| Library / Tipiṭaka / তিপিটক • Tipiṭaka / খুদ্দসিক্খা-মূলসিক্খা • Khuddasikkhā-mūlasikkhā |
৪৫. পৰারণানিদ্দেসৰণ্ণনা
45. Pavāraṇāniddesavaṇṇanā
৪৩৩. ‘‘অনুজানামি , ভিক্খৰে, পঞ্চন্নং সঙ্ঘে পৰারেতু’’ন্তি (মহাৰ॰ ২১৫) ৰুত্তত্তা ‘‘সেসা সঙ্ঘপ্পৰারণা’’তি (মহাৰ॰ ২১৫ আদযো) ৰুত্তা।
433. ‘‘Anujānāmi , bhikkhave, pañcannaṃ saṅghe pavāretu’’nti (mahāva. 215) vuttattā ‘‘sesā saṅghappavāraṇā’’ti (mahāva. 215 ādayo) vuttā.
৪৩৪. অজ্জ পৰারণাতি এত্থ (মহাৰ॰ ২১৫ আদযো) পন চাতুদ্দসিকায পৰারণায ‘‘অজ্জ পৰারণা চাতুদ্দসী’’তি পুব্বকিচ্চং কাতব্বং, পন্নরসিযং ‘‘অজ্জ পৰারণা পন্নরসী’’তি।
434.Ajja pavāraṇāti ettha (mahāva. 215 ādayo) pana cātuddasikāya pavāraṇāya ‘‘ajja pavāraṇā cātuddasī’’ti pubbakiccaṃ kātabbaṃ, pannarasiyaṃ ‘‘ajja pavāraṇā pannarasī’’ti.
৪৩৭. থেরেসু উক্কুটিকং নিসজ্জ পৰারেন্তেসু সযং পন নৰো যাৰ পৰারেতি, তাৰ উক্কুটিকোৰ অচ্ছতূতি অত্থো। ‘‘ন ভিক্খৰে থেরেসু উক্কুটিকং নিসিন্নেসু পৰারযমানেসু আসনেসু অচ্ছিতব্বং। যো অচ্ছেয্য, আপত্তি দুক্কটস্স। অনুজানামি, ভিক্খৰে, তদমন্তরা উক্কুটিকং নিসীদিতুং, যাৰ পৰারেতি, পৰারেত্ৰা আসনে নিসীদিতু’’ন্তি (মহাৰ॰ ২১১) হি ৰুত্তং।
437. Theresu ukkuṭikaṃ nisajja pavārentesu sayaṃ pana navo yāva pavāreti, tāva ukkuṭikova acchatūti attho. ‘‘Na bhikkhave theresu ukkuṭikaṃ nisinnesu pavārayamānesu āsanesu acchitabbaṃ. Yo accheyya, āpatti dukkaṭassa. Anujānāmi, bhikkhave, tadamantarā ukkuṭikaṃ nisīdituṃ, yāva pavāreti, pavāretvā āsane nisīditu’’nti (mahāva. 211) hi vuttaṃ.
৪৪০-২. এৰং তেৰাচিকপ্পৰারণং দস্সেত্ৰা ইদানি দ্ৰেৰাচিকএকৰাচিকসমানৰস্সিকপ্পৰারণাসু কত্তব্বং দস্সেতুং ‘‘দানেনা’’তিআদিমাহ। তত্থ দানেনাতি দানেন ৰা। ধম্মসাকচ্ছাতি ইমিনা ধম্মকথাসুত্তসঙ্গাযনাৰিনযৰিনিচ্ছযাদযো গহিতা। দানেন ৰা ধম্মসাকচ্ছায ৰা কলহেন ৰা রত্তিযা খেপিতভাৰতো তেৰাচিকায ওকাসে অসতি দসৰিধে ৰা অন্তরাযে অনুরূপতো উত্তিং ঠপেত্ৰা পৰারেয্যাতি সম্বন্ধো।
440-2. Evaṃ tevācikappavāraṇaṃ dassetvā idāni dvevācikaekavācikasamānavassikappavāraṇāsu kattabbaṃ dassetuṃ ‘‘dānenā’’tiādimāha. Tattha dānenāti dānena vā. Dhammasākacchāti iminā dhammakathāsuttasaṅgāyanāvinayavinicchayādayo gahitā. Dānena vā dhammasākacchāya vā kalahena vā rattiyā khepitabhāvato tevācikāya okāse asati dasavidhe vā antarāye anurūpato uttiṃ ṭhapetvā pavāreyyāti sambandho.
