| Library / Tipiṭaka / திபிடக • Tipiṭaka / படிஸம்பி⁴தா³மக்³க³பாளி • Paṭisambhidāmaggapāḷi |
1. பட²மஸுத்தந்தனித்³தே³ஸோ
1. Paṭhamasuttantaniddeso
கத²ங் து³க்க²ங் தத²ட்டே²ன ஸச்சங்? சத்தாரோ து³க்க²ஸ்ஸ து³க்க²ட்டா² ததா² அவிததா² அனஞ்ஞதா². து³க்க²ஸ்ஸ பீளனட்டோ², ஸங்க²தட்டோ², ஸந்தாபட்டோ², விபரிணாமட்டோ² – இமே சத்தாரோ து³க்க²ஸ்ஸ து³க்க²ட்டா² ததா² அவிததா² அனஞ்ஞதா². ஏவங் து³க்க²ங் தத²ட்டே²ன ஸச்சங்.
Kathaṃ dukkhaṃ tathaṭṭhena saccaṃ? Cattāro dukkhassa dukkhaṭṭhā tathā avitathā anaññathā. Dukkhassa pīḷanaṭṭho, saṅkhataṭṭho, santāpaṭṭho, vipariṇāmaṭṭho – ime cattāro dukkhassa dukkhaṭṭhā tathā avitathā anaññathā. Evaṃ dukkhaṃ tathaṭṭhena saccaṃ.
கத²ங் ஸமுத³யோ தத²ட்டே²ன ஸச்சங்? சத்தாரோ ஸமுத³யஸ்ஸ ஸமுத³யட்டா² ததா² அவிததா² அனஞ்ஞதா². ஸமுத³யஸ்ஸ ஆயூஹனட்டோ², நிதா³னட்டோ², ஸங்யோக³ட்டோ² பலிபோ³த⁴ட்டோ² – இமே சத்தாரோ ஸமுத³யஸ்ஸ ஸமுத³யட்டா² ததா² அவிததா² அனஞ்ஞதா². ஏவங் ஸமுத³யோ தத²ட்டே²ன ஸச்சங்.
Kathaṃ samudayo tathaṭṭhena saccaṃ? Cattāro samudayassa samudayaṭṭhā tathā avitathā anaññathā. Samudayassa āyūhanaṭṭho, nidānaṭṭho, saṃyogaṭṭho palibodhaṭṭho – ime cattāro samudayassa samudayaṭṭhā tathā avitathā anaññathā. Evaṃ samudayo tathaṭṭhena saccaṃ.
கத²ங் நிரோதோ⁴ தத²ட்டே²ன ஸச்சங்? சத்தாரோ நிரோத⁴ஸ்ஸ நிரோத⁴ட்டா² ததா² அவிததா² அனஞ்ஞதா². நிரோத⁴ஸ்ஸ நிஸ்ஸரணட்டோ², விவேகட்டோ², அஸங்க²தட்டோ², அமதட்டோ² – இமே சத்தாரோ நிரோத⁴ஸ்ஸ நிரோத⁴ட்டா² ததா² அவிததா² அனஞ்ஞதா². ஏவங் நிரோதோ⁴ தத²ட்டே²ன ஸச்சங்.
Kathaṃ nirodho tathaṭṭhena saccaṃ? Cattāro nirodhassa nirodhaṭṭhā tathā avitathā anaññathā. Nirodhassa nissaraṇaṭṭho, vivekaṭṭho, asaṅkhataṭṭho, amataṭṭho – ime cattāro nirodhassa nirodhaṭṭhā tathā avitathā anaññathā. Evaṃ nirodho tathaṭṭhena saccaṃ.
கத²ங் மக்³கோ³ தத²ட்டே²ன ஸச்சங்? சத்தாரோ மக்³க³ஸ்ஸ மக்³க³ட்டா² ததா² அவிததா² அனஞ்ஞதா². மக்³க³ஸ்ஸ நிய்யானட்டோ², ஹேதுட்டோ², த³ஸ்ஸனட்டோ², ஆதி⁴பதெய்யட்டோ² – இமே சத்தாரோ மக்³க³ஸ்ஸ மக்³க³ட்டா² ததா² அவிததா² அனஞ்ஞதா². ஏவங் மக்³கோ³ தத²ட்டே²ன ஸச்சங்.
Kathaṃ maggo tathaṭṭhena saccaṃ? Cattāro maggassa maggaṭṭhā tathā avitathā anaññathā. Maggassa niyyānaṭṭho, hetuṭṭho, dassanaṭṭho, ādhipateyyaṭṭho – ime cattāro maggassa maggaṭṭhā tathā avitathā anaññathā. Evaṃ maggo tathaṭṭhena saccaṃ.
