| Library / Tipiṭaka / ਤਿਪਿਟਕ • Tipiṭaka / ਦ੍વੇਮਾਤਿਕਾਪਾਲ਼ਿ • Dvemātikāpāḷi |
੩. ਪਤ੍ਤવਗ੍ਗੋ
3. Pattavaggo
੧. ਪਤ੍ਤਸਿਕ੍ਖਾਪਦવਣ੍ਣਨਾ
1. Pattasikkhāpadavaṇṇanā
ਪਤ੍ਤવਗ੍ਗਸ੍ਸ ਪਠਮੇ ਅਤਿਰੇਕਪਤ੍ਤੋਤਿ ਅਨਧਿਟ੍ਠਿਤੋ ਚ ਅવਿਕਪ੍ਪਿਤੋ ਚ, ਸੋ ਚ ਖੋ ਉਕ੍ਕਟ੍ਠਮਜ੍ਝਿਮੋਮਕਾਨਂ ਅਞ੍ਞਤਰੋ ਪਮਾਣਯੁਤ੍ਤੋવ, ਤਸ੍ਸ ਪਮਾਣਂ ‘‘ਅਡ੍ਢਾਲ਼੍ਹਕੋਦਨਂ ਗਣ੍ਹਾਤੀ’’ਤਿਆਦਿਨਾ (ਪਾਰਾ ੬੦੨) ਨਯੇਨ ਪਾਲ਼ਿਯਂ વੁਤ੍ਤਂ। ਤਤ੍ਰਾਯਂ વਿਨਿਚ੍ਛਯੋ – ਅਨੁਪਹਤਪੁਰਾਣਸਾਲਿਤਣ੍ਡੁਲਾਨਂ ਸੁਕੋਟ੍ਟਿਤਪਰਿਸੁਦ੍ਧਾਨਂ ਦ੍વੇ ਮਗਧਨਾਲ਼ਿਯੋ ਗਹੇਤ੍વਾ ਤੇਹਿ ਤਣ੍ਡੁਲੇਹਿ ਅਨੁਤ੍ਤਣ੍ਡੁਲਮਕਿਲਿਨ੍ਨਮਪਿਣ੍ਡਿਕਂ ਸੁવਿਸਦਂ ਕੁਨ੍ਦਮਕੁਲ਼ਰਾਸਿਸਦਿਸਂ ਅવਸ੍ਸਾવਿਤੋਦਨਂ ਪਚਿਤ੍વਾ ਨਿਰવਸੇਸਂ ਪਤ੍ਤੇ ਪਕ੍ਖਿਪਿਤ੍વਾ ਤਸ੍ਸ ਓਦਨਸ੍ਸ ਚਤੁਤ੍ਥਭਾਗਪ੍ਪਮਾਣੋ ਨਾਤਿਘਨੋ ਨਾਤਿਤਨੁਕੋ ਹਤ੍ਥਹਾਰਿਯੋ ਸਬ੍ਬਸਮ੍ਭਾਰਸਙ੍ਖਤੋ ਮੁਗ੍ਗਸੂਪੋ ਪਕ੍ਖਿਪਿਤਬ੍ਬੋ, ਤਤੋ ਆਲੋਪਸ੍ਸ ਅਨੁਰੂਪਂ ਯਾવਚਰਿਮਾਲੋਪਪ੍ਪਹੋਨਕਂ ਮਚ੍ਛਮਂਸਾਦਿਬ੍ਯਞ੍ਜਨਂ ਪਕ੍ਖਿਪਿਤਬ੍ਬਂ, ਸਪ੍ਪਿਤੇਲਤਕ੍ਕਰਸਕਞ੍ਜਿਯਾਦੀਨਿ ਪਨ ਗਣਨੂਪਗਾਨਿ ਨ ਹੋਨ੍ਤਿ। ਤਾਨਿ ਹਿ ਓਦਨਗਤਿਕਾਨੇવ, ਨੇવ ਹਾਪੇਤੁਂ, ਨ વਡ੍ਢੇਤੁਂ ਸਕ੍ਕੋਨ੍ਤਿ, ਏવਮੇਤਂ ਸਬ੍ਬਮ੍ਪਿ ਪਕ੍ਖਿਤ੍ਤਂ ਸਚੇ ਪਤ੍ਤਸ੍ਸ ਮੁਖવਟ੍ਟਿਯਾ ਹੇਟ੍ਠਿਮਰਾਜਿਸਮਂ ਤਿਟ੍ਠਤਿ, ਸੁਤ੍ਤੇਨ વਾ ਹੀਰੇਨ વਾ ਛਿਨ੍ਦਨ੍ਤਸ੍ਸ ਸੁਤ੍ਤਸ੍ਸ વਾ ਹੀਰਸ੍ਸ વਾ ਹੇਟ੍ਠਿਮਨ੍ਤਂ ਫੁਸਤਿ, ਅਯਂ ਉਕ੍ਕਟ੍ਠੋ ਨਾਮ ਪਤ੍ਤੋ। ਸਚੇ ਤਂ ਰਾਜਿਂ ਅਤਿਕ੍ਕਮ੍ਮ ਥੂਪੀਕਤਂ ਤਿਟ੍ਠਤਿ, ਅਯਂ ਉਕ੍ਕਟ੍ਠੋਮਕੋ ਨਾਮ ਪਤ੍ਤੋ। ਸਚੇ ਤਂ ਰਾਜਿਂ ਨ ਸਮ੍ਪਾਪੁਣਾਤਿ, ਅਨ੍ਤੋਗਧਮੇવ ਹੋਤਿ, ਅਯਂ ਉਕ੍ਕਟ੍ਠੁਕ੍ਕਟ੍ਠੋ ਨਾਮ ਪਤ੍ਤੋ। ਉਕ੍ਕਟ੍ਠਤੋ ਉਪਡ੍ਢਪ੍ਪਮਾਣੋ ਮਜ੍ਝਿਮੋ। ਮਜ੍ਝਿਮਪਤ੍ਤਤੋ ਉਪਡ੍ਢਪ੍ਪਮਾਣੋ ਓਮਕੋ। ਤੇਸਮ੍ਪਿ વੁਤ੍ਤਨਯੇਨੇવ ਭੇਦੋ વੇਦਿਤਬ੍ਬੋ। ਇਚ੍ਚੇਤੇਸੁ ਨવਸੁ ਉਕ੍ਕਟ੍ਠੁਕ੍ਕਟ੍ਠੋ ਚ ਓਮਕੋਮਕੋ ਚਾਤਿ ਦ੍વੇ ਅਪਤ੍ਤਾ, ਸੇਸਾ ਸਤ੍ਤ ਪਤ੍ਤਾ ਪਮਾਣਯੁਤ੍ਤਾ ਨਾਮ, ਅਯਮੇਤ੍ਥਸਙ੍ਖੇਪੋ, વਿਤ੍ਥਾਰੋ ਪਨ ਸਮਨ੍ਤਪਾਸਾਦਿਕਾਯਂ (ਪਾਰਾ॰ ਅਟ੍ਠ॰ ੨.੫੯੮ ਆਦਯੋ) વੁਤ੍ਤੋ, ਤਸ੍ਮਾ ਏવਂ ਪਮਾਣਯੁਤ੍ਤਂ ਸਮਣਸਾਰੁਪ੍ਪੇਨ ਪਕ੍ਕਂ ਅਯੋਪਤ੍ਤਂ વਾ ਮਤ੍ਤਿਕਾਪਤ੍ਤਂ વਾ ਲਭਿਤ੍વਾ ਪੁਰਾਣਪਤ੍ਤਂ ਪਚ੍ਚੁਦ੍ਧਰਿਤ੍વਾ ਅਨ੍ਤੋਦਸਾਹੇ ਅਧਿਟ੍ਠਾਤਬ੍ਬੋ। ਸਚੇ ਪਨਸ੍ਸ ਮੂਲਤੋ ਕਾਕਣਿਕਮਤ੍ਤਮ੍ਪਿ ਦਾਤਬ੍ਬਂ ਅવਸਿਟ੍ਠਂ ਹੋਤਿ, ਅਧਿਟ੍ਠਾਨੁਪਗੋ ਨ ਹੋਤਿ, ਅਪ੍ਪਚ੍ਚੁਦ੍ਧਰਨ੍ਤੇਨ વਿਕਪ੍ਪੇਤਬ੍ਬੋ। ਤਤ੍ਥ ਪਚ੍ਚੁਦ੍ਧਰਣਾਧਿਟ੍ਠਾਨਲਕ੍ਖਣਂ ਚੀવਰવਗ੍ਗੇ વੁਤ੍ਤਨਯੇਨੇવ વੇਦਿਤਬ੍ਬਂ, વਿਕਪ੍ਪਨਲਕ੍ਖਣਂ ਪਰਤੋ વਕ੍ਖਾਮ। ਸਚੇ ਪਨ ਕੋਚਿ ਅਪਤ੍ਤਕੋ ਭਿਕ੍ਖੁ ਦਸ ਪਤ੍ਤੇ ਲਭਿਤ੍વਾ ਸਬ੍ਬੇ ਅਤ੍ਤਨਾવ ਪਰਿਭੁਞ੍ਜਿਤੁਕਾਮੋ ਹੋਤਿ, ਏਕਂ ਪਤ੍ਤਂ ਅਧਿਟ੍ਠਾਯ ਪੁਨ ਦਿવਸੇ ਤਂ ਪਚ੍ਚੁਦ੍ਧਰਿਤ੍વਾ ਅਞ੍ਞੋ ਅਧਿਟ੍ਠਾਤਬ੍ਬੋ, ਏਤੇਨੁਪਾਯੇਨ વਸ੍ਸਸਤਮ੍ਪਿ ਪਰਿਹਰਿਤੁਂ ਸਕ੍ਕਾ। ਯੋ ਪਨਸ੍ਸ ਪਤ੍ਤੋ ਮੁਖવਟ੍ਟਿਤੋ ਹੇਟ੍ਠਾ ਦ੍વਙ੍ਗੁਲਮਤ੍ਤੋਕਾਸਤੋ ਪਟ੍ਠਾਯ ਯਤ੍ਥਕਤ੍ਥਚਿ ਕਙ੍ਗੁਸਿਤ੍ਥਨਿਕ੍ਖਮਨਮਤ੍ਤੇਨ ਛਿਦ੍ਦੇਨ ਛਿਦ੍ਦੋ ਹੋਤਿ, ਸੋ ਅਧਿਟ੍ਠਾਨੁਪਗੋ ਨ ਹੋਤਿ। ਪੁਨ ਛਿਦ੍ਦੇ ਪਾਕਤਿਕੇ ਕਤੇ ਅਧਿਟ੍ਠਾਤਬ੍ਬੋ, ਸੇਸਂ ਅਧਿਟ੍ਠਾਨવਿਜਹਨਂ ਤਿਚੀવਰੇ વੁਤ੍ਤਨਯਮੇવ।
Pattavaggassa paṭhame atirekapattoti anadhiṭṭhito ca avikappito ca, so ca kho ukkaṭṭhamajjhimomakānaṃ aññataro pamāṇayuttova, tassa pamāṇaṃ ‘‘aḍḍhāḷhakodanaṃ gaṇhātī’’tiādinā (pārā 602) nayena pāḷiyaṃ vuttaṃ. Tatrāyaṃ vinicchayo – anupahatapurāṇasālitaṇḍulānaṃ sukoṭṭitaparisuddhānaṃ dve magadhanāḷiyo gahetvā tehi taṇḍulehi anuttaṇḍulamakilinnamapiṇḍikaṃ suvisadaṃ kundamakuḷarāsisadisaṃ avassāvitodanaṃ pacitvā niravasesaṃ patte pakkhipitvā tassa odanassa catutthabhāgappamāṇo nātighano nātitanuko hatthahāriyo sabbasambhārasaṅkhato muggasūpo pakkhipitabbo, tato ālopassa anurūpaṃ yāvacarimālopappahonakaṃ macchamaṃsādibyañjanaṃ pakkhipitabbaṃ, sappitelatakkarasakañjiyādīni pana gaṇanūpagāni na honti. Tāni hi odanagatikāneva, neva hāpetuṃ, na vaḍḍhetuṃ sakkonti, evametaṃ sabbampi pakkhittaṃ sace pattassa mukhavaṭṭiyā heṭṭhimarājisamaṃ tiṭṭhati, suttena vā hīrena vā chindantassa suttassa vā hīrassa vā heṭṭhimantaṃ phusati, ayaṃ ukkaṭṭho nāma patto. Sace taṃ rājiṃ atikkamma thūpīkataṃ tiṭṭhati, ayaṃ ukkaṭṭhomako nāma patto. Sace taṃ rājiṃ na sampāpuṇāti, antogadhameva hoti, ayaṃ ukkaṭṭhukkaṭṭho nāma patto. Ukkaṭṭhato upaḍḍhappamāṇo majjhimo. Majjhimapattato upaḍḍhappamāṇo omako. Tesampi vuttanayeneva bhedo veditabbo. Iccetesu navasu ukkaṭṭhukkaṭṭho ca omakomako cāti dve apattā, sesā satta pattā pamāṇayuttā nāma, ayametthasaṅkhepo, vitthāro pana samantapāsādikāyaṃ (pārā. aṭṭha. 2.598 ādayo) vutto, tasmā evaṃ pamāṇayuttaṃ samaṇasāruppena pakkaṃ ayopattaṃ vā mattikāpattaṃ vā labhitvā purāṇapattaṃ paccuddharitvā antodasāhe adhiṭṭhātabbo. Sace panassa mūlato kākaṇikamattampi dātabbaṃ avasiṭṭhaṃ hoti, adhiṭṭhānupago na hoti, appaccuddharantena vikappetabbo. Tattha paccuddharaṇādhiṭṭhānalakkhaṇaṃ cīvaravagge vuttanayeneva veditabbaṃ, vikappanalakkhaṇaṃ parato vakkhāma. Sace pana koci apattako bhikkhu dasa patte labhitvā sabbe attanāva paribhuñjitukāmo hoti, ekaṃ pattaṃ adhiṭṭhāya puna divase taṃ paccuddharitvā añño adhiṭṭhātabbo, etenupāyena vassasatampi pariharituṃ sakkā. Yo panassa patto mukhavaṭṭito heṭṭhā dvaṅgulamattokāsato paṭṭhāya yatthakatthaci kaṅgusitthanikkhamanamattena chiddena chiddo hoti, so adhiṭṭhānupago na hoti. Puna chidde pākatike kate adhiṭṭhātabbo, sesaṃ adhiṭṭhānavijahanaṃ ticīvare vuttanayameva.
ਸਾવਤ੍ਥਿਯਂ ਛਬ੍ਬਗ੍ਗਿਯੇ ਆਰਬ੍ਭ ਅਤਿਰੇਕਪਤ੍ਤਧਾਰਣવਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਸਾਧਾਰਣਪਞ੍ਞਤ੍ਤਿ, ਸੇਸવਣ੍ਣਨਾਕ੍ਕਮੋ ਚੀવਰવਗ੍ਗਸ੍ਸ ਪਠਮਸਿਕ੍ਖਾਪਦੇ વੁਤ੍ਤਨਯੇਨੇવ વੇਦਿਤਬ੍ਬੋਤਿ।
Sāvatthiyaṃ chabbaggiye ārabbha atirekapattadhāraṇavatthusmiṃ paññattaṃ, asādhāraṇapaññatti, sesavaṇṇanākkamo cīvaravaggassa paṭhamasikkhāpade vuttanayeneva veditabboti.
ਪਤ੍ਤਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Pattasikkhāpadavaṇṇanā niṭṭhitā.
