| Library / Tipiṭaka / តិបិដក • Tipiṭaka / បដិសម្ភិទាមគ្គបាឡិ • Paṭisambhidāmaggapāḷi |
៦. បាដិហារិយកថា
6. Pāṭihāriyakathā
៣០. ‘‘តីណិមានិ , ភិក្ខវេ 1, បាដិហារិយានិ។ កតមានិ តីណិ? ឥទ្ធិបាដិហារិយំ, អាទេសនាបាដិហារិយំ, អនុសាសនីបាដិហារិយំ។
30. ‘‘Tīṇimāni , bhikkhave 2, pāṭihāriyāni. Katamāni tīṇi? Iddhipāṭihāriyaṃ, ādesanāpāṭihāriyaṃ, anusāsanīpāṭihāriyaṃ.
‘‘កតមញ្ច, ភិក្ខវេ, ឥទ្ធិបាដិហារិយំ? ឥធ, ភិក្ខវេ, ឯកច្ចោ អនេកវិហិតំ ឥទ្ធិវិធំ បច្ចនុភោតិ – ឯកោបិ ហុត្វា ពហុធា ហោតិ , ពហុធាបិ ហុត្វា ឯកោ ហោតិ; អាវិភាវំ តិរោភាវំ…បេ.… យាវ ព្រហ្មលោកាបិ កាយេន វសំ វត្តេតិ។ ឥទំ វុច្ចតិ, ភិក្ខវេ, ឥទ្ធិបាដិហារិយំ។
‘‘Katamañca, bhikkhave, iddhipāṭihāriyaṃ? Idha, bhikkhave, ekacco anekavihitaṃ iddhividhaṃ paccanubhoti – ekopi hutvā bahudhā hoti , bahudhāpi hutvā eko hoti; āvibhāvaṃ tirobhāvaṃ…pe… yāva brahmalokāpi kāyena vasaṃ vatteti. Idaṃ vuccati, bhikkhave, iddhipāṭihāriyaṃ.
‘‘កតមញ្ច , ភិក្ខវេ, អាទេសនាបាដិហារិយំ? ឥធ, ភិក្ខវេ, ឯកច្ចោ និមិត្តេន អាទិសតិ – ‘ឯវម្បិ តេ មនោ, ឥត្ថម្បិ តេ មនោ, ឥតិបិ តេ ចិត្ត’ន្តិ។ សោ ពហុំ ចេបិ អាទិសតិ, តថេវ តំ ហោតិ, នោ អញ្ញថា។ ឥធ បន, ភិក្ខវេ, ឯកច្ចោ ន ហេវ ខោ និមិត្តេន អាទិសតិ, អបិ ច ខោ មនុស្សានំ វា អមនុស្សានំ វា ទេវតានំ វា សទ្ទំ សុត្វា អាទិសតិ – ‘ឯវម្បិ តេ មនោ, ឥត្ថម្បិ តេ មនោ, ឥតិបិ តេ ចិត្ត’ន្តិ។ សោ ពហុំ ចេបិ អាទិសតិ, តថេវ តំ ហោតិ, នោ អញ្ញថា។ ឥធ បន, ភិក្ខវេ, ឯកច្ចោ ន ហេវ ខោ និមិត្តេន អាទិសតិ, នបិ មនុស្សានំ វា អមនុស្សានំ វា ទេវតានំ វា សទ្ទំ សុត្វា អាទិសតិ, អបិ ច ខោ វិតក្កយតោ វិចារយតោ វិតក្កវិប្ផារសទ្ទំ សុត្វា អាទិសតិ – ‘ឯវម្បិ តេ មនោ, ឥត្ថម្បិ តេ មនោ, ឥតិបិ តេ ចិត្ត’ន្តិ។ សោ ពហុំ ចេបិ អាទិសតិ, តថេវ តំ ហោតិ, នោ អញ្ញថា។ ឥធ បន, ភិក្ខវេ, ឯកច្ចោ ន ហេវ ខោ និមិត្តេន អាទិសតិ, នបិ មនុស្សានំ វា អមនុស្សានំ វា ទេវតានំ វា សទ្ទំ សុត្វា អាទិសតិ, នបិ វិតក្កយតោ វិចារយតោ វិតក្កវិប្ផារសទ្ទំ សុត្វា អាទិសតិ, អបិ ច ខោ អវិតក្កំ អវិចារំ សមាធិំ សមាបន្នស្ស ចេតសា ចេតោ បរិច្ច បជានាតិ – ‘យថា ឥមស្ស ភោតោ មនោសង្ខារា បណិហិតា ឥមស្ស 3 ចិត្តស្ស អនន្តរា អមុកំ នាម វិតក្កំ វិតក្កយិស្សតី’តិ 4។ សោ ពហុំ ចេបិ អាទិសតិ, តថេវ តំ ហោតិ, នោ អញ្ញថា។ ឥទំ វុច្ចតិ, ភិក្ខវេ, អាទេសនាបាដិហារិយំ។
‘‘Katamañca, bhikkhave, ādesanāpāṭihāriyaṃ? Idha, bhikkhave, ekacco nimittena ādisati – ‘evampi te mano, itthampi te mano, itipi te citta’nti. So bahuṃ cepi ādisati, tatheva taṃ hoti, no aññathā. Idha pana, bhikkhave, ekacco na heva kho nimittena ādisati, api ca kho manussānaṃ vā amanussānaṃ vā devatānaṃ vā saddaṃ sutvā ādisati – ‘evampi te mano, itthampi te mano, itipi te citta’nti. So bahuṃ cepi ādisati, tatheva taṃ hoti, no aññathā. Idha pana, bhikkhave, ekacco na heva kho nimittena ādisati, napi manussānaṃ vā amanussānaṃ vā devatānaṃ vā saddaṃ sutvā ādisati, api ca kho vitakkayato vicārayato vitakkavipphārasaddaṃ sutvā ādisati – ‘evampi te mano, itthampi te mano, itipi te citta’nti. So bahuṃ cepi ādisati, tatheva taṃ hoti, no aññathā. Idha pana, bhikkhave, ekacco na heva kho nimittena ādisati, napi manussānaṃ vā amanussānaṃ vā devatānaṃ vā saddaṃ sutvā ādisati, napi vitakkayato vicārayato vitakkavipphārasaddaṃ sutvā ādisati, api ca kho avitakkaṃ avicāraṃ samādhiṃ samāpannassa cetasā ceto paricca pajānāti – ‘yathā imassa bhoto manosaṅkhārā paṇihitā imassa 5 cittassa anantarā amukaṃ nāma vitakkaṃ vitakkayissatī’ti 6. So bahuṃ cepi ādisati, tatheva taṃ hoti, no aññathā. Idaṃ vuccati, bhikkhave, ādesanāpāṭihāriyaṃ.
‘‘កតមញ្ច, ភិក្ខវេ, អនុសាសនីបាដិហារិយំ? ឥធ, ភិក្ខវេ, ឯកច្ចោ ឯវមនុសាសតិ – ‘ឯវំ វិតក្កេថ, មា ឯវំ វិតក្កយិត្ថ។ ឯវំ មនសិ ករោថ, មា ឯវំ មនសិ ករិត្ថ។ ឥទំ បជហថ, ឥទំ ឧបសម្បជ្ជ វិហរថា’តិ។ ឥទំ វុច្ចតិ, ភិក្ខវេ, អនុសាសនីបាដិហារិយំ។ ឥមានិ ខោ, ភិក្ខវេ, តីណិ បាដិហារិយានិ’’។
‘‘Katamañca, bhikkhave, anusāsanīpāṭihāriyaṃ? Idha, bhikkhave, ekacco evamanusāsati – ‘evaṃ vitakketha, mā evaṃ vitakkayittha. Evaṃ manasi karotha, mā evaṃ manasi karittha. Idaṃ pajahatha, idaṃ upasampajja viharathā’ti. Idaṃ vuccati, bhikkhave, anusāsanīpāṭihāriyaṃ. Imāni kho, bhikkhave, tīṇi pāṭihāriyāni’’.
៣១. នេក្ខម្មំ ឥជ្ឈតីតិ – ឥទ្ធិ។ កាមច្ឆន្ទំ បដិហរតីតិ – បាដិហារិយំ។ យេ តេន នេក្ខម្មេន សមន្នាគតា, សព្ពេ តេ វិសុទ្ធចិត្តា អនាវិលសង្កប្បាតិ – អាទេសនាបាដិហារិយំ។ ‘‘តំ ខោ បន នេក្ខម្មំ ឯវំ អាសេវិតព្ពំ, ឯវំ ភាវេតព្ពំ , ឯវំ ពហុលីកាតព្ពំ, ឯវំ តទនុធម្មតា សតិ ឧបដ្ឋាបេតព្ពា’’តិ – អនុសាសនីបាដិហារិយំ។
31. Nekkhammaṃ ijjhatīti – iddhi. Kāmacchandaṃ paṭiharatīti – pāṭihāriyaṃ. Ye tena nekkhammena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘Taṃ kho pana nekkhammaṃ evaṃ āsevitabbaṃ, evaṃ bhāvetabbaṃ , evaṃ bahulīkātabbaṃ, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ.
អព្យាបាទោ ឥជ្ឈតីតិ – ឥទ្ធិ។ ព្យាបាទំ បដិហរតីតិ – បាដិហារិយំ។ យេ តេន អព្យាបាទេន សមន្នាគតា, សព្ពេ តេ វិសុទ្ធចិត្តា អនាវិលសង្កប្បាតិ – អាទេសនាបាដិហារិយំ។ ‘‘សោ ខោ បន អព្យាបាទោ ឯវំ អាសេវិតព្ពោ, ឯវំ ភាវេតព្ពោ, ឯវំ ពហុលីកាតព្ពោ, ឯវំ តទនុធម្មតា សតិ ឧបដ្ឋាបេតព្ពា’’តិ – អនុសាសនីបាដិហារិយំ។
Abyāpādo ijjhatīti – iddhi. Byāpādaṃ paṭiharatīti – pāṭihāriyaṃ. Ye tena abyāpādena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘So kho pana abyāpādo evaṃ āsevitabbo, evaṃ bhāvetabbo, evaṃ bahulīkātabbo, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ.
អាលោកសញ្ញា ឥជ្ឈតីតិ – ឥទ្ធិ។ ថិនមិទ្ធំ បដិហរតីតិ – បាដិហារិយំ។ យេ តាយ អាលោកសញ្ញាយ សមន្នាគតា, សព្ពេ តេ វិសុទ្ធចិត្តា អនាវិលសង្កប្បាតិ – អាទេសនាបាដិហារិយំ។ ‘‘សា ខោ បន អាលោកសញ្ញា ឯវំ អាសេវិតព្ពា, ឯវំ ភាវេតព្ពា, ឯវំ ពហុលីកាតព្ពា, ឯវំ តទនុធម្មតា សតិ ឧបដ្ឋាបេតព្ពា’’តិ – អនុសាសនីបាដិហារិយំ។
Ālokasaññā ijjhatīti – iddhi. Thinamiddhaṃ paṭiharatīti – pāṭihāriyaṃ. Ye tāya ālokasaññāya samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘Sā kho pana ālokasaññā evaṃ āsevitabbā, evaṃ bhāvetabbā, evaṃ bahulīkātabbā, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ.
អវិក្ខេបោ ឥជ្ឈតីតិ – ឥទ្ធិ។ ឧទ្ធច្ចំ បដិហរតីតិ – បាដិហារិយំ។ យេ តេន អវិក្ខេបេន សមន្នាគតា, សព្ពេ តេ វិសុទ្ធចិត្តា អនាវិលសង្កប្បាតិ – អាទេសនាបាដិហារិយំ។ ‘‘សោ ខោ បន អវិក្ខេបោ ឯវំ អាសេវិតព្ពោ, ឯវំ ភាវេតព្ពោ, ឯវំ ពហុលីកាតព្ពោ, ឯវំ តទនុធម្មតា សតិ ឧបដ្ឋាបេតព្ពា’’តិ – អនុសាសនីបាដិហារិយំ។
Avikkhepo ijjhatīti – iddhi. Uddhaccaṃ paṭiharatīti – pāṭihāriyaṃ. Ye tena avikkhepena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘So kho pana avikkhepo evaṃ āsevitabbo, evaṃ bhāvetabbo, evaṃ bahulīkātabbo, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ.