9. கதிஹாகாரேஹி சத்தாரி ஸச்சானி ஏகப்படிவேதா⁴னி? சதூஹாகாரேஹி சத்தாரி ஸச்சானி ஏகப்படிவேதா⁴னி. தத²ட்டே²ன, அனத்தட்டே²ன, ஸச்சட்டே²ன, படிவேத⁴ட்டே²ன – இமேஹி சதூஹாகாரேஹி சத்தாரி ஸச்சானி ஏகஸங்க³ஹிதானி. யங் ஏகஸங்க³ஹிதங் தங் ஏகத்தங். ஏகத்தங் ஏகேன ஞாணேன படிவிஜ்ஜ²தீதி – சத்தாரி ஸச்சானி ஏகப்படிவேதா⁴னி.
9. Katihākārehi cattāri saccāni ekappaṭivedhāni? Catūhākārehi cattāri saccāni ekappaṭivedhāni. Tathaṭṭhena, anattaṭṭhena, saccaṭṭhena, paṭivedhaṭṭhena – imehi catūhākārehi cattāri saccāni ekasaṅgahitāni. Yaṃ ekasaṅgahitaṃ taṃ ekattaṃ. Ekattaṃ ekena ñāṇena paṭivijjhatīti – cattāri saccāni ekappaṭivedhāni.
கத²ங் தத²ட்டே²ன சத்தாரி ஸச்சானி ஏகப்படிவேதா⁴னி? சதூஹாகாரேஹி தத²ட்டே²ன சத்தாரி ஸச்சானி ஏகப்படிவேதா⁴னி. து³க்க²ஸ்ஸ து³க்க²ட்டோ² தத²ட்டோ², ஸமுத³யஸ்ஸ ஸமுத³யட்டோ² தத²ட்டோ², நிரோத⁴ஸ்ஸ நிரோத⁴ட்டோ² தத²ட்டோ², மக்³க³ஸ்ஸ மக்³க³ட்டோ² தத²ட்டோ² – இமேஹி சதூஹாகாரேஹி தத²ட்டே²ன சத்தாரி ஸச்சானி ஏகஸங்க³ஹிதானி. யங் ஏகஸங்க³ஹிதங் தங் ஏகத்தங். ஏகத்தங் ஏகேன ஞாணேன படிவிஜ்ஜ²தீதி – சத்தாரி ஸச்சானி ஏகப்படிவேதா⁴னி.
Kathaṃ tathaṭṭhena cattāri saccāni ekappaṭivedhāni? Catūhākārehi tathaṭṭhena cattāri saccāni ekappaṭivedhāni. Dukkhassa dukkhaṭṭho tathaṭṭho, samudayassa samudayaṭṭho tathaṭṭho, nirodhassa nirodhaṭṭho tathaṭṭho, maggassa maggaṭṭho tathaṭṭho – imehi catūhākārehi tathaṭṭhena cattāri saccāni ekasaṅgahitāni. Yaṃ ekasaṅgahitaṃ taṃ ekattaṃ. Ekattaṃ ekena ñāṇena paṭivijjhatīti – cattāri saccāni ekappaṭivedhāni.
கத²ங் அனத்தட்டே²ன சத்தாரி ஸச்சானி ஏகப்படிவேதா⁴னி? சதூஹாகாரேஹி அனத்தட்டே²ன சத்தாரி ஸச்சானி ஏகப்படிவேதா⁴னி. து³க்க²ஸ்ஸ து³க்க²ட்டோ² அனத்தட்டோ², ஸமுத³யஸ்ஸ ஸமுத³யட்டோ² அனத்தட்டோ², நிரோத⁴ஸ்ஸ நிரோத⁴ட்டோ² அனத்தட்டோ², மக்³க³ஸ்ஸ மக்³க³ட்டோ² அனத்தட்டோ² – இமேஹி சதூஹாகாரேஹி அனத்தட்டே²ன சத்தாரி ஸச்சானி ஏகஸங்க³ஹிதானி. யங் ஏகஸங்க³ஹிதங் தங் ஏகத்தங். ஏகத்தங் ஏகேன ஞாணேன படிவிஜ்ஜ²தீதி – சத்தாரி ஸச்சானி ஏகப்படிவேதா⁴னி.
Kathaṃ anattaṭṭhena cattāri saccāni ekappaṭivedhāni? Catūhākārehi anattaṭṭhena cattāri saccāni ekappaṭivedhāni. Dukkhassa dukkhaṭṭho anattaṭṭho, samudayassa samudayaṭṭho anattaṭṭho, nirodhassa nirodhaṭṭho anattaṭṭho, maggassa maggaṭṭho anattaṭṭho – imehi catūhākārehi anattaṭṭhena cattāri saccāni ekasaṅgahitāni. Yaṃ ekasaṅgahitaṃ taṃ ekattaṃ. Ekattaṃ ekena ñāṇena paṭivijjhatīti – cattāri saccāni ekappaṭivedhāni.
