| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) |
੫. ਪਠਮਯੋਧਾਜੀવਸੁਤ੍ਤવਣ੍ਣਨਾ
5. Paṭhamayodhājīvasuttavaṇṇanā
੭੫. ਪਞ੍ਚਮੇ ਯੋਧਾਜੀવਾਤਿ ਯੁਦ੍ਧੂਪਜੀવਿਨੋ। ਰਜਗ੍ਗਨ੍ਤਿ ਹਤ੍ਥਿਅਸ੍ਸਾਦੀਨਂ ਪਾਦਪ੍ਪਹਾਰਭਿਨ੍ਨਾਯ ਭੂਮਿਯਾ ਉਗ੍ਗਤਂ ਰਜਕ੍ਖਨ੍ਧਂ। ਨ ਸਨ੍ਥਮ੍ਭਤੀਤਿ ਸਨ੍ਥਮ੍ਭਿਤ੍વਾ ਠਾਤੁਂ ਨ ਸਕ੍ਕੋਤਿ। ਸਹਤਿ ਰਜਗ੍ਗਨ੍ਤਿ ਰਜਕ੍ਖਨ੍ਧਂ ਦਿਸ੍વਾਪਿ ਅਧਿવਾਸੇਤਿ। ਧਜਗ੍ਗਨ੍ਤਿ ਹਤ੍ਥਿਅਸ੍ਸਦੀਨਂ ਪਿਟ੍ਠੇਸੁ વਾ ਰਥੇਸੁ વਾ ਉਸ੍ਸਾਪਿਤਾਨਂ ਧਜਾਨਂ ਅਗ੍ਗਂ। ਉਸ੍ਸਾਰਣਨ੍ਤਿ ਹਤ੍ਥਿਅਸ੍ਸਰਥਾਨਞ੍ਚੇવ ਬਲਕਾਯਸ੍ਸ ਚ ਉਚ੍ਚਾਸਦ੍ਦਮਹਾਸਦ੍ਦਂ। ਸਮ੍ਪਹਾਰੇਤਿ ਸਮਾਗਤੇ ਅਪ੍ਪਮਤ੍ਤਕੇਪਿ ਪਹਾਰੇ। ਹਞ੍ਞਤੀਤਿ વਿਹਞ੍ਞਤਿ વਿਘਾਤਂ ਆਪਜ੍ਜਤਿ। ਬ੍ਯਾਪਜ੍ਜਤੀਤਿ વਿਪਤ੍ਤਿਂ ਆਪਜ੍ਜਤਿ, ਪਕਤਿਭਾવਂ ਜਹਤਿ। ਸਹਤਿ ਸਮ੍ਪਹਾਰਨ੍ਤਿ ਦ੍વੇ ਤਯੋ ਪਹਾਰੇ ਪਤ੍વਾਪਿ ਸਹਤਿ ਅਧਿવਾਸੇਤਿ। ਤਮੇવ ਸਙ੍ਗਾਮਸੀਸਨ੍ਤਿ ਤਂਯੇવ ਜਯਕ੍ਖਨ੍ਧਾવਾਰਟ੍ਠਾਨਂ। ਅਜ੍ਝਾવਸਤੀਤਿ ਸਤ੍ਤਾਹਮਤ੍ਤਂ ਅਭਿਭવਿਤ੍વਾ ਆવਸਤਿ। ਕਿਂ ਕਾਰਣਾ ? ਲਦ੍ਧਪਹਾਰਾਨਂ ਪਹਾਰਜਗ੍ਗਨਤ੍ਥਞ੍ਚੇવ ਕਤਕਮ੍ਮਾਨਂ વਿਸੇਸਂ ਞਤ੍વਾ ਠਾਨਨ੍ਤਰਦਾਨਤ੍ਥਞ੍ਚ ਇਸ੍ਸਰਿਯਸੁਖਾਨੁਭવਨਤ੍ਥਞ੍ਚ।
75. Pañcame yodhājīvāti yuddhūpajīvino. Rajagganti hatthiassādīnaṃ pādappahārabhinnāya bhūmiyā uggataṃ rajakkhandhaṃ. Na santhambhatīti santhambhitvā ṭhātuṃ na sakkoti. Sahati rajagganti rajakkhandhaṃ disvāpi adhivāseti. Dhajagganti hatthiassadīnaṃ piṭṭhesu vā rathesu vā ussāpitānaṃ dhajānaṃ aggaṃ. Ussāraṇanti hatthiassarathānañceva balakāyassa ca uccāsaddamahāsaddaṃ. Sampahāreti samāgate appamattakepi pahāre. Haññatīti vihaññati vighātaṃ āpajjati. Byāpajjatīti vipattiṃ āpajjati, pakatibhāvaṃ jahati. Sahati sampahāranti dve tayo pahāre patvāpi sahati adhivāseti. Tamevasaṅgāmasīsanti taṃyeva jayakkhandhāvāraṭṭhānaṃ. Ajjhāvasatīti sattāhamattaṃ abhibhavitvā āvasati. Kiṃ kāraṇā ? Laddhapahārānaṃ pahārajagganatthañceva katakammānaṃ visesaṃ ñatvā ṭhānantaradānatthañca issariyasukhānubhavanatthañca.
ਇਦਾਨਿ ਯਸ੍ਮਾ ਸਤ੍ਥੁ ਯੋਧਾਜੀવੇਹਿ ਕਿਚ੍ਚਂ ਨਤ੍ਥਿ, ਇਮਸ੍ਮਿਂ ਪਨ ਸਾਸਨੇ ਤਥਾਰੂਪੇ ਪਞ੍ਚ ਪੁਗ੍ਗਲੇ ਦਸ੍ਸੇਤੁਂ ਇਦਂ ਓਪਮ੍ਮਂ ਆਭਤਂ। ਤਸ੍ਮਾ ਤੇ ਪੁਗ੍ਗਲੇ ਦਸ੍ਸੇਨ੍ਤੋ ਏવਮੇવ ਖੋਤਿਆਦਿਮਾਹ। ਤਤ੍ਥ ਸਂਸੀਦਤੀਤਿ ਮਿਚ੍ਛਾવਿਤਕ੍ਕਸ੍ਮਿਂ ਸਂਸੀਦਤਿ ਅਨੁਪ੍ਪવਿਸਤਿ। ਨ ਸਕ੍ਕੋਤਿ ਬ੍ਰਹ੍ਮਚਰਿਯਂ ਸਨ੍ਧਾਰੇਤੁਨ੍ਤਿ ਬ੍ਰਹ੍ਮਚਰਿਯવਾਸਂ ਅਨੁਪਚ੍ਛਿਜ੍ਜਮਾਨਂ ਗੋਪੇਤੁਂ ਨ ਸਕ੍ਕੋਤਿ। ਸਿਕ੍ਖਾਦੁਬ੍ਬਲ੍ਯਂ ਆવਿਕਤ੍વਾਤਿ ਸਿਕ੍ਖਾਯ ਦੁਬ੍ਬਲਭਾવਂ ਪਕਾਸੇਤ੍વਾ। ਕਿਮਸ੍ਸ ਰਜਗ੍ਗਸ੍ਮਿਨ੍ਤਿ ਕਿਂ ਤਸ੍ਸ ਪੁਗ੍ਗਲਸ੍ਸ ਰਜਗ੍ਗਂ ਨਾਮਾਤਿ વਦਤਿ। ਅਭਿਰੂਪਾਤਿ ਅਭਿਰੂਪવਤੀ। ਦਸ੍ਸਨੀਯਾਤਿ ਦਸ੍ਸਨਯੋਗ੍ਗਾ। ਪਾਸਾਦਿਕਾਤਿ ਦਸ੍ਸਨੇਨੇવ ਚਿਤ੍ਤਪ੍ਪਸਾਦਾવਹਾ। ਪਰਮਾਯਾਤਿ ਉਤ੍ਤਮਾਯ। વਣ੍ਣਪੋਕ੍ਖਰਤਾਯਾਤਿ ਸਰੀਰવਣ੍ਣੇਨ ਚੇવ ਅਙ੍ਗਸਣ੍ਠਾਨੇਨ ਚ। ਊਹਸਤੀਤਿ ਅવਹਸਤਿ। ਉਲ੍ਲਪਤੀਤਿ ਕਥੇਤਿ। ਉਜ੍ਝਗ੍ਘਤੀਤਿ ਪਾਣਿਂ ਪਹਰਿਤ੍વਾ ਮਹਾਹਸਿਤਂ ਹਸਤਿ। ਉਪ੍ਪਣ੍ਡੇਤੀਤਿ ਉਪ੍ਪਣ੍ਡਨਕਥਂ ਕਥੇਤਿ। ਅਭਿਨਿਸੀਦਤੀਤਿ ਅਭਿਭવਿਤ੍વਾ ਸਨ੍ਤਿਕੇ વਾ ਏਕਾਸਨੇ વਾ ਨਿਸੀਦਤਿ। ਦੁਤਿਯਪਦੇਪਿ ਏਸੇવ ਨਯੋ। ਅਜ੍ਝੋਤ੍ਥਰਤੀਤਿ ਅવਤ੍ਥਰਤਿ। વਿਨਿવੇਠੇਤ੍વਾ વਿਨਿਮੋਚੇਤ੍વਾਤਿ ਗਹਿਤਟ੍ਠਾਨਤੋ ਤਸ੍ਸਾ ਹਤ੍ਥਂ વਿਨਿਬ੍ਬੇਠੇਤ੍વਾ ਚੇવ ਮੋਚੇਤ੍વਾ ਚ। ਸੇਸਮੇਤ੍ਥ ਉਤ੍ਤਾਨਤ੍ਥਮੇવਾਤਿ। ਇਮਸ੍ਮਿਂ ਸੁਤ੍ਤੇ વਟ੍ਟવਿવਟ੍ਟਂ ਕਥਿਤਂ।
