| Library / Tipiṭaka / তিপিটক • Tipiṭaka / খুদ্দসিক্খা-মূলসিক্খা • Khuddasikkhā-mūlasikkhā |
৩৫. পরিক্খারনিদ্দেসৰণ্ণনা
35. Parikkhāraniddesavaṇṇanā
২৫৯-২৬০. গিরিকূটন্তি মকরদন্তকং। সিব্বিতুঞ্চ ছিন্দিতুঞ্চ ন ৰট্টতীতি সব্বত্থ যোজনা। দণ্ডেতি ছত্তদণ্ডে।
259-260.Girikūṭanti makaradantakaṃ. Sibbituñca chindituñca na vaṭṭatīti sabbattha yojanā. Daṇḍeti chattadaṇḍe.
২৬১. সিব্বিতুং ৰা পঞ্জরং ৰিনন্ধিতুং ৰা থিরত্থং ছত্তে বন্ধিতুং দণ্ডে লেখা ৰট্টতীতি সম্বন্ধো। সচে ৰুত্তপ্পকারং অকপ্পিযছত্তং লভতি, ঘটকম্পি ৰাল়রূপম্পি ছিন্দিত্ৰা ধারেতব্বং, লেখাপি ঘংসেত্ৰা অপনেতব্বা, সুত্তকেন ৰা দণ্ডো ৰেঠেতব্বো।
261. Sibbituṃ vā pañjaraṃ vinandhituṃ vā thiratthaṃ chatte bandhituṃ daṇḍe lekhā vaṭṭatīti sambandho. Sace vuttappakāraṃ akappiyachattaṃ labhati, ghaṭakampi vāḷarūpampi chinditvā dhāretabbaṃ, lekhāpi ghaṃsetvā apanetabbā, suttakena vā daṇḍo veṭhetabbo.
২৬২. অনুৰাতং সন্ধায ‘‘অন্তে ৰা’’তি ৰুত্তং। দ্ৰিন্নং পট্টানং সঙ্ঘটিতট্ঠানং সন্ধায ‘‘পট্টমুখে ৰাপী’’তি ৰুত্তং। ৰরকসীসাকারেন সিব্বনং সন্ধায ‘‘ৰেণিকা’’তি চ সতপদাকারেন সিব্বনং সন্ধায ‘‘সঙ্খলিকাপি ৰা’’তি চ ৰুত্তং। সতপদিসদিসং অঞ্ঞং ৰা সূচিৰিকারং ন কপ্পতি, পকতিসূচিকম্মমেৰ ৰট্টতীতি অত্থো। পাল়িকণ্ণিকআদিকং চীৰরে ন চ কপ্পতীতি সম্বন্ধো।
262. Anuvātaṃ sandhāya ‘‘ante vā’’ti vuttaṃ. Dvinnaṃ paṭṭānaṃ saṅghaṭitaṭṭhānaṃ sandhāya ‘‘paṭṭamukhe vāpī’’ti vuttaṃ. Varakasīsākārena sibbanaṃ sandhāya ‘‘veṇikā’’ti ca satapadākārena sibbanaṃ sandhāya ‘‘saṅkhalikāpi vā’’ti ca vuttaṃ. Satapadisadisaṃ aññaṃ vā sūcivikāraṃ na kappati, pakatisūcikammameva vaṭṭatīti attho. Pāḷikaṇṇikaādikaṃ cīvare na ca kappatīti sambandho.
২৬৩-৪. চতুকোণাৰ (পারা॰ অট্ঠ॰ ১.৮৫) কপ্পরেতি সম্বন্ধো। অগ্ঘিকন্তি অগ্ঘিযং চেতিযসদিসং। এত্থাতি গণ্ঠিপাসকপট্টে। কোণসুত্তা চ পীল়কাতি ন কেৰলং চতুকোণা গণ্ঠিকপাসকপট্টাৰ কপ্পন্তি, অথ খো দুৰিঞ্ঞেয্যা কোণসুত্তপীল়কা চ কপ্পরেতি অত্থো। গন্ধং তেলং ৰাতি গন্ধং ৰা তেলং ৰা।
263-4. Catukoṇāva (pārā. aṭṭha. 1.85) kappareti sambandho. Agghikanti agghiyaṃ cetiyasadisaṃ. Etthāti gaṇṭhipāsakapaṭṭe. Koṇasuttā ca pīḷakāti na kevalaṃ catukoṇā gaṇṭhikapāsakapaṭṭāva kappanti, atha kho duviññeyyā koṇasuttapīḷakā ca kappareti attho. Gandhaṃ telaṃ vāti gandhaṃ vā telaṃ vā.