கத²ங் ஸச்சட்டே²ன சத்தாரி ஸச்சானி ஏகப்படிவேதா⁴னி? சதூஹாகாரேஹி ஸச்சட்டே²ன சத்தாரி ஸச்சானி ஏகப்படிவேதா⁴னி. து³க்க²ஸ்ஸ து³க்க²ட்டோ² ஸச்சட்டோ², ஸமுத³யஸ்ஸ ஸமுத³யட்டோ² ஸச்சட்டோ², நிரோத⁴ஸ்ஸ நிரோத⁴ட்டோ² ஸச்சட்டோ², மக்³க³ஸ்ஸ மக்³க³ட்டோ² ஸச்சட்டோ² – இமேஹி சதூஹாகாரேஹி ஸச்சட்டே²ன சத்தாரி ஸச்சானி ஏகஸங்க³ஹிதானி. யங் ஏகஸங்க³ஹிதங் தங் ஏகத்தங். ஏகத்தங் ஏகேன ஞாணேன படிவிஜ்ஜ²தீதி – சத்தாரி ஸச்சானி ஏகப்படிவேதா⁴னி.
Kathaṃ saccaṭṭhena cattāri saccāni ekappaṭivedhāni? Catūhākārehi saccaṭṭhena cattāri saccāni ekappaṭivedhāni. Dukkhassa dukkhaṭṭho saccaṭṭho, samudayassa samudayaṭṭho saccaṭṭho, nirodhassa nirodhaṭṭho saccaṭṭho, maggassa maggaṭṭho saccaṭṭho – imehi catūhākārehi saccaṭṭhena cattāri saccāni ekasaṅgahitāni. Yaṃ ekasaṅgahitaṃ taṃ ekattaṃ. Ekattaṃ ekena ñāṇena paṭivijjhatīti – cattāri saccāni ekappaṭivedhāni.
கத²ங் படிவேத⁴ட்டே²ன சத்தாரி ஸச்சானி ஏகப்படிவேதா⁴னி? சதூஹாகாரேஹி படிவேத⁴ட்டே²ன சத்தாரி ஸச்சானி ஏகப்படிவேதா⁴னி. து³க்க²ஸ்ஸ து³க்க²ட்டோ² படிவேத⁴ட்டோ², ஸமுத³யஸ்ஸ ஸமுத³யட்டோ² படிவேத⁴ட்டோ² நிரோத⁴ஸ்ஸ நிரோத⁴ட்டோ² படிவேத⁴ட்டோ², மக்³க³ஸ்ஸ மக்³க³ட்டோ² படிவேத⁴ட்டோ² – இமேஹி சதூஹாகாரேஹி படிவேத⁴ட்டே²ன சத்தாரி ஸச்சானி ஏகஸங்க³ஹிதானி யங் ஏகஸங்க³ஹிதங் தங் ஏகத்தங். ஏகத்தங் ஏகேன ஞாணேன படிவிஜ்ஜ²தீதி – சத்தாரி ஸச்சானி ஏகப்படிவேதா⁴னி.
Kathaṃ paṭivedhaṭṭhena cattāri saccāni ekappaṭivedhāni? Catūhākārehi paṭivedhaṭṭhena cattāri saccāni ekappaṭivedhāni. Dukkhassa dukkhaṭṭho paṭivedhaṭṭho, samudayassa samudayaṭṭho paṭivedhaṭṭho nirodhassa nirodhaṭṭho paṭivedhaṭṭho, maggassa maggaṭṭho paṭivedhaṭṭho – imehi catūhākārehi paṭivedhaṭṭhena cattāri saccāni ekasaṅgahitāni yaṃ ekasaṅgahitaṃ taṃ ekattaṃ. Ekattaṃ ekena ñāṇena paṭivijjhatīti – cattāri saccāni ekappaṭivedhāni.
10. கதிஹாகாரேஹி சத்தாரி ஸச்சானி ஏகப்படிவேதா⁴னி? யங் அனிச்சங் தங் து³க்க²ங், யங் து³க்க²ங் தங் அனிச்சங், யங் அனிச்சஞ்ச து³க்க²ஞ்ச தங் அனத்தா. யங் அனிச்சஞ்ச து³க்க²ஞ்ச அனத்தா ச தங் தத²ங். யங் அனிச்சங் ச து³க்க²ஞ்ச அனத்தா ச தத²ஞ்ச தங் ஸச்சங். யங் அனிச்சஞ்ச து³க்க²ஞ்ச அனத்தா ச தத²ஞ்ச ஸச்சஞ்ச தங் ஏகஸங்க³ஹிதங். யங் ஏகஸங்க³ஹிதங் தங் ஏகத்தங். ஏகத்தங் ஏகேன ஞாணேன படிவிஜ்ஜ²தீதி – சத்தாரி ஸச்சானி ஏகப்படிவேதா⁴னி.