੨. ਊਨਪਞ੍ਚਬਨ੍ਧਨਸਿਕ੍ਖਾਪਦવਣ੍ਣਨਾ
2. Ūnapañcabandhanasikkhāpadavaṇṇanā
ਦੁਤਿਯੇ ਊਨਾਨਿ ਪਞ੍ਚ ਬਨ੍ਧਨਾਨਿ ਅਸ੍ਸਾਤਿ ਊਨਪਞ੍ਚਬਨ੍ਧਨੋ, ਨਾਸ੍ਸ ਪਞ੍ਚ ਬਨ੍ਧਨਾਨਿ ਪੂਰੇਨ੍ਤੀਤਿ ਅਤ੍ਥੋ, ਤੇਨ ਊਨਪਞ੍ਚਬਨ੍ਧਨੇਨ, ਇਤ੍ਥਮ੍ਭੂਤਸ੍ਸ ਲਕ੍ਖਣੇ ਕਰਣવਚਨਂ। ਤਤ੍ਥ ਯਸ੍ਮਾ ਅਬਨ੍ਧਨਸ੍ਸਾਪਿ ਪਞ੍ਚ ਬਨ੍ਧਨਾਨਿ ਨ ਪੂਰੇਨ੍ਤਿ ਸਬ੍ਬਸੋ ਨਤ੍ਥਿਤਾਯ, ਤੇਨਸ੍ਸ ਪਦਭਾਜਨੇ ‘‘ਊਨਪਞ੍ਚਬਨ੍ਧਨੋ ਨਾਮ ਪਤ੍ਤੋ ਅਬਨ੍ਧਨੋ વਾ ਏਕਬਨ੍ਧਨੋ વਾ’’ਤਿਆਦਿ (ਪਾਰਾ॰ ੬੧੩) વੁਤ੍ਤਂ। ‘‘ਊਨਪਞ੍ਚਬਨ੍ਧਨੇਨਾ’’ਤਿ ਚ વੁਤ੍ਤਤ੍ਤਾ ਯਸ੍ਸ ਪਞ੍ਚਬਨ੍ਧਨੋ ਪਤ੍ਤੋ ਹੋਤਿ ਪਞ੍ਚਬਨ੍ਧਨੋਕਾਸੋ વਾ, ਤਸ੍ਸ ਸੋ ਅਪਤ੍ਤੋ, ਤਸ੍ਮਾ ਅਞ੍ਞਂ વਿਞ੍ਞਾਪੇਤੁਂ વਟ੍ਟਤਿ। ਯਸ੍ਮਿਂ ਪਨ ਪਤ੍ਤੇ ਮੁਖવਟ੍ਟਿਤੋ ਹੇਟ੍ਠਾ ਭਟ੍ਠਾ ਦ੍વਙ੍ਗੁਲਪ੍ਪਮਾਣਾ ਏਕਾਪਿ ਰਾਜਿ ਹੋਤਿ, ਤਂ ਤਸ੍ਸਾ ਰਾਜਿਯਾ ਹੇਟ੍ਠਿਮਪਰਿਯਨ੍ਤੇ ਪਤ੍ਤવੇਧਕੇਨ વਿਜ੍ਝਿਤ੍વਾ ਪਚਿਤ੍વਾ ਸੁਤ੍ਤਰਜ੍ਜੁਕਮਕਚਿਰਜ੍ਜੁਕਾਦੀਹਿ વਾ ਤਿਪੁਸੁਤ੍ਤਕੇਨ વਾ ਬਨ੍ਧਿਤ੍વਾ ਤਂ ਬਨ੍ਧਨਂ ਆਮਿਸਸ੍ਸ ਅਲਗ੍ਗਨਤ੍ਥਂ ਤਿਪੁਪਟ੍ਟਕੇਨ વਾ ਕੇਨਚਿ ਬਦ੍ਧਸਿਲੇਸਾਦਿਨਾ વਾ ਪਟਿਚ੍ਛਾਦੇਤਬ੍ਬਂ, ਸੋ ਚ ਪਤ੍ਤੋ ਅਧਿਟ੍ਠਹਿਤ੍વਾ ਪਰਿਭੁਞ੍ਜਿਤਬ੍ਬੋ, ਸੁਖੁਮਂ વਾ ਛਿਦ੍ਦਂ ਕਤ੍વਾ ਬਨ੍ਧਿਤਬ੍ਬੋ, ਫਾਣਿਤਂ ਝਾਪੇਤ੍વਾ ਪਾਸਾਣਚੁਣ੍ਣੇਨ ਬਨ੍ਧਿਤੁਮ੍ਪਿ વਟ੍ਟਤਿ। ਯਸ੍ਸ ਪਨ ਦ੍વੇ ਰਾਜਿਯੋ વਾ ਏਕਾਯੇવ વਾ ਚਤੁਰਙ੍ਗੁਲਾ, ਤਸ੍ਸ ਦ੍વੇ ਬਨ੍ਧਨਾਨਿ ਦਾਤਬ੍ਬਾਨਿ। ਯਸ੍ਸ ਤਿਸ੍ਸੋ વਾ ਏਕਾਯੇવ વਾ ਛਲ਼ਙ੍ਗੁਲਾ, ਤਸ੍ਸ ਤੀਣਿ। ਯਸ੍ਸ ਚਤਸ੍ਸੋ વਾ ਏਕਾਯੇવ વਾ ਅਟ੍ਠਙ੍ਗੁਲਾ, ਤਸ੍ਸ ਚਤ੍ਤਾਰਿ। ਯਸ੍ਸ ਪਞ੍ਚ વਾ ਏਕਾਯੇવ વਾ ਦਸਙ੍ਗੁਲਾ, ਸੋ ਬਦ੍ਧੋਪਿ ਅਬਦ੍ਧੋਪਿ ਅਪਤ੍ਤੋਯੇવ, ਅਞ੍ਞੋ વਿਞ੍ਞਾਪੇਤਬ੍ਬੋ, ਏਸ ਤਾવ ਮਤ੍ਤਿਕਾਪਤ੍ਤੇ વਿਨਿਚ੍ਛਯੋ।
Dutiye ūnāni pañca bandhanāni assāti ūnapañcabandhano, nāssa pañca bandhanāni pūrentīti attho, tena ūnapañcabandhanena, itthambhūtassa lakkhaṇe karaṇavacanaṃ. Tattha yasmā abandhanassāpi pañca bandhanāni na pūrenti sabbaso natthitāya, tenassa padabhājane ‘‘ūnapañcabandhano nāma patto abandhano vā ekabandhano vā’’tiādi (pārā. 613) vuttaṃ. ‘‘Ūnapañcabandhanenā’’ti ca vuttattā yassa pañcabandhano patto hoti pañcabandhanokāso vā, tassa so apatto, tasmā aññaṃ viññāpetuṃ vaṭṭati. Yasmiṃ pana patte mukhavaṭṭito heṭṭhā bhaṭṭhā dvaṅgulappamāṇā ekāpi rāji hoti, taṃ tassā rājiyā heṭṭhimapariyante pattavedhakena vijjhitvā pacitvā suttarajjukamakacirajjukādīhi vā tipusuttakena vā bandhitvā taṃ bandhanaṃ āmisassa alagganatthaṃ tipupaṭṭakena vā kenaci baddhasilesādinā vā paṭicchādetabbaṃ, so ca patto adhiṭṭhahitvā paribhuñjitabbo, sukhumaṃ vā chiddaṃ katvā bandhitabbo, phāṇitaṃ jhāpetvā pāsāṇacuṇṇena bandhitumpi vaṭṭati. Yassa pana dve rājiyo vā ekāyeva vā caturaṅgulā, tassa dve bandhanāni dātabbāni. Yassa tisso vā ekāyeva vā chaḷaṅgulā, tassa tīṇi. Yassa catasso vā ekāyeva vā aṭṭhaṅgulā, tassa cattāri. Yassa pañca vā ekāyeva vā dasaṅgulā, so baddhopi abaddhopi apattoyeva, añño viññāpetabbo, esa tāva mattikāpatte vinicchayo.
ਅਯੋਪਤ੍ਤੇ ਪਨ ਸਚੇਪਿ ਪਞ੍ਚ વਾ ਅਤਿਰੇਕਾਨਿ વਾ ਛਿਦ੍ਦਾਨਿ ਹੋਨ੍ਤਿ, ਤਾਨਿ ਚੇ ਅਯਚੁਣ੍ਣੇਨ વਾ ਆਣਿਯਾ વਾ ਲੋਹਮਣ੍ਡਲੇਨ વਾ ਬਦ੍ਧਾਨਿ ਮਟ੍ਠਾਨਿ ਹੋਨ੍ਤਿ, ਸ੍વੇવ ਪਰਿਭੁਞ੍ਜਿਤਬ੍ਬੋ, ਅਞ੍ਞੋ ਨ વਿਞ੍ਞਾਪੇਤਬ੍ਬੋ। ਅਥ ਪਨ ਏਕਮ੍ਪਿ ਛਿਦ੍ਦਂ ਮਹਨ੍ਤਂ ਹੋਤਿ, ਲੋਹਮਣ੍ਡਲੇਨ ਬਦ੍ਧਮ੍ਪਿ ਮਟ੍ਠਂ ਨ ਹੋਤਿ, ਪਤ੍ਤੇ ਆਮਿਸਂ ਲਗ੍ਗਤਿ, ਅਕਪ੍ਪਿਯੋ ਹੋਤਿ ਅਯਂ ਪਤ੍ਤੋ, ਅਞ੍ਞੋ વਿਞ੍ਞਾਪੇਤਬ੍ਬੋ। ਯੋ ਪਨ ਏવਂ ਪਤ੍ਤਸਙ੍ਖੇਪਗਤੇ વਾ ਅਯੋਪਤ੍ਤੇ, ਊਨਪਞ੍ਚਬਨ੍ਧਨੇ વਾ ਮਤ੍ਤਿਕਾਪਤ੍ਤੇ ਸਤਿ ਅਞ੍ਞਂ વਿਞ੍ਞਾਪੇਤਿ, ਪਯੋਗੇ ਦੁਕ੍ਕਟਂ, ਪਟਿਲਾਭੇਨ ਨਿਸ੍ਸਗ੍ਗਿਯੋ ਹੋਤਿ, ਨਿਸ੍ਸਜ੍ਜਿਤਬ੍ਬੋ। ਨਿਸ੍ਸਜ੍ਜਨ੍ਤੇਨ ਸਙ੍ਘਮਜ੍ਝੇ ਏવ ਨਿਸ੍ਸਜ੍ਜਿਤਬ੍ਬੋ, ਤੇਨ વੁਤ੍ਤਂ ‘‘ਭਿਕ੍ਖੁਪਰਿਸਾਯ ਨਿਸ੍ਸਜ੍ਜਿਤਬ੍ਬੋ’’ਤਿ। ਯੋ ਚ ਤਸ੍ਸਾ ਭਿਕ੍ਖੁਪਰਿਸਾਯਾਤਿਏਤ੍ਥ ਤੇਹਿ ਭਿਕ੍ਖੂਹਿ ਪਕਤਿਯਾ ਏવ ਅਤ੍ਤਨੋ ਅਤ੍ਤਨੋ ਅਧਿਟ੍ਠਿਤਂ ਪਤ੍ਤਂ ਗਹੇਤ੍વਾ ਸਨ੍ਨਿਪਤਿਤਬ੍ਬਂ, ਤਤੋ ਸਮ੍ਮਤੇਨ ਪਤ੍ਤਗ੍ਗਾਹਾਪਕੇਨ ਪਤ੍ਤਸ੍ਸ વਿਜ੍ਜਮਾਨਗੁਣਂ વਤ੍વਾ ‘‘ਭਨ੍ਤੇ, ਇਮਂ ਗਣ੍ਹਥਾ’’ਤਿ ਥੇਰੋ વਤ੍ਤਬ੍ਬੋ। ਸਚੇ ਥੇਰਸ੍ਸ ਸੋ ਪਤ੍ਤੋ ਨ ਰੁਚ੍ਚਤਿ, ਅਪ੍ਪਿਚ੍ਛਤਾਯ વਾ ਨ ਗਣ੍ਹਾਤਿ, વਟ੍ਟਤਿ। ਤਸ੍ਮਿਂ ਪਨ ਅਨੁਕਮ੍ਪਾਯ ਅਗਣ੍ਹਨ੍ਤਸ੍ਸ ਦੁਕ੍ਕਟਂ। ਸਚੇ ਪਨ ਗਣ੍ਹਾਤਿ, ਥੇਰਸ੍ਸ ਪਤ੍ਤਂ ਦੁਤਿਯਤ੍ਥੇਰਂ ਗਾਹਾਪੇਤ੍વਾ ਏਤੇਨੇવ ਉਪਾਯੇਨ ਯਾવ ਸਙ੍ਘਨવਕਾ ਗਾਹਾਪੇਤਬ੍ਬੋ, ਤੇਨ ਪਰਿਚ੍ਚਤ੍ਤਪਤ੍ਤੋ ਪਨ ਪਤ੍ਤਪਰਿਯਨ੍ਤੋ ਨਾਮ, ਸੋ ਤਸ੍ਸ ਭਿਕ੍ਖੁਨੋ ਪਦਾਤਬ੍ਬੋ। ਤੇਨਾਪਿ ਸੋ ਯਥਾ વਿਞ੍ਞਾਪੇਤ੍વਾ ਗਹਿਤਪਤ੍ਤੋ, ਏવਮੇવ ਸਕ੍ਕਚ੍ਚਂ ਪਰਿਭੁਞ੍ਜਿਤਬ੍ਬੋ। ਸਚੇ ਪਨ ਤਂ ਜਿਗੁਚ੍ਛਨ੍ਤੋ ਅਦੇਸੇ વਾ ਨਿਕ੍ਖਿਪਤਿ, ਅਪਰਿਭੋਗੇਨ વਾ ਪਰਿਭੁਞ੍ਜਤਿ, વਿਸ੍ਸਜ੍ਜੇਤਿ વਾ, ਦੁਕ੍ਕਟਂ ਆਪਜ੍ਜਤਿ।
Ayopatte pana sacepi pañca vā atirekāni vā chiddāni honti, tāni ce ayacuṇṇena vā āṇiyā vā lohamaṇḍalena vā baddhāni maṭṭhāni honti, sveva paribhuñjitabbo, añño na viññāpetabbo. Atha pana ekampi chiddaṃ mahantaṃ hoti, lohamaṇḍalena baddhampi maṭṭhaṃ na hoti, patte āmisaṃ laggati, akappiyo hoti ayaṃ patto, añño viññāpetabbo. Yo pana evaṃ pattasaṅkhepagate vā ayopatte, ūnapañcabandhane vā mattikāpatte sati aññaṃ viññāpeti, payoge dukkaṭaṃ, paṭilābhena nissaggiyo hoti, nissajjitabbo. Nissajjantena saṅghamajjhe eva nissajjitabbo, tena vuttaṃ ‘‘bhikkhuparisāya nissajjitabbo’’ti. Yo ca tassā bhikkhuparisāyātiettha tehi bhikkhūhi pakatiyā eva attano attano adhiṭṭhitaṃ pattaṃ gahetvā sannipatitabbaṃ, tato sammatena pattaggāhāpakena pattassa vijjamānaguṇaṃ vatvā ‘‘bhante, imaṃ gaṇhathā’’ti thero vattabbo. Sace therassa so patto na ruccati, appicchatāya vā na gaṇhāti, vaṭṭati. Tasmiṃ pana anukampāya agaṇhantassa dukkaṭaṃ. Sace pana gaṇhāti, therassa pattaṃ dutiyattheraṃ gāhāpetvā eteneva upāyena yāva saṅghanavakā gāhāpetabbo, tena pariccattapatto pana pattapariyanto nāma, so tassa bhikkhuno padātabbo. Tenāpi so yathā viññāpetvā gahitapatto, evameva sakkaccaṃ paribhuñjitabbo. Sace pana taṃ jigucchanto adese vā nikkhipati, aparibhogena vā paribhuñjati, vissajjeti vā, dukkaṭaṃ āpajjati.
