| Library / Tipiṭaka / तिपिटक • Tipiṭaka / संयुत्तनिकाय (टीका) • Saṃyuttanikāya (ṭīkā) |
७. पठमगेलञ्ञसुत्तवण्णना
7. Paṭhamagelaññasuttavaṇṇanā
२५५. सद्दहित्वा गिलाने उपट्ठातब्बे मञ्ञिस्सन्तीति योजना। तत्थाति तस्मिं ठाने। कम्मट्ठानानुयोगो सप्पायो येसं ते कम्मट्ठानसप्पाया, सतिपट्ठानरताति अत्थो। अनिच्चतं अनुपस्सन्तोति कायं पटिच्च उप्पन्नाय वेदनाय च अनिच्चतं अनुपस्सन्तो। वयं अनुपस्सन्तोतिआदीसुपि एसेव नयो। वयन्ति पन ताय एव खयसङ्खातं। विरागन्ति विरज्जनं। पटिनिस्सग्गन्ति परिच्चागपटिनिस्सग्गं, पक्खन्दनपटिनिस्सग्गम्पि वा।
255. Saddahitvā gilāne upaṭṭhātabbe maññissantīti yojanā. Tatthāti tasmiṃ ṭhāne. Kammaṭṭhānānuyogo sappāyo yesaṃ te kammaṭṭhānasappāyā, satipaṭṭhānaratāti attho. Aniccataṃ anupassantoti kāyaṃ paṭicca uppannāya vedanāya ca aniccataṃ anupassanto. Vayaṃ anupassantotiādīsupi eseva nayo. Vayanti pana tāya eva khayasaṅkhātaṃ. Virāganti virajjanaṃ. Paṭinissagganti pariccāgapaṭinissaggaṃ, pakkhandanapaṭinissaggampi vā.
आगमनीयपटिपदाति अरियमग्गस्स आगमनट्ठानिया पुब्बभागपटिपदा। पुब्बभागायेव न लोकुत्तरा। सम्पजञ्ञं पुब्बभागियमेव। तिस्सो अनुपस्सना पुब्बभागायेव विपस्सनापरियापन्नत्ता । मिस्सकाति लोकियलोकुत्तरमिस्सका। भावनाकालो दस्सितो ‘‘निरोधानुपस्सिनो विहरतो, पटिनिस्सग्गानुपस्सिनो विहरतो रागानुसयो पहीयती’’ति वुत्तत्ता।
Āgamanīyapaṭipadāti ariyamaggassa āgamanaṭṭhāniyā pubbabhāgapaṭipadā. Pubbabhāgāyeva na lokuttarā. Sampajaññaṃ pubbabhāgiyameva. Tisso anupassanā pubbabhāgāyeva vipassanāpariyāpannattā . Missakāti lokiyalokuttaramissakā. Bhāvanākālo dassito ‘‘nirodhānupassino viharato, paṭinissaggānupassino viharato rāgānusayo pahīyatī’’ti vuttattā.
पठमगेलञ्ञसुत्तवण्णना निट्ठिता।
Paṭhamagelaññasuttavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / संयुत्तनिकाय • Saṃyuttanikāya / ७. पठमगेलञ्ञसुत्तं • 7. Paṭhamagelaññasuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / ७. पठमगेलञ्ञसुत्तवण्णना • 7. Paṭhamagelaññasuttavaṇṇanā