10. Katihākārehi cattāri saccāni ekappaṭivedhāni? Yaṃ aniccaṃ taṃ dukkhaṃ, yaṃ dukkhaṃ taṃ aniccaṃ, yaṃ aniccañca dukkhañca taṃ anattā. Yaṃ aniccañca dukkhañca anattā ca taṃ tathaṃ. Yaṃ aniccaṃ ca dukkhañca anattā ca tathañca taṃ saccaṃ. Yaṃ aniccañca dukkhañca anattā ca tathañca saccañca taṃ ekasaṅgahitaṃ. Yaṃ ekasaṅgahitaṃ taṃ ekattaṃ. Ekattaṃ ekena ñāṇena paṭivijjhatīti – cattāri saccāni ekappaṭivedhāni.
கதிஹாகாரேஹி சத்தாரி ஸச்சானி ஏகப்படிவேதா⁴னி? நவஹாகாரேஹி சத்தாரி ஸச்சானி ஏகப்படிவேதா⁴னி. தத²ட்டே²ன, அனத்தட்டே²ன, ஸச்சட்டே²ன, படிவேத⁴ட்டே²ன, அபி⁴ஞ்ஞட்டே²ன, பரிஞ்ஞட்டே²ன, பஹானட்டே²ன, பா⁴வனட்டே²ன, ஸச்சி²கிரியட்டே²ன – இமேஹி நவஹாகாரேஹி சத்தாரி ஸச்சானி ஏகஸங்க³ஹிதானி. யங் ஏகஸங்க³ஹிதங் தங் ஏகத்தங். ஏகத்தங் ஏகேன ஞாணேன படிவிஜ்ஜ²தீதி – சத்தாரி ஸச்சானி ஏகப்படிவேதா⁴னி.
Katihākārehi cattāri saccāni ekappaṭivedhāni? Navahākārehi cattāri saccāni ekappaṭivedhāni. Tathaṭṭhena, anattaṭṭhena, saccaṭṭhena, paṭivedhaṭṭhena, abhiññaṭṭhena, pariññaṭṭhena, pahānaṭṭhena, bhāvanaṭṭhena, sacchikiriyaṭṭhena – imehi navahākārehi cattāri saccāni ekasaṅgahitāni. Yaṃ ekasaṅgahitaṃ taṃ ekattaṃ. Ekattaṃ ekena ñāṇena paṭivijjhatīti – cattāri saccāni ekappaṭivedhāni.
கத²ங் தத²ட்டே²ன சத்தாரி ஸச்சானி ஏகப்படிவேதா⁴னி? நவஹாகாரேஹி தத²ட்டே²ன சத்தாரி ஸச்சானி ஏகப்படிவேதா⁴னி. து³க்க²ஸ்ஸ து³க்க²ட்டோ² தத²ட்டோ², ஸமுத³யஸ்ஸ ஸமுத³யட்டோ² தத²ட்டோ², நிரோத⁴ஸ்ஸ நிரோத⁴ட்டோ² தத²ட்டோ², மக்³க³ஸ்ஸ மக்³க³ட்டோ² தத²ட்டோ², அபி⁴ஞ்ஞாய அபி⁴ஞ்ஞட்டோ² தத²ட்டோ², பரிஞ்ஞாய பரிஞ்ஞட்டோ² தத²ட்டோ², பஹானஸ்ஸ பஹானட்டோ² தத²ட்டோ², பா⁴வனாய பா⁴வனட்டோ² தத²ட்டோ², ஸச்சி²கிரியாய ஸச்சி²கிரியட்டோ² தத²ட்டோ² – இமேஹி நவஹாகாரேஹி தத²ட்டே²ன சத்தாரி ஸச்சானி ஏகஸங்க³ஹிதானி. யங் ஏகஸங்க³ஹிதங் தங் ஏகத்தங். ஏகத்தங் ஏகேன ஞாணேன படிவிஜ்ஜ²தீதி – சத்தாரி ஸச்சானி ஏகப்படிவேதா⁴னி.
Kathaṃ tathaṭṭhena cattāri saccāni ekappaṭivedhāni? Navahākārehi tathaṭṭhena cattāri saccāni ekappaṭivedhāni. Dukkhassa dukkhaṭṭho tathaṭṭho, samudayassa samudayaṭṭho tathaṭṭho, nirodhassa nirodhaṭṭho tathaṭṭho, maggassa maggaṭṭho tathaṭṭho, abhiññāya abhiññaṭṭho tathaṭṭho, pariññāya pariññaṭṭho tathaṭṭho, pahānassa pahānaṭṭho tathaṭṭho, bhāvanāya bhāvanaṭṭho tathaṭṭho, sacchikiriyāya sacchikiriyaṭṭho tathaṭṭho – imehi navahākārehi tathaṭṭhena cattāri saccāni ekasaṅgahitāni. Yaṃ ekasaṅgahitaṃ taṃ ekattaṃ. Ekattaṃ ekena ñāṇena paṭivijjhatīti – cattāri saccāni ekappaṭivedhāni.
