| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၉. ပဌမဒ္ဝယသုတ္တံ
9. Paṭhamadvayasuttaṃ
၉၂. ‘‘ဒ္ဝယံ ဝော, ဘိက္ခဝေ, ဒေသေသ္သာမိ။ တံ သုဏာထ။ ကိဉ္စ, ဘိက္ခဝေ, ဒ္ဝယံ? စက္ခုဉ္စေဝ ရူပာ စ, သောတဉ္စေဝ သဒ္ဒာ စ, ဃာနဉ္စေဝ ဂန္ဓာ စ, ဇိဝ္ဟာ စေဝ ရသာ စ, ကာယော စေဝ ဖောဋ္ဌဗ္ဗာ စ , မနော စေဝ ဓမ္မာ စ – ဣဒံ ဝုစ္စတိ, ဘိက္ခဝေ, ဒ္ဝယံ။
92. ‘‘Dvayaṃ vo, bhikkhave, desessāmi. Taṃ suṇātha. Kiñca, bhikkhave, dvayaṃ? Cakkhuñceva rūpā ca, sotañceva saddā ca, ghānañceva gandhā ca, jivhā ceva rasā ca, kāyo ceva phoṭṭhabbā ca , mano ceva dhammā ca – idaṃ vuccati, bhikkhave, dvayaṃ.
‘‘ယော, ဘိက္ခဝေ, ဧဝံ ဝဒေယ္ယ – ‘အဟမေတံ ဒ္ဝယံ ပစ္စက္ခာယ အညံ ဒ္ဝယံ ပညပေသ္သာမီ’တိ, တသ္သ ဝာစာဝတ္ထုကမေဝသ္သ။ ပုဋ္ဌော စ န သမ္ပာယေယ္ယ။ ဥတ္တရိဉ္စ ဝိဃာတံ အာပဇ္ဇေယ္ယ။ တံ ကိသ္သ ဟေတု? ယထာ တံ, ဘိက္ခဝေ, အဝိသယသ္မိ’’န္တိ။ နဝမံ။
‘‘Yo, bhikkhave, evaṃ vadeyya – ‘ahametaṃ dvayaṃ paccakkhāya aññaṃ dvayaṃ paññapessāmī’ti, tassa vācāvatthukamevassa. Puṭṭho ca na sampāyeyya. Uttariñca vighātaṃ āpajjeyya. Taṃ kissa hetu? Yathā taṃ, bhikkhave, avisayasmi’’nti. Navamaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၉-၁၀. ပဌမဒ္ဝယသုတ္တာဒိဝဏ္ဏနာ • 9-10. Paṭhamadvayasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၉-၁၀. ပဌမဒ္ဝယသုတ္တာဒိဝဏ္ဏနာ • 9-10. Paṭhamadvayasuttādivaṇṇanā
