| Library / Tipiṭaka / ཏིཔིཊཀ • Tipiṭaka / ཨིཏིཝུཏྟཀ-ཨཊྛཀཐཱ • Itivuttaka-aṭṭhakathā |
༩. པཋམརཱགསུཏྟཝཎྞནཱ
9. Paṭhamarāgasuttavaṇṇanā
༦༨. ནཝམེ ཡསྶ ཀསྶཙཱིཏི ཨནིཡམིཏཝཙནཾ, ཏསྨཱ ཡསྶ ཀསྶཙི པུགྒལསྶ གཧཊྛསྶ ཝཱ པབྦཛིཏསྶ ཝཱ། རཱགོ ཨཔྤཧཱིནོཏི རཉྫནཊྛེན རཱགོ སམུཙྪེདཝསེན ན པཧཱིནོ, མགྒེན ཨནུཔྤཏྟིདྷམྨཏཾ ན ཨཱཔཱདིཏོ། དོསམོཧེསུཔི ཨེསེཝ ནཡོ། ཏཏྠ ཨཔཱཡགམནཱིཡཱ རཱགདོསམོཧཱ པཋམམགྒེན, ཨོལཱ༹རིཀཱ ཀཱམརཱགདོསཱ དུཏིཡམགྒེན, ཏེཡེཝ ཨནཝསེསཱ ཏཏིཡམགྒེན, བྷཝརཱགོ ཨཝསིཊྛམོཧོ ཙ ཙཏུཏྠམགྒེན པཧཱིཡནྟི། ཨེཝམེཏེསུ པཧཱིཡནྟེསུ ཏདེཀཊྛཏོ སབྦེཔི ཀིལེསཱ པཧཱིཡནྟེཝ། ཨེཝམེཏེ རཱགཱདཡོ ཡསྶ ཀསྶཙི བྷིཀྑུསྶ ཝཱ བྷིཀྑུནིཡཱ ཝཱ ཨུཔཱསཀསྶ ཝཱ ཨུཔཱསིཀཱཡ ཝཱ མགྒེན ཨཔྤཧཱིནཱ། བདྡྷོ མཱརསྶཱཏི ཀིལེསམཱརེན བདྡྷོཏི ཝུཙྩཏི། ཡདགྒེན ཙ ཀིལེསམཱརེན བདྡྷོ, ཏདགྒེན ཨབྷིསངྑཱརམཱརཱདཱིཧིཔི བདྡྷོཡེཝ ཧོཏི། པཊིམུཀྐསྶ མཱརཔཱསོཏི པཊིམུཀྐོ ཨསྶ ཨནེན ཨཔྤཧཱིནཀིལེསེན པུགྒལེན ཏཱཡེཝ ཨཔྤཧཱིནཀིལེསཏཱཡ མཱརཔཱསསངྑཱཏོ ཀིལེསོ ཨཏྟནོ ཙིཏྟསནྟཱནེ པཊིམུཀྐོ པཝེསིཏོ, ཏེན སཡཾ བནྡྷཱཔིཏོཏི ཨཏྠོ། ཨཐ ཝཱ པཊིམུཀྐོ ཨསྶ བྷཝེཡྻ མཱརཔཱསོ། སུཀྐཔཀྑེ ཨོམུཀྐསྶཱཏི ཨཝམུཀྐོ མོཙིཏོ ཨཔནཱིཏོ ཨསྶ། སེསཾ ཝུཏྟཝིཔརིཡཱཡེན ཝེདིཏབྦཾ།
68. Navame yassa kassacīti aniyamitavacanaṃ, tasmā yassa kassaci puggalassa gahaṭṭhassa vā pabbajitassa vā. Rāgo appahīnoti rañjanaṭṭhena rāgo samucchedavasena na pahīno, maggena anuppattidhammataṃ na āpādito. Dosamohesupi eseva nayo. Tattha apāyagamanīyā rāgadosamohā paṭhamamaggena, oḷārikā kāmarāgadosā dutiyamaggena, teyeva anavasesā tatiyamaggena, bhavarāgo avasiṭṭhamoho ca catutthamaggena pahīyanti. Evametesu pahīyantesu tadekaṭṭhato sabbepi kilesā pahīyanteva. Evamete rāgādayo yassa kassaci bhikkhussa vā bhikkhuniyā vā upāsakassa vā upāsikāya vā maggena appahīnā. Baddho mārassāti kilesamārena baddhoti vuccati. Yadaggena ca kilesamārena baddho, tadaggena abhisaṅkhāramārādīhipi baddhoyeva hoti. Paṭimukkassa mārapāsoti paṭimukko assa anena appahīnakilesena puggalena tāyeva appahīnakilesatāya mārapāsasaṅkhāto kileso attano cittasantāne paṭimukko pavesito, tena sayaṃ bandhāpitoti attho. Atha vā paṭimukko assa bhaveyya mārapāso. Sukkapakkhe omukkassāti avamukko mocito apanīto assa. Sesaṃ vuttavipariyāyena veditabbaṃ.
