| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১০. দুতিযপজ্জুন্নধীতুসুত্তং
10. Dutiyapajjunnadhītusuttaṃ
৪০. এৰং মে সুতং – একং সমযং ভগৰা ৰেসালিযং ৰিহরতি মহাৰনে কূটাগারসালাযং। অথ খো চূল়কোকনদা 1 পজ্জুন্নস্স ধীতা অভিক্কন্তায রত্তিযা অভিক্কন্তৰণ্ণা কেৰলকপ্পং মহাৰনং ওভাসেত্ৰা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং অট্ঠাসি। একমন্তং ঠিতা খো সা দেৰতা চূল়কোকনদা পজ্জুন্নস্স ধীতা ভগৰতো সন্তিকে ইমা গাথাযো অভাসি –
40. Evaṃ me sutaṃ – ekaṃ samayaṃ bhagavā vesāliyaṃ viharati mahāvane kūṭāgārasālāyaṃ. Atha kho cūḷakokanadā 2 pajjunnassa dhītā abhikkantāya rattiyā abhikkantavaṇṇā kevalakappaṃ mahāvanaṃ obhāsetvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhitā kho sā devatā cūḷakokanadā pajjunnassa dhītā bhagavato santike imā gāthāyo abhāsi –
‘‘ইধাগমা ৰিজ্জুপভাসৰণ্ণা, কোকনদা পজ্জুন্নস্স ধীতা।
‘‘Idhāgamā vijjupabhāsavaṇṇā, kokanadā pajjunnassa dhītā;
বুদ্ধঞ্চ ধম্মঞ্চ নমস্সমানা, গাথাচিমা অত্থৰতী অভাসি॥
Buddhañca dhammañca namassamānā, gāthācimā atthavatī abhāsi.
‘‘বহুনাপি খো তং ৰিভজেয্যং, পরিযাযেন তাদিসো ধম্মো।
‘‘Bahunāpi kho taṃ vibhajeyyaṃ, pariyāyena tādiso dhammo;
সংখিত্তমত্থং 3 লপযিস্সামি, যাৰতা মে মনসা পরিযত্তং॥
Saṃkhittamatthaṃ 4 lapayissāmi, yāvatā me manasā pariyattaṃ.
‘‘পাপং ন কযিরা ৰচসা মনসা,
‘‘Pāpaṃ na kayirā vacasā manasā,
কাযেন ৰা কিঞ্চন সব্বলোকে।
Kāyena vā kiñcana sabbaloke;
কামে পহায সতিমা সম্পজানো,
Kāme pahāya satimā sampajāno,
দুক্খং ন সেৰেথ অনত্থসংহিত’’ন্তি॥
Dukkhaṃ na sevetha anatthasaṃhita’’nti.
সতুল্লপকাযিকৰগ্গো চতুত্থো।
Satullapakāyikavaggo catuttho.
তস্সুদ্দানং –
Tassuddānaṃ –
সব্ভিমচ্ছরিনা সাধু, ন সন্তুজ্ঝানসঞ্ঞিনো।
Sabbhimaccharinā sādhu, na santujjhānasaññino;
সদ্ধা সমযো সকলিকং, উভো পজ্জুন্নধীতরোতি॥
Saddhā samayo sakalikaṃ, ubho pajjunnadhītaroti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১০. দুতিযপজ্জুন্নধীতুসুত্তৰণ্ণনা • 10. Dutiyapajjunnadhītusuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১০. দুতিযপজ্জুন্নধীতুসুত্তৰণ্ণনা • 10. Dutiyapajjunnadhītusuttavaṇṇanā