கத²ங் அனத்தட்டே²ன… ஸச்சட்டே²ன… படிவேத⁴ட்டே²ன சத்தாரி ஸச்சானி ஏகப்படிவேதா⁴னி? நவஹாகாரேஹி படிவேத⁴ட்டே²ன சத்தாரி ஸச்சானி ஏகப்படிவேதா⁴னி. து³க்க²ஸ்ஸ து³க்க²ட்டோ² படிவேத⁴ட்டோ², ஸமுத³யஸ்ஸ ஸமுத³யட்டோ² படிவேத⁴ட்டோ², நிரோத⁴ஸ்ஸ நிரோத⁴ட்டோ² படிவேத⁴ட்டோ², மக்³க³ஸ்ஸ மக்³க³ட்டோ² படிவேத⁴ட்டோ², அபி⁴ஞ்ஞாய அபி⁴ஞ்ஞட்டோ² படிவேத⁴ட்டோ², பரிஞ்ஞாய பரிஞ்ஞட்டோ² படிவேத⁴ட்டோ², பஹானஸ்ஸ பஹானட்டோ² படிவேத⁴ட்டோ², பா⁴வனாய பா⁴வனட்டோ² படிவேத⁴ட்டோ², ஸச்சி²கிரியாய ஸச்சி²கிரியட்டோ² படிவேத⁴ட்டோ² – இமேஹி நவஹாகாரேஹி படிவேத⁴ட்டே²ன சத்தாரி ஸச்சானி ஏகஸங்க³ஹிதானி. யங் ஏகஸங்க³ஹிதங் தங் ஏகத்தங். ஏகத்தங் ஏகேன ஞாணேன படிவிஜ்ஜ²தீதி – சத்தாரி ஸச்சானி ஏகப்படிவேதா⁴னி.
Kathaṃ anattaṭṭhena… saccaṭṭhena… paṭivedhaṭṭhena cattāri saccāni ekappaṭivedhāni? Navahākārehi paṭivedhaṭṭhena cattāri saccāni ekappaṭivedhāni. Dukkhassa dukkhaṭṭho paṭivedhaṭṭho, samudayassa samudayaṭṭho paṭivedhaṭṭho, nirodhassa nirodhaṭṭho paṭivedhaṭṭho, maggassa maggaṭṭho paṭivedhaṭṭho, abhiññāya abhiññaṭṭho paṭivedhaṭṭho, pariññāya pariññaṭṭho paṭivedhaṭṭho, pahānassa pahānaṭṭho paṭivedhaṭṭho, bhāvanāya bhāvanaṭṭho paṭivedhaṭṭho, sacchikiriyāya sacchikiriyaṭṭho paṭivedhaṭṭho – imehi navahākārehi paṭivedhaṭṭhena cattāri saccāni ekasaṅgahitāni. Yaṃ ekasaṅgahitaṃ taṃ ekattaṃ. Ekattaṃ ekena ñāṇena paṭivijjhatīti – cattāri saccāni ekappaṭivedhāni.
11. கதிஹாகாரேஹி சத்தாரி ஸச்சானி ஏகப்படிவேதா⁴னி? த்³வாத³ஸஹி ஆகாரேஹி சத்தாரி ஸச்சானி ஏகப்படிவேதா⁴னி. தத²ட்டே²ன, அனத்தட்டே²ன, ஸச்சட்டே²ன, படிவேத⁴ட்டே²ன, அபி⁴ஜானநட்டே²ன, பரிஜானநட்டே²ன, த⁴ம்மட்டே²ன, தத²ட்டே²ன, ஞாதட்டே²ன, ஸச்சி²கிரியட்டே²ன, ப²ஸ்ஸனட்டே²ன, அபி⁴ஸமயட்டே²ன – இமேஹி த்³வாத³ஸஹி ஆகாரேஹி சத்தாரி ஸச்சானி ஏகஸங்க³ஹிதானி. யங் ஏகஸங்க³ஹிதங் தங் ஏகத்தங். ஏகத்தங் ஏகேன ஞாணேன படிவிஜ்ஜ²தீதி – சத்தாரி ஸச்சானி ஏகப்படிவேதா⁴னி.
