| Library / Tipiṭaka / តិបិដក • Tipiṭaka / វិមានវត្ថុបាឡិ • Vimānavatthupāḷi |
១១. បឋមបតិព្ពតាវិមានវត្ថុ
11. Paṭhamapatibbatāvimānavatthu
៩៣.
93.
‘‘កោញ្ចា មយូរា ទិវិយា ច ហំសា, វគ្គុស្សរា កោកិលា សម្បតន្តិ;
‘‘Koñcā mayūrā diviyā ca haṃsā, vaggussarā kokilā sampatanti;
បុប្ផាភិកិណ្ណំ រម្មមិទំ វិមានំ, អនេកចិត្តំ នរនារិសេវិតំ 1។
Pupphābhikiṇṇaṃ rammamidaṃ vimānaṃ, anekacittaṃ naranārisevitaṃ 2.
៩៤.
94.
‘‘តត្ថច្ឆសិ ទេវិ មហានុភាវេ, ឥទ្ធី វិកុព្ពន្តិ អនេករូបា;
‘‘Tatthacchasi devi mahānubhāve, iddhī vikubbanti anekarūpā;
ឥមា ច តេ អច្ឆរាយោ សមន្តតោ, នច្ចន្តិ គាយន្តិ បមោទយន្តិ ច។
Imā ca te accharāyo samantato, naccanti gāyanti pamodayanti ca.
៩៥.
95.
‘‘ទេវិទ្ធិបត្តាសិ មហានុភាវេ, មនុស្សភូតា កិមកាសិ បុញ្ញំ;
‘‘Deviddhipattāsi mahānubhāve, manussabhūtā kimakāsi puññaṃ;
កេនាសិ ឯវំ ជលិតានុភាវា, វណ្ណោ ច តេ សព្ពទិសា បភាសតី’’តិ។
Kenāsi evaṃ jalitānubhāvā, vaṇṇo ca te sabbadisā pabhāsatī’’ti.
៩៦.
96.
សា ទេវតា អត្តមនា, មោគ្គល្លានេន បុច្ឆិតា;
Sā devatā attamanā, moggallānena pucchitā;
បញ្ហំ បុដ្ឋា វិយាកាសិ, យស្ស កម្មស្សិទំ ផលំ។
Pañhaṃ puṭṭhā viyākāsi, yassa kammassidaṃ phalaṃ.
៩៧.
97.
‘‘អហំ មនុស្សេសុ មនុស្សភូតា, បតិព្ពតានញ្ញមនា អហោសិំ;
‘‘Ahaṃ manussesu manussabhūtā, patibbatānaññamanā ahosiṃ;
មាតាវ បុត្តំ អនុរក្ខមានា, កុទ្ធាបិហំ 3 នប្ផរុសំ អវោចំ។
Mātāva puttaṃ anurakkhamānā, kuddhāpihaṃ 4 nappharusaṃ avocaṃ.
៩៨.
98.
‘‘សច្ចេ ឋិតា មោសវជ្ជំ បហាយ, ទានេ រតា សង្គហិតត្តភាវា;
‘‘Sacce ṭhitā mosavajjaṃ pahāya, dāne ratā saṅgahitattabhāvā;
អន្នញ្ច បានញ្ច បសន្នចិត្តា, សក្កច្ច ទានំ វិបុលំ អទាសិំ។
Annañca pānañca pasannacittā, sakkacca dānaṃ vipulaṃ adāsiṃ.
៩៩.
99.
‘‘តេន មេតាទិសោ វណ្ណោ, តេន មេ ឥធ មិជ្ឈតិ;
‘‘Tena metādiso vaṇṇo, tena me idha mijjhati;
ឧប្បជ្ជន្តិ ច មេ ភោគា, យេ កេចិ មនសោ បិយា។
Uppajjanti ca me bhogā, ye keci manaso piyā.
១០០.
100.
‘‘អក្ខាមិ តេ ភិក្ខុ មហានុភាវ, មនុស្សភូតា យមកាសិ បុញ្ញំ;
‘‘Akkhāmi te bhikkhu mahānubhāva, manussabhūtā yamakāsi puññaṃ;
តេនម្ហិ ឯវំ ជលិតានុភាវា, វណ្ណោ ច មេ សព្ពទិសា បភាសតី’’តិ។
Tenamhi evaṃ jalitānubhāvā, vaṇṇo ca me sabbadisā pabhāsatī’’ti.
បឋមបតិព្ពតាវិមានំ ឯកាទសមំ។
Paṭhamapatibbatāvimānaṃ ekādasamaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / វិមានវត្ថុ-អដ្ឋកថា • Vimānavatthu-aṭṭhakathā / ១១. បឋមបតិព្ពតាវិមានវណ្ណនា • 11. Paṭhamapatibbatāvimānavaṇṇanā
