| Library / Tipiṭaka / ติปิฎก • Tipiṭaka / วินยวินิจฺฉย-อุตฺตรวินิจฺฉย • Vinayavinicchaya-uttaravinicchaya |
ภิกฺขุวิภโงฺค
Bhikkhuvibhaṅgo
ปาราชิกกถา
Pārājikakathā
ปฐมปาราชิกกถา
Paṭhamapārājikakathā
๖.
6.
ติวิเธ ติลมตฺตมฺปิ, มเคฺค เสวนเจตโน;
Tividhe tilamattampi, magge sevanacetano;
องฺคชาตํ ปเวเสโนฺต, อโลฺลกาเส ปราชิโตฯ
Aṅgajātaṃ pavesento, allokāse parājito.
๗.
7.
ปเวสนํ ปวิฎฺฐํ วา, ฐิตมุทฺธรณมฺปิ วา;
Pavesanaṃ paviṭṭhaṃ vā, ṭhitamuddharaṇampi vā;
สสิโกฺข สาทิยโนฺต โส, ฐเปตฺวา กิริยํ จุโตฯ
Sasikkho sādiyanto so, ṭhapetvā kiriyaṃ cuto.
๘.
8.
สนฺถเตนงฺคชาเตน, สนฺถตํ วา อสนฺถตํ;
Santhatenaṅgajātena, santhataṃ vā asanthataṃ;
มคฺคํ ปน ปเวเสโนฺต, ตเถวาสนฺถเตน จฯ
Maggaṃ pana pavesento, tathevāsanthatena ca.
๙.
9.
อุปาทิเนฺนนุปาทิเนฺน, อนุปาทินฺนเกน วา;
Upādinnenupādinne, anupādinnakena vā;
ฆฎฺฎิเต อนุปาทิเนฺน, สเจ สาทิยเตตฺถ โสฯ
Ghaṭṭite anupādinne, sace sādiyatettha so.
๑๐.
10.
โหติ ปาราชิกเกฺขเตฺต, ปวิเฎฺฐ ตุ ปราชิโต;
Hoti pārājikakkhette, paviṭṭhe tu parājito;
เขเตฺต ถุลฺลจฺจยํ ตสฺส, ทุกฺกฎญฺจ วินิทฺทิเสฯ
Khette thullaccayaṃ tassa, dukkaṭañca viniddise.
๑๑.
11.
มเต อกฺขายิเต จาปิ, เยภุยฺยกฺขายิเตปิ จ;
Mate akkhāyite cāpi, yebhuyyakkhāyitepi ca;
เมถุนํ ปฎิเสวโนฺต, โหติ ปาราชิโก นโรฯ
Methunaṃ paṭisevanto, hoti pārājiko naro.
๑๒.
12.
เยภุยฺยกฺขายิเต จาปิ, อุปฑฺฒกฺขายิเตปิ จ;
Yebhuyyakkhāyite cāpi, upaḍḍhakkhāyitepi ca;
โหติ ถุลฺลจฺจยาปตฺติ, เสเส อาปตฺติ ทุกฺกฎํฯ
Hoti thullaccayāpatti, sese āpatti dukkaṭaṃ.
๑๓.
13.
นิมิตฺตมตฺตํ เสเสตฺวา, ขายิเตปิ สรีรเก;
Nimittamattaṃ sesetvā, khāyitepi sarīrake;
นิมิเตฺต เมถุนํ ตสฺมิํ, เสวโตปิ ปราชโยฯ
Nimitte methunaṃ tasmiṃ, sevatopi parājayo.
๑๔.
14.
อุทฺธุมาตาทิสมฺปเตฺต, สพฺพตฺถาปิ จ ทุกฺกฎํ;
Uddhumātādisampatte, sabbatthāpi ca dukkaṭaṃ;
ขายิตากฺขายิตํ นาม, สพฺพํ มตสรีรเกฯ
Khāyitākkhāyitaṃ nāma, sabbaṃ matasarīrake.
๑๕.
15.
ฉินฺทิตฺวา ปน ตเจฺฉตฺวา, นิมิตฺตุปฺปาฎิเต ปน;
Chinditvā pana tacchetvā, nimittuppāṭite pana;
วณสเงฺขปโต ตสฺมิํ, เสวํ ถุลฺลจฺจยํ ผุเสฯ
Vaṇasaṅkhepato tasmiṃ, sevaṃ thullaccayaṃ phuse.
๑๖.
16.
ตโต เมถุนราเคน, ปติตาย นิมิตฺตโต;
Tato methunarāgena, patitāya nimittato;
ตายํ อุปกฺกมนฺตสฺส, ทุกฺกฎํ มํสเปสิยํฯ
Tāyaṃ upakkamantassa, dukkaṭaṃ maṃsapesiyaṃ.
