதா ‘அப்³யாவடா தும்ஹே, ஆனந்த³, ஹோத² ததா²க³தஸ்ஸ ஸரீரபூஜாயா’தி, புன ச ப⁴ணிதங் ‘பூஜேத² நங் பூஜனியஸ்ஸ தா⁴துங், ஏவங் கரா ஸக்³க³மிதோ க³மிஸ்ஸதா²’தி, தஞ்ச பன ந ஸப்³பே³ஸங் ஜினபுத்தானங் யேவ ஆரப்³ப⁴ ப⁴ணிதங் ‘அப்³யாவடா தும்ஹே, ஆனந்த³, ஹோத² ததா²க³தஸ்ஸ ஸரீரபூஜாயா’தி. அகம்மங் ஹேதங், மஹாராஜ, ஜினபுத்தானங் யதி³த³ங் பூஜா, ஸம்மஸனங் ஸங்கா²ரானங், யோனிஸோ மனஸிகாரோ, ஸதிபட்டா²னானுபஸ்ஸனா, ஆரம்மணஸாரக்³கா³ஹோ, கிலேஸயுத்³த⁴ங், ஸத³த்த²மனுயுஞ்ஜனா, ஏதங் ஜினபுத்தானங் கரணீயங், அவஸேஸானங் தே³வமனுஸ்ஸானங் பூஜா கரணீயா.
‘‘Bhāsitampetaṃ, mahārāja, bhagavatā ‘abyāvaṭā tumhe, ānanda, hotha tathāgatassa sarīrapūjāyā’ti, puna ca bhaṇitaṃ ‘pūjetha naṃ pūjaniyassa dhātuṃ, evaṃ karā saggamito gamissathā’ti, tañca pana na sabbesaṃ jinaputtānaṃ yeva ārabbha bhaṇitaṃ ‘abyāvaṭā tumhe, ānanda, hotha tathāgatassa sarīrapūjāyā’ti. Akammaṃ hetaṃ, mahārāja, jinaputtānaṃ yadidaṃ pūjā, sammasanaṃ saṅkhārānaṃ, yoniso manasikāro, satipaṭṭhānānupassanā, ārammaṇasāraggāho, kilesayuddhaṃ, sadatthamanuyuñjanā, etaṃ jinaputtānaṃ karaṇīyaṃ, avasesānaṃ devamanussānaṃ pūjā karaṇīyā.
‘‘யதா², மஹாராஜ, மஹியா ராஜபுத்தானங் ஹத்தி²அஸ்ஸரத²த⁴னுத²ருலேக²முத்³தா³ஸிக்கா²க²க்³க³மந்தஸுதி- ஸம்முதியுத்³த⁴யுஜ்ஜா²பனகிரியா கரணீயா, அவஸேஸானங் புது²வெஸ்ஸஸுத்³தா³னங் கஸி வணிஜ்ஜா கோ³ரக்கா² கரணீயா, ஏவமேவ கோ², மஹாராஜ, அகம்மங் ஹேதங் ஜினபுத்தானங் யதி³த³ங் பூஜா, ஸம்மஸனங் ஸங்கா²ரானங், யோனிஸோ மனஸிகாரோ, ஸதிபட்டா²னானுபஸ்ஸனா, ஆரம்மணஸாரக்³கா³ஹோ, கிலேஸயுத்³த⁴ங், ஸத³த்த²மனுயுஞ்ஜனா, ஏதங் ஜினபுத்தானங் கரணீயங், அவஸேஸானங் தே³வமனுஸ்ஸானங் பூஜா கரணீயா.
‘‘Yathā, mahārāja, mahiyā rājaputtānaṃ hatthiassarathadhanutharulekhamuddāsikkhākhaggamantasuti- sammutiyuddhayujjhāpanakiriyā karaṇīyā, avasesānaṃ puthuvessasuddānaṃ kasi vaṇijjā gorakkhā karaṇīyā, evameva kho, mahārāja, akammaṃ hetaṃ jinaputtānaṃ yadidaṃ pūjā, sammasanaṃ saṅkhārānaṃ, yoniso manasikāro, satipaṭṭhānānupassanā, ārammaṇasāraggāho, kilesayuddhaṃ, sadatthamanuyuñjanā, etaṃ jinaputtānaṃ karaṇīyaṃ, avasesānaṃ devamanussānaṃ pūjā karaṇīyā.