ਸਕ੍ਕੇਸੁ ਛਬ੍ਬਗ੍ਗਿਯੇ ਆਰਬ੍ਭ ਬਹੂ ਪਤ੍ਤੇ વਿਞ੍ਞਾਪਨવਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ , ਅਬਨ੍ਧਨੇਨ ਅਬਨ੍ਧਨਂ, ਏਕਬਨ੍ਧਨਂ, ਦੁਬਨ੍ਧਨਂ, ਤਿਬਨ੍ਧਨਂ, ਚਤੁਬ੍ਬਨ੍ਧਨਂ, ਅਬਨ੍ਧਨੋਕਾਸਂ, ਏਕਦ੍વਿਤਿਚਤੁਬ੍ਬਨ੍ਧਨੋਕਾਸਂ ਚੇਤਾਪੇਤਿ, ਏવਂ ਏਕੇਕੇਨ ਪਤ੍ਤੇਨ ਦਸਧਾ ਦਸવਿਧਂ ਪਤ੍ਤਂ। ਚੇਤਾਪਨવਸੇਨ ਪਨ ਏਕਂ ਨਿਸ੍ਸਗ੍ਗਿਯਪਾਚਿਤ੍ਤਿਯਸਤਂ ਹੋਤਿ। ਨਟ੍ਠਪਤ੍ਤਸ੍ਸ, ਭਿਨ੍ਨਪਤ੍ਤਸ੍ਸ, ਅਤ੍ਤਨੋ ਞਾਤਕਪ੍ਪવਾਰਿਤੇ, ਅਞ੍ਞਸ੍ਸ ਚ ਞਾਤਕਪ੍ਪવਾਰਿਤੇ, ਤਸ੍ਸੇવਤ੍ਥਾਯ વਿਞ੍ਞਾਪੇਨ੍ਤਸ੍ਸ, ਅਤ੍ਤਨੋ ਧਨੇਨ ਗਣ੍ਹਤੋ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ। ਅਧਿਟ੍ਠਾਨੁਪਗਪਤ੍ਤਸ੍ਸ ਊਨਪਞ੍ਚਬਨ੍ਧਨਤਾ, ਅਤ੍ਤੁਦ੍ਦੇਸਿਕਤਾ, ਅਕਤવਿਞ੍ਞਤ੍ਤਿ , ਤਾਯ ਚ ਪਟਿਲਾਭੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ। ਸਮੁਟ੍ਠਾਨਾਦੀਨਿ ਧੋવਾਪਨਸਿਕ੍ਖਾਪਦੇ વੁਤ੍ਤਨਯਾਨੇવਾਤਿ।
Sakkesu chabbaggiye ārabbha bahū patte viññāpanavatthusmiṃ paññattaṃ, sādhāraṇapaññatti, anāṇattikaṃ , abandhanena abandhanaṃ, ekabandhanaṃ, dubandhanaṃ, tibandhanaṃ, catubbandhanaṃ, abandhanokāsaṃ, ekadviticatubbandhanokāsaṃ cetāpeti, evaṃ ekekena pattena dasadhā dasavidhaṃ pattaṃ. Cetāpanavasena pana ekaṃ nissaggiyapācittiyasataṃ hoti. Naṭṭhapattassa, bhinnapattassa, attano ñātakappavārite, aññassa ca ñātakappavārite, tassevatthāya viññāpentassa, attano dhanena gaṇhato, ummattakādīnañca anāpatti. Adhiṭṭhānupagapattassa ūnapañcabandhanatā, attuddesikatā, akataviññatti , tāya ca paṭilābhoti imānettha cattāri aṅgāni. Samuṭṭhānādīni dhovāpanasikkhāpade vuttanayānevāti.
ਊਨਪਞ੍ਚਬਨ੍ਧਨਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Ūnapañcabandhanasikkhāpadavaṇṇanā niṭṭhitā.
੩. ਭੇਸਜ੍ਜਸਿਕ੍ਖਾਪਦવਣ੍ਣਨਾ
3. Bhesajjasikkhāpadavaṇṇanā
ਤਤਿਯੇ ਪਟਿਸਾਯਨੀਯਾਨੀਤਿ ਪਟਿਸਾਯਿਤਬ੍ਬਾਨਿ, ਪਰਿਭੁਞ੍ਜਿਤਬ੍ਬਾਨੀਤਿ ਅਤ੍ਥੋ। ਏਤੇਨ ਸਯਂ ਉਗ੍ਗਹੇਤ੍વਾ ਨਿਕ੍ਖਿਤ੍ਤਾਨਂ ਸਤ੍ਤਾਹਾਤਿਕ੍ਕਮੇਪਿ ਅਨਾਪਤ੍ਤਿਂ ਦਸ੍ਸੇਤਿ, ਤਾਨਿ ਹਿ ਪਟਿਸਾਯਿਤੁਂ ਨ વਟ੍ਟਨ੍ਤਿ। ਭੇਸਜ੍ਜਾਨੀਤਿ ਭੇਸਜ੍ਜਕਿਚ੍ਚਂ ਕਰੋਨ੍ਤੁ વਾ, ਮਾ વਾ, ਏવਂ ਲਦ੍ਧવੋਹਾਰਾਨਿ। ਸਪ੍ਪਿ ਨਾਮ ਗવਾਦੀਨਂ ਸਪ੍ਪਿ, ਯੇਸਂ ਮਂਸਂ ਕਪ੍ਪਤਿ, ਤੇਸਂ ਸਪ੍ਪਿ। ਤਥਾ ਨવਨੀਤਂ। ਤੇਲਂ ਨਾਮ ਤਿਲਸਾਸਪਮਧੂਕਏਰਣ੍ਡਕવਸਾਦੀਹਿ ਨਿਬ੍ਬਤ੍ਤਿਤਂ। ਮਧੁ ਨਾਮ ਮਕ੍ਖਿਕਾਮਧੁਮੇવ। ਫਾਣਿਤਂ ਨਾਮ ਉਚ੍ਛੁਰਸਂ ਉਪਾਦਾਯ ਪਨ ਅਪਕ੍ਕਾ વਾ ਅવਤ੍ਥੁਕਪਕ੍ਕਾ વਾ ਸਬ੍ਬਾਪਿ ਉਚ੍ਛੁવਿਕਤਿ ‘‘ਫਾਣਿਤ’’ਨ੍ਤਿ વੇਦਿਤਬ੍ਬਂ। ਤਾਨਿ ਪਟਿਗ੍ਗਹੇਤ੍વਾਤਿ ਤਾਨਿ ਭੇਸਜ੍ਜਾਨਿ ਪਟਿਗ੍ਗਹੇਤ੍વਾ, ਨ ਤੇਸਂ વਤ੍ਥੂਨਿ। ਏਤੇਨ ਠਪੇਤ੍વਾ વਸਾਤੇਲਂ ਯਾਨੇਤ੍ਥ ਯਾવਕਾਲਿਕવਤ੍ਥੁਕਾਨਿ, ਤੇਸਂ વਤ੍ਥੂਨਿ ਪਟਿਗ੍ਗਹੇਤ੍વਾ ਕਤਾਨਿ ਸਪ੍ਪਿਆਦੀਨਿ ਸਤ੍ਤਾਹਂ ਅਤਿਕ੍ਕਾਮਯਤੋਪਿ ਅਨਾਪਤ੍ਤਿਂ ਦਸ੍ਸੇਤਿ। વਸਾਤੇਲਂ ਪਨ ਕਾਲੇ ਪਟਿਗ੍ਗਹਿਤਂ ਕਾਲੇ ਨਿਪਕ੍ਕਂ ਕਾਲੇ ਸਂਸਟ੍ਠਂ ਤੇਲਪਰਿਭੋਗੇਨ ਪਰਿਭੁਞ੍ਜਿਤੁਂ ਅਨੁਞ੍ਞਾਤਂ, ਤਸ੍ਮਾ ਠਪੇਤ੍વਾ ਮਨੁਸ੍ਸવਸਂ ਅਞ੍ਞਂ ਯਂਕਞ੍ਚਿ વਸਂ ਪੁਰੇਭਤ੍ਤਂ ਪਟਿਗ੍ਗਹੇਤ੍વਾ ਸਾਮਂ ਪਚਿਤ੍વਾ ਨਿਬ੍ਬਤ੍ਤਿਤਤੇਲਮ੍ਪਿ ਸਤ੍ਤਾਹਂ ਨਿਰਾਮਿਸਪਰਿਭੋਗੇਨ વਟ੍ਟਤਿ। ਅਨੁਪਸਮ੍ਪਨ੍ਨੇਨ ਪਚਿਤ੍વਾ ਦਿਨ੍ਨਂ ਪਨ ਤਦਹੁਪੁਰੇਭਤ੍ਤਂ ਸਾਮਿਸਮ੍ਪਿ વਟ੍ਟਤਿ, ਅਞ੍ਞੇਸਂ ਯਾવਕਾਲਿਕવਤ੍ਥੂਨਂ વਤ੍ਥੁਂ ਪਚਿਤੁਂ ਨ વਟ੍ਟਤਿਯੇવ। ਨਿਬ੍ਬਤ੍ਤਿਤਸਪ੍ਪਿ વਾ ਨવਨੀਤਂ વਾ ਪਚਿਤੁਂ વਟ੍ਟਤਿ, ਤਂ ਪਨ ਤਦਹੁਪੁਰੇਭਤ੍ਤਮ੍ਪਿ ਸਾਮਿਸਂ ਪਰਿਭੁਞ੍ਜਿਤੁਂ ਨ વਟ੍ਟਤਿ। ਪੁਰੇਭਤ੍ਤਂ ਪਟਿਗ੍ਗਹਿਤਖੀਰਾਦਿਤੋ ਅਨੁਪਸਮ੍ਪਨ੍ਨੇਨ ਪਚਿਤ੍વਾ ਕਤਸਪ੍ਪਿਆਦੀਨਿ ਪਨ ਤਦਹੁਪੁਰੇਭਤ੍ਤਂ ਸਾਮਿਸਾਨਿਪਿ વਟ੍ਟਨ੍ਤਿ, ਪਚ੍ਛਾਭਤ੍ਤਤੋ ਪਟ੍ਠਾਯ ਅਨਜ੍ਝੋਹਰਣੀਯਾਨਿ, ਸਤ੍ਤਾਹਾਤਿਕ੍ਕਮੇਪਿ ਅਨਾਪਤ੍ਤਿ। ਸਨ੍ਨਿਧਿਕਾਰਕਂ ਪਰਿਭੁਞ੍ਜਿਤਬ੍ਬਾਨੀਤਿ ਸਨ੍ਨਿਧਿਂ ਕਤ੍વਾ ਨਿਦਹਿਤ੍વਾ ਪੁਰੇਭਤ੍ਤਂ ਪਟਿਗ੍ਗਹਿਤਾਨਿ ਤਦਹੁਪੁਰੇਭਤ੍ਤਂ ਸਾਮਿਸਪਰਿਭੋਗੇਨਾਪਿ વਟ੍ਟਨ੍ਤਿ, ਪਚ੍ਛਾਭਤ੍ਤਤੋ ਪਟ੍ਠਾਯ ਪਨ ਤਾਨਿ ਚ, ਪਚ੍ਛਾਭਤ੍ਤਂ ਪਟਿਗ੍ਗਹਿਤਾਨਿ ਚ ਸਤ੍ਤਾਹਂ ਨਿਰਾਮਿਸਪਰਿਭੋਗੇਨ ਪਰਿਭੁਞ੍ਜਿਤਬ੍ਬਾਨੀਤਿ ਅਤ੍ਥੋ। ‘‘ਪਰਿਭੁਞ੍ਜਿਤਬ੍ਬਾਨੀ’’ਤਿ ਚ વਚਨਤੋ ਅਨ੍ਤੋਸਤ੍ਤਾਹੇ ਅਬ੍ਭਞ੍ਜਨਾਦੀਨਂ ਅਤ੍ਥਾਯ ਅਧਿਟ੍ਠਹਿਤ੍વਾ ਠਪਿਤੇਸੁ ਅਨਾਪਤ੍ਤਿ, ਯਾવਜੀવਿਕਾਨਿ ਸਾਸਪਮਧੂਕਏਰਣ੍ਡਕਅਟ੍ਠੀਨਿ ਤੇਲਕਰਣਤ੍ਥਂ ਪਟਿਗ੍ਗਹੇਤ੍વਾ ਤਦਹੇવ ਕਤਤੇਲਂ ਸਤ੍ਤਾਹਕਾਲਿਕਂ, ਦੁਤਿਯਦਿવਸੇ ਕਤਂ ਛਾਹਂ વਟ੍ਟਤਿ, ਤਤਿਯਦਿવਸੇ ਕਤਂ ਪਞ੍ਚਾਹਂ, ਚਤੁਤ੍ਥਪਞ੍ਚਮਛਟ੍ਠਸਤ੍ਤਮਦਿવਸੇ ਕਤਂ ਤਦਹੇવ વਟ੍ਟਤਿ। ਸਚੇ ਯਾવ ਅਰੁਣਸ੍ਸ ਉਗ੍ਗਮਨਾ ਤਿਟ੍ਠਤਿ, ਨਿਸ੍ਸਗ੍ਗਿਯਂ ਹੋਤਿ, ਅਟ੍ਠਮਦਿવਸੇ ਕਤਂ ਅਨਜ੍ਝੋਹਰਣੀਯਂ, ਅਨਿਸ੍ਸਗ੍ਗਿਯਤ੍ਤਾ ਪਨ ਬਾਹਿਰਪਰਿਭੋਗੇਨ વਟ੍ਟਤਿ। ਸਚੇਪਿ ਨ ਕਰੋਤਿ, ਤੇਲਤ੍ਥਾਯ ਪਟਿਗ੍ਗਹਿਤਸਾਸਪਾਦੀਨਂ ਪਨ ਪਾਲ਼ਿਯਂ ਅਨਾਗਤਸਪ੍ਪਿਆਦੀਨਞ੍ਚ ਸਤ੍ਤਾਹਾਤਿਕ੍ਕਮੇ ਦੁਕ੍ਕਟਂ ਆਪਜ੍ਜਤਿ। ਸੀਤੁਦਕੇਨ ਕਤਮਧੂਕਪੁਪ੍ਫਫਾਣਿਤਂ ਪਨ ਫਾਣਿਤਗਤਿਕਮੇવ, ਅਮ੍ਬਫਾਣਿਤਾਦੀਨਿ ਯਾવਕਾਲਿਕਾਨਿ। ਯਂ ਪਨੇਤ੍ਥ ਸਤ੍ਤਾਹਕਾਲਿਕਂ, ਤਂ ਨਿਸ੍ਸਟ੍ਠਂ ਪਟਿਲਭਿਤ੍વਾਪਿ ਅਰੁਆਦੀਨਿ વਾ ਮਕ੍ਖੇਤੁਂ, ਅਜ੍ਝੋਹਰਿਤੁਂ વਾ ਨ વਟ੍ਟਤਿ। ਪਦੀਪੇ ਕਾਲ਼વਣ੍ਣੇ વਾ ਉਪਨੇਤਬ੍ਬਂ, ਅਞ੍ਞਸ੍ਸ ਭਿਕ੍ਖੁਨੋ ਕਾਯਿਕਪਰਿਭੋਗਂ વਟ੍ਟਤਿ। ਯਂ ਪਨ ਨਿਰਪੇਕ੍ਖੋ ਪਰਿਚ੍ਚਜਿਤ੍વਾ ਪੁਨ ਲਭਤਿ, ਤਂ ਅਜ੍ਝੋਹਰਿਤੁਮ੍ਪਿ વਟ੍ਟਤਿ। વਿਸੁਂ ਠਪਿਤਸਪ੍ਪਿਆਦੀਸੁ, ਏਕਭਾਜਨੇ વਾ ਅਮਿਸ੍ਸਿਤੇਸੁ વਤ੍ਥੁਗਣਨਾਯ ਆਪਤ੍ਤਿਯੋ।
Tatiye paṭisāyanīyānīti paṭisāyitabbāni, paribhuñjitabbānīti attho. Etena sayaṃ uggahetvā nikkhittānaṃ sattāhātikkamepi anāpattiṃ dasseti, tāni hi paṭisāyituṃ na vaṭṭanti. Bhesajjānīti bhesajjakiccaṃ karontu vā, mā vā, evaṃ laddhavohārāni. Sappi nāma gavādīnaṃ sappi, yesaṃ maṃsaṃ kappati, tesaṃ sappi. Tathā navanītaṃ. Telaṃ nāma tilasāsapamadhūkaeraṇḍakavasādīhi nibbattitaṃ. Madhu nāma makkhikāmadhumeva. Phāṇitaṃ nāma ucchurasaṃ upādāya pana apakkā vā avatthukapakkā vā sabbāpi ucchuvikati ‘‘phāṇita’’nti veditabbaṃ. Tāni paṭiggahetvāti tāni bhesajjāni paṭiggahetvā, na tesaṃ vatthūni. Etena ṭhapetvā vasātelaṃ yānettha yāvakālikavatthukāni, tesaṃ vatthūni paṭiggahetvā katāni sappiādīni sattāhaṃ atikkāmayatopi anāpattiṃ dasseti. Vasātelaṃ pana kāle paṭiggahitaṃ kāle nipakkaṃ kāle saṃsaṭṭhaṃ telaparibhogena paribhuñjituṃ anuññātaṃ, tasmā ṭhapetvā manussavasaṃ aññaṃ yaṃkañci vasaṃ purebhattaṃ paṭiggahetvā sāmaṃ pacitvā nibbattitatelampi sattāhaṃ nirāmisaparibhogena vaṭṭati. Anupasampannena pacitvā dinnaṃ pana tadahupurebhattaṃ sāmisampi vaṭṭati, aññesaṃ yāvakālikavatthūnaṃ vatthuṃ pacituṃ na