| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৯. পঠমপজ্জুন্নধীতুসুত্তং
9. Paṭhamapajjunnadhītusuttaṃ
৩৯. এৰং মে সুতং – একং সমযং ভগৰা ৰেসালিযং ৰিহরতি মহাৰনে কূটাগারসালাযং। অথ খো কোকনদা পজ্জুন্নস্স ধীতা অভিক্কন্তায রত্তিযা অভিক্কন্তৰণ্ণা কেৰলকপ্পং মহাৰনং ওভাসেত্ৰা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং অট্ঠাসি। একমন্তং ঠিতা খো সা দেৰতা কোকনদা পজ্জুন্নস্স ধীতা ভগৰতো সন্তিকে ইমা গাথাযো অভাসি –
39. Evaṃ me sutaṃ – ekaṃ samayaṃ bhagavā vesāliyaṃ viharati mahāvane kūṭāgārasālāyaṃ. Atha kho kokanadā pajjunnassa dhītā abhikkantāya rattiyā abhikkantavaṇṇā kevalakappaṃ mahāvanaṃ obhāsetvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhitā kho sā devatā kokanadā pajjunnassa dhītā bhagavato santike imā gāthāyo abhāsi –
‘‘ৰেসালিযং ৰনে ৰিহরন্তং, অগ্গং সত্তস্স সম্বুদ্ধং।
‘‘Vesāliyaṃ vane viharantaṃ, aggaṃ sattassa sambuddhaṃ;
কোকনদাহমস্মি অভিৰন্দে, কোকনদা পজ্জুন্নস্স ধীতা॥
Kokanadāhamasmi abhivande, kokanadā pajjunnassa dhītā.
‘‘সুতমেৰ পুরে আসি, ধম্মো চক্খুমতানুবুদ্ধো।
‘‘Sutameva pure āsi, dhammo cakkhumatānubuddho;
সাহং দানি সক্খি জানামি, মুনিনো দেসযতো সুগতস্স॥
Sāhaṃ dāni sakkhi jānāmi, munino desayato sugatassa.
‘‘যে কেচি অরিযং ধম্মং, ৰিগরহন্তা চরন্তি দুম্মেধা।
‘‘Ye keci ariyaṃ dhammaṃ, vigarahantā caranti dummedhā;
উপেন্তি রোরুৰং ঘোরং, চিররত্তং দুক্খং অনুভৰন্তি॥
Upenti roruvaṃ ghoraṃ, cirarattaṃ dukkhaṃ anubhavanti.
‘‘যে চ খো অরিযে ধম্মে, খন্তিযা উপসমেন উপেতা।
‘‘Ye ca kho ariye dhamme, khantiyā upasamena upetā;
পহায মানুসং দেহং, দেৰকায পরিপূরেস্সন্তী’’তি॥
Pahāya mānusaṃ dehaṃ, devakāya paripūressantī’’ti.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৯. পঠমপজ্জুন্নধীতুসুত্তৰণ্ণনা • 9. Paṭhamapajjunnadhītusuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৯. পঠমপজ্জুন্নধীতুসুত্তৰণ্ণনা • 9. Paṭhamapajjunnadhītusuttavaṇṇanā