ཨིདྷ གཱཐཱ སུཀྐཔཀྑཝསེནེཝ ཨཱགཏཱ། ཏཏྲཱཡཾ སངྑེཔཏྠོ – ཡསྶ ཨརིཡཔུགྒལསྶ རཱགདོསཱཝིཛྫཱ ཝིརཱཛིཏཱ ཨགྒམགྒེན ནིརོདྷིཏཱ, ཏཾ བྷཱཝིཏཀཱཡསཱིལཙིཏྟཔཉྙཏཱཡ བྷཱཝིཏཏྟེསུ ཨརཧནྟེསུ ཨཉྙཏརཾ ཨབྦྷནྟརཾ ཨེཀཾ བྲཧྨབྷཱུཏཾ བྲཧྨཾ ཝཱ སེཊྛཾ ཨརཧཏྟཕལཾ པཏྟཾ། ཡཐཱ ཨཉྙེ ཁཱིཎཱསཝཱ པུབྦཱུཔནིསྶཡསམྤཏྟིསམནྣཱགཏཱ ཧུཏྭཱ ཨཱགཏཱ, ཡཐཱ ཙ ཏེ ཨནྟདྭཡརཧིཏཱཡ སཱིལསམཱདྷིཔཉྙཱཀྑནྡྷསཧགཏཱཡ མཛ྄ཛྷིམཱཡ པཊིཔདཱཡ ནིབྦཱནཾ གཏཱ ཨདྷིགཏཱ། ཡཐཱ ཝཱ ཏེ ཁནྡྷཱདཱིནཾ ཏཐལཀྑཎཾ ཡཱཐཱཝཏོ པཊིཝིཛ྄ཛྷིཾསུ, ཡཐཱ ཙ ཏེ ཏཐདྷམྨེ དུཀྑཱདཡོ ཨཝིཔརཱིཏཏོ ཨབྦྷཉྙིཾསུ, རཱུཔཱདིཀེ ཙ ཝིསཡེ ཡཐཱ ཏེ དིཊྛམཏྟཱདིཝསེནེཝ པསྶིཾསུ, ཡཐཱ ཝཱ པན ཏེ ཨཊྛ ཨནརིཡཝོཧཱརེ ཝཛྫེཏྭཱ ཨརིཡཝོཧཱརཝསེནེཝ པཝཏྟཝཱཙཱ, ཝཱཙཱནུརཱུཔཉྩ པཝཏྟཀཱཡཱ, ཀཱཡཱནུརཱུཔཉྩ པཝཏྟཝཱཙཱ, ཏཐཱ ཨཡམྤི ཨརིཡཔུགྒལོཏི ཏཐཱགཏཾ, ཙཏུསཙྩབུདྡྷཏཱཡ བུདྡྷཾ, པུགྒལཝེརཾ ཀིལེསཝེརཾ ཨཏྟཱནུཝཱདཱདིབྷཡཉྩ ཨཏིཀྐནྟནྟི ཝེརབྷཡཱཏཱིཏཾ། སབྦེསཾ ཀིལེསཱབྷིསངྑཱརཱདཱིནཾ པཧཱིནཏྟཱ སབྦཔྤཧཱཡིནཾ བུདྡྷཱདཡོ ཨརིཡཱ ཨཱཧུ ཀཐེནྟི ཀིཏྟེནྟཱིཏི།
Idha gāthā sukkapakkhavaseneva āgatā. Tatrāyaṃ saṅkhepattho – yassa ariyapuggalassa rāgadosāvijjā virājitā aggamaggena nirodhitā, taṃ bhāvitakāyasīlacittapaññatāya bhāvitattesu arahantesu aññataraṃ abbhantaraṃ ekaṃ brahmabhūtaṃ brahmaṃ vā seṭṭhaṃ arahattaphalaṃ pattaṃ. Yathā aññe khīṇāsavā pubbūpanissayasampattisamannāgatā hutvā āgatā, yathā ca te antadvayarahitāya sīlasamādhipaññākkhandhasahagatāya majjhimāya paṭipadāya nibbānaṃ gatā adhigatā. Yathā vā te khandhādīnaṃ tathalakkhaṇaṃ yāthāvato paṭivijjhiṃsu, yathā ca te tathadhamme dukkhādayo aviparītato abbhaññiṃsu, rūpādike ca visaye yathā te diṭṭhamattādivaseneva passiṃsu, yathā vā pana te aṭṭha anariyavohāre vajjetvā ariyavohāravaseneva pavattavācā, vācānurūpañca pavattakāyā, kāyānurūpañca pavattavācā, tathā ayampi ariyapuggaloti tathāgataṃ, catusaccabuddhatāya buddhaṃ, puggalaveraṃ kilesaveraṃ attānuvādādibhayañca atikkantanti verabhayātītaṃ. Sabbesaṃ kilesābhisaṅkhārādīnaṃ pahīnattā sabbappahāyinaṃ buddhādayo ariyā āhu kathenti kittentīti.
ནཝམསུཏྟཝཎྞནཱ ནིཊྛིཏཱ།
Navamasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / ཨིཏིཝུཏྟཀཔཱལི༹ • Itivuttakapāḷi / ༩. པཋམརཱགསུཏྟཾ • 9. Paṭhamarāgasuttaṃ