ធម្មវវត្ថានំ ឥជ្ឈតីតិ – ឥទ្ធិ។ វិចិកិច្ឆំ បដិហរតីតិ – បាដិហារិយំ។ យេ តេន ធម្មវវត្ថានេន សមន្នាគតា, សព្ពេ តេ វិសុទ្ធចិត្តា អនាវិលសង្កប្បាតិ – អាទេសនាបាដិហារិយំ។ ‘‘តំ ខោ បន ធម្មវវត្ថានំ ឯវំ អាសេវិតព្ពំ, ឯវំ ភាវេតព្ពំ, ឯវំ ពហុលីកាតព្ពំ, ឯវំ តទនុធម្មតា, សតិ ឧបដ្ឋាបេតព្ពា’’តិ – អនុសាសនីបាដិហារិយំ។
Dhammavavatthānaṃ ijjhatīti – iddhi. Vicikicchaṃ paṭiharatīti – pāṭihāriyaṃ. Ye tena dhammavavatthānena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘Taṃ kho pana dhammavavatthānaṃ evaṃ āsevitabbaṃ, evaṃ bhāvetabbaṃ, evaṃ bahulīkātabbaṃ, evaṃ tadanudhammatā, sati upaṭṭhāpetabbā’’ti – anusāsanīpāṭihāriyaṃ.
ញាណំ ឥជ្ឈតីតិ – ឥទ្ធិ។ អវិជ្ជំ បដិហរតីតិ – បាដិហារិយំ។ យេ តេន ញាណេន សមន្នាគតា, សព្ពេ តេ វិសុទ្ធចិត្តា អនាវិលសង្កប្បាតិ – អាទេសនាបាដិហារិយំ។ ‘‘តំ ខោ បន ញាណំ ឯវំ អាសេវិតព្ពំ, ឯវំ ភាវេតព្ពំ, ឯវំ ពហុលីកាតព្ពំ, ឯវំ តទនុធម្មតា សតិ ឧបដ្ឋាបេតព្ពា’’តិ – អនុសាសនីបាដិហារិយំ។
Ñāṇaṃ ijjhatīti – iddhi. Avijjaṃ paṭiharatīti – pāṭihāriyaṃ. Ye tena ñāṇena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘Taṃ kho pana ñāṇaṃ evaṃ āsevitabbaṃ, evaṃ bhāvetabbaṃ, evaṃ bahulīkātabbaṃ, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ.
បាមោជ្ជំ ឥជ្ឈតីតិ – ឥទ្ធិ។ អរតិំ បដិហរតីតិ – បាដិហារិយំ។ យេ តេន បាមោជ្ជេន សមន្នាគតា, សព្ពេ តេ វិសុទ្ធចិត្តា អនាវិលសង្កប្បាតិ – អាទេសនាបាដិហារិយំ។ ‘‘តំ ខោ បន បាមោជ្ជំ ឯវំ អាសេវិតព្ពំ, ឯវំ ភាវេតព្ពំ , ឯវំ ពហុលីកាតព្ពំ, ឯវំ តទនុធម្មតា សតិ ឧបដ្ឋាបេតព្ពា’’តិ – អនុសាសនីបាដិហារិយំ…បេ.…។
Pāmojjaṃ ijjhatīti – iddhi. Aratiṃ paṭiharatīti – pāṭihāriyaṃ. Ye tena pāmojjena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘Taṃ kho pana pāmojjaṃ evaṃ āsevitabbaṃ, evaṃ bhāvetabbaṃ , evaṃ bahulīkātabbaṃ, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ…pe….
បឋមំ ឈានំ ឥជ្ឈតីតិ – ឥទ្ធិ។ នីវរណេ បដិហរតីតិ – បាដិហារិយំ។ យេ តេន បឋមេន ឈានេន សមន្នាគតា, សព្ពេ តេ វិសុទ្ធចិត្តា អនាវិលសង្កប្បាតិ – អាទេសនាបាដិហារិយំ។ ‘‘តំ ខោ បន បឋមំ ឈានំ ឯវំ អាសេវិតព្ពំ, ឯវំ ភាវេតព្ពំ, ឯវំ ពហុលីកាតព្ពំ, ឯវំ តទនុធម្មតា សតិ ឧបដ្ឋាបេតព្ពា’’តិ – អនុសាសនីបាដិហារិយំ…បេ.…។
Paṭhamaṃ jhānaṃ ijjhatīti – iddhi. Nīvaraṇe paṭiharatīti – pāṭihāriyaṃ. Ye tena paṭhamena jhānena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘Taṃ kho pana paṭhamaṃ jhānaṃ evaṃ āsevitabbaṃ, evaṃ bhāvetabbaṃ, evaṃ bahulīkātabbaṃ, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ…pe….