ইদানি যথানুরূপতো ঞত্তি ঠপিতা, তং দস্সেতুং ‘‘সুণাতু মে’’তিআদিমাহ। যথাঠপিতঞত্তিযাতি এত্থ সব্বসঙ্গাহিকাচেঞত্তিঠপিতা, তেৰাচিকদ্ৰেৰাচিকএকৰাচিকানং ৰসেন পৰারেতব্বং, সমানৰস্সিকপ্পৰারণাৰ একা ন ৰট্টতি। সচে ‘‘সঙ্ঘো তেৰাচিকং পৰারেয্যা’’তি ঠপিতা, তেৰাচিকা এৰ ৰট্টতি, দ্ৰেৰাচিকাদযো ন ৰট্টন্তি। ‘‘দ্ৰেৰাচিকং পৰারেয্যা’’তি ৰুত্তে দ্ৰেৰাচিকঞ্চ তেৰাচিকঞ্চ ৰট্টতি, একৰাচিকসমানৰস্সিকা ন ৰট্টন্তি। ‘‘একৰাচিকং পৰারেয্যা’’তি ৰুত্তে পন সমানৰস্সিকং ঠপেত্ৰা সেসা ৰট্টন্তি। ‘‘সমানৰস্সিক’’ন্তি পন ৰুত্তে সব্বং ৰট্টতীতি। আদিকে চেত্থ আহরেতি এত্থ পৰারণাযপি পুব্বে উপোসথে ৰুত্তে ‘‘যদি সমা আগচ্ছেয্যু’’ন্তিআদিকে ৰারে আহরেতি অত্থো।
Idāni yathānurūpato ñatti ṭhapitā, taṃ dassetuṃ ‘‘suṇātu me’’tiādimāha. Yathāṭhapitañattiyāti ettha sabbasaṅgāhikāceñattiṭhapitā, tevācikadvevācikaekavācikānaṃ vasena pavāretabbaṃ, samānavassikappavāraṇāva ekā na vaṭṭati. Sace ‘‘saṅgho tevācikaṃ pavāreyyā’’ti ṭhapitā, tevācikā eva vaṭṭati, dvevācikādayo na vaṭṭanti. ‘‘Dvevācikaṃ pavāreyyā’’ti vutte dvevācikañca tevācikañca vaṭṭati, ekavācikasamānavassikā na vaṭṭanti. ‘‘Ekavācikaṃ pavāreyyā’’ti vutte pana samānavassikaṃ ṭhapetvā sesā vaṭṭanti. ‘‘Samānavassika’’nti pana vutte sabbaṃ vaṭṭatīti. Ādike cettha āhareti ettha pavāraṇāyapi pubbe uposathe vutte ‘‘yadi samā āgaccheyyu’’ntiādike vāre āhareti attho.
৪৪৩. ইদানি ৰত্তব্বং সন্ধায ‘‘এৰ’’ন্তি ৰুত্তং। তিৰগ্গো চ চতুৰগ্গো চ তিচতুৰগ্গো।
443. Idāni vattabbaṃ sandhāya ‘‘eva’’nti vuttaṃ. Tivaggo ca catuvaggo ca ticatuvaggo.
৪৫০. ‘‘ন ভিক্খৰে সাপত্তিকেন পৰারেতব্বং। যো পৰারেয্য, আপত্তি দুক্কটস্সা’’তি (মহাৰ॰ ২৩৫) ৰুত্তত্তা সাপত্তিকেনপি ৰেমতিকেনপি পৰারিযমানে আপত্তিং সরন্তেনপি উপোসথে ৰুত্তনযেন পটিপজ্জিতব্বং। ‘‘ৰগ্গে সমগ্গে ৰগ্গোতি-সঞ্ঞিনো ৰিমতিস্স ৰা’’তিআদিগাথাতো পট্ঠায যাৰ ‘‘অন্তরাযং ৰ সঙ্ঘং ৰা-ধিট্ঠাতুং সীমমেৰ ৰা’’তি অৰসানগাথা, তাৰ সেসা উপোসথে ৰুত্তা গাথাযোতি অধিপ্পেতা।
450. ‘‘Na bhikkhave sāpattikena pavāretabbaṃ. Yo pavāreyya, āpatti dukkaṭassā’’ti (mahāva. 235) vuttattā sāpattikenapi vematikenapi pavāriyamāne āpattiṃ sarantenapi uposathe vuttanayena paṭipajjitabbaṃ. ‘‘Vagge samagge vaggoti-saññino vimatissa vā’’tiādigāthāto paṭṭhāya yāva ‘‘antarāyaṃ va saṅghaṃ vā-dhiṭṭhātuṃ sīmameva vā’’ti avasānagāthā, tāva sesā uposathe vuttā gāthāyoti adhippetā.
৪৫১. পৰারিতে চাতি (মহাৰ॰ ২১৩ আদযো) পঠমপৰারণায সঙ্ঘম্হি পৰারিতেতি অধিপ্পাযো। এত্থ অৰুত্থোতি পচ্ছিমিকায উপগতো অপরিনিট্ঠিতত্তা ‘‘অৰুত্থো’’তি ৰুচ্চতি।
451.Pavāritecāti (mahāva. 213 ādayo) paṭhamapavāraṇāya saṅghamhi pavāriteti adhippāyo. Ettha avutthoti pacchimikāya upagato apariniṭṭhitattā ‘‘avuttho’’ti vuccati.
৪৫২. চাতুমাসিনীতি কত্তিকপুণ্ণমী। এত্থ ৰুত্থৰস্সা নাম পচ্ছিমিকায উপগতা। পৰারণাৰিনিচ্ছযো।
452.Cātumāsinīti kattikapuṇṇamī. Ettha vutthavassā nāma pacchimikāya upagatā. Pavāraṇāvinicchayo.
পৰারণানিদ্দেসৰণ্ণনা নিট্ঠিতা।
Pavāraṇāniddesavaṇṇanā niṭṭhitā.