11. Katihākārehi cattāri saccāni ekappaṭivedhāni? Dvādasahi ākārehi cattāri saccāni ekappaṭivedhāni. Tathaṭṭhena, anattaṭṭhena, saccaṭṭhena, paṭivedhaṭṭhena, abhijānanaṭṭhena, parijānanaṭṭhena, dhammaṭṭhena, tathaṭṭhena, ñātaṭṭhena, sacchikiriyaṭṭhena, phassanaṭṭhena, abhisamayaṭṭhena – imehi dvādasahi ākārehi cattāri saccāni ekasaṅgahitāni. Yaṃ ekasaṅgahitaṃ taṃ ekattaṃ. Ekattaṃ ekena ñāṇena paṭivijjhatīti – cattāri saccāni ekappaṭivedhāni.
கத²ங் தத²ட்டே²ன சத்தாரி ஸச்சானி ஏகப்படிவேதா⁴னி? ஸோளஸஹி ஆகாரேஹி தத²ட்டே²ன சத்தாரி ஸச்சானி ஏகப்படிவேதா⁴னி. து³க்க²ஸ்ஸ பீளனட்டோ², ஸங்க²தட்டோ², ஸந்தாபட்டோ², விபரிணாமட்டோ², தத²ட்டோ²; ஸமுத³யஸ்ஸ ஆயூஹனட்டோ², நிதா³னட்டோ², ஸங்யோக³ட்டோ², பலிபோ³த⁴ட்டோ² தத²ட்டோ²; நிரோத⁴ஸ்ஸ நிஸ்ஸரணட்டோ², விவேகட்டோ², அஸங்க²தட்டோ², அமதட்டோ² தத²ட்டோ²; மக்³க³ஸ்ஸ நிய்யானட்டோ², ஹேதுட்டோ², த³ஸ்ஸனட்டோ², ஆதி⁴பதெய்யட்டோ² தத²ட்டோ² – இமேஹி ஸோளஸஹி ஆகாரேஹி தத²ட்டே²ன சத்தாரி ஸச்சானி ஏகஸங்க³ஹிதானி. யங் ஏகஸங்க³ஹிதங் தங் ஏகத்தங். ஏகத்தங் ஏகேன ஞாணேன படிவிஜ்ஜ²தீதி – சத்தாரி ஸச்சானி ஏகப்படிவேதா⁴னி.
Kathaṃ tathaṭṭhena cattāri saccāni ekappaṭivedhāni? Soḷasahi ākārehi tathaṭṭhena cattāri saccāni ekappaṭivedhāni. Dukkhassa pīḷanaṭṭho, saṅkhataṭṭho, santāpaṭṭho, vipariṇāmaṭṭho, tathaṭṭho; samudayassa āyūhanaṭṭho, nidānaṭṭho, saṃyogaṭṭho, palibodhaṭṭho tathaṭṭho; nirodhassa nissaraṇaṭṭho, vivekaṭṭho, asaṅkhataṭṭho, amataṭṭho tathaṭṭho; maggassa niyyānaṭṭho, hetuṭṭho, dassanaṭṭho, ādhipateyyaṭṭho tathaṭṭho – imehi soḷasahi ākārehi tathaṭṭhena cattāri saccāni ekasaṅgahitāni. Yaṃ ekasaṅgahitaṃ taṃ ekattaṃ. Ekattaṃ ekena ñāṇena paṭivijjhatīti – cattāri saccāni ekappaṭivedhāni.
கத²ங் அனத்தட்டே²ன…பே॰… ஸச்சட்டே²ன… படிவேத⁴ட்டே²ன… அபி⁴ஜானநட்டே²ன… பரிஜானநட்டே²ன… த⁴ம்மட்டே²ன… தத²ட்டே²ன… ஞாதட்டே²ன… ஸச்சி²கிரியட்டே²ன… ப²ஸ்ஸனட்டே²ன… அபி⁴ஸமயட்டே²ன சத்தாரி ஸச்சானி ஏகப்படிவேதா⁴னி? ஸோளஸஹி ஆகாரேஹி அபி⁴ஸமயட்டே²ன சத்தாரி ஸச்சானி ஏகப்படிவேதா⁴னி. து³க்க²ஸ்ஸ பீளனட்டோ², ஸங்க²தட்டோ², ஸந்தாபட்டோ², விபரிணாமட்டோ², அபி⁴ஸமயட்டோ²; ஸமுத³யஸ்ஸ ஆயூஹனட்டோ², நிதா³னட்டோ², ஸங்யோக³ட்டோ², பலிபோ³த⁴ட்டோ², அபி⁴ஸமயட்டோ²; நிரோத⁴ஸ்ஸ நிஸ்ஸரணட்டோ² , விவேகட்டோ², அஸங்க²தட்டோ², அமதட்டோ², அபி⁴ஸமயட்டோ²; மக்³க³ஸ்ஸ நிய்யானட்டோ², ஹேதுட்டோ², த³ஸ்ஸனட்டோ², ஆதி⁴பதெய்யட்டோ², அபி⁴ஸமயட்டோ² – இமேஹி ஸோளஸஹி ஆகாரேஹி அபி⁴ஸமயட்டே²ன சத்தாரி ஸச்சானி ஏகஸங்க³ஹிதானி. யங் ஏகஸங்க³ஹிதங் தங் ஏகத்தங். ஏகத்தங் ஏகேன ஞாணேன படிவிஜ்ஜ²தீதி – சத்தாரி ஸச்சானி ஏகப்படிவேதா⁴னி.