๑๗.
17.
นขปิฎฺฐิปฺปมาเณปิ, มํเส นฺหารุมฺหิ วา สติ;
Nakhapiṭṭhippamāṇepi, maṃse nhārumhi vā sati;
เมถุนํ ปฎิเสวโนฺต, ชีวมาเน ปราชิโตฯ
Methunaṃ paṭisevanto, jīvamāne parājito.
๑๘.
18.
กณฺณจฺฉิทฺทกฺขินาสาสุ, วตฺถิโกเส วเณสุ วา;
Kaṇṇacchiddakkhināsāsu, vatthikose vaṇesu vā;
องฺคชาตํ ปเวเสโนฺต, ราคา ถุลฺลจฺจยํ ผุเสฯ
Aṅgajātaṃ pavesento, rāgā thullaccayaṃ phuse.
๑๙.
19.
อวเสสสรีรสฺมิํ, อุปกจฺฉูรุกาทิสุ;
Avasesasarīrasmiṃ, upakacchūrukādisu;
วสา เมถุนราคสฺส, เสวมานสฺส ทุกฺกฎํฯ
Vasā methunarāgassa, sevamānassa dukkaṭaṃ.
๒๐.
20.
อสฺสโคมหิสาทีนํ, โอฎฺฐคทฺรภทนฺตินํ;
Assagomahisādīnaṃ, oṭṭhagadrabhadantinaṃ;
นาสาสุ วตฺถิโกเสสุ, เสวํ ถุลฺลจฺจยํ ผุเสฯ
Nāsāsu vatthikosesu, sevaṃ thullaccayaṃ phuse.
๒๑.
21.
ตถา สพฺพติรจฺฉานํ, อกฺขิกณฺณวเณสุปิ;
Tathā sabbatiracchānaṃ, akkhikaṇṇavaṇesupi;
อวเสสสรีเรสุ, เสวมานสฺส ทุกฺกฎํฯ
Avasesasarīresu, sevamānassa dukkaṭaṃ.
๒๒.
22.
เตสํ อลฺลสรีเรสุ, มตานํ เสวโต ปน;
Tesaṃ allasarīresu, matānaṃ sevato pana;
ติวิธาปิ สิยาปตฺติ, เขตฺตสฺมิํ ติวิเธ สติฯ
Tividhāpi siyāpatti, khettasmiṃ tividhe sati.
๒๓.
23.
พหิ เมถุนราเคน, นิมิตฺตํ อิตฺถิยา ปน;
Bahi methunarāgena, nimittaṃ itthiyā pana;
นิมิเตฺตน ฉุปนฺตสฺส, ตสฺส ถุลฺลจฺจยํ สิยาฯ
Nimittena chupantassa, tassa thullaccayaṃ siyā.
๒๔.
24.
กายสํสคฺคราเคน, นิมิเตฺตน มุเขน วา;
Kāyasaṃsaggarāgena, nimittena mukhena vā;
นิมิตฺตํ อิตฺถิยา ตสฺส, ฉุปโต ครุกํ สิยาฯ
Nimittaṃ itthiyā tassa, chupato garukaṃ siyā.
๒๕.
25.
ตเถโวภยราเคน, นิมิตฺตํ ปุริสสฺสปิ;
Tathevobhayarāgena, nimittaṃ purisassapi;
นิมิเตฺตน ฉุปนฺตสฺส, โหติ อาปตฺติ ทุกฺกฎํฯ
Nimittena chupantassa, hoti āpatti dukkaṭaṃ.
๒๖.
26.
นิมิเตฺตน นิมิตฺตํ ตุ, ติรจฺฉานคติตฺถิยา;
Nimittena nimittaṃ tu, tiracchānagatitthiyā;
ถุลฺลจฺจยํ ฉุปนฺตสฺส, โหติ เมถุนราคโตฯ
Thullaccayaṃ chupantassa, hoti methunarāgato.
๒๗.
27.
กายสํสคฺคราเคน, ติรจฺฉานคติตฺถิยา;
Kāyasaṃsaggarāgena, tiracchānagatitthiyā;
นิมิเตฺตน นิมิตฺตสฺส, ฉุปเน ทุกฺกฎํ มตํฯ
Nimittena nimittassa, chupane dukkaṭaṃ mataṃ.
๒๘.
28.
องฺคชาตํ ปเวเสตฺวา, ตมาวฎฺฎกเต มุเข;
Aṅgajātaṃ pavesetvā, tamāvaṭṭakate mukhe;
ตตฺถากาสคตํ กตฺวา, นีหรนฺตสฺส ทุกฺกฎํฯ
Tatthākāsagataṃ katvā, nīharantassa dukkaṭaṃ.
