| Library / Tipiṭaka / তিপিটক • Tipiṭaka / খুদ্দসিক্খা-মূলসিক্খা • Khuddasikkhā-mūlasikkhā |
৩৪. পথৰীনিদ্দেসৰণ্ণনা
34. Pathavīniddesavaṇṇanā
২৪২. জাতা (পাচি॰ ৮৬; পাচি॰ অট্ঠ॰ ৮৬-৮৮; কঙ্খা॰ অট্ঠ॰ পথৰীখণনসিক্খাপদৰণ্ণনা) অজাতাতি দুৰিধা পথৰীতি অত্থো। ইদানি তদুভযং দস্সেতুং ‘‘সুদ্ধমত্তিকপংসুকা’’তিআদিমাহ। তত্থ সুদ্ধমত্তিকপংসুকা চ অদড্ঢা চ বহুমত্তিকপংসুকা চ চাতুমাসাধিকোৰট্ঠপংসুমত্তিকরাসি চ জাতপথৰীতি সম্বন্ধো। এত্থ পন অদড্ঢাতি উদ্ধনপচনকুম্ভকারাৰাপভাজনপচনাদিৰসেন তথা তথা অদড্ঢা। অযং পন ৰিসুং নত্থি, সুদ্ধপংসুআদীসু অঞ্ঞতরাৰ ৰেদিতব্বা। সুদ্ধপংসু সুদ্ধমত্তিকা যেভুয্যেনপংসু যেভুয্যেনমত্তিকা অতিরেকচাতুমাসাধিকোৰট্ঠমত্তিকাপংসুপুঞ্জা চ অদড্ঢা চাতি অযং সব্বাপি জাতপথৰীতি ৰেদিতব্বা।
242. Jātā (pāci. 86; pāci. aṭṭha. 86-88; kaṅkhā. aṭṭha. pathavīkhaṇanasikkhāpadavaṇṇanā) ajātāti duvidhā pathavīti attho. Idāni tadubhayaṃ dassetuṃ ‘‘suddhamattikapaṃsukā’’tiādimāha. Tattha suddhamattikapaṃsukā ca adaḍḍhā ca bahumattikapaṃsukā ca cātumāsādhikovaṭṭhapaṃsumattikarāsi ca jātapathavīti sambandho. Ettha pana adaḍḍhāti uddhanapacanakumbhakārāvāpabhājanapacanādivasena tathā tathā adaḍḍhā. Ayaṃ pana visuṃ natthi, suddhapaṃsuādīsu aññatarāva veditabbā. Suddhapaṃsu suddhamattikā yebhuyyenapaṃsu yebhuyyenamattikā atirekacātumāsādhikovaṭṭhamattikāpaṃsupuñjā ca adaḍḍhā cāti ayaṃ sabbāpi jātapathavīti veditabbā.
২৪৩. দুতিযাতি অজাতপথৰীতি অত্থো। ৰুত্তরাসীতি মত্তিকরাসি চ পংসুরাসি চ চাতুমাসোমৰট্ঠকো অজাতপথৰীতি অত্থো।
243.Dutiyāti ajātapathavīti attho. Vuttarāsīti mattikarāsi ca paṃsurāsi ca cātumāsomavaṭṭhako ajātapathavīti attho.
২৪৪. ইদানি যেভুয্যেনমত্তিকা যেভুয্যেনপংসুকা যেভুয্যেনসক্খরাতি এৰং ৰুত্তাসু কিত্তাৰতা যেভুয্যতা হোতীতি তং দস্সেতুং ‘‘দ্ৰে ভাগা’’তিআদিমাহ। তত্থ তীসু ভাগেসু দ্ৰে ভাগা মত্তিকা যস্সা ভূমিযা, এসা যেভুয্যমত্তিকাতি সম্বন্ধো। উপড্ঢপংসুআদযোপি কপ্পিযা এৰ অকপ্পিযভাগস্স অনতিরেকতো। ‘‘যেভুয্যেনমত্তিকা যেভুয্যেনপংসুকা’’তি (পাচি॰ ৮৬) হি ৰুত্তং, ন ‘‘উপড্ঢমত্তিকা, উপড্ঢপংসুকা’’তি। সেসেসুপীতি যেভুয্যপংসুকাদীসুপি।
244. Idāni yebhuyyenamattikā yebhuyyenapaṃsukā yebhuyyenasakkharāti evaṃ vuttāsu kittāvatā yebhuyyatā hotīti taṃ dassetuṃ ‘‘dve bhāgā’’tiādimāha. Tattha tīsu bhāgesu dve bhāgā mattikā yassā bhūmiyā, esā yebhuyyamattikāti sambandho. Upaḍḍhapaṃsuādayopi kappiyā eva akappiyabhāgassa anatirekato. ‘‘Yebhuyyenamattikā yebhuyyenapaṃsukā’’ti (pāci. 86) hi vuttaṃ, na ‘‘upaḍḍhamattikā, upaḍḍhapaṃsukā’’ti. Sesesupīti yebhuyyapaṃsukādīsupi.
