| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
८. पठमनकुहनसुत्तं
8. Paṭhamanakuhanasuttaṃ
३५. वुत्तञ्हेतं भगवता, वुत्तमरहताति मे सुतं –
35. Vuttañhetaṃ bhagavatā, vuttamarahatāti me sutaṃ –
‘‘नयिदं, भिक्खवे, ब्रह्मचरियं वुस्सति जनकुहनत्थं, न जनलपनत्थं, न लाभसक्कारसिलोकानिसंसत्थं, न ‘इति मं जनो जानातू’ति। अथ खो इदं, भिक्खवे , ब्रह्मचरियं वुस्सति संवरत्थञ्चेव पहानत्थञ्चा’’ति। एतमत्थं भगवा अवोच। तत्थेतं इति वुच्चति –
‘‘Nayidaṃ, bhikkhave, brahmacariyaṃ vussati janakuhanatthaṃ, na janalapanatthaṃ, na lābhasakkārasilokānisaṃsatthaṃ, na ‘iti maṃ jano jānātū’ti. Atha kho idaṃ, bhikkhave , brahmacariyaṃ vussati saṃvaratthañceva pahānatthañcā’’ti. Etamatthaṃ bhagavā avoca. Tatthetaṃ iti vuccati –
‘‘संवरत्थं पहानत्थं, ब्रह्मचरियं अनीतिहं।
‘‘Saṃvaratthaṃ pahānatthaṃ, brahmacariyaṃ anītihaṃ;
अदेसयि सो भगवा, निब्बानोगधगामिनं॥
Adesayi so bhagavā, nibbānogadhagāminaṃ.
ये ये तं पटिपज्जन्ति, यथा बुद्धेन देसितं।
Ye ye taṃ paṭipajjanti, yathā buddhena desitaṃ;
दुक्खस्सन्तं करिस्सन्ति, सत्थुसासनकारिनो’’ति॥
Dukkhassantaṃ karissanti, satthusāsanakārino’’ti.
अयम्पि अत्थो वुत्तो भगवता, इति मे सुतन्ति। अट्ठमं।
Ayampi attho vutto bhagavatā, iti me sutanti. Aṭṭhamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / ८. पठमनकुहनसुत्तवण्णना • 8. Paṭhamanakuhanasuttavaṇṇanā