អរហត្តមគ្គោ ឥជ្ឈតីតិ – ឥទ្ធិ។ សព្ពកិលេសេ បដិហរតីតិ – បាដិហារិយំ។ យេ តេន អរហត្តមគ្គេន សមន្នាគតា, សព្ពេ តេ វិសុទ្ធចិត្តា អនាវិលសង្កប្បាតិ – អាទេសនាបាដិហារិយំ។ ‘‘សោ ខោ បន អរហត្តមគ្គោ ឯវំ អាសេវិតព្ពោ, ឯវំ ភាវេតព្ពោ, ឯវំ ពហុលីកាតព្ពោ, ឯវំ តទនុធម្មតា សតិ ឧបដ្ឋាបេតព្ពា’’តិ – អនុសាសនីបាដិហារិយំ។
Arahattamaggo ijjhatīti – iddhi. Sabbakilese paṭiharatīti – pāṭihāriyaṃ. Ye tena arahattamaggena samannāgatā, sabbe te visuddhacittā anāvilasaṅkappāti – ādesanāpāṭihāriyaṃ. ‘‘So kho pana arahattamaggo evaṃ āsevitabbo, evaṃ bhāvetabbo, evaṃ bahulīkātabbo, evaṃ tadanudhammatā sati upaṭṭhāpetabbā’’ti – anusāsanīpāṭihāriyaṃ.
៣២. នេក្ខម្មំ ឥជ្ឈតីតិ – ឥទ្ធិ។ កាមច្ឆន្ទំ បដិហរតីតិ – បាដិហារិយំ។ យា ច ឥទ្ធិ យញ្ច បាដិហារិយំ, ឥទំ វុច្ចតិ ឥទ្ធិបាដិហារិយំ។ អព្យាបាទោ ឥជ្ឈតីតិ – ឥទ្ធិ។ ព្យាបាទំ បដិហរតីតិ – បាដិហារិយំ។ យា ច ឥទ្ធិ យញ្ច បាដិហារិយំ, ឥទំ វុច្ចតិ ឥទ្ធិបាដិហារិយំ។ អាលោកសញ្ញា ឥជ្ឈតីតិ – ឥទ្ធិ។ ថិនមិទ្ធំ បដិហរតីតិ – បាដិហារិយំ…បេ.… អរហត្តមគ្គោ ឥជ្ឈតីតិ – ឥទ្ធិ។ សព្ពកិលេសេ បដិហរតីតិ – បាដិហារិយំ។ យា ច ឥទ្ធិ យញ្ច បាដិហារិយំ, ឥទំ វុច្ចតិ ឥទ្ធិបាដិហារិយន្តិ ។
32. Nekkhammaṃ ijjhatīti – iddhi. Kāmacchandaṃ paṭiharatīti – pāṭihāriyaṃ. Yā ca iddhi yañca pāṭihāriyaṃ, idaṃ vuccati iddhipāṭihāriyaṃ. Abyāpādo ijjhatīti – iddhi. Byāpādaṃ paṭiharatīti – pāṭihāriyaṃ. Yā ca iddhi yañca pāṭihāriyaṃ, idaṃ vuccati iddhipāṭihāriyaṃ. Ālokasaññā ijjhatīti – iddhi. Thinamiddhaṃ paṭiharatīti – pāṭihāriyaṃ…pe… arahattamaggo ijjhatīti – iddhi. Sabbakilese paṭiharatīti – pāṭihāriyaṃ. Yā ca iddhi yañca pāṭihāriyaṃ, idaṃ vuccati iddhipāṭihāriyanti .
បាដិហារិយកថា និដ្ឋិតា។
Pāṭihāriyakathā niṭṭhitā.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / បដិសម្ភិទាមគ្គ-អដ្ឋកថា • Paṭisambhidāmagga-aṭṭhakathā / បាដិហារិយកថាវណ្ណនា • Pāṭihāriyakathāvaṇṇanā