Kathaṃ anattaṭṭhena…pe… saccaṭṭhena… paṭivedhaṭṭhena… abhijānanaṭṭhena… parijānanaṭṭhena… dhammaṭṭhena… tathaṭṭhena… ñātaṭṭhena… sacchikiriyaṭṭhena… phassanaṭṭhena… abhisamayaṭṭhena cattāri saccāni ekappaṭivedhāni? Soḷasahi ākārehi abhisamayaṭṭhena cattāri saccāni ekappaṭivedhāni. Dukkhassa pīḷanaṭṭho, saṅkhataṭṭho, santāpaṭṭho, vipariṇāmaṭṭho, abhisamayaṭṭho; samudayassa āyūhanaṭṭho, nidānaṭṭho, saṃyogaṭṭho, palibodhaṭṭho, abhisamayaṭṭho; nirodhassa nissaraṇaṭṭho , vivekaṭṭho, asaṅkhataṭṭho, amataṭṭho, abhisamayaṭṭho; maggassa niyyānaṭṭho, hetuṭṭho, dassanaṭṭho, ādhipateyyaṭṭho, abhisamayaṭṭho – imehi soḷasahi ākārehi abhisamayaṭṭhena cattāri saccāni ekasaṅgahitāni. Yaṃ ekasaṅgahitaṃ taṃ ekattaṃ. Ekattaṃ ekena ñāṇena paṭivijjhatīti – cattāri saccāni ekappaṭivedhāni.
12. ஸச்சானங் கதி லக்க²ணானி? ஸச்சானங் த்³வே லக்க²ணானி. ஸங்க²தலக்க²ணஞ்ச, அஸங்க²தலக்க²ணஞ்ச – ஸச்சானங் இமானி த்³வே லக்க²ணானி.
12. Saccānaṃ kati lakkhaṇāni? Saccānaṃ dve lakkhaṇāni. Saṅkhatalakkhaṇañca, asaṅkhatalakkhaṇañca – saccānaṃ imāni dve lakkhaṇāni.
ஸச்சானங் கதி லக்க²ணானி? ஸச்சானங் ச² லக்க²ணானி. ஸங்க²தானங் ஸச்சானங் உப்பாதோ³ பஞ்ஞாயதி, வயோ பஞ்ஞாயதி, டி²தானங் அஞ்ஞத²த்தங் பஞ்ஞாயதி அஸங்க²தஸ்ஸ ஸச்சஸ்ஸ ந உப்பாதோ³ பஞ்ஞாயதி , ந வயோ பஞ்ஞாயதி, ந டி²தஸ்ஸ அஞ்ஞத²த்தங் பஞ்ஞாயதி – ஸச்சானங் இமானி ச² லக்க²ணானி.
Saccānaṃ kati lakkhaṇāni? Saccānaṃ cha lakkhaṇāni. Saṅkhatānaṃ saccānaṃ uppādo paññāyati, vayo paññāyati, ṭhitānaṃ aññathattaṃ paññāyati asaṅkhatassa saccassa na uppādo paññāyati , na vayo paññāyati, na ṭhitassa aññathattaṃ paññāyati – saccānaṃ imāni cha lakkhaṇāni.
ஸச்சானங் கதி லக்க²ணானி? ஸச்சானங் த்³வாத³ஸ லக்க²ணானி. து³க்க²ஸச்சஸ்ஸ உப்பாதோ³ பஞ்ஞாயதி, வயோ பஞ்ஞாயதி, டி²தஸ்ஸ அஞ்ஞத²த்தங் பஞ்ஞாயதி; ஸமுத³யஸச்சஸ்ஸ உப்பாதோ³ பஞ்ஞாயதி, வயோ பஞ்ஞாயதி, டி²தஸ்ஸ அஞ்ஞத²த்தங் பஞ்ஞாயதி; மக்³க³ஸச்சஸ்ஸ உப்பாதோ³ பஞ்ஞாயதி, வயோ பஞ்ஞாயதி, டி²தஸ்ஸ அஞ்ஞத²த்தங் பஞ்ஞாயதி; நிரோத⁴ஸச்சஸ்ஸ ந உப்பாதோ³ பஞ்ஞாயதி, ந வயோ பஞ்ஞாயதி, ந டி²தஸ்ஸ அஞ்ஞத²த்தங் பஞ்ஞாயதி – ஸச்சானங் இமானி த்³வாத³ஸ லக்க²ணானி.
Saccānaṃ kati lakkhaṇāni? Saccānaṃ dvādasa lakkhaṇāni. Dukkhasaccassa uppādo paññāyati, vayo paññāyati, ṭhitassa aññathattaṃ paññāyati; samudayasaccassa uppādo paññāyati, vayo paññāyati, ṭhitassa aññathattaṃ paññāyati; maggasaccassa uppādo paññāyati, vayo paññāyati, ṭhitassa aññathattaṃ paññāyati; nirodhasaccassa na uppādo paññāyati, na vayo paññāyati, na ṭhitassa aññathattaṃ paññāyati – saccānaṃ imāni dvādasa lakkhaṇāni.
சதுன்னங் ஸச்சானங் கதி குஸலா, கதி அகுஸலா, கதி அப்³யாகதா? ஸமுத³யஸச்சங் அகுஸலங், மக்³க³ஸச்சங் குஸலங் , நிரோத⁴ஸச்சங் அப்³யாகதங். து³க்க²ஸச்சங் ஸியா குஸலங், ஸியா அகுஸலங், ஸியா அப்³யாகதங்.
Catunnaṃ saccānaṃ kati kusalā, kati akusalā, kati abyākatā? Samudayasaccaṃ akusalaṃ, maggasaccaṃ kusalaṃ , nirodhasaccaṃ abyākataṃ. Dukkhasaccaṃ siyā kusalaṃ, siyā akusalaṃ, siyā abyākataṃ.
ஸியா தீணி ஸச்சானி ஏகஸச்சேன ஸங்க³ஹிதானி, ஏகஸச்சங் தீஹி ஸச்சேஹி ஸங்க³ஹிதங்? வத்து²வஸேன பரியாயேன ஸியாதி. கத²ஞ்ச ஸியா? யங் து³க்க²ஸச்சங் அகுஸலங், ஸமுத³யஸச்சங் அகுஸலங் – ஏவங் அகுஸலட்டே²ன த்³வே ஸச்சானி ஏகஸச்சேன ஸங்க³ஹிதானி, ஏகஸச்சங் த்³வீஹி ஸச்சேஹி ஸங்க³ஹிதங். யங் து³க்க²ஸச்சங் குஸலங், மக்³க³ஸச்சங் குஸலங் – ஏவங் குஸலட்டே²ன த்³வே ஸச்சானி ஏகஸச்சேன ஸங்க³ஹிதானி , ஏகஸச்சங் த்³வீஹி ஸச்சேஹி ஸங்க³ஹிதங். யங் து³க்க²ஸச்சங் அப்³யாகதங், நிரோத⁴ஸச்சங் அப்³யாகதங் – ஏவங் அப்³யாகதட்டே²ன த்³வே ஸச்சானி ஏகஸச்சேன ஸங்க³ஹிதானி, ஏகஸச்சங் த்³வீஹி ஸச்சேஹி ஸங்க³ஹிதங். ஏவங் ஸியா தீணி ஸச்சானி ஏகஸச்சேன ஸங்க³ஹிதானி, ஏகஸச்சங் தீஹி ஸச்சேஹி ஸங்க³ஹிதங் வத்து²வஸேன பரியாயேனாதி.
Siyā tīṇi saccāni ekasaccena saṅgahitāni, ekasaccaṃ tīhi saccehi saṅgahitaṃ? Vatthuvasena pariyāyena siyāti. Kathañca siyā? Yaṃ dukkhasaccaṃ akusalaṃ, samudayasaccaṃ akusalaṃ – evaṃ akusalaṭṭhena dve saccāni ekasaccena saṅgahitāni, ekasaccaṃ dvīhi saccehi saṅgahitaṃ. Yaṃ dukkhasaccaṃ kusalaṃ, maggasaccaṃ kusalaṃ – evaṃ kusalaṭṭhena dve saccāni ekasaccena saṅgahitāni , ekasaccaṃ dvīhi saccehi saṅgahitaṃ. Yaṃ dukkhasaccaṃ abyākataṃ, nirodhasaccaṃ abyākataṃ – evaṃ abyākataṭṭhena dve saccāni ekasaccena saṅgahitāni, ekasaccaṃ dvīhi saccehi saṅgahitaṃ. Evaṃ siyā tīṇi saccāni ekasaccena saṅgahitāni, ekasaccaṃ tīhi saccehi saṅgahitaṃ vatthuvasena pariyāyenāti.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā / 1. பட²மஸுத்தந்தனித்³தே³ஸவண்ணனா • 1. Paṭhamasuttantaniddesavaṇṇanā