vaṭṭatiyeva. Nibbattitasappi vā navanītaṃ vā pacituṃ vaṭṭati, taṃ pana tadahupurebhattampi sāmisaṃ paribhuñjituṃ na vaṭṭati. Purebhattaṃ paṭiggahitakhīrādito anupasampannena pacitvā katasappiādīni pana tadahupurebhattaṃ sāmisānipi vaṭṭanti, pacchābhattato paṭṭhāya anajjhoharaṇīyāni, sattāhātikkamepi anāpatti. Sannidhikārakaṃ paribhuñjitabbānīti sannidhiṃ katvā nidahitvā purebhattaṃ paṭiggahitāni tadahupurebhattaṃ sāmisaparibhogenāpi vaṭṭanti, pacchābhattato paṭṭhāya pana tāni ca, pacchābhattaṃ paṭiggahitāni ca sattāhaṃ nirāmisaparibhogena paribhuñjitabbānīti attho. ‘‘Paribhuñjitabbānī’’ti ca vacanato antosattāhe abbhañjanādīnaṃ atthāya adhiṭṭhahitvā ṭhapitesu anāpatti, yāvajīvikāni sāsapamadhūkaeraṇḍakaaṭṭhīni telakaraṇatthaṃ paṭiggahetvā tadaheva katatelaṃ sattāhakālikaṃ, dutiyadivase kataṃ chāhaṃ vaṭṭati, tatiyadivase kataṃ pañcāhaṃ, catutthapañcamachaṭṭhasattamadivase kataṃ tadaheva vaṭṭati. Sace yāva aruṇassa uggamanā tiṭṭhati, nissaggiyaṃ hoti, aṭṭhamadivase kataṃ anajjhoharaṇīyaṃ, anissaggiyattā pana bāhiraparibhogena vaṭṭati. Sacepi na karoti, telatthāya paṭiggahitasāsapādīnaṃ pana pāḷiyaṃ anāgatasappiādīnañca sattāhātikkame dukkaṭaṃ āpajjati. Sītudakena katamadhūkapupphaphāṇitaṃ pana phāṇitagatikameva, ambaphāṇitādīni yāvakālikāni. Yaṃ panettha sattāhakālikaṃ, taṃ nissaṭṭhaṃ paṭilabhitvāpi aruādīni vā makkhetuṃ, ajjhoharituṃ vā na vaṭṭati. Padīpe kāḷavaṇṇe vā upanetabbaṃ, aññassa bhikkhuno kāyikaparibhogaṃ vaṭṭati. Yaṃ pana nirapekkho pariccajitvā puna labhati, taṃ ajjhoharitumpi vaṭṭati. Visuṃ ṭhapitasappiādīsu, ekabhājane vā amissitesu vatthugaṇanāya āpattiyo.
ਸਾવਤ੍ਥਿਯਂ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਸਤ੍ਤਾਹਂ ਅਤਿਕ੍ਕਮਨવਤ੍ਥੁਸ੍ਮਿਂ ਪਞ੍ਞਤ੍ਤਂ, ਸੇਸਂ ਚੀવਰવਗ੍ਗਸ੍ਸ ਪਠਮਸਿਕ੍ਖਾਪਦੇ વੁਤ੍ਤਨਯੇਨੇવ વੇਦਿਤਬ੍ਬਨ੍ਤਿ।
Sāvatthiyaṃ sambahule bhikkhū ārabbha sattāhaṃ atikkamanavatthusmiṃ paññattaṃ, sesaṃ cīvaravaggassa paṭhamasikkhāpade vuttanayeneva veditabbanti.
ਭੇਸਜ੍ਜਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Bhesajjasikkhāpadavaṇṇanā niṭṭhitā.
੪. વਸ੍ਸਿਕਸਾਟਿਕਸਿਕ੍ਖਾਪਦવਣ੍ਣਨਾ
4. Vassikasāṭikasikkhāpadavaṇṇanā
ਚਤੁਤ੍ਥੇ ਮਾਸੋ ਸੇਸੋ ਗਿਮ੍ਹਾਨਨ੍ਤਿ ਚਤੁਨ੍ਨਂ ਗਿਮ੍ਹਮਾਸਾਨਂ ਏਕੋ ਪਚ੍ਛਿਮਮਾਸੋ ਸੇਸੋ। ਪਰਿਯੇਸਿਤਬ੍ਬਨ੍ਤਿ ਗਿਮ੍ਹਾਨਂ ਪਚ੍ਛਿਮਮਾਸਸ੍ਸ ਪਠਮਦਿવਸਤੋ ਪਟ੍ਠਾਯ ਯਾવ ਕਤ੍ਤਿਕਮਾਸਸ੍ਸ ਪਚ੍ਛਿਮਦਿવਸੋ, ਤਾવ ‘‘ਕਾਲੋ વਸ੍ਸਿਕਸਾਟਿਕਾਯਾ’’ਤਿਆਦਿਨਾ ਸਤੁਪ੍ਪਾਦਕਰਣੇਨ, ਸਙ੍ਘਸ੍ਸ ਪવਾਰਿਤਟ੍ਠਾਨਤੋ, ਅਤ੍ਤਨੋ ਞਾਤਕਪ੍ਪવਾਰਿਤਟ੍ਠਾਨਤੋ ਪਨ ‘‘ਦੇਥ ਮੇ વਸ੍ਸਿਕਸਾਟਿਕਚੀવਰ’’ਨ੍ਤਿਆਦਿਕਾਯ વਿਞ੍ਞਤ੍ਤਿਯਾਪਿ ਪਰਿਯੇਸਿਤਬ੍ਬਂ। ਅਞ੍ਞਾਤਕਅਪ੍ਪવਾਰਿਤਟ੍ਠਾਨੇ ਸਤੁਪ੍ਪਾਦਂ ਕਰੋਨ੍ਤਸ੍ਸ વਤ੍ਤਭੇਦੇ ਦੁਕ੍ਕਟਂ, ਯਥਾ વਾ ਤਥਾ વਾ ‘‘ਦੇਥ ਮੇ’’ਤਿਆਦਿવਚਨੇਨ વਿਞ੍ਞਾਪੇਨ੍ਤਸ੍ਸ ਅਞ੍ਞਾਤਕવਿਞ੍ਞਤ੍ਤਿਸਿਕ੍ਖਾਪਦੇਨ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ। ਕਤ੍વਾ ਨਿવਾਸੇਤਬ੍ਬਨ੍ਤਿ ਗਿਮ੍ਹਾਨਂ ਪਚ੍ਛਿਮਦ੍ਧਮਾਸਸ੍ਸ ਪਠਮਦਿવਸਤੋ ਪਟ੍ਠਾਯ ਯਾવ ਕਤ੍ਤਿਕਮਾਸਸ੍ਸ ਪਚ੍ਛਿਮਦਿવਸੋ, ਤਾવ ਸੂਚਿਕਮ੍ਮਨਿਟ੍ਠਾਨੇਨ ਸਕਿਮ੍ਪਿ વਣ੍ਣਭੇਦਮਤ੍ਤਰਜਨੇਨ ਕਪ੍ਪਬਿਨ੍ਦੁਕਰਣੇਨ ਚ ਕਤ੍વਾ ਪਰਿਦਹਿਤਬ੍ਬਾ। ਏਤ੍ਤਾવਤਾ ਗਿਮ੍ਹਾਨਂ ਪਚ੍ਛਿਮੋ ਮਾਸੋ ਪਰਿਯੇਸਨਕ੍ਖੇਤ੍ਤਂ , ਪਚ੍ਛਿਮੋ ਅਦ੍ਧਮਾਸੋ ਕਰਣਨਿવਾਸਨਕ੍ਖੇਤ੍ਤਮ੍ਪਿ, વਸ੍ਸਾਨਸ੍ਸ ਚਤੂਸੁ ਮਾਸੇਸੁ ਸਬ੍ਬਮ੍ਪਿ ਤਂ વਟ੍ਟਤੀਤਿ ਅਯਮਤ੍ਥੋ ਦਸ੍ਸਿਤੋ ਹੋਤਿ। ਯੋ ਚਾਯਂ ਗਿਮ੍ਹਾਨਂ ਪਚ੍ਛਿਮੋ ਮਾਸੋ ਅਨੁਞ੍ਞਾਤੋ, ਏਤ੍ਥ ਕਤਪਰਿਯੇਸਿਤਮ੍ਪਿ વਸ੍ਸਿਕਸਾਟਿਕਂ ਅਧਿਟ੍ਠਾਤੁਂ ਨ વਟ੍ਟਤਿ। ਸਚੇ ਤਸ੍ਮਿਂ ਮਾਸੇ ਅਤਿਕ੍ਕਨ੍ਤੇ વਸ੍ਸਂ ਉਕ੍ਕਡ੍ਢਿਯਤਿ, ਪੁਨ ਮਾਸਪਰਿਹਾਰਂ ਲਭਤਿ, ਧੋવਿਤ੍વਾ ਪਨ ਨਿਕ੍ਖਿਪਿਤ੍વਾ વਸ੍ਸੂਪਨਾਯਿਕਦਿવਸੇ ਅਧਿਟ੍ਠਾਤਬ੍ਬਾ। ਸਚੇ ਸਤਿਸਮ੍ਮੋਸੇਨ વਾ ਅਪ੍ਪਹੋਨਕਭਾવੇਨ વਾ ਅਕਤਾ ਹੋਤਿ। ਤੇ ਚ ਦ੍વੇ ਮਾਸੇ વਸ੍ਸਾਨਸ੍ਸ ਚਤੁਮਾਸਨ੍ਤਿ ਛ ਮਾਸੇ ਪਰਿਹਾਰਂ ਲਭਤਿ। ਸਚੇ ਪਨ ਕਤ੍ਤਿਕਮਾਸੇ ਕਥਿਨਂ ਅਤ੍ਥਰਿਯਤਿ, ਅਪਰੇਪਿ ਚਤ੍ਤਾਰੋ ਮਾਸੇ ਲਭਤਿ, ਏવਂ ਦਸ ਮਾਸਾ ਹੋਨ੍ਤਿ। ਤਤੋ ਪਰਮ੍ਪਿ ਸਤਿਯਾ ਪਚ੍ਚਾਸਾਯ ਤਂ ਮੂਲਚੀવਰਂ ਕਤ੍વਾ ਠਪੇਨ੍ਤਸ੍ਸ ਏਕਮਾਸਨ੍ਤਿ ਏવਂ ਏਕਾਦਸ ਮਾਸੇ ਪਰਿਹਾਰਂ ਲਭਤਿ, ਇਤੋ ਪਰਂ ਏਕਾਹਮ੍ਪਿ ਨ ਲਭਤਿ।
Catutthe māso seso gimhānanti catunnaṃ gimhamāsānaṃ eko pacchimamāso seso. Pariyesitabbanti gimhānaṃ pacchimamāsassa paṭhamadivasato paṭṭhāya yāva kattikamāsassa pacchimadivaso, tāva ‘‘kālo vassikasāṭikāyā’’tiādinā satuppādakaraṇena, saṅghassa pavāritaṭṭhānato, attano ñātakappavāritaṭṭhānato pana ‘‘detha me vassikasāṭikacīvara’’ntiādikāya viññattiyāpi pariyesitabbaṃ. Aññātakaappavāritaṭṭhāne satuppādaṃ karontassa vattabhede dukkaṭaṃ, yathā vā tathā vā ‘‘detha me’’tiādivacanena viññāpentassa aññātakaviññattisikkhāpadena nissaggiyaṃ pācittiyaṃ. Katvā nivāsetabbanti gimhānaṃ pacchimaddhamāsassa paṭhamadivasato paṭṭhāya yāva kattikamāsassa pacchimadivaso, tāva sūcikammaniṭṭhānena sakimpi vaṇṇabhedamattarajanena kappabindukaraṇena ca katvā paridahitabbā. Ettāvatā gimhānaṃ pacchimo māso pariyesanakkhettaṃ , pacchimo addhamāso karaṇanivāsanakkhettampi, vassānassa catūsu māsesu sabbampi taṃ vaṭṭatīti ayamattho dassito hoti. Yo cāyaṃ gimhānaṃ pacchimo māso anuññāto, ettha katapariyesitampi vassikasāṭikaṃ adhiṭṭhātuṃ na vaṭṭati. Sace tasmiṃ māse atikkante vassaṃ ukkaḍḍhiyati, puna māsaparihāraṃ labhati, dhovitvā pana nikkhipitvā vassūpanāyikadivase adhiṭṭhātabbā. Sace satisammosena vā appahonakabhāvena vā akatā hoti. Te ca dve māse vassānassa catumāsanti cha māse parihāraṃ labhati. Sace pana kattikamāse kathinaṃ atthariyati, aparepi cattāro māse labhati, evaṃ dasa māsā honti. Tato parampi satiyā paccāsāya taṃ mūlacīvaraṃ katvā ṭhapentassa ekamāsanti evaṃ ekādasa māse parihāraṃ labhati, ito paraṃ ekāhampi na labhati.
ਓਰੇਨ ਚੇ ਮਾਸੋ ਸੇਸੋ ਗਿਮ੍ਹਾਨਨ੍ਤਿ ਗਿਮ੍ਹਾਨਂ ਪਚ੍ਛਿਮਮਾਸਸ੍ਸ ਓਰਿਮਭਾਗੇ ਯਾવ ਹੇਮਨ੍ਤਸ੍ਸ ਪਠਮਦਿવਸੋ, ਤਾવਾਤਿ ਅਤ੍ਥੋ। ਪਰਿਯੇਸੇਯ੍ਯਾਤਿ ਏਤੇਸੁ ਸਤ੍ਤਸੁ ਪਿਟ੍ਠਿਸਮਯਮਾਸੇਸੁ ਅਞ੍ਞਾਤਕਅਪ੍ਪવਾਰਿਤਟ੍ਠਾਨਤੋ ਸਤੁਪ੍ਪਾਦਕਰਣੇਨ ਪਰਿਯੇਸਨ੍ਤਸ੍ਸ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ, વਿਞ੍ਞਾਪੇਨ੍ਤਸ੍ਸ ਅਞ੍ਞਾਤਕવਿਞ੍ਞਤ੍ਤਿਸਿਕ੍ਖਾਪਦੇਨ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ, ਞਾਤਕਪ੍ਪવਾਰਿਤੇ વਿਞ੍ਞਾਪੇਨ੍ਤਸ੍ਸ ਤੇਨ ਸਿਕ੍ਖਾਪਦੇਨ ਅਨਾਪਤ੍ਤਿ, ਸਤੁਪ੍ਪਾਦਂ ਕਰੋਨ੍ਤਸ੍ਸ ਇਮਿਨਾ ਸਿਕ੍ਖਾਪਦੇਨ ਆਪਤ੍ਤਿ। ਓਰੇਨਦ੍ਧਮਾਸੋ ਸੇਸੋ ਗਿਮ੍ਹਾਨਨ੍ਤਿ ਗਿਮ੍ਹਾਨਸ੍ਸ ਪਚ੍ਛਿਮਦ੍ਧਮਾਸਤੋ ਓਰਿਮਭਾਗੇ ਏਕਸ੍ਮਿਂ ਅਦ੍ਧਮਾਸੇ। ਕਤ੍વਾ ਨਿવਾਸੇਯ੍ਯਾਤਿ ਏਤ੍ਥਨ੍ਤਰੇ ਧਮ੍ਮੇਨ ਉਪ੍ਪਨ੍ਨਮ੍ਪਿ ਕਤ੍વਾ ਨਿવਾਸੇਨ੍ਤਸ੍ਸ ਨਿਸ੍ਸਗ੍ਗਿਯਂ ਹੋਤਿ।
Orena ce māsoseso gimhānanti gimhānaṃ pacchimamāsassa orimabhāge yāva hemantassa paṭhamadivaso, tāvāti attho. Pariyeseyyāti etesu sattasu piṭṭhisamayamāsesu aññātakaappavāritaṭṭhānato satuppādakaraṇena pariyesantassa nissaggiyaṃ pācittiyaṃ, viññāpentassa aññātakaviññattisikkhāpadena nissaggiyaṃ pācittiyaṃ, ñātakappavārite viññāpentassa tena sikkhāpadena anāpatti, satuppādaṃ karontassa iminā sikkhāpadena āpatti. Orenaddhamāso seso gimhānanti gimhānassa pacchimaddhamāsato orimabhāge ekasmiṃ addhamāse. Katvā nivāseyyāti etthantare dhammena uppannampi katvā nivāsentassa nissaggiyaṃ hoti.
ਸਾવਤ੍ਥਿਯਂ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ વਸ੍ਸਿਕਸਾਟਿਕਪਰਿਯੇਸਨવਤ੍ਥੁਸ੍ਮਿਂ ਪਞ੍ਞਤ੍ਤਂ, ਅਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਊਨਕਮਾਸਦ੍ਧਮਾਸੇਸੁ ਅਤਿਰੇਕਸਞ੍ਞਿਨੋ વੇਮਤਿਕਸ੍ਸ વਾ ਦੁਕ੍ਕਟਂ, ਤਥਾ ਸਤਿਯਾ વਸ੍ਸਿਕਸਾਟਿਕਾਯ ਨਗ੍ਗਸ੍ਸ ਕਾਯਂ ਓવਸ੍ਸਾਪਯਤੋ। ਪੋਕ੍ਖਰਣਿਯਾਦੀਸੁ ਪਨ ਨ੍ਹਾਯਨ੍ਤਸ੍ਸ વਾ ਅਚ੍ਛਿਨ੍ਨਚੀવਰਸ੍ਸ વਾ ਨਟ੍ਠਚੀવਰਸ੍ਸ વਾ ‘‘ਅਨਿવਤ੍ਥਂ ਚੋਰਾ ਹਰਨ੍ਤੀ’’ਤਿ ਏવਂ ਆਪਦਾਸੁ વਾ ਨਿવਾਸਯਤੋ ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ। ਏਤ੍ਥ ਚ વਸ੍ਸਿਕਸਾਟਿਕਾਯ ਅਤ੍ਤੁਦ੍ਦੇਸਿਕਤਾ, ਅਸਮਯੇ ਪਰਿਯੇਸਨਤਾ, ਤਾਯ ਚ ਪਟਿਲਾਭੋਤਿ ਇਮਾਨਿ ਤਾવ ਪਰਿਯੇਸਨਾਪਤ੍ਤਿਯਾ ਤੀਣਿ ਅਙ੍ਗਾਨਿ । ਸਚੀવਰਤਾ, ਆਪਦਾਭਾવੋ, વਸ੍ਸਿਕਸਾਟਿਕਾਯ ਸਕਭਾવੋ, ਅਸਮਯੇ ਨਿવਾਸਨਨ੍ਤਿ ਇਮਾਨਿ ਨਿવਾਸਨਾਪਤ੍ਤਿਯਾ ਚਤ੍ਤਾਰਿ ਅਙ੍ਗਾਨਿ। ਸਮੁਟ੍ਠਾਨਾਦੀਨਿ ਧੋવਾਪਨਸਿਕ੍ਖਾਪਦੇ વੁਤ੍ਤਨਯਾਨੇવਾਤਿ।
Sāvatthiyaṃ chabbaggiye bhikkhū ārabbha vassikasāṭikapariyesanavatthusmiṃ paññattaṃ, asādhāraṇapaññatti, anāṇattikaṃ, tikapācittiyaṃ, ūnakamāsaddhamāsesu atirekasaññino vematikassa vā dukkaṭaṃ, tathā satiyā vassikasāṭikāya naggassa kāyaṃ ovassāpayato. Pokkharaṇiyādīsu pana nhāyantassa vā acchinnacīvarassa vā naṭṭhacīvarassa vā ‘‘anivatthaṃ corā harantī’’ti evaṃ āpadāsu vā nivāsayato ummattakādīnañca anāpatti. Ettha ca vassikasāṭikāya attuddesikatā, asamaye pariyesanatā, tāya ca paṭilābhoti imāni tāva pariyesanāpattiyā tīṇi aṅgāni . Sacīvaratā, āpadābhāvo, vassikasāṭikāya sakabhāvo, asamaye nivāsananti imāni nivāsanāpattiyā cattāri aṅgāni. Samuṭṭhānādīni dhovāpanasikkhāpade vuttanayānevāti.
વਸ੍ਸਿਕਸਾਟਿਕਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Vassikasāṭikasikkhāpadavaṇṇanā niṭṭhitā.
੫. ਚੀવਰਅਚ੍ਛਿਨ੍ਦਨਸਿਕ੍ਖਾਪਦવਣ੍ਣਨਾ
5. Cīvaraacchindanasikkhāpadavaṇṇanā
ਪਞ੍ਚਮੇ ਸਾਮਂ ਚੀવਰਂ ਦਤ੍વਾਤਿ વੇਯ੍ਯਾવਚ੍ਚਾਦੀਨਿ ਪਚ੍ਚਾਸਿਸਮਾਨੋ ਸਯਮੇવ ਦਤ੍વਾ। ਅਚ੍ਛਿਨ੍ਦੇਯ੍ਯਾਤਿ વੇਯ੍ਯਾવਚ੍ਚਾਦੀਨਿ ਅਕਰੋਨ੍ਤਂ ਦਿਸ੍વਾ ਸਕਸਞ੍ਞਾਯ ਅਚ੍ਛਿਨ੍ਦਨ੍ਤਸ੍ਸ વਤ੍ਥੁਗਣਨਾਯ ਆਪਤ੍ਤਿਯੋ। ਅਚ੍ਛਿਨ੍ਦਾਪੇਯ੍ਯਾਤਿਏਤ੍ਥ ਪਨ ‘‘ਅਚ੍ਛਿਨ੍ਦਾ’’ਤਿ ਆਣਤ੍ਤਿਯਾ ਦੁਕ੍ਕਟਂ, ਅਚ੍ਛਿਨ੍ਦੇਸੁ ਯਤ੍ਤਕਾਨਿ ਆਣਤ੍ਤਾਨਿ, ਤੇਸਂ ਗਣਨਾਯ ਆਪਤ੍ਤਿਯੋ।
Pañcame sāmaṃ cīvaraṃ datvāti veyyāvaccādīni paccāsisamāno sayameva datvā. Acchindeyyāti veyyāvaccādīni akarontaṃ disvā sakasaññāya acchindantassa vatthugaṇanāya āpattiyo. Acchindāpeyyātiettha pana ‘‘acchindā’’ti āṇattiyā dukkaṭaṃ, acchindesu yattakāni āṇattāni, tesaṃ gaṇanāya āpattiyo.
ਸਾવਤ੍ਥਿਯਂ ਉਪਨਨ੍ਦਂ ਆਰਬ੍ਭ ਚੀવਰਅਚ੍ਛਿਨ੍ਦਨવਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਸਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ। ਅਨੁਪਸਮ੍ਪਨ੍ਨੇ ਉਪਸਮ੍ਪਨ੍ਨਸਞ੍ਞਿਨੋ, વੇਮਤਿਕਸ੍ਸ, ਅਨੁਪਸਮ੍ਪਨ੍ਨਸਞ੍ਞਿਨੋ વਾ, ਉਪਸਮ੍ਪਨ੍ਨਸ੍ਸਾਪਿ વਿਕਪ੍ਪਨੁਪਗਪਚ੍ਛਿਮਚੀવਰਂ ਠਪੇਤ੍વਾ ਅਞ੍ਞਂ ਪਰਿਕ੍ਖਾਰਂ, ਅਨੁਪਸਮ੍ਪਨ੍ਨਸ੍ਸ ਚ ਯਂਕਿਞ੍ਚਿ ਅਚ੍ਛਿਨ੍ਦਤੋ વਾ ਦੁਕ੍ਕਟਂ। ਤੇਨ ਤੁਟ੍ਠੇਨ વਾ ਕੁਪਿਤੇਨ વਾ ਦਿਨ੍ਨਂ ਪਨ ਤਸ੍ਸ વਿਸ੍ਸਾਸਂ વਾ ਗਣ੍ਹਨ੍ਤਸ੍ਸ ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ। વਿਕਪ੍ਪਨੁਪਗਪਚ੍ਛਿਮਚੀવਰਤਾ, ਸਾਮਂ ਦਿਨ੍ਨਤਾ, ਸਕਸਞ੍ਞਿਤਾ, ਉਪਸਮ੍ਪਨ੍ਨਤਾ, ਕੋਧવਸੇਨ ਅਚ੍ਛਿਨ੍ਦਨਂ વਾ ਅਚ੍ਛਿਨ੍ਦਾਪਨਂ વਾਤਿ ਇਮਾਨੇਤ੍ਥ ਪਞ੍ਚ ਅਙ੍ਗਾਨਿ। ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨਿ ਅਞ੍ਞਤ੍ਰ વੇਦਨਾਯ। વੇਦਨਾ ਪਨ ਇਧ ਦੁਕ੍ਖવੇਦਨਾਯੇવਾਤਿ।
Sāvatthiyaṃ upanandaṃ ārabbha cīvaraacchindanavatthusmiṃ paññattaṃ, sādhāraṇapaññatti, sāṇattikaṃ, tikapācittiyaṃ. Anupasampanne upasampannasaññino, vematikassa, anupasampannasaññino vā, upasampannassāpi vikappanupagapacchimacīvaraṃ ṭhapetvā aññaṃ parikkhāraṃ, anupasampannassa ca yaṃkiñci acchindato vā dukkaṭaṃ. Tena tuṭṭhena vā kupitena vā dinnaṃ pana tassa vissāsaṃ vā gaṇhantassa ummattakādīnañca anāpatti. Vikappanupagapacchimacīvaratā, sāmaṃ dinnatā, sakasaññitā, upasampannatā, kodhavasena acchindanaṃ vā acchindāpanaṃ vāti imānettha pañca aṅgāni. Samuṭṭhānādīni adinnādānasadisāni aññatra vedanāya. Vedanā pana idha dukkhavedanāyevāti.
ਚੀવਰਅਚ੍ਛਿਨ੍ਦਨਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Cīvaraacchindanasikkhāpadavaṇṇanā niṭṭhitā.
੬. ਸੁਤ੍ਤવਿਞ੍ਞਤ੍ਤਿਸਿਕ੍ਖਾਪਦવਣ੍ਣਨਾ
6. Suttaviññattisikkhāpadavaṇṇanā
ਛਟ੍ਠੇ ਸੁਤ੍ਤਨ੍ਤਿ ਛਬ੍ਬਿਧਂ ਖੋਮਸੁਤ੍ਤਾਦਿਂ વਾ ਤੇਸਂ ਅਨੁਲੋਮਂ વਾ। વਿਞ੍ਞਾਪੇਤ੍વਾਤਿ ਚੀવਰਤ੍ਥਾਯ ਯਾਚਿਤ੍વਾ। વਾਯਾਪੇਯ੍ਯਾਤਿ ‘‘ਚੀવਰਂ ਮੇ, ਆવੁਸੋ, વਾਯਥਾ’’ਤਿ ਅਕਪ੍ਪਿਯਾਯ વਿਞ੍ਞਤ੍ਤਿਯਾ વਾਯਾਪੇਯ੍ਯ। ਨਿਸ੍ਸਗ੍ਗਿਯਨ੍ਤਿ ਏવਂ વਾਯਾਪੇਨ੍ਤਸ੍ਸ ਯੋ ਤਨ੍ਤવਾਯੋ ਚੀવਰવਾਯਨਤ੍ਥਂ ਤੁਰਿવੇਮਸਜ੍ਜਨਾਦਿਕੇ ਪਯੋਗੇ ਕਰੋਤਿ, ਤਸ੍ਸ ਸਬ੍ਬਪ੍ਪਯੋਗੇਸੁ ਦੁਕ੍ਕਟਂ, ਪਟਿਲਾਭੇਨ ਨਿਸ੍ਸਗ੍ਗਿਯਂ ਹੋਤਿ।
Chaṭṭhe suttanti chabbidhaṃ khomasuttādiṃ vā tesaṃ anulomaṃ vā. Viññāpetvāti cīvaratthāya yācitvā. Vāyāpeyyāti ‘‘cīvaraṃ me, āvuso, vāyathā’’ti akappiyāya viññattiyā vāyāpeyya. Nissaggiyanti evaṃ vāyāpentassa yo tantavāyo cīvaravāyanatthaṃ turivemasajjanādike payoge karoti, tassa sabbappayogesu dukkaṭaṃ, paṭilābhena nissaggiyaṃ hoti.
ਰਾਜਗਹੇ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ਚੀવਰવਾਯਾਪਨવਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, વਿਞ੍ਞਾਪਿਤਸੁਤ੍ਤਂ વਿਞ੍ਞਾਪਿਤਤਨ੍ਤવਾਯੇਨ વਾਯਾਪੇਨ੍ਤਸ੍ਸ ਦੀਘਤੋ વਿਦਤ੍ਥਿਮਤ੍ਤੇ ਤਿਰਿਯਞ੍ਚ ਹਤ੍ਥਮਤ੍ਤੇ વੀਤੇ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ। ਇਤਿ ਯਾવ ਚੀવਰਂ વਡ੍ਢਤਿ, ਤਾવ ਇਮਿਨਾ ਪਮਾਣੇਨ ਆਪਤ੍ਤਿਯੋ વਡ੍ਢਨ੍ਤਿ। ਤੇਨੇવ ਪਨ ਅવਿਞ੍ਞਤ੍ਤਿਯਾ ਲਦ੍ਧਸੁਤ੍ਤਂ વਾਯਾਪੇਨ੍ਤਸ੍ਸ ਯਥਾ ਪੁਬ੍ਬੇ ਨਿਸ੍ਸਗ੍ਗਿਯਂ , ਏવਂ ਇਧ ਦੁਕ੍ਕਟਂ। ਤੇਨੇવ વਿਞ੍ਞਤ੍ਤਞ੍ਚ ਅવਿਞ੍ਞਤ੍ਤਞ੍ਚ વਾਯਾਪੇਨ੍ਤਸ੍ਸ ਸਚੇ વੁਤ੍ਤਪ੍ਪਮਾਣੇਨ ਕੇਦਾਰਬਦ੍ਧਂ વਿਯ ਚੀવਰਂ ਹੋਤਿ, ਅਕਪ੍ਪਿਯਸੁਤ੍ਤਮਯੇ ਪਰਿਚ੍ਛੇਦੇ ਪਾਚਿਤ੍ਤਿਯਂ, ਇਤਰਸ੍ਮਿਂ ਤਥੇવ ਦੁਕ੍ਕਟਂ। ਤਤੋ ਚੇ ਊਨਤਰਾ ਪਰਿਚ੍ਛੇਦਾ, ਸਬ੍ਬਪਰਿਚ੍ਛੇਦੇਸੁ ਦੁਕ੍ਕਟਾਨੇવ। ਅਥ ਏਕਨ੍ਤਰਿਕੇਨ વਾ ਸੁਤ੍ਤੇਨ ਦੀਘਤੋ વਾ ਕਪ੍ਪਿਯਂ ਤਿਰਿਯਂ ਅਕਪ੍ਪਿਯਂ ਕਤ੍વਾ વੀਤਂ ਹੋਤਿ, ਪੁਬ੍ਬੇ વੁਤ੍ਤਪ੍ਪਮਾਣਗਣਨਾਯ ਦੁਕ੍ਕਟਾਨਿ। ਏਤੇਨੇવ ਉਪਾਯੇਨ ਕਪ੍ਪਿਯਤਨ੍ਤવਾਯੇਨ ਅਕਪ੍ਪਿਯਸੁਤ੍ਤੇ, ਕਪ੍ਪਿਯਾਕਪ੍ਪਿਯੇਹਿ ਤਨ੍ਤવਾਯੇਹਿ ਸੁਤ੍ਤੇਪਿ ਕਪ੍ਪਿਯੇ ਅਕਪ੍ਪਿਯੇ ਕਪ੍ਪਿਯਾਕਪ੍ਪਿਯੇ ਚ ਆਪਤ੍ਤਿਭੇਦੋ વੇਦਿਤਬ੍ਬੋ। ਤਿਕਪਾਚਿਤ੍ਤਿਯਂ, ਅવਾਯਾਪਿਤੇ વਾਯਾਪਿਤਸਞ੍ਞਿਨੋ વੇਮਤਿਕਸ੍ਸ વਾ ਦੁਕ੍ਕਟਂ। ਚੀવਰਸਿਬ੍ਬਨਆਯੋਗਕਾਯਬਨ੍ਧਨਅਂਸਬਦ੍ਧਕਪਤ੍ਤਤ੍ਥવਿਕਪਰਿਸ੍ਸਾવਨਾਨਂ ਅਤ੍ਥਾਯ ਸੁਤ੍ਤਂ વਿਞ੍ਞਾਪੇਨ੍ਤਸ੍ਸ, ਞਾਤਕਪ੍ਪવਾਰਿਤੇਹਿ ਕਪ੍ਪਿਯਸੁਤ੍ਤਂ વਾਯਾਪੇਨ੍ਤਸ੍ਸ, ਅਞ੍ਞਸ੍ਸਤ੍ਥਾਯ, ਅਤ੍ਤਨੋ ਧਨੇਨ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ, ਚੀવਰਤ੍ਥਾਯ વਿਞ੍ਞਾਪਿਤਸੁਤ੍ਤਂ, ਅਤ੍ਤੁਦ੍ਦੇਸਿਕਤਾ, ਅਕਪ੍ਪਿਯਤਨ੍ਤવਾਯੇਨ ਅਕਪ੍ਪਿਯવਿਞ੍ਞਤ੍ਤਿਯਾ વਾਯਾਪਨਨ੍ਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ। ਸਮੁਟ੍ਠਾਨਾਦੀਨਿ ਧੋવਾਪਨਸਿਕ੍ਖਾਪਦੇ વੁਤ੍ਤਨਯਾਨੇવਾਤਿ।
Rājagahe chabbaggiye bhikkhū ārabbha cīvaravāyāpanavatthusmiṃ paññattaṃ, sādhāraṇapaññatti, anāṇattikaṃ, viññāpitasuttaṃ viññāpitatantavāyena vāyāpentassa dīghato vidatthimatte tiriyañca hatthamatte vīte nissaggiyaṃ pācittiyaṃ. Iti yāva cīvaraṃ vaḍḍhati, tāva iminā pamāṇena āpattiyo vaḍḍhanti. Teneva pana aviññattiyā laddhasuttaṃ vāyāpentassa yathā pubbe nissaggiyaṃ , evaṃ idha dukkaṭaṃ. Teneva viññattañca aviññattañca vāyāpentassa sace vuttappamāṇena kedārabaddhaṃ viya cīvaraṃ hoti, akappiyasuttamaye paricchede pācittiyaṃ, itarasmiṃ tatheva dukkaṭaṃ. Tato ce ūnatarā paricchedā, sabbaparicchedesu dukkaṭāneva. Atha ekantarikena vā suttena dīghato vā kappiyaṃ tiriyaṃ akappiyaṃ katvā vītaṃ hoti, pubbe vuttappamāṇagaṇanāya dukkaṭāni. Eteneva upāyena kappiyatantavāyena akappiyasutte, kappiyākappiyehi tantavāyehi suttepi kappiye akappiye kappiyākappiye ca āpattibhedo veditabbo. Tikapācittiyaṃ, avāyāpite vāyāpitasaññino vematikassa vā dukkaṭaṃ. Cīvarasibbanaāyogakāyabandhanaaṃsabaddhakapattatthavikaparissāvanānaṃ atthāya suttaṃ viññāpentassa, ñātakappavāritehi kappiyasuttaṃ vāyāpentassa, aññassatthāya, attano dhanena, ummattakādīnañca anāpatti, cīvaratthāya viññāpitasuttaṃ, attuddesikatā, akappiyatantavāyena akappiyaviññattiyā vāyāpananti imānettha tīṇi aṅgāni. Samuṭṭhānādīni dhovāpanasikkhāpade vuttanayānevāti.
ਸੁਤ੍ਤવਿਞ੍ਞਤ੍ਤਿਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Suttaviññattisikkhāpadavaṇṇanā niṭṭhitā.
੭. ਮਹਾਪੇਸਕਾਰਸਿਕ੍ਖਾਪਦવਣ੍ਣਨਾ
7. Mahāpesakārasikkhāpadavaṇṇanā
ਸਤ੍ਤਮੇ ਤਤ੍ਰ ਚੇ ਸੋ ਭਿਕ੍ਖੂਤਿ ਯਤ੍ਰ ਗਾਮੇ વਾ ਨਿਗਮੇ વਾ ਤਨ੍ਤવਾਯਾ, ਤਤ੍ਰ। ਪੁਬ੍ਬੇ ਅਪ੍ਪવਾਰਿਤੋਤਿ ਚੀવਰਸਾਮਿਕੇਹਿ ਅਪ੍ਪવਾਰਿਤੋ ਹੁਤ੍વਾ । વਿਕਪ੍ਪਂ ਆਪਜ੍ਜੇਯ੍ਯਾਤਿ વਿਸਿਟ੍ਠਕਪ੍ਪਂ ਅਧਿਕવਿਧਾਨਂ ਆਪਜ੍ਜੇਯ੍ਯ। ਇਦਾਨਿ ਯੇਨਾਕਾਰੇਨ વਿਕਪ੍ਪਂ ਆਪਨ੍ਨੋ ਹੋਤਿ, ਤਂ ਦਸ੍ਸੇਤੁਂ ਇਦਂ ਖੋ, ਆવੁਸੋਤਿਆਦਿ વੁਤ੍ਤਂ। ਤਤ੍ਥ ਆਯਤਨ੍ਤਿ ਦੀਘਂ। વਿਤ੍ਥਤਨ੍ਤਿ ਪੁਥੁਲਂ। ਅਪ੍ਪਿਤਨ੍ਤਿ ਘਨਂ। ਸੁવੀਤਨ੍ਤਿ ਸੁਟ੍ਠੁ વੀਤਂ, ਸਬ੍ਬਟ੍ਠਾਨੇਸੁ ਸਮਂ ਕਤ੍વਾ વੀਤਂ। ਸੁਪ੍ਪવਾਯਿਤਨ੍ਤਿ ਸੁਟ੍ਠੁ ਪવਾਯਿਤਂ, ਸਬ੍ਬਟ੍ਠਾਨੇਸੁ ਸਮਂ ਕਤ੍વਾ ਤਨ੍ਤੇ ਪਸਾਰਿਤਂ। ਸੁવਿਲੇਖਿਤਨ੍ਤਿ ਲੇਖਨਿਯਾ ਸੁਟ੍ਠੁ વਿਲੇਖਿਤਂ। ਸੁવਿਤਚ੍ਛਿਤਨ੍ਤਿ ਕੋਚ੍ਛੇਨ ਸੁਟ੍ਠੁ વਿਤਚ੍ਛਿਤਂ, ਸੁਟ੍ਠੁ ਨਿਦ੍ਧੋਤਨ੍ਤਿ ਅਤ੍ਥੋ। ਪਿਣ੍ਡਪਾਤਮਤ੍ਤਮ੍ਪੀਤਿ ਏਤ੍ਥ ਚ ਨ ਭਿਕ੍ਖੁਨੋ ਪਿਣ੍ਡਪਾਤਦਾਨਮਤ੍ਤੇਨ ਤਂ ਨਿਸ੍ਸਗ੍ਗਿਯਂ ਹੋਤਿ, ਸਚੇ ਪਨ ਤੇ ਤਸ੍ਸ વਚਨੇਨ ਚੀવਰਸਾਮਿਕਾਨਂ ਹਤ੍ਥਤੋ ਸੁਤ੍ਤਂ ਗਹੇਤ੍વਾ ਈਸਕਮ੍ਪਿ ਆਯਤਂ વਾ વਿਤ੍ਥਤਂ વਾ ਅਪ੍ਪਿਤਂ વਾ ਕਰੋਨ੍ਤਿ, ਅਥ ਤੇਸਂ ਪਯੋਗੇ ਭਿਕ੍ਖੁਨੋ ਦੁਕ੍ਕਟਂ, ਪਟਿਲਾਭੇਨ ਨਿਸ੍ਸਗ੍ਗਿਯਂ ਹੋਤਿ।
Sattame tatra ce so bhikkhūti yatra gāme vā nigame vā tantavāyā, tatra. Pubbe appavāritoti cīvarasāmikehi appavārito hutvā . Vikappaṃ āpajjeyyāti visiṭṭhakappaṃ adhikavidhānaṃ āpajjeyya. Idāni yenākārena vikappaṃ āpanno hoti, taṃ dassetuṃ idaṃ kho, āvusotiādi vuttaṃ. Tattha āyatanti dīghaṃ. Vitthatanti puthulaṃ. Appitanti ghanaṃ. Suvītanti suṭṭhu vītaṃ, sabbaṭṭhānesu samaṃ katvā vītaṃ. Suppavāyitanti suṭṭhu pavāyitaṃ, sabbaṭṭhānesu samaṃ katvā tante pasāritaṃ. Suvilekhitanti lekhaniyā suṭṭhu vilekhitaṃ. Suvitacchitanti kocchena suṭṭhu vitacchitaṃ, suṭṭhu niddhotanti attho. Piṇḍapātamattampīti ettha ca na bhikkhuno piṇḍapātadānamattena taṃ nissaggiyaṃ hoti, sace pana te tassa vacanena cīvarasāmikānaṃ hatthato suttaṃ gahetvā īsakampi āyataṃ vā vitthataṃ vā appitaṃ vā karonti, atha tesaṃ payoge bhikkhuno dukkaṭaṃ, paṭilābhena nissaggiyaṃ hoti.
ਸਾવਤ੍ਥਿਯਂ ਉਪਨਨ੍ਦਂ ਆਰਬ੍ਭ ਚੀવਰੇ વਿਕਪ੍ਪਂ ਆਪਜ੍ਜਨવਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਤਿਕਪਾਚਿਤ੍ਤਿਯਂ, ਞਾਤਕੇ ਅਞ੍ਞਾਤਕਸਞ੍ਞਿਨੋ વੇਮਤਿਕਸ੍ਸ વਾ ਦੁਕ੍ਕਟਂ। ਞਾਤਕਪ੍ਪવਾਰਿਤਾਨਂ ਤਨ੍ਤવਾਯੇਹਿ, ਅਞ੍ਞਸ੍ਸ વਾ ਅਤ੍ਥਾਯ, ਅਤ੍ਤਨੋ વਾ ਧਨੇਨ, ਮਹਗ੍ਘਂ વਾਯਾਪੇਤੁਕਾਮਂ ਅਪ੍ਪਗ੍ਘਂ વਾਯਾਪੇਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ। ਅਞ੍ਞਾਤਕਅਪ੍ਪવਾਰਿਤਾਨਂ ਤਨ੍ਤવਾਯੇ ਉਪਸਙ੍ਕਮਿਤ੍વਾ વਿਕਪ੍ਪਮਾਪਜ੍ਜਨਤਾ, ਚੀવਰਸ੍ਸ ਅਤ੍ਤੁਦ੍ਦੇਸਿਕਤਾ, ਤਸ੍ਸ વਚਨੇਨ ਸੁਤ੍ਤવਡ੍ਢਨਂ, ਚੀવਰਪ੍ਪਟਿਲਾਭੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨਿ। ਸਮੁਟ੍ਠਾਨਾਦੀਨਿ ਧੋવਾਪਨਸਿਕ੍ਖਾਪਦੇ વੁਤ੍ਤਨਯਾਨੇવਾਤਿ।
Sāvatthiyaṃ upanandaṃ ārabbha cīvare vikappaṃ āpajjanavatthusmiṃ paññattaṃ, sādhāraṇapaññatti, anāṇattikaṃ, tikapācittiyaṃ, ñātake aññātakasaññino vematikassa vā dukkaṭaṃ. Ñātakappavāritānaṃ tantavāyehi, aññassa vā atthāya, attano vā dhanena, mahagghaṃ vāyāpetukāmaṃ appagghaṃ vāyāpentassa, ummattakādīnañca anāpatti. Aññātakaappavāritānaṃ tantavāye upasaṅkamitvā vikappamāpajjanatā, cīvarassa attuddesikatā, tassa vacanena suttavaḍḍhanaṃ, cīvarappaṭilābhoti imānettha cattāri aṅgāni. Samuṭṭhānādīni dhovāpanasikkhāpade vuttanayānevāti.
ਮਹਾਪੇਸਕਾਰਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Mahāpesakārasikkhāpadavaṇṇanā niṭṭhitā.
੮. ਅਚ੍ਚੇਕਚੀવਰਸਿਕ੍ਖਾਪਦવਣ੍ਣਨਾ
8. Accekacīvarasikkhāpadavaṇṇanā
ਅਟ੍ਠਮੇ ਦਸਾਹਾਨਾਗਤਨ੍ਤਿ ਦਸ ਅਹਾਨਿ ਦਸਾਹਂ, ਤੇਨ ਦਸਾਹੇਨ ਅਨਾਗਤਾ ਦਸਾਹਾਨਾਗਤਾ, ਦਸਾਹੇਨ ਅਸਮ੍ਪਤ੍ਤਾਤਿ ਅਤ੍ਥੋ, ਤਂ ਦਸਾਹਾਨਾਗਤਂ, ਅਚ੍ਚਨ੍ਤਸਂਯੋਗવਸੇਨ ਭੁਮ੍ਮਤ੍ਥੇ ਉਪਯੋਗવਚਨਂ। ਕਤ੍ਤਿਕਤੇਮਾਸਿਕਪੁਣ੍ਣਮਨ੍ਤਿ ਪਠਮਕਤ੍ਤਿਕਪੁਣ੍ਣਮਂ, ਇਧਾਪਿ ਪਠਮਪਦਸ੍ਸ ਅਨੁਪਯੋਗਤਾ ਪੁਰਿਮਨਯੇਨੇવ ਭੁਮ੍ਮਤ੍ਥੇ ਉਪਯੋਗવਚਨਂ। ਇਦਂ વੁਤ੍ਤਂ ਹੋਤਿ – ਯਤੋ ਪਟ੍ਠਾਯ ਪਠਮਪ੍ਪવਾਰਣਾ ‘‘ਦਸਾਹਾਨਾਗਤਾ’’ਤਿ વੁਚ੍ਚਤਿ, ਸਚੇਪਿ ਤਾਨਿ ਦਿવਸਾਨਿ ਅਚ੍ਚਨ੍ਤਮੇવ ਭਿਕ੍ਖੁਨੋ ਅਚ੍ਚੇਕਚੀવਰਂ ਉਪ੍ਪਜ੍ਜੇਯ੍ਯ, ‘‘ਅਚ੍ਚੇਕਂ ਇਦ’’ਨ੍ਤਿ ਜਾਨਮਾਨੇਨ ਭਿਕ੍ਖੁਨਾ ਸਬ੍ਬਮ੍ਪਿ ਪਟਿਗ੍ਗਹੇਤਬ੍ਬਨ੍ਤਿ। ਤੇਨ ਪવਾਰਣਾਮਾਸਸ੍ਸ ਜੁਣ੍ਹਪਕ੍ਖਪਞ੍ਚਮਿਤੋ ਪਟ੍ਠਾਯ ਉਪ੍ਪਨ੍ਨਸ੍ਸ ਚੀવਰਸ੍ਸ ਨਿਧਾਨਕਾਲੋ ਦਸ੍ਸਿਤੋ ਹੋਤਿ। ਕਾਮਞ੍ਚੇਸ ‘‘ਦਸਾਹਪਰਮਂ ਅਤਿਰੇਕਚੀવਰਂ ਧਾਰੇਤਬ੍ਬ’’ਨ੍ਤਿਇਮਿਨਾવ ਸਿਦ੍ਧੋ, ਅਟ੍ਠੁਪ੍ਪਤ੍ਤਿવਸੇਨ ਪਨ ਅਪੁਬ੍ਬਂ વਿਯ ਅਤ੍ਥਂ ਦਸ੍ਸੇਤ੍વਾ ਸਿਕ੍ਖਾਪਦਂ ਠਪਿਤਂ। ਅਚ੍ਚੇਕਚੀવਰਨ੍ਤਿ ਗਮਿਕਗਿਲਾਨਗਬ੍ਭਿਨਿਅਭਿਨવੁਪ੍ਪਨ੍ਨਸਦ੍ਧਾਨਂ ਪੁਗ੍ਗਲਾਨਂ ਅਞ੍ਞਤਰੇਨ ‘‘વਸ੍ਸਾવਾਸਿਕਂ ਦਸ੍ਸਾਮੀ’’ਤਿ ਏવਂ ਆਰੋਚੇਤ੍વਾ ਦਿਨ੍ਨਂ। ਸਚੇ ਤਂ ਪੁਰੇ ਪવਾਰਣਾਯ વਿਭਜਿਤਂ, ਯੇਨ ਗਹਿਤਂ, ਤੇਨ વਸ੍ਸਚ੍ਛੇਦੋ ਨ ਕਾਤਬ੍ਬੋ, ਕਰੋਤਿ ਚੇ, ਤਂ ਚੀવਰਂ ਸਙ੍ਘਿਕਂ ਹੋਤਿ। ਯਾવ ਚੀવਰਕਾਲਸਮਯਨ੍ਤਿ ਅਨਤ੍ਥਤੇ ਕਥਿਨੇ ਯਾવ વਸ੍ਸਾਨਸ੍ਸ ਪਚ੍ਛਿਮੋ ਮਾਸੋ, ਅਤ੍ਥਤੇ ਕਥਿਨੇ ਯਾવ ਪਞ੍ਚ ਮਾਸਾ, ਤਾવ ਨਿਕ੍ਖਿਪਿਤਬ੍ਬਂ।
Aṭṭhame dasāhānāgatanti dasa ahāni dasāhaṃ, tena dasāhena anāgatā dasāhānāgatā, dasāhena asampattāti attho, taṃ dasāhānāgataṃ, accantasaṃyogavasena bhummatthe upayogavacanaṃ. Kattikatemāsikapuṇṇamanti paṭhamakattikapuṇṇamaṃ, idhāpi paṭhamapadassa anupayogatā purimanayeneva bhummatthe upayogavacanaṃ. Idaṃ vuttaṃ hoti – yato paṭṭhāya paṭhamappavāraṇā ‘‘dasāhānāgatā’’ti vuccati, sacepi tāni divasāni accantameva bhikkhuno accekacīvaraṃ uppajjeyya, ‘‘accekaṃ ida’’nti jānamānena bhikkhunā sabbampi paṭiggahetabbanti. Tena pavāraṇāmāsassa juṇhapakkhapañcamito paṭṭhāya uppannassa cīvarassa nidhānakālo dassito hoti. Kāmañcesa ‘‘dasāhaparamaṃ atirekacīvaraṃ dhāretabba’’ntiimināva siddho, aṭṭhuppattivasena pana apubbaṃ viya atthaṃ dassetvā sikkhāpadaṃ ṭhapitaṃ. Accekacīvaranti gamikagilānagabbhiniabhinavuppannasaddhānaṃ puggalānaṃ aññatarena ‘‘vassāvāsikaṃ dassāmī’’ti evaṃ ārocetvā dinnaṃ. Sace taṃ pure pavāraṇāya vibhajitaṃ, yena gahitaṃ, tena vassacchedo na kātabbo, karoti ce, taṃ cīvaraṃ saṅghikaṃ hoti. Yāva cīvarakālasamayanti anatthate kathine yāva vassānassa pacchimo māso, atthate kathine yāva pañca māsā, tāva nikkhipitabbaṃ.
ਸਾવਤ੍ਥਿਯਂ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਅਚ੍ਚੇਕਚੀવਰਸ੍ਸ ਚੀવਰਕਾਲਸਮਯਂ ਅਤਿਕ੍ਕਮਨવਤ੍ਥੁਸ੍ਮਿਂ ਪਞ੍ਞਤ੍ਤਂ, ਸੇਸਮੇਤ੍ਥ ਚੀવਰવਗ੍ਗਸ੍ਸ ਪਠਮਸਿਕ੍ਖਾਪਦੇ વੁਤ੍ਤਨਯੇਨੇવ વੇਦਿਤਬ੍ਬਨ੍ਤਿ।
Sāvatthiyaṃ sambahule bhikkhū ārabbha accekacīvarassa cīvarakālasamayaṃ atikkamanavatthusmiṃ paññattaṃ, sesamettha cīvaravaggassa paṭhamasikkhāpade vuttanayeneva veditabbanti.
ਅਚ੍ਚੇਕਚੀવਰਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Accekacīvarasikkhāpadavaṇṇanā niṭṭhitā.
੯. ਸਾਸਙ੍ਕਸਿਕ੍ਖਾਪਦવਣ੍ਣਨਾ
9. Sāsaṅkasikkhāpadavaṇṇanā
ਨવਮੇ ਉਪવਸ੍ਸਂ ਖੋ ਪਨਾਤਿ ਏਤ੍ਥ ਉਪવਸ੍ਸਨ੍ਤਿ ਉਪવਸ੍ਸ, ਉਪવਸਿਤ੍વਾਤਿ વੁਤ੍ਤਂ ਹੋਤਿ, ਉਪਸਮ੍ਪਜ੍ਜਨ੍ਤਿਆਦੀਸੁ (વਿਭ॰ ੫੭੦) વਿਯ ਹੇਤ੍ਥ ਅਨੁਨਾਸਿਕੋ ਦਟ੍ਠਬ੍ਬੋ, વਸ੍ਸਂ ਉਪਗਨ੍ਤ੍વਾ વਸਿਤ੍વਾ ਚਾਤਿ ਅਤ੍ਥੋ। ਇਮਸ੍ਸ ਚ ਪਦਸ੍ਸ ‘‘ਤਥਾਰੂਪੇਸੁ ਭਿਕ੍ਖੁ ਸੇਨਾਸਨੇਸੁ વਿਹਰਨ੍ਤੋ’’ਤਿਇਮਿਨਾ ਸਮ੍ਬਨ੍ਧੋ, ਇਦਂ વੁਤ੍ਤਂ ਹੋਤਿ – વਸ੍ਸਂ ਉਪਗਨ੍ਤ੍વਾ વਸਿਤ੍વਾ ਚ ਤਤੋ ਪਰਂ ਪਚ੍ਛਿਮਕਤ੍ਤਿਕਪੁਣ੍ਣਮਪਰਿਯੋਸਾਨਕਾਲਂ ਯਾਨਿ ਖੋ ਪਨ ਤਾਨਿ ਆਰਞ੍ਞਕਾਨਿ…ਪੇ॰… ਅਨ੍ਤਰਘਰੇ ਨਿਕ੍ਖਿਪੇਯ੍ਯਾਤਿ। ਤਤ੍ਥ ਆਰਞ੍ਞਕਾਨੀਤਿ ਸਬ੍ਬਪਚ੍ਛਿਮਾਨਿ ਆਰੋਪਿਤੇਨ ਆਚਰਿਯਧਨੁਨਾ ਗਾਮਸ੍ਸ ਇਨ੍ਦਖੀਲਤੋ ਪਟ੍ਠਾਯ ਪਞ੍ਚਧਨੁਸਤਪ੍ਪਮਾਣੇ ਪਦੇਸੇ ਕਤਸੇਨਾਸਨਾਨਿ। ਸਚੇ ਪਨ ਅਪਰਿਕ੍ਖਿਤ੍ਤੋ ਗਾਮੋ ਹੋਤਿ, ਪਰਿਕ੍ਖੇਪਾਰਹਟ੍ਠਾਨਤੋ ਪਟ੍ਠਾਯ ਮਿਨੇਤਬ੍ਬਂ। ਸਚੇ વਿਹਾਰਸ੍ਸ ਪਰਿਕ੍ਖੇਪੋ વਾ ਅਪਰਿਕ੍ਖਿਤ੍ਤਸ੍ਸ ਯਂ ਗਾਮਤੋ ਸਬ੍ਬਪਠਮਂ ਸੇਨਾਸਨਂ વਾ ਚੇਤਿਯਂ વਾ ਬੋਧਿ વਾ ਧੁવਸਨ੍ਨਿਪਾਤਟ੍ਠਾਨਂ વਾ ਯਾવ , ਤਂ ਤਾવ ਪਕਤਿਮਗ੍ਗੇਨ ਮਿਨੇਤਬ੍ਬਂ, ਅਞ੍ਞਂ ਮਗ੍ਗਂ ਕਾਤੁਂ, ਅਮਗ੍ਗੇਨ વਾ ਮਿਨੇਤੁਂ ਨ વਟ੍ਟਤਿ। ਸਾਸਙ੍ਕਸਮ੍ਮਤਾਨੀਤਿ ਚੋਰਾਦੀਨਂ ਨਿવਿਟ੍ਠੋਕਾਸਾਦਿਦਸ੍ਸਨੇਨ ‘‘ਸਾਸਙ੍ਕਾਨੀ’’ਤਿ ਸਮ੍ਮਤਾਨਿ, ਏવਂ ਸਞ੍ਞਾਤਾਨੀਤਿ ਅਤ੍ਥੋ। ਸਹ ਪਟਿਭਯੇਨ ਸਪ੍ਪਟਿਭਯਾਨਿ, ਚੋਰੇਹਿ ਮਨੁਸ੍ਸਾਨਂ ਹਤવਿਲੁਤ੍ਤਾਕੋਟਿਤਭਾવਦਸ੍ਸਨਤੋ ਸਨ੍ਨਿਹਿਤਬਲવਭਯਾਨੀਤਿ ਅਤ੍ਥੋ।
Navame upavassaṃ kho panāti ettha upavassanti upavassa, upavasitvāti vuttaṃ hoti, upasampajjantiādīsu (vibha. 570) viya hettha anunāsiko daṭṭhabbo, vassaṃ upagantvā vasitvā cāti attho. Imassa ca padassa ‘‘tathārūpesu bhikkhu senāsanesu viharanto’’tiiminā sambandho, idaṃ vuttaṃ hoti – vassaṃ upagantvā vasitvā ca tato paraṃ pacchimakattikapuṇṇamapariyosānakālaṃ yāni kho pana tāni āraññakāni…pe… antaraghare nikkhipeyyāti. Tattha āraññakānīti sabbapacchimāni āropitena ācariyadhanunā gāmassa indakhīlato paṭṭhāya pañcadhanusatappamāṇe padese katasenāsanāni. Sace pana aparikkhitto gāmo hoti, parikkhepārahaṭṭhānato paṭṭhāya minetabbaṃ. Sace vihārassa parikkhepo vā aparikkhittassa yaṃ gāmato sabbapaṭhamaṃ senāsanaṃ vā cetiyaṃ vā bodhi vā dhuvasannipātaṭṭhānaṃ vā yāva , taṃ tāva pakatimaggena minetabbaṃ, aññaṃ maggaṃ kātuṃ, amaggena vā minetuṃ na vaṭṭati. Sāsaṅkasammatānīti corādīnaṃ niviṭṭhokāsādidassanena ‘‘sāsaṅkānī’’ti sammatāni, evaṃ saññātānīti attho. Saha paṭibhayena sappaṭibhayāni, corehi manussānaṃ hataviluttākoṭitabhāvadassanato sannihitabalavabhayānīti attho.