‘‘யதா² வா பன, மஹாராஜ, ப்³ராஹ்மணமாணவகானங் இருவேத³ங் யஜுவேத³ங் ஸாமவேத³ங் அத²ப்³ப³ணவேத³ங் லக்க²ணங் இதிஹாஸங் புராணங் நிக⁴ண்டு³ கேடுப⁴ங் அக்க²ரப்பபே⁴த³ங் பத³ங் வெய்யாகரணங் பா⁴ஸமக்³க³ங் உப்பாதங் ஸுபினங் நிமித்தங் ச²ளங்க³ங் சந்த³க்³கா³ஹங் ஸூரியக்³கா³ஹங் ஸுக்கராஹுசரிதங் உளுக்³க³ஹயுத்³த⁴ங் 1 தே³வது³ந்து³பி⁴ஸ்ஸரங் ஓக்கந்தி உக்காபாதங் பூ⁴மிகம்மங் 2 தி³ஸாதா³ஹங் பு⁴ம்மந்தலிக்க²ங் ஜோதிஸங் லோகாயதிகங் ஸாசக்கங் மிக³சக்கங் அந்தரசக்கங் மிஸ்ஸகுப்பாத³ங் ஸகுணருதரவிதங் 3 ஸிக்கா² கரணீயா, அவஸேஸானங் புது²வெஸ்ஸஸுத்³தா³னங் கஸி வணிஜ்ஜா கோ³ரக்கா² கரணீயா, ஏவமேவ கோ², மஹாராஜ, அகம்மங் ஹேதங் ஜினபுத்தானங் யதி³த³ங் பூஜா, ஸம்மஸனங் ஸங்கா²ரானங், யோனிஸோ மனஸிகாரோ, ஸதிபட்டா²னானுபஸ்ஸனா, ஆரம்மணஸாரக்³கா³ஹோ, கிலேஸயுத்³த⁴ங், ஸத³த்த²மனுயுஞ்ஜனா, ஏதங் ஜினபுத்தானங் கரணீயங், அவஸேஸானங் தே³வமனுஸ்ஸானங் பூஜா கரணீயா, தஸ்மா, மஹாராஜ, ததா²க³தோ ‘மா இமே அகம்மே யுஞ்ஜந்து, கம்மே இமே யுஞ்ஜந்தூ’தி ஆஹ ‘அப்³யாவடா தும்ஹே, ஆனந்த³, ஹோத² ததா²க³தஸ்ஸ ஸரீரபூஜாயா’தி. யதே³தங், மஹாராஜ, ததா²க³தோ ந ப⁴ணெய்ய, பத்தசீவரம்பி அத்தனோ பரியாதா³பெத்வா பி⁴க்கூ² பு³த்³த⁴பூஜங் யேவ கரெய்யு’’ந்தி. ‘‘ஸாது⁴, ப⁴ந்தே நாக³ஸேன, ஏவமேதங் ததா² ஸம்படிச்சா²மீ’’தி.
‘‘Yathā vā pana, mahārāja, brāhmaṇamāṇavakānaṃ iruvedaṃ yajuvedaṃ sāmavedaṃ athabbaṇavedaṃ lakkhaṇaṃ itihāsaṃ purāṇaṃ nighaṇḍu keṭubhaṃ akkharappabhedaṃ padaṃ veyyākaraṇaṃ bhāsamaggaṃ uppātaṃ supinaṃ nimittaṃ chaḷaṅgaṃ candaggāhaṃ sūriyaggāhaṃ sukkarāhucaritaṃ uḷuggahayuddhaṃ 4 devadundubhissaraṃ okkanti ukkāpātaṃ bhūmikammaṃ 5 disādāhaṃ bhummantalikkhaṃ jotisaṃ lokāyatikaṃ sācakkaṃ migacakkaṃ antaracakkaṃ missakuppādaṃ sakuṇarutaravitaṃ 6 sikkhā karaṇīyā, avasesānaṃ puthuvessasuddānaṃ kasi vaṇijjā gorakkhā karaṇīyā, evameva kho, mahārāja, akammaṃ hetaṃ jinaputtānaṃ yadidaṃ pūjā, sammasanaṃ saṅkhārānaṃ, yoniso manasikāro, satipaṭṭhānānupassanā, ārammaṇasāraggāho, kilesayuddhaṃ, sadatthamanuyuñjanā, etaṃ jinaputtānaṃ karaṇīyaṃ, avasesānaṃ devamanussānaṃ pūjā karaṇīyā, tasmā, mahārāja, tathāgato ‘mā ime akamme yuñjantu, kamme ime yuñjantū’ti āha ‘abyāvaṭā tumhe, ānanda, hotha tathāgatassa sarīrapūjāyā’ti. Yadetaṃ, mahārāja, tathāgato na bhaṇeyya, pattacīvarampi attano pariyādāpetvā bhikkhū buddhapūjaṃ yeva kareyyu’’nti. ‘‘Sādhu, bhante nāgasena, evametaṃ tathā sampaṭicchāmī’’ti.
பு³த்³த⁴பூஜனபஞ்ஹோ ஸத்தமோ.
Buddhapūjanapañho sattamo.
Footnotes:
