| Library / Tipiṭaka / តិបិដក • Tipiṭaka / វិមានវត្ថុ-អដ្ឋកថា • Vimānavatthu-aṭṭhakathā |
១៣. បឋមសុណិសាវិមានវណ្ណនា
13. Paṭhamasuṇisāvimānavaṇṇanā
អភិក្កន្តេន វណ្ណេនាតិ សុណិសាវិមានំ។ តស្ស កា ឧប្បត្តិ? សាវត្ថិយំ អញ្ញតរស្មិំ គេហេ ឯកា កុលសុណ្ហា គេហំ បិណ្ឌាយ បវិដ្ឋំ ខីណាសវត្ថេរំ ទិស្វា សញ្ជាតបីតិសោមនស្សា ‘‘ឥទំ មយ្ហំ ឧត្តមំ បុញ្ញក្ខេត្តំ ឧបដ្ឋិត’’ន្តិ អត្តនា លទ្ធំ បូវភាគំ អាទាយ អាទរេន ថេរស្ស ឧបនេសិ, ថេរោ តំ បដិគ្គហេត្វា អនុមោទនំ កត្វា គតោ។ សា អបរភាគេ កាលំ កត្វា តាវតិំសភវនេ ឧប្បជ្ជិ។ សេសំ សព្ពំ ហេដ្ឋា វុត្តសទិសមេវ។ តេន វុត្តំ –
Abhikkantena vaṇṇenāti suṇisāvimānaṃ. Tassa kā uppatti? Sāvatthiyaṃ aññatarasmiṃ gehe ekā kulasuṇhā gehaṃ piṇḍāya paviṭṭhaṃ khīṇāsavattheraṃ disvā sañjātapītisomanassā ‘‘idaṃ mayhaṃ uttamaṃ puññakkhettaṃ upaṭṭhita’’nti attanā laddhaṃ pūvabhāgaṃ ādāya ādarena therassa upanesi, thero taṃ paṭiggahetvā anumodanaṃ katvā gato. Sā aparabhāge kālaṃ katvā tāvatiṃsabhavane uppajji. Sesaṃ sabbaṃ heṭṭhā vuttasadisameva. Tena vuttaṃ –
១០៨.
108.
‘‘អភិក្កន្តេន វណ្ណេន, យា ត្វំ តិដ្ឋសិ ទេវតេ;
‘‘Abhikkantena vaṇṇena, yā tvaṃ tiṭṭhasi devate;
ឱភាសេន្តី ទិសា សព្ពា, ឱសធី វិយ តារកា។
Obhāsentī disā sabbā, osadhī viya tārakā.
១០៩.
109.
‘‘កេន តេតាទិសោ វណ្ណោ, កេន តេ ឥធ មិជ្ឈតិ;
‘‘Kena tetādiso vaṇṇo, kena te idha mijjhati;
ឧប្បជ្ជន្តិ ច តេ ភោគា, យេ កេចិ មនសោ បិយា។
Uppajjanti ca te bhogā, ye keci manaso piyā.
១១០.
110.
‘‘បុច្ឆាមិ តំ ទេវិ មហានុភាវេ, មនុស្សភូតា កិមកាសិ បុញ្ញំ;
‘‘Pucchāmi taṃ devi mahānubhāve, manussabhūtā kimakāsi puññaṃ;
កេនាសិ ឯវំ ជលិតានុភាវា, វណ្ណោ ច តេ សព្ពទិសា បភាសតី’’តិ។
Kenāsi evaṃ jalitānubhāvā, vaṇṇo ca te sabbadisā pabhāsatī’’ti.
១១១.
111.
‘‘សា ទេវតា អត្តមនា, មោគ្គល្លានេន បុច្ឆិតា;
‘‘Sā devatā attamanā, moggallānena pucchitā;
បញ្ហំ បុដ្ឋា វិយាកាសិ, យស្ស កម្មស្សិទំ ផលំ’’។
Pañhaṃ puṭṭhā viyākāsi, yassa kammassidaṃ phalaṃ’’.
១១២.
112.
‘‘អហំ មនុស្សេសុ មនុស្សភូតា, សុណិសា អហោសិំ សសុរស្ស គេហេ។
‘‘Ahaṃ manussesu manussabhūtā, suṇisā ahosiṃ sasurassa gehe.
១១៣.
113.
‘‘អទ្ទសំ វិរជំ ភិក្ខុំ, វិប្បសន្នមនាវិលំ;
‘‘Addasaṃ virajaṃ bhikkhuṃ, vippasannamanāvilaṃ;
តស្ស អទាសហំ បូវំ, បសន្នា សេហិ បាណិភិ;
Tassa adāsahaṃ pūvaṃ, pasannā sehi pāṇibhi;
ភាគឌ្ឍភាគំ ទត្វាន, មោទាមិ នន្ទនេ វនេ។
Bhāgaḍḍhabhāgaṃ datvāna, modāmi nandane vane.
១១៤.
114.
‘‘តេន មេតាទិសោ វណ្ណោ, តេន មេ ឥធ មិជ្ឈតិ;
‘‘Tena metādiso vaṇṇo, tena me idha mijjhati;
ឧប្បជ្ជន្តិ ច មេ ភោគា, យេ កេចិ មនសោ បិយា។
Uppajjanti ca me bhogā, ye keci manaso piyā.
១១៥.
115.
‘‘អក្ខាមិ តេ ភិក្ខុ មហានុភាវ, មនុស្សភូតា យមកាសិ បុញ្ញំ;
‘‘Akkhāmi te bhikkhu mahānubhāva, manussabhūtā yamakāsi puññaṃ;
តេនម្ហិ ឯវំ ជលិតានុភាវា, វណ្ណោ ច មេ សព្ពទិសា បភាសតី’’តិ។
Tenamhi evaṃ jalitānubhāvā, vaṇṇo ca me sabbadisā pabhāsatī’’ti.
១១២. តត្ថ សុណិសាតិ បុត្តស្ស ភរិយា។ ឥត្ថិយា ហិ សាមិកស្ស បិតា ‘‘សសុរោ’’តិ វុច្ចតិ, តស្ស ច សា ‘‘សុណិសា’’តិ។ តំ សន្ធាយ ‘‘សុណិសា អហោសិំ សសុរស្ស គេហេ’’តិ។
112. Tattha suṇisāti puttassa bhariyā. Itthiyā hi sāmikassa pitā ‘‘sasuro’’ti vuccati, tassa ca sā ‘‘suṇisā’’ti. Taṃ sandhāya ‘‘suṇisā ahosiṃ sasurassa gehe’’ti.
១១៣. ភាគឌ្ឍភាគន្តិ អត្តនា លទ្ធបដិវីសតោ ឧបឌ្ឍភាគំ។ មោទាមិ នន្ទនេ វនេតិ ថេរេន នន្ទនវនេ ទិដ្ឋតាយ អាហ។ សេសំ វុត្តនយមេវ។
113.Bhāgaḍḍhabhāganti attanā laddhapaṭivīsato upaḍḍhabhāgaṃ. Modāmi nandane vaneti therena nandanavane diṭṭhatāya āha. Sesaṃ vuttanayameva.
សុណិសាវិមានវណ្ណនា និដ្ឋិតា។
Suṇisāvimānavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / វិមានវត្ថុបាឡិ • Vimānavatthupāḷi / ១៣. បឋមសុណិសាវិមានវត្ថុ • 13. Paṭhamasuṇisāvimānavatthu