๒๙.
29.
ตถา จตูหิ ปเสฺสหิ, อิตฺถิยา เหฎฺฐิมตฺตลํ;
Tathā catūhi passehi, itthiyā heṭṭhimattalaṃ;
อฉุปนฺตํ ปเวเสตฺวา, นีหรนฺตสฺส ทุกฺกฎํฯ
Achupantaṃ pavesetvā, nīharantassa dukkaṭaṃ.
๓๐.
30.
อุปฺปาฎิโตฎฺฐมํเสสุ , พหิ นิกฺขนฺตเกสุ วา;
Uppāṭitoṭṭhamaṃsesu , bahi nikkhantakesu vā;
ทเนฺตสุ วายมนฺตสฺส, ตสฺส ถุลฺลจฺจยํ สิยาฯ
Dantesu vāyamantassa, tassa thullaccayaṃ siyā.
๓๑.
31.
อฎฺฐิสงฺฆฎฺฎนํ กตฺวา, มเคฺค ทุวิธราคโต;
Aṭṭhisaṅghaṭṭanaṃ katvā, magge duvidharāgato;
สุเกฺก มุเตฺตปิ วามุเตฺต, วายมนฺตสฺส ทุกฺกฎํฯ
Sukke muttepi vāmutte, vāyamantassa dukkaṭaṃ.
๓๒.
32.
อิตฺถิํ เมถุนราเคน, อาลิงฺคนฺตสฺส ทุกฺกฎํ;
Itthiṃ methunarāgena, āliṅgantassa dukkaṭaṃ;
หตฺถคฺคาหปรามาส-จุมฺพนาทีสฺวยํ นโยฯ
Hatthaggāhaparāmāsa-cumbanādīsvayaṃ nayo.
๓๓.
33.
อปเท อหโย มจฺฉา, กโปตา ทฺวิปเทปิ จ;
Apade ahayo macchā, kapotā dvipadepi ca;
โคธา จตุปฺปเท เหฎฺฐา, วตฺถุ ปาราชิกสฺสิเมฯ
Godhā catuppade heṭṭhā, vatthu pārājikassime.
๓๔.
34.
เสเวตุกามตาจิตฺตํ, มเคฺค มคฺคปฺปเวสนํ;
Sevetukāmatācittaṃ, magge maggappavesanaṃ;
อิทมงฺคทฺวยํ วุตฺตํ, ปฐมนฺติมวตฺถุโนฯ
Idamaṅgadvayaṃ vuttaṃ, paṭhamantimavatthuno.
๓๕.
35.
ทุกฺกฎํ ปฐมเสฺสว, สามนฺตมิติ วณฺณิตํ;
Dukkaṭaṃ paṭhamasseva, sāmantamiti vaṇṇitaṃ;
เสสานํ ปน ติณฺณมฺปิ, ถุลฺลจฺจยมุทีริตํฯ
Sesānaṃ pana tiṇṇampi, thullaccayamudīritaṃ.
๓๖.
36.
‘‘อนาปตฺตี’’ติ ญาตพฺพํ, อชานนฺตสฺส ภิกฺขุโน;
‘‘Anāpattī’’ti ñātabbaṃ, ajānantassa bhikkhuno;
ตเถวาสาทิยนฺตสฺส, ชานนฺตสฺสาทิกมฺมิโนฯ
Tathevāsādiyantassa, jānantassādikammino.
๓๗.
37.
วินเย อนยูปรเม ปรเม;
Vinaye anayūparame parame;
สุชนสฺส สุขานยเน นยเน;
Sujanassa sukhānayane nayane;
ปฎุ โหติ ปธานรโต น รโต;
Paṭu hoti padhānarato na rato;
อิธ โย ปน สารมเต รมเตฯ
Idha yo pana sāramate ramate.
๓๘.
38.
อิมํ หิตวิภาวนํ ภาวนํ;
Imaṃ hitavibhāvanaṃ bhāvanaṃ;
อเวทิ สุรสมฺภวํ สมฺภวํ;
Avedi surasambhavaṃ sambhavaṃ;
ส มารพฬิสาสเน สาสเน;
Sa mārabaḷisāsane sāsane;
สโม ภวตุปาลินา ปาลินาฯ
Samo bhavatupālinā pālinā.
อิติ วินยวินิจฺฉเย ปฐมปาราชิกกถา นิฎฺฐิตาฯ
Iti vinayavinicchaye paṭhamapārājikakathā niṭṭhitā.
