| Library / Tipiṭaka / तिपिटक • Tipiṭaka / संयुत्तनिकाय (अट्ठकथा) • Saṃyuttanikāya (aṭṭhakathā) |
७. पठमगेलञ्ञसुत्तवण्णना
7. Paṭhamagelaññasuttavaṇṇanā
२५५. सत्तमे येन गिलानसाला तेनुपसङ्कमीति ‘‘सदेवके लोके अग्गपुग्गलो तथागतोपि गिलानुपट्ठानं गच्छति, उपट्ठातब्बयुत्तका नाम गिलानाति भिक्खू सद्दहित्वा ओकप्पेत्वा गिलाने उपट्ठातब्बे मञ्ञिस्सन्ती’’ति च ‘‘ये तत्थ कम्मट्ठानसप्पाया, तेसं कम्मट्ठानं कथेस्सामी’’ति च चिन्तेत्वा उपसङ्कमि। काये कायानुपस्सीतिआदीसु यं वत्तब्बं, तं परतो वक्खाम। अनिच्चानुपस्सीति अनिच्चतं अनुपस्सन्तो। वयानुपस्सीति वयं अनुपस्सन्तो। विरागानुपस्सीति विरागं अनुपस्सन्तो। निरोधानुपस्सीति निरोधं अनुपस्सन्तो। पटिनिस्सग्गानुपस्सीति पटिनिस्सग्गं अनुपस्सन्तो।
255. Sattame yena gilānasālā tenupasaṅkamīti ‘‘sadevake loke aggapuggalo tathāgatopi gilānupaṭṭhānaṃ gacchati, upaṭṭhātabbayuttakā nāma gilānāti bhikkhū saddahitvā okappetvā gilāne upaṭṭhātabbe maññissantī’’ti ca ‘‘ye tattha kammaṭṭhānasappāyā, tesaṃ kammaṭṭhānaṃ kathessāmī’’ti ca cintetvā upasaṅkami. Kāye kāyānupassītiādīsu yaṃ vattabbaṃ, taṃ parato vakkhāma. Aniccānupassīti aniccataṃ anupassanto. Vayānupassīti vayaṃ anupassanto. Virāgānupassīti virāgaṃ anupassanto. Nirodhānupassīti nirodhaṃ anupassanto. Paṭinissaggānupassīti paṭinissaggaṃ anupassanto.
एत्तावता किं दस्सितं होति? इमस्स भिक्खुनो आगमनीयपटिपदा, सतिपट्ठानापि हि पुब्बभागायेव, सम्पजञ्ञेपि अनिच्चानुपस्सना वयानुपस्सना विरागानुपस्सनाति च इमापि तिस्सो अनुपस्सना पुब्बभागायेव, निरोधानुपस्सनापि पटिनिस्सग्गानुपस्सनापि इमा द्वे मिस्सका। एत्तावता इमस्स भिक्खुनो भावनाकालो दस्सितोति। सेसं वुत्तनयमेव।
Ettāvatā kiṃ dassitaṃ hoti? Imassa bhikkhuno āgamanīyapaṭipadā, satipaṭṭhānāpi hi pubbabhāgāyeva, sampajaññepi aniccānupassanā vayānupassanā virāgānupassanāti ca imāpi tisso anupassanā pubbabhāgāyeva, nirodhānupassanāpi paṭinissaggānupassanāpi imā dve missakā. Ettāvatā imassa bhikkhuno bhāvanākālo dassitoti. Sesaṃ vuttanayameva.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / संयुत्तनिकाय • Saṃyuttanikāya / ७. पठमगेलञ्ञसुत्तं • 7. Paṭhamagelaññasuttaṃ
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / ७. पठमगेलञ्ञसुत्तवण्णना • 7. Paṭhamagelaññasuttavaṇṇanā
