| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
4. நிப்³பா³னவக்³கோ³
4. Nibbānavaggo
1. ப²ஸ்ஸாதி³வினிப்³பு⁴ஜனபஞ்ஹோ
1. Phassādivinibbhujanapañho
1. ராஜா ஆஹ ‘‘ப⁴ந்தே நாக³ஸேன, ஸக்கா இமேஸங் த⁴ம்மானங் ஏகதோபா⁴வக³தானங் வினிப்³பு⁴ஜித்வா வினிப்³பு⁴ஜித்வா நானாகரணங் பஞ்ஞாபேதுங் ‘அயங் ப²ஸ்ஸோ, அயங் வேத³னா, அயங் ஸஞ்ஞா, அயங் சேதனா, இத³ங் விஞ்ஞாணங், அயங் விதக்கோ, அயங் விசாரோ’தி’’? ‘‘ந ஸக்கா, மஹாராஜ, இமேஸங் த⁴ம்மானங் ஏகதோபா⁴வக³தானங் வினிப்³பு⁴ஜித்வா வினிப்³பு⁴ஜித்வா நானாகரணங் பஞ்ஞாபேதுங் ‘அயங் ப²ஸ்ஸோ, அயங் வேத³னா, அயங் ஸஞ்ஞா, அயங் சேதனா, இத³ங் விஞ்ஞாணங், அயங் விதக்கோ, அயங் விசாரோ’’’தி.
1. Rājā āha ‘‘bhante nāgasena, sakkā imesaṃ dhammānaṃ ekatobhāvagatānaṃ vinibbhujitvā vinibbhujitvā nānākaraṇaṃ paññāpetuṃ ‘ayaṃ phasso, ayaṃ vedanā, ayaṃ saññā, ayaṃ cetanā, idaṃ viññāṇaṃ, ayaṃ vitakko, ayaṃ vicāro’ti’’? ‘‘Na sakkā, mahārāja, imesaṃ dhammānaṃ ekatobhāvagatānaṃ vinibbhujitvā vinibbhujitvā nānākaraṇaṃ paññāpetuṃ ‘ayaṃ phasso, ayaṃ vedanā, ayaṃ saññā, ayaṃ cetanā, idaṃ viññāṇaṃ, ayaṃ vitakko, ayaṃ vicāro’’’ti.
‘‘ஓபம்மங் கரோஹீ’’தி. ‘‘யதா², மஹாராஜ, ரஞ்ஞோ ஸூதோ³ அரஸங் வா ரஸங் வா 1 கரெய்ய, ஸோ தத்த² த³தி⁴ம்பி பக்கி²பெய்ய, லோணம்பி பக்கி²பெய்ய, ஸிங்கி³வேரம்பி பக்கி²பெய்ய, ஜீரகம்பி பக்கி²பெய்ய, மரிசம்பி பக்கி²பெய்ய, அஞ்ஞானிபி பகாரானி பக்கி²பெய்ய, தமேனங் ராஜா ஏவங் வதெ³ய்ய, ‘த³தி⁴ஸ்ஸ மே ரஸங் ஆஹர, லோணஸ்ஸ மே ரஸங் ஆஹர, ஸிங்கி³வேரஸ்ஸ மே ரஸங் ஆஹர, ஜீரகஸ்ஸ மே ரஸங் ஆஹர, மரிசஸ்ஸ மே ரஸங் ஆஹர, ஸப்³பே³ஸங் மே பக்கி²த்தானங் ரஸங் ஆஹரா’தி. ஸக்கா நு கோ², மஹாராஜ, தேஸங் ரஸானங் ஏகதோபா⁴வக³தானங் வினிப்³பு⁴ஜித்வா வினிப்³பு⁴ஜித்வா ரஸங் ஆஹரிதுங் அம்பி³லத்தங் வா லவணத்தங் வா தித்தகத்தங் வா கடுகத்தங் வா கஸாயத்தங் வா மது⁴ரத்தங் வா’’தி? ‘‘ந ஹி, ப⁴ந்தே, ஸக்கா தேஸங் ரஸானங் ஏகதோபா⁴வக³தானங் வினிப்³பு⁴ஜித்வா வினிப்³பு⁴ஜித்வா ரஸங் ஆஹரிதுங் அம்பி³லத்தங் வா லவணத்தங் வா தித்தகத்தங் வா கடுகத்தங் வா கஸாயத்தங் வா மது⁴ரத்தங் வா, அபி ச கோ² பன ஸகேன ஸகேன லக்க²ணேன உபட்ட²ஹந்தீ’’தி. ‘‘ஏவமேவ கோ², மஹாராஜ, ந ஸக்கா இமேஸங் த⁴ம்மானங் ஏகதோபா⁴வக³தானங் வினிப்³பு⁴ஜித்வா வினிப்³பு⁴ஜித்வா நானாகரணங் பஞ்ஞாபேதுங் ‘அயங் ப²ஸ்ஸோ, அயங் வேத³னா, அயங் ஸஞ்ஞா, அயங் சேதனா, இத³ங் விஞ்ஞாணங், அயங் விதக்கோ, அயங் விசாரோ’தி, அபி ச கோ² பன ஸகேன ஸகேன லக்க²ணேன உபட்ட²ஹந்தீ’’தி.
‘‘Opammaṃ karohī’’ti. ‘‘Yathā, mahārāja, rañño sūdo arasaṃ vā rasaṃ vā 2 kareyya, so tattha dadhimpi pakkhipeyya, loṇampi pakkhipeyya, siṅgiverampi pakkhipeyya, jīrakampi pakkhipeyya, maricampi pakkhipeyya, aññānipi pakārāni pakkhipeyya, tamenaṃ rājā evaṃ vadeyya, ‘dadhissa me rasaṃ āhara, loṇassa me rasaṃ āhara, siṅgiverassa me rasaṃ āhara, jīrakassa me rasaṃ āhara, maricassa me rasaṃ āhara, sabbesaṃ me pakkhittānaṃ rasaṃ āharā’ti. Sakkā nu kho, mahārāja, tesaṃ rasānaṃ ekatobhāvagatānaṃ vinibbhujitvā vinibbhujitvā rasaṃ āharituṃ ambilattaṃ vā lavaṇattaṃ vā tittakattaṃ vā kaṭukattaṃ vā kasāyattaṃ vā madhurattaṃ vā’’ti? ‘‘Na hi, bhante, sakkā tesaṃ rasānaṃ ekatobhāvagatānaṃ vinibbhujitvā vinibbhujitvā rasaṃ āharituṃ ambilattaṃ vā lavaṇattaṃ vā tittakattaṃ vā kaṭukattaṃ vā kasāyattaṃ vā madhurattaṃ vā, api ca kho pana sakena sakena lakkhaṇena upaṭṭhahantī’’ti. ‘‘Evameva kho, mahārāja, na sakkā imesaṃ dhammānaṃ ekatobhāvagatānaṃ vinibbhujitvā vinibbhujitvā nānākaraṇaṃ paññāpetuṃ ‘ayaṃ phasso, ayaṃ vedanā, ayaṃ saññā, ayaṃ cetanā, idaṃ viññāṇaṃ, ayaṃ vitakko, ayaṃ vicāro’ti, api ca kho pana sakena sakena lakkhaṇena upaṭṭhahantī’’ti.
‘‘கல்லோஸி , ப⁴ந்தே நாக³ஸேனா’’தி.
‘‘Kallosi , bhante nāgasenā’’ti.
ப²ஸ்ஸாதி³வினிப்³பு⁴ஜனபஞ்ஹோ பட²மோ.
Phassādivinibbhujanapañho paṭhamo.
Footnotes:
