| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
45. பவாரணானித்³தே³ஸவண்ணனா
45. Pavāraṇāniddesavaṇṇanā
433. ‘‘அனுஜானாமி , பி⁴க்க²வே, பஞ்சன்னங் ஸங்கே⁴ பவாரேது’’ந்தி (மஹாவ॰ 215) வுத்தத்தா ‘‘ஸேஸா ஸங்க⁴ப்பவாரணா’’தி (மஹாவ॰ 215 ஆத³யோ) வுத்தா.
433. ‘‘Anujānāmi , bhikkhave, pañcannaṃ saṅghe pavāretu’’nti (mahāva. 215) vuttattā ‘‘sesā saṅghappavāraṇā’’ti (mahāva. 215 ādayo) vuttā.
434. அஜ்ஜ பவாரணாதி எத்த² (மஹாவ॰ 215 ஆத³யோ) பன சாதுத்³த³ஸிகாய பவாரணாய ‘‘அஜ்ஜ பவாரணா சாதுத்³த³ஸீ’’தி புப்³ப³கிச்சங் காதப்³ப³ங், பன்னரஸியங் ‘‘அஜ்ஜ பவாரணா பன்னரஸீ’’தி.
434.Ajja pavāraṇāti ettha (mahāva. 215 ādayo) pana cātuddasikāya pavāraṇāya ‘‘ajja pavāraṇā cātuddasī’’ti pubbakiccaṃ kātabbaṃ, pannarasiyaṃ ‘‘ajja pavāraṇā pannarasī’’ti.
437. தே²ரேஸு உக்குடிகங் நிஸஜ்ஜ பவாரெந்தேஸு ஸயங் பன நவோ யாவ பவாரேதி, தாவ உக்குடிகோவ அச்ச²தூதி அத்தோ². ‘‘ந பி⁴க்க²வே தே²ரேஸு உக்குடிகங் நிஸின்னேஸு பவாரயமானேஸு ஆஸனேஸு அச்சி²தப்³ப³ங். யோ அச்செ²ய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, தத³மந்தரா உக்குடிகங் நிஸீதி³துங், யாவ பவாரேதி, பவாரெத்வா ஆஸனே நிஸீதி³து’’ந்தி (மஹாவ॰ 211) ஹி வுத்தங்.
437. Theresu ukkuṭikaṃ nisajja pavārentesu sayaṃ pana navo yāva pavāreti, tāva ukkuṭikova acchatūti attho. ‘‘Na bhikkhave theresu ukkuṭikaṃ nisinnesu pavārayamānesu āsanesu acchitabbaṃ. Yo accheyya, āpatti dukkaṭassa. Anujānāmi, bhikkhave, tadamantarā ukkuṭikaṃ nisīdituṃ, yāva pavāreti, pavāretvā āsane nisīditu’’nti (mahāva. 211) hi vuttaṃ.
440-2. ஏவங் தேவாசிகப்பவாரணங் த³ஸ்ஸெத்வா இதா³னி த்³வேவாசிகஏகவாசிகஸமானவஸ்ஸிகப்பவாரணாஸு கத்தப்³ப³ங் த³ஸ்ஸேதுங் ‘‘தா³னேனா’’திஆதி³மாஹ. தத்த² தா³னேனாதி தா³னேன வா. த⁴ம்மஸாகச்சா²தி இமினா த⁴ம்மகதா²ஸுத்தஸங்கா³யனாவினயவினிச்ச²யாத³யோ க³ஹிதா. தா³னேன வா த⁴ம்மஸாகச்சா²ய வா கலஹேன வா ரத்தியா கே²பிதபா⁴வதோ தேவாசிகாய ஓகாஸே அஸதி த³ஸவிதே⁴ வா அந்தராயே அனுரூபதோ உத்திங் ட²பெத்வா பவாரெய்யாதி ஸம்ப³ந்தோ⁴.
440-2. Evaṃ tevācikappavāraṇaṃ dassetvā idāni dvevācikaekavācikasamānavassikappavāraṇāsu kattabbaṃ dassetuṃ ‘‘dānenā’’tiādimāha. Tattha dānenāti dānena vā. Dhammasākacchāti iminā dhammakathāsuttasaṅgāyanāvinayavinicchayādayo gahitā. Dānena vā dhammasākacchāya vā kalahena vā rattiyā khepitabhāvato tevācikāya okāse asati dasavidhe vā antarāye anurūpato uttiṃ ṭhapetvā pavāreyyāti sambandho.
இதா³னி யதா²னுரூபதோ ஞத்தி ட²பிதா, தங் த³ஸ்ஸேதுங் ‘‘ஸுணாது மே’’திஆதி³மாஹ. யதா²ட²பிதஞத்தியாதி எத்த² ஸப்³ப³ஸங்கா³ஹிகாசேஞத்திட²பிதா, தேவாசிகத்³வேவாசிகஏகவாசிகானங் வஸேன பவாரேதப்³ப³ங், ஸமானவஸ்ஸிகப்பவாரணாவ ஏகா ந வட்டதி. ஸசே ‘‘ஸங்கோ⁴ தேவாசிகங் பவாரெய்யா’’தி ட²பிதா, தேவாசிகா ஏவ வட்டதி, த்³வேவாசிகாத³யோ ந வட்டந்தி. ‘‘த்³வேவாசிகங் பவாரெய்யா’’தி வுத்தே த்³வேவாசிகஞ்ச தேவாசிகஞ்ச வட்டதி, ஏகவாசிகஸமானவஸ்ஸிகா ந வட்டந்தி. ‘‘ஏகவாசிகங் பவாரெய்யா’’தி வுத்தே பன ஸமானவஸ்ஸிகங் ட²பெத்வா ஸேஸா வட்டந்தி. ‘‘ஸமானவஸ்ஸிக’’ந்தி பன வுத்தே ஸப்³ப³ங் வட்டதீதி. ஆதி³கே செத்த² ஆஹரேதி எத்த² பவாரணாயபி புப்³பே³ உபோஸதே² வுத்தே ‘‘யதி³ ஸமா ஆக³ச்செ²ய்யு’’ந்திஆதி³கே வாரே ஆஹரேதி அத்தோ².