২৬৫. রত্তন্তি (পারা॰ অট্ঠ॰ ১.৮৫) রজিতং। অঞ্ঞেন ৰাতি মুগ্গরাদিনা ৰা। কত্ৰাতি ঠপেত্ৰা। পহারে ন চ মুট্ঠিনাতি মুট্ঠিনা ন পহারেয্যাতি অত্থো।
265.Rattanti (pārā. aṭṭha. 1.85) rajitaṃ. Aññena vāti muggarādinā vā. Katvāti ṭhapetvā. Pahāre na ca muṭṭhināti muṭṭhinā na pahāreyyāti attho.
২৬৬-৭. ছত্তৰট্টিযং (পারা॰ অট্ঠ॰ ১.৮৫) লেখং ঠপেত্ৰা ধম্মকরণে লেখা ন ৰট্টতীতি সম্বন্ধো। কুঞ্চিকায চ পিপ্ফলে চ মণিকা চ পীল়কা চ ন ৰট্টতীতি সম্বন্ধো। তত্থ মণিকাতি একা এৰ ৰট্টমণিকা। পীল়কা মুত্তরাজিসদিসা বহূ।
266-7. Chattavaṭṭiyaṃ (pārā. aṭṭha. 1.85) lekhaṃ ṭhapetvā dhammakaraṇe lekhā na vaṭṭatīti sambandho. Kuñcikāya ca pipphale ca maṇikā ca pīḷakā ca na vaṭṭatīti sambandho. Tattha maṇikāti ekā eva vaṭṭamaṇikā. Pīḷakā muttarājisadisā bahū.
২৬৮-৯. মালাদ্যরণিযন্তি (পারা॰ অট্ঠ॰ ১.৮৫) অরণিযং মালাদি ৰণ্ণমট্ঠং ন ৰট্টতীতি সম্বন্ধো। এৰং সব্বত্থ। তিপুসীসমযে পত্তমণ্ডলে ভিত্তিকম্মঞ্চ ন ৰট্টতীতি অত্থো। হিত্ৰাতি ঠপেত্ৰা। সূচিসণ্ডাসকো (পারা॰ অট্ঠ॰ ১.৮৫) নাম সূচিং ডংসাপেত্ৰা ঘংসিতুং কতো দারুমযো। ‘‘অনুজানামি, ভিক্খৰে, মকরদন্তকং ছিন্দিতু’’ন্তি (চূল়ৰ॰ ২৫৩) ৰুত্তত্তা পত্তমণ্ডলে মকরদন্তকং ৰট্টতি, অঞ্ঞং ভিত্তিকম্মাদিৰিকারমেৰ ন ৰট্টতি, তস্মা গিরিকূটং পত্তমণ্ডলে ঠপেত্ৰা অৰসেসে ন ৰট্টতীতি ৰেদিতব্বং।
268-9.Mālādyaraṇiyanti (pārā. aṭṭha. 1.85) araṇiyaṃ mālādi vaṇṇamaṭṭhaṃ na vaṭṭatīti sambandho. Evaṃ sabbattha. Tipusīsamaye pattamaṇḍale bhittikammañca na vaṭṭatīti attho. Hitvāti ṭhapetvā. Sūcisaṇḍāsako (pārā. aṭṭha. 1.85) nāma sūciṃ ḍaṃsāpetvā ghaṃsituṃ kato dārumayo. ‘‘Anujānāmi, bhikkhave, makaradantakaṃ chinditu’’nti (cūḷava. 253) vuttattā pattamaṇḍale makaradantakaṃ vaṭṭati, aññaṃ bhittikammādivikārameva na vaṭṭati, tasmā girikūṭaṃ pattamaṇḍale ṭhapetvā avasese na vaṭṭatīti veditabbaṃ.
২৭২. সেনাসনেতি (পারা॰ অট্ঠ॰ ১.৮৫) পাসাদাদিসেনাসনেতি অত্থো।
272.Senāsaneti (pārā. aṭṭha. 1.85) pāsādādisenāsaneti attho.
২৭৩. পুমিত্থিরূপরহিতন্তি পুরিসরূপইত্থিরূপরহিতন্তি অত্থো। পরিক্খারৰিনিচ্ছযো।
273.Pumitthirūparahitanti purisarūpaitthirūparahitanti attho. Parikkhāravinicchayo.
পরিক্খারনিদ্দেসৰণ্ণনা নিট্ঠিতা।
Parikkhāraniddesavaṇṇanā niṭṭhitā.