২৪৫. জাতসঞ্ঞিস্স পাচিত্তীতি সম্বন্ধো। দ্ৰেল়্হস্স ৰিমতিস্স দুক্কটং। জাতে অজাতসঞ্ঞিস্স অনাপত্তি।
245. Jātasaññissa pācittīti sambandho. Dveḷhassa vimatissa dukkaṭaṃ. Jāte ajātasaññissa anāpatti.
২৪৬. একাযাণত্তিযা একাতি সচে সকিং আণত্তো দিৰসম্পি খণতি, আণাপকস্স একা এৰাতি অত্থো। ৰাচসোতি ৰাচায ৰাচাযাতি অত্থো।
246.Ekāyāṇattiyā ekāti sace sakiṃ āṇatto divasampi khaṇati, āṇāpakassa ekā evāti attho. Vācasoti vācāya vācāyāti attho.
২৪৭. এত্থ ‘‘জালেহি অগ্গি’’ন্তি ৰা ৰত্তুং ন ৰট্টতি। অনিযমেত্ৰা পন ‘‘পোক্খরণিং খণ, পথৰিং খণ, ৰাপিং খণ, আৰাটং খণ, কন্দং খণা’’তি ৰত্তুং ৰট্টতি।
247. Ettha ‘‘jālehi aggi’’nti vā vattuṃ na vaṭṭati. Aniyametvā pana ‘‘pokkharaṇiṃ khaṇa, pathaviṃ khaṇa, vāpiṃ khaṇa, āvāṭaṃ khaṇa, kandaṃ khaṇā’’ti vattuṃ vaṭṭati.
২৪৮. এদিসন্তি এত্থ অঞ্ঞম্পি এৰরূপং কপ্পিযৰোহারৰচনং ৰট্টতীতি অধিপ্পাযো।
248.Edisanti ettha aññampi evarūpaṃ kappiyavohāravacanaṃ vaṭṭatīti adhippāyo.
২৪৯. কোপেতুং লব্ভন্তি সম্বন্ধো, ঘটাদীহি গহেতুং সক্কুণেয্যকং উস্সিঞ্চনীযকদ্দমং।
249. Kopetuṃ labbhanti sambandho, ghaṭādīhi gahetuṃ sakkuṇeyyakaṃ ussiñcanīyakaddamaṃ.
২৫১-২. উদকসন্তিকে পতিতেতি সম্বন্ধো। উদকে পতিতং পন সব্বকালং কপ্পিযমেৰ, তস্মা অকপ্পিযং দস্সেতুং ‘‘উদকসন্তিকে’’তি ৰুত্তং। পাসাণে লগ্গে রজে চ নৰসোণ্ডিযা পতিতে রজে চাতি সম্বন্ধো। অব্ভোকাসুট্ঠিতে ৰম্মিকে চ মত্তিকাকুট্টে চাতি অত্থো, তথা এতেপি সব্বে চাতুমাসাধিকোৰট্ঠা ন কোপেতব্বাতি অত্থো।
251-2. Udakasantike patiteti sambandho. Udake patitaṃ pana sabbakālaṃ kappiyameva, tasmā akappiyaṃ dassetuṃ ‘‘udakasantike’’ti vuttaṃ. Pāsāṇe lagge raje ca navasoṇḍiyā patite raje cāti sambandho. Abbhokāsuṭṭhite vammike ca mattikākuṭṭe cāti attho, tathā etepi sabbe cātumāsādhikovaṭṭhā na kopetabbāti attho.
২৫৩-৫. ভূমিং ৰিকোপযং থম্ভাদিং গণ্হিতুং ন চ কপ্পতীতি সম্বন্ধো। ধারাযাতি পস্সাৰধারায। পদং দস্সেস্সামীতি সম্বন্ধো।
253-5. Bhūmiṃ vikopayaṃ thambhādiṃ gaṇhituṃ na ca kappatīti sambandho. Dhārāyāti passāvadhārāya. Padaṃ dassessāmīti sambandho.
২৫৭. সেকোতি সিঞ্চনং। ভূমিযা অল্লহত্থং ঠপেত্ৰাতি সম্বন্ধো।
257.Sekoti siñcanaṃ. Bhūmiyā allahatthaṃ ṭhapetvāti sambandho.
২৫৮. অৰসে সতীতি হত্থদাহাদীসু আপদাসূতি অত্থো। পথৰীৰিনিচ্ছযো।
258.Avase satīti hatthadāhādīsu āpadāsūti attho. Pathavīvinicchayo.
পথৰীনিদ্দেসৰণ্ণনা নিট্ঠিতা।
Pathavīniddesavaṇṇanā niṭṭhitā.