Idāni yasmā satthu yodhājīvehi kiccaṃ natthi, imasmiṃ pana sāsane tathārūpe pañca puggale dassetuṃ idaṃ opammaṃ ābhataṃ. Tasmā te puggale dassento evameva khotiādimāha. Tattha saṃsīdatīti micchāvitakkasmiṃ saṃsīdati anuppavisati. Na sakkoti brahmacariyaṃ sandhāretunti brahmacariyavāsaṃ anupacchijjamānaṃ gopetuṃ na sakkoti. Sikkhādubbalyaṃ āvikatvāti sikkhāya dubbalabhāvaṃ pakāsetvā. Kimassa rajaggasminti kiṃ tassa puggalassa rajaggaṃ nāmāti vadati. Abhirūpāti abhirūpavatī. Dassanīyāti dassanayoggā. Pāsādikāti dassaneneva cittappasādāvahā. Paramāyāti uttamāya. Vaṇṇapokkharatāyāti sarīravaṇṇena ceva aṅgasaṇṭhānena ca. Ūhasatīti avahasati. Ullapatīti katheti. Ujjhagghatīti pāṇiṃ paharitvā mahāhasitaṃ hasati. Uppaṇḍetīti uppaṇḍanakathaṃ katheti. Abhinisīdatīti abhibhavitvā santike vā ekāsane vā nisīdati. Dutiyapadepi eseva nayo. Ajjhottharatīti avattharati. Viniveṭhetvā vinimocetvāti gahitaṭṭhānato tassā hatthaṃ vinibbeṭhetvā ceva mocetvā ca. Sesamettha uttānatthamevāti. Imasmiṃ sutte vaṭṭavivaṭṭaṃ kathitaṃ.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੫. ਪਠਮਯੋਧਾਜੀવਸੁਤ੍ਤਂ • 5. Paṭhamayodhājīvasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) / ੫. ਪਠਮਯੋਧਾਜੀવਸੁਤ੍ਤવਣ੍ਣਨਾ • 5. Paṭhamayodhājīvasuttavaṇṇanā