Idāni yathānurūpato ñatti ṭhapitā, taṃ dassetuṃ ‘‘suṇātu me’’tiādimāha. Yathāṭhapitañattiyāti ettha sabbasaṅgāhikāceñattiṭhapitā, tevācikadvevācikaekavācikānaṃ vasena pavāretabbaṃ, samānavassikappavāraṇāva ekā na vaṭṭati. Sace ‘‘saṅgho tevācikaṃ pavāreyyā’’ti ṭhapitā, tevācikā eva vaṭṭati, dvevācikādayo na vaṭṭanti. ‘‘Dvevācikaṃ pavāreyyā’’ti vutte dvevācikañca tevācikañca vaṭṭati, ekavācikasamānavassikā na vaṭṭanti. ‘‘Ekavācikaṃ pavāreyyā’’ti vutte pana samānavassikaṃ ṭhapetvā sesā vaṭṭanti. ‘‘Samānavassika’’nti pana vutte sabbaṃ vaṭṭatīti. Ādike cettha āhareti ettha pavāraṇāyapi pubbe uposathe vutte ‘‘yadi samā āgaccheyyu’’ntiādike vāre āhareti attho.
443. இதா³னி வத்தப்³ப³ங் ஸந்தா⁴ய ‘‘ஏவ’’ந்தி வுத்தங். திவக்³கோ³ ச சதுவக்³கோ³ ச திசதுவக்³கோ³.
443. Idāni vattabbaṃ sandhāya ‘‘eva’’nti vuttaṃ. Tivaggo ca catuvaggo ca ticatuvaggo.
450. ‘‘ந பி⁴க்க²வே ஸாபத்திகேன பவாரேதப்³ப³ங். யோ பவாரெய்ய, ஆபத்தி து³க்கடஸ்ஸா’’தி (மஹாவ॰ 235) வுத்தத்தா ஸாபத்திகேனபி வேமதிகேனபி பவாரியமானே ஆபத்திங் ஸரந்தேனபி உபோஸதே² வுத்தனயேன படிபஜ்ஜிதப்³ப³ங். ‘‘வக்³கே³ ஸமக்³கே³ வக்³கோ³தி-ஸஞ்ஞினோ விமதிஸ்ஸ வா’’திஆதி³கா³தா²தோ பட்டா²ய யாவ ‘‘அந்தராயங் வ ஸங்க⁴ங் வா-தி⁴ட்டா²துங் ஸீமமேவ வா’’தி அவஸானகா³தா², தாவ ஸேஸா உபோஸதே² வுத்தா கா³தா²யோதி அதி⁴ப்பேதா.
450. ‘‘Na bhikkhave sāpattikena pavāretabbaṃ. Yo pavāreyya, āpatti dukkaṭassā’’ti (mahāva. 235) vuttattā sāpattikenapi vematikenapi pavāriyamāne āpattiṃ sarantenapi uposathe vuttanayena paṭipajjitabbaṃ. ‘‘Vagge samagge vaggoti-saññino vimatissa vā’’tiādigāthāto paṭṭhāya yāva ‘‘antarāyaṃ va saṅghaṃ vā-dhiṭṭhātuṃ sīmameva vā’’ti avasānagāthā, tāva sesā uposathe vuttā gāthāyoti adhippetā.
451. பவாரிதே சாதி (மஹாவ॰ 213 ஆத³யோ) பட²மபவாரணாய ஸங்க⁴ம்ஹி பவாரிதேதி அதி⁴ப்பாயோ. எத்த² அவுத்தோ²தி பச்சி²மிகாய உபக³தோ அபரினிட்டி²தத்தா ‘‘அவுத்தோ²’’தி வுச்சதி.
451.Pavāritecāti (mahāva. 213 ādayo) paṭhamapavāraṇāya saṅghamhi pavāriteti adhippāyo. Ettha avutthoti pacchimikāya upagato apariniṭṭhitattā ‘‘avuttho’’ti vuccati.
452. சாதுமாஸினீதி கத்திகபுண்ணமீ. எத்த² வுத்த²வஸ்ஸா நாம பச்சி²மிகாய உபக³தா. பவாரணாவினிச்ச²யோ.
452.Cātumāsinīti kattikapuṇṇamī. Ettha vutthavassā nāma pacchimikāya upagatā. Pavāraṇāvinicchayo.
பவாரணானித்³தே³ஸவண்ணனா நிட்டி²தா.
Pavāraṇāniddesavaṇṇanā niṭṭhitā.
