| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
९. दुतियनकुहनसुत्तं
9. Dutiyanakuhanasuttaṃ
३६. वुत्तञ्हेतं भगवता, वुत्तमरहताति मे सुतं –
36. Vuttañhetaṃ bhagavatā, vuttamarahatāti me sutaṃ –
‘‘नयिदं, भिक्खवे, ब्रह्मचरियं वुस्सति जनकुहनत्थं, न जनलपनत्थं, न लाभसक्कारसिलोकानिसंसत्थं, न ‘इति मं जनो जानातू’ति। अथ खो इदं, भिक्खवे, ब्रह्मचरियं वुस्सति अभिञ्ञत्थञ्चेव परिञ्ञत्थञ्चा’’ति। एतमत्थं भगवा अवोच। तत्थेतं इति वुच्चति –
‘‘Nayidaṃ, bhikkhave, brahmacariyaṃ vussati janakuhanatthaṃ, na janalapanatthaṃ, na lābhasakkārasilokānisaṃsatthaṃ, na ‘iti maṃ jano jānātū’ti. Atha kho idaṃ, bhikkhave, brahmacariyaṃ vussati abhiññatthañceva pariññatthañcā’’ti. Etamatthaṃ bhagavā avoca. Tatthetaṃ iti vuccati –
‘‘अभिञ्ञत्थं परिञ्ञत्थं, ब्रह्मचरियं अनीतिहं।
‘‘Abhiññatthaṃ pariññatthaṃ, brahmacariyaṃ anītihaṃ;
अदेसयि सो भगवा, निब्बानोगधगामिनं॥
Adesayi so bhagavā, nibbānogadhagāminaṃ.
‘‘एस मग्गो महत्तेहि, अनुयातो महेसिभि।
‘‘Esa maggo mahattehi, anuyāto mahesibhi;
ये ये तं पटिपज्जन्ति, यथा बुद्धेन देसितं।
Ye ye taṃ paṭipajjanti, yathā buddhena desitaṃ;
दुक्खस्सन्तं करिस्सन्ति, सत्थुसासनकारिनो’’ति॥
Dukkhassantaṃ karissanti, satthusāsanakārino’’ti.
अयम्पि अत्थो वुत्तो भगवता, इति मे सुतन्ति। नवमं।
Ayampi attho vutto bhagavatā, iti me sutanti. Navamaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / ९. दुतियनकुहनसुत्तवण्णना • 9. Dutiyanakuhanasuttavaṇṇanā