ਅਨ੍ਤਰਘਰੇ ਨਿਕ੍ਖਿਪੇਯ੍ਯਾਤਿ ਆਰਞ੍ਞਕਸ੍ਸ ਸੇਨਾਸਨਸ੍ਸ ਸਮਨ੍ਤਾ ਸਬ੍ਬਦਿਸਾਭਾਗੇਸੁ ਅਤ੍ਤਨਾ ਅਭਿਰੁਚਿਤੇ ਗੋਚਰਗਾਮੇ ਨਿਕ੍ਖਿਪੇਯ੍ਯ। ਤਞ੍ਚ ਖੋ ਸਤਿਯਾ ਅਙ੍ਗਸਮ੍ਪਤ੍ਤਿਯਾ, ਤਤ੍ਰਾਯਂ ਅਙ੍ਗਸਮ੍ਪਤ੍ਤਿ – ਪੁਰਿਮਿਕਾਯ ਉਪਗਨ੍ਤ੍વਾ ਮਹਾਪવਾਰਣਾਯ ਪવਾਰਿਤੋ ਹੋਤਿ, ਇਦਮੇਕਂ ਅਙ੍ਗਂ। ਕਤ੍ਤਿਕਮਾਸੋਯੇવ ਹੋਤਿ, ਇਦਂ ਦੁਤਿਯਂ ਅਙ੍ਗਂ। ਪਞ੍ਚਧਨੁਸਤਿਕਪਚ੍ਛਿਮਪ੍ਪਮਾਣਯੁਤ੍ਤਂ ਸੇਨਾਸਨਂ ਹੋਤਿ, ਇਦਂ ਤਤਿਯਂ ਅਙ੍ਗਂ। ਊਨਪ੍ਪਮਾਣੇ વਾ ਗਾવੁਤਤੋ ਅਤਿਰੇਕਪ੍ਪਮਾਣੇ વਾ ਨ ਲਭਤਿ, ਯਤ੍ਰ ਹਿ ਪਿਣ੍ਡਾਯ ਚਰਿਤ੍વਾ ਭੁਤ੍ਤવੇਲਾਯਮੇવ ਪੁਨ વਿਹਾਰਂ ਸਕ੍ਕਾ ਆਗਨ੍ਤੁਂ, ਤਦੇવ ਇਧਾਧਿਪ੍ਪੇਤਂ। ਸਾਸਙ੍ਕਸਪ੍ਪਟਿਭਯਮੇવ ਹੋਤਿ, ਇਦਂ ਚਤੁਤ੍ਥਂ ਅਙ੍ਗਂ ਹੋਤੀਤਿ। ਕੋਚਿਦੇવ ਪਚ੍ਚਯੋਤਿ ਕਿਞ੍ਚਿਦੇવ ਕਾਰਣਂ। ਤੇਨ ਚੀવਰੇਨਾਤਿ ਤੇਨ ਅਨ੍ਤਰਘਰੇ ਨਿਕ੍ਖਿਤ੍ਤਚੀવਰੇਨ। વਿਪ੍ਪવਾਸਾਯਾਤਿ વਿਯੋਗવਾਸਾਯ। ਤਤੋ ਚੇ ਉਤ੍ਤਰਿ વਿਪ੍ਪવਸੇਯ੍ਯਾਤਿ ਛਾਰਤ੍ਤਤੋ ਉਤ੍ਤਰਿ ਤਸ੍ਮਿਂ ਸੇਨਾਸਨੇ ਸਤ੍ਤਮਂ ਅਰੁਣਂ ਉਟ੍ਠਾਪੇਯ੍ਯਾਤਿ ਅਤ੍ਥੋ, ਤਥਾ ਅਸਕ੍ਕੋਨ੍ਤੇਨ ਪਨ ਗਾਮਸੀਮਂ ਓਕ੍ਕਮਿਤ੍વਾ ਸਭਾਯਂ વਾ ਯਤ੍ਥ ਕਤ੍ਥਚਿ વਾ વਸਿਤ੍વਾ ਚੀવਰਪ੍ਪવਤ੍ਤਿਂ ਞਤ੍વਾ ਪਕ੍ਕਮਿਤੁਂ વਟ੍ਟਤਿ। ਅਞ੍ਞਤ੍ਰ ਭਿਕ੍ਖੁਸਮ੍ਮੁਤਿਯਾਤਿ ਯਂ ਸਙ੍ਘੋ ਗਿਲਾਨਸ੍ਸ ਭਿਕ੍ਖੁਨੋ ਚੀવਰੇਨ વਿਪ੍ਪવਾਸਸਮ੍ਮੁਤਿਂ ਦੇਤਿ, ਤਂ ਠਪੇਤ੍વਾ ਅਲਦ੍ਧਸਮ੍ਮੁਤਿਕਸ੍ਸ ਅਤਿਰੇਕਛਾਰਤ੍ਤਂ વਿਪ੍ਪવਸਤੋ ਨਿਸ੍ਸਗ੍ਗਿਯਂ ਹੋਤਿ।
Antaraghare nikkhipeyyāti āraññakassa senāsanassa samantā sabbadisābhāgesu attanā abhirucite gocaragāme nikkhipeyya. Tañca kho satiyā aṅgasampattiyā, tatrāyaṃ aṅgasampatti – purimikāya upagantvā mahāpavāraṇāya pavārito hoti, idamekaṃ aṅgaṃ. Kattikamāsoyeva hoti, idaṃ dutiyaṃ aṅgaṃ. Pañcadhanusatikapacchimappamāṇayuttaṃ senāsanaṃ hoti, idaṃ tatiyaṃ aṅgaṃ. Ūnappamāṇe vā gāvutato atirekappamāṇe vā na labhati, yatra hi piṇḍāya caritvā bhuttavelāyameva puna vihāraṃ sakkā āgantuṃ, tadeva idhādhippetaṃ. Sāsaṅkasappaṭibhayameva hoti, idaṃ catutthaṃ aṅgaṃ hotīti. Kocideva paccayoti kiñcideva kāraṇaṃ. Tena cīvarenāti tena antaraghare nikkhittacīvarena. Vippavāsāyāti viyogavāsāya. Tato ce uttari vippavaseyyāti chārattato uttari tasmiṃ senāsane sattamaṃ aruṇaṃ uṭṭhāpeyyāti attho, tathā asakkontena pana gāmasīmaṃ okkamitvā sabhāyaṃ vā yattha katthaci vā vasitvā cīvarappavattiṃ ñatvā pakkamituṃ vaṭṭati. Aññatra bhikkhusammutiyāti yaṃ saṅgho gilānassa bhikkhuno cīvarena vippavāsasammutiṃ deti, taṃ ṭhapetvā aladdhasammutikassa atirekachārattaṃ vippavasato nissaggiyaṃ hoti.
ਸਾવਤ੍ਥਿਯਂ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਚੀવਰવਿਪ੍ਪવਾਸવਤ੍ਥੁਸ੍ਮਿਂ ਪਞ੍ਞਤ੍ਤਂ, ਸੇਸਮੇਤ੍ਥ ਚੀવਰવਗ੍ਗਸ੍ਸ ਦੁਤਿਯਸਿਕ੍ਖਾਪਦੇ વੁਤ੍ਤਨਯੇਨੇવ વੇਦਿਤਬ੍ਬਨ੍ਤਿ।
Sāvatthiyaṃ sambahule bhikkhū ārabbha cīvaravippavāsavatthusmiṃ paññattaṃ, sesamettha cīvaravaggassa dutiyasikkhāpade vuttanayeneva veditabbanti.
ਸਾਸਙ੍ਕਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Sāsaṅkasikkhāpadavaṇṇanā niṭṭhitā.
੧੦. ਪਰਿਣਤਸਿਕ੍ਖਾਪਦવਣ੍ਣਨਾ
10. Pariṇatasikkhāpadavaṇṇanā
ਦਸਮੇ ਸਙ੍ਘਿਕਨ੍ਤਿ ਸਙ੍ਘਸ੍ਸ ਸਨ੍ਤਕਂ। ਸੋ ਹਿ ਸਙ੍ਘਸ੍ਸ ਪਰਿਣਤਤ੍ਤਾ ਹਤ੍ਥੇ ਅਨਾਰੁਲ਼੍ਹੋਪਿ ਏਕੇਨ ਪਰਿਯਾਯੇਨ ਸਙ੍ਘਸਨ੍ਤਕੋ ਹੋਤਿ। ਲਾਭਨ੍ਤਿ ਲਭਿਤਬ੍ਬਂ ਚੀવਰਾਦਿવਤ੍ਥੁਂ। ਪਰਿਣਤਨ੍ਤਿ ‘‘ਦਸ੍ਸਾਮ ਕਰਿਸ੍ਸਾਮਾ’’ਤਿ વਚੀਭੇਦੇਨ વਾ ਹਤ੍ਥਮੁਦ੍ਦਾਯ વਾ ਸਙ੍ਘਸ੍ਸ ਨਿਨ੍ਨਂ ਹੁਤ੍વਾ ਠਿਤਂ। ਅਤ੍ਤਨੋ ਪਰਿਣਾਮੇਯ੍ਯਾਤਿ ‘‘ਇਦਂ ਮਯ੍ਹਂ ਦੇਥਾ’’ਤਿਆਦੀਨਿ વਦਨ੍ਤੋ ਅਤ੍ਤਨਿਨ੍ਨਂ ਕਰੇਯ੍ਯ। ਸਚੇ ਪਨ ਸਙ੍ਘਸ੍ਸ ਦਿਨ੍ਨਂ ਹੋਤਿ, ਤਂ ਗਹੇਤੁਂ ਨ વਟ੍ਟਤਿ, ਸਙ੍ਘਸ੍ਸੇવ ਦਾਤਬ੍ਬਂ। ਪਰਿਣਤਂ ਪਨ ਸਹਧਮ੍ਮਿਕਾਨਂ વਾ ਗਿਹੀਨਂ વਾ ਅਨ੍ਤਮਸੋ ਮਾਤੁਸਨ੍ਤਕਮ੍ਪਿ ਅਤ੍ਤਨੋ ਪਰਿਣਾਮੇਨ੍ਤਸ੍ਸ ਪਯੋਗੇ ਦੁਕ੍ਕਟਂ, ਪਟਿਲਾਭੇਨ ਨਿਸ੍ਸਗ੍ਗਿਯਂ ਹੋਤਿ।
Dasame saṅghikanti saṅghassa santakaṃ. So hi saṅghassa pariṇatattā hatthe anāruḷhopi ekena pariyāyena saṅghasantako hoti. Lābhanti labhitabbaṃ cīvarādivatthuṃ. Pariṇatanti ‘‘dassāma karissāmā’’ti vacībhedena vā hatthamuddāya vā saṅghassa ninnaṃ hutvā ṭhitaṃ. Attano pariṇāmeyyāti ‘‘idaṃ mayhaṃ dethā’’tiādīni vadanto attaninnaṃ kareyya. Sace pana saṅghassa dinnaṃ hoti, taṃ gahetuṃ na vaṭṭati, saṅghasseva dātabbaṃ. Pariṇataṃ pana sahadhammikānaṃ vā gihīnaṃ vā antamaso mātusantakampi attano pariṇāmentassa payoge dukkaṭaṃ, paṭilābhena nissaggiyaṃ hoti.
ਸਾવਤ੍ਥਿਯਂ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ਪਰਿਣਾਮਨવਤ੍ਥੁਸ੍ਮਿਂ ਪਞ੍ਞਤ੍ਤਂ, ਸਾਧਾਰਣਪਞ੍ਞਤ੍ਤਿ, ਅਨਾਣਤ੍ਤਿਕਂ, ਪਰਿਣਤੇ વੇਮਤਿਕਸ੍ਸ, ਅਪਰਿਣਤੇ ਪਰਿਣਤਸਞ੍ਞਿਨੋ ਚੇવ વੇਮਤਿਕਸ੍ਸ ਚ, ਸਙ੍ਘਚੇਤਿਯਪੁਗ੍ਗਲੇਸੁ ਯਸ੍ਸ ਕਸ੍ਸਚਿ ਪਰਿਣਤਂ ਅਞ੍ਞਸਙ੍ਘਾਦੀਨਂ ਪਰਿਣਾਮੇਨ੍ਤਸ੍ਸ ਚ ਦੁਕ੍ਕਟਂ। ਅਪਰਿਣਤਸਞ੍ਞਿਨੋ, ‘‘ਕਤ੍ਥ ਦੇਮਾ’’ਤਿ ਪੁਚ੍ਛਿਤੇ ‘‘ਯਤ੍ਥ ਤੁਮ੍ਹਾਕਂ ਚਿਤ੍ਤਂ ਪਸੀਦਤਿ, ਤਤ੍ਥ ਦੇਥ, ਤੁਮ੍ਹਾਕਂ ਦੇਯ੍ਯਧਮ੍ਮੋ ਪਰਿਭੋਗਂ વਾ ਲਭੇਯ੍ਯਾ’’ਤਿਆਦੀਨਿ વਦਨ੍ਤਸ੍ਸ, ਉਮ੍ਮਤ੍ਤਕਾਦੀਨਞ੍ਚ ਅਨਾਪਤ੍ਤਿ। ਸਙ੍ਘੇ ਪਰਿਣਤਭਾવੋ, ਤਂ ਞਤ੍વਾ ਅਤ੍ਤਨੋ ਪਰਿਣਾਮਨਂ, ਪਟਿਲਾਭੋਤਿ ਇਮਾਨੇਤ੍ਥ ਤੀਣਿ ਅਙ੍ਗਾਨਿ। ਸਮੁਟ੍ਠਾਨਾਦੀਨਿ ਅਦਿਨ੍ਨਾਦਾਨਸਦਿਸਾਨੀਤਿ।
Sāvatthiyaṃ chabbaggiye bhikkhū ārabbha pariṇāmanavatthusmiṃ paññattaṃ, sādhāraṇapaññatti, anāṇattikaṃ, pariṇate vematikassa, apariṇate pariṇatasaññino ceva vematikassa ca, saṅghacetiyapuggalesu yassa kassaci pariṇataṃ aññasaṅghādīnaṃ pariṇāmentassa ca dukkaṭaṃ. Apariṇatasaññino, ‘‘kattha demā’’ti pucchite ‘‘yattha tumhākaṃ cittaṃ pasīdati, tattha detha, tumhākaṃ deyyadhammo paribhogaṃ vā labheyyā’’tiādīni vadantassa, ummattakādīnañca anāpatti. Saṅghe pariṇatabhāvo, taṃ ñatvā attano pariṇāmanaṃ, paṭilābhoti imānettha tīṇi aṅgāni. Samuṭṭhānādīni adinnādānasadisānīti.
ਪਰਿਣਤਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Pariṇatasikkhāpadavaṇṇanā niṭṭhitā.
ਪਤ੍ਤવਗ੍ਗੋ ਤਤਿਯੋ।
Pattavaggo tatiyo.
ਇਤਿ ਕਙ੍ਖਾવਿਤਰਣਿਯਾ ਪਾਤਿਮੋਕ੍ਖવਣ੍ਣਨਾਯ
Iti kaṅkhāvitaraṇiyā pātimokkhavaṇṇanāya
ਨਿਸ੍ਸਗ੍ਗਿਯਪਾਚਿਤ੍ਤਿਯવਣ੍ਣਨਾ ਨਿਟ੍ਠਿਤਾ।
Nissaggiyapācittiyavaṇṇanā niṭṭhitā.
